Read bassa IZIKƐL 30 Bible Online

IZIKƐL 30 - bassa bible

IZIKƐL 30

¹Nazhɛ AGWANGWAMA dumananɛ n-ndumwa ne mi, bɛɛ hiɛŋ,

²Ɛ-yɛu bụtụ, duma tigesere maa, AGWANGWAMA Mokondo hiɛŋ, Ugana maa hiɛŋ, Ụjita wa adangboo we ci ba!

³Ụjita ata gwumwongonu, ubwa shɛ ụjita na AGWANGWAMA zhɛ a nda iyi, ụjita ata zhɛ wa shana edenji ụjita tizhuuŋ gana odomu keeni aka ufwu tɛnda.

⁴Utokwobi zhɛ wa sukakana Ijipti, ụngwụ-tuhwuga ụ'wụtụ zhɛ wa shɛnda ni Itiopia. Ɛ zhɛ a kwụna atwa ofwugwo ni Ijipti, ɛ zhɛ a lashɛga u'una ata o sugo i'wɛŋnɛ ibwɛ wa sha ya osombo. Ɛ zhɛ a bwada ukoshilo ubwa.

⁵Ujasa ata zhɛ wa kwụna atwa Itiopia, ti Lidia, ti Libia, ta Arabia, tu Kub hwɛɛ, ta atwa na namɛ na ashashɛ atwa mi ɛ zhɛ a 'waŋ na atwa Ijipti.

⁶AGWANGWAMA Mokondo hiɛŋ, Te kwune ni Migdol na namɛ tuzuba uuwa i ci Aswan na namɛ tuta, atwa elele na o mbiyono Ijipti hwɛɛ zhɛ o 'wo nu ujasa ata. Ejeshi atwa Ijipti a na a busa iwɛ ukpahiŋ wa aba, ɛ zhɛ o 'wo. Gamba AGWANGWAMA Mokondo N dumwa.

⁷Cɛnjɛ ta ata ti zhɛ ta sha shisombo na ashashɛ cɛnjɛ cɛnjɛ tu na tɛ shɛ shisombo, ashɛpwụ ubwa zhɛ a nama na ashashɛ ashɛpwụ na hwuŋzwotongwu hwɛɛ.

⁸Aka na Ngee sepi Ijipti ulwa, nazhɛ atwa na go mbiyono uŋ hwɛɛ zhɛ o 'wo, nazhɛ ɛɛ zhɛ a mapa maa Gamba n shɛ AGWANGWAMA.

⁹Aka na ụjita ata ci hwuŋ, aa njɛ ga Ijipti ufwu, N zhɛ ma tumwana atumwa mi a na vwengenji nu usumwa[91] maa e zhe o holono atwa Itiopia[92] a na ge te heŋshi shi yebe iwɛ gɛnɛ ɛtɛ, inyɛsɛ kaa zhɛ ya sha aŋ. Ụjita ata kaa we ci ba gom!

¹⁰AGWANGWAMA Mokondo hiɛŋ, Tedure na agwuma Babulon gɛ Nɛbukadnɛza Ngɛɛ zhɛ mo hwuwo uduciya[93] wa atwa Ijipti.

¹¹Bi zhɛ ba zhajɛ ne ejeshi ata ubwa abwagara maa e tefwuleji cɛnjɛ ta ata. Ɛ zhɛ a sukakana Ijipti no otokwobi, ibɛ po n'wo mi zhɛ ma bala na cɛnjɛ ta ata.

¹²N zhɛ ma hwuŋcɛnga Urefu Nayɛl ma shapa Ijipti ma pana atwa ci'nyɛ, agaiŋ zhɛ o hwuŋzotongo u'una ata hwɛɛ. Gamba AGWANGWAMA N dumwa.

¹³AGWANGWAMA Mokondo hiɛŋ, N zhɛ mo iricingo ntatanuwaŋ keeni azhɛba ata namɛ ni Mɛmfis. I zasa uhiu we elele zhɛ wa nama ya maa untangana Ijipti o, N zhɛ mo zwono atwa ata inyɛsɛ hwɛɛ aba.

¹⁴N zhɛ ma nda Patros osombo, ma sapa ụshɛpwụ ata ɛɛ hiɛŋ, Zoan ulwa. N zhɛ ma pana ụshɛpwụ ata ụ shɛ uhiu Tɛbɛs ulwapɛ.

¹⁵N zhɛ ma nda maa Pɛlusium ata shɛ ijilɛni Ijipti ɛtɛ 'yajɛ ukpahiŋ hwụjɛ-ụngwụ ni isɛbwɛ mi. N zhɛ ma nda uduciya Tɛbɛs ufwu.

¹⁶N zhɛ ma sapa Ijipti ulwa, Pɛlusium zhɛ wa nama nụ ụngwụ-tuhwuga. Uba Tɛbɛs zhɛ wo hwuŋzwo, meni mi zhɛ mo sugo uŋ.[94]

¹⁷Esemberi ashɛpwụ Hɛliopolis keeni Bubastis zhɛ o 'wo nu ujasa ata, ɛɛ zhɛ a ima atwa vwɛ aba a sha ajama.

¹⁸Aka na Ngee bweji ukpahiŋ Ijipti, Ngaa kwunanjɛ ikɛnyi ɛtɛ ya aba aa busa iwɛ ibɛ, tishi ti zhɛ ta layanɛ atwa Tapanhis. Udomu zhɛ wo ubo du Ijipti, ibɛ po ɛɛ zhɛ a ima atwa ashɛpwụ ubwa a sha ajama.

¹⁹Aka na Ngee peni Ijipti ulwapɛ gana ga, nazhɛ ɛɛ zhɛ a mapa maa Gamba n shɛ AGWANGWAMA.

²⁰Aka na atu ulwa shiywa umpwa-nu-boo-ko nu upiana uko ni ijitɛ icenje na ti'ima, nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²¹Ɛ-yɛu bụtụ, N bwodwo ụragbamụ Faro agwuma Ijipti. I zasa bụtụ be elele zhɛ bo umpo bu uŋ okwo kaa zhɛ ba ta bụ idɛgwɛ iwɛ maa u zhɛmananɛ maa u 'yaga ikɛnyi maa untangana utokwobi sasana o.

²²Iwɛbɛ po Ngaa jɛmɛ Gamba AGWANGWAMA Mokondo, Ngɛɛ hiɛŋ, N shɛ bụtụ bi i'ime Faro agwuma Ijipti, N zhɛ mo dwotwogonu aragbamụ ubwa tu una ata ga kwuswawa hwɛɛ, tu una ata ta vwɛ, nazhɛ utokwobi zhɛ wa banangana bụ ni i'ɛlɛ.

²³N zhɛ ma garataga atwa Ijipti mo tulogono aŋ swoswoswo na cɛnjɛ tu unyizo hwɛɛ.

²⁴Nazhɛ Ngɛɛ zhɛ ma nda maa aragbamụ agwuma Babulon 'yaga ikɛnyi, ibɛ Ngɛɛ zhɛ mo utogono bu utokwobi mu ni i'ɛlɛ. Ama tuba N zhɛ ma bwarataga aragbamụ Faro agwuma Ijipti, bi zhɛ no ngwulo uuwa bo 'wo no ofwo atwa i'ime ibwɛ.

²⁵N zhɛ mo lwogwocongo aragbamụ Faro, maa ma pana tuba agwuma Babulon ukpahiŋ. Aka na Ngee peni bu utokwobi mu bee shepi uŋ bee sekeni geri bi Ijipti, nazhɛ bụtụ be elele zhɛ ba mapa maa Gamba n shɛ AGWANGWAMA.

²⁶N zhɛ ma garataga atwa Ijipti mo tulogono aŋ swoswoswo na cɛnjɛ tu unyizo hwɛɛ. Nazhɛ ɛɛ zhɛ a mapa maa Gamba n shɛ AGWANGWAMA.