Read bassa IZIKƐL 34 Bible Online

IZIKƐL 34 - bassa bible

IZIKƐL 34

¹Nazhɛ AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, dumangana a'iywa Isrɛl tigesere tu na ti zhɛ ta wumana aŋ. Dumangana aŋ tigesere, mbiso aŋ maa, Gamba na n shɛ AGWANGWAMA Mokondo, N hiɛŋ, Ahiɛba a'iywa Isrɛl, hi zhɛ hia nda hwuŋ adangboo iwɛnɛ ahi mama biga kiri! Shɛ a'iywa suu ga shɛ a na biga iyi ya aba mabiga?

³Hia swa mosubo mi iyimabiga, ohio urogono tugwuno tu na aa njɛ ne tihiŋzhe ta agwụdụ, ahia kwụna agwụdụ na nyemenji ahia ya; ama hi peni shi kaa agwụdụ iyimɛyɛ o.

⁴Hi 'wa sụ iwɛ anaa na mama zasa o, hiɛ nɛnjɛ shɛ kaa anaa na a gwuma o, maa hi no umpo anaa na aa gwụcanjɛ andala aba o, hi dwelekeci shi kaa anaa na 'inɛ maa hi gwuricinje aŋ o. Ama manyarɛ kiri ɛhiɛ bwɛjɛ aŋ.

⁵Ibɛ po agwụdụ garatagwụ, iwɛnɛ ta a zasa bi'iywa, ibɛ du po usunda ehilo 'imɛ oko aa yɛ.

⁶Ibɛ po agwụdụ mi garatagwụ nu nshama keeni tikpekwu tu na ti zeteji. Oo mburusonu na cɛnjɛ tu unyizo kpasaa, i zasa bụtụ be elele beni urungo maa dwalakacɛ aŋ o.

⁷Iwɛ ecilo ata, ahiɛba a'iywa-agwụdụ, hwulaga ma n-ndumwa mu na Ngaa jɛmɛ Gamba AGWANGWAMA, N hiɛŋ,

⁸Gana na tu Ngaa shɛ buumwa, i debeji maa hi n shɛlagana. Usunda ehilo sukakanɛ agwụdụ mi, waa kwụnɛ aŋ waa yɛ, iwɛnɛ ta a'iywa zasaba. A'iywa mi beni shi urungo maa a dwalakacɛ agwụdụ mi na 'inɛ o. Ama A'iywa aba mama biga, a bɛjɛ shɛ agwụdụ mi o.

⁹Iwɛ ecilo ata ahiɛba a'iywa ga agwụdụ, shɛlaga ma n-ndumwa mi mi.

¹⁰Gamba AGWANGWAMA Mokondo, N jɛmɛ, Ngɛɛ hiɛŋ, N shɛ bụtụ hiŋ bi i'ime. N zhɛ ma lashɛga agwụdụ mi ni i'ɛlɛ hiŋ. N zha shɛ mo lono maa hiɛ shɛ ya a'iywa aba kwukwuŋ. N zha shɛ du kaa mo lono maa hi na mama biga ya o. N zhɛ mo bicingo agwụdụ mi ni i'ɛlɛ hiŋ iwɛ maa kede hi na ya aŋ ya o.

¹¹Mo hi mbiso maa, Gamba AGWANGWAMA Mokondo, Gamba ni ikɛnyi mi N zhɛ ma dwalakaka agwụdụ mi, mu na ngbaraka aŋ.

¹²Gana na ta bi'iywa-ba-agwụdụ ba dwalakacɛ agwụdụ ubwa na[104] garatagwụ; gana ata du Ngɛɛ zhɛ ma dwalakacɛ agwụdụ mi. N zhɛ ma bwajɛ aŋ no olugwo elele na aa ga garatagwụ maa me gwuricinje aŋ nụ ụjita ata tishi keeni odomu namɛ.

¹³N zhɛ ma bwajɛ aŋ na a'una ata ee ge zwegeni hwɛɛ, to olugwo edenji ata, maa mo sotulonu aŋ urubwo uko maa me jicinje aŋ na cɛnjɛ ta aba. N zhɛ mo hwulono aŋ umbe nu nshama keeni ohwulwo Isrɛl maa ma pana aŋ iyimɛyɛ. N zhɛ mo sugonono aŋ no ofwo na ga shɛwa la ofwo aba tiyaga na cɛnjɛ ta aba.

¹⁴N zhɛ ma pana aŋ iyimɛyɛ no ofwo na ambɛ tiyaga zhɛmɛ tebiye. Nu nshama ma ata mi Isrɛl mi zeteji ibɛ unyama ata iyimabiga zhɛ wa nama. Ɛ zhɛ o wotogo na cɛnjɛ ta ata tɛ zhɛmɛ tiyaga, ɛɛ zhɛ na ya ambɛ ata sebi tebiye ni ishɛmɛ ɛtɛ Isrɛl.

¹⁵Gamba ni ikɛnyi mi N zhɛ ma sha bi'iywa-ba-agwụdụ mi, N zhɛ ma jalakana aŋ ofwo ụhinjanụ tuta. Gamba AGWANGWAMA Mokondo N dumwa.

¹⁶N zhɛ ma dwalakaka anaa na 'inɛ, maa me gwuricinje anaa na ee ge gereteji, maa mo umpo anaa na aa ga gwụcanjɛ andala aba, maa ma nɛnga anaa na a gwumanga. Ama anaa na nyemenji a na 'yajɛ ukpahiŋ, aba Ngɛɛ zhɛ ma nda ufwu.[105] Gamba kaa N shɛ bi'iywa-ba-agwụdụ na ba nda iyi ne tishiriri.

¹⁷Ahiɛba iyimabiga mi, Gamba AGWANGWAMA Mokondo mo hi mbiso maa, N zhɛ ma duma ụshɛrɛya hiŋ, N zhɛ mo bogwu agwụdụ ebiye na a na awɛ, N zhɛ mo bogwu adagba ne epi.

¹⁸Okwo tu meseyi hiŋ uko wa ya ambɛ na ngezeni nụ ụzhɛ hwɛɛ, e shiji shi kaa o, iwɛnɛ to ohio rukoto ambɛ na ahiɛ ta yɛ shɛ! Ahia swa kaa meni mu tụrụmbɛɛ ama hio vwundoko kaa mu na ata mu vwɛ ni vwunɛ hiŋ!

¹⁹Ibɛ po agwụdụ mi na ta vwɛ a ya ya ambɛ na ehi rikeci, aa swa meni mu na ehi vwundeci ni ivwunɛ hiŋ.

²⁰Iwɛbɛ po Ngaa jɛmɛ, Gamba AGWANGWAMA Mokondo, Ngɛɛ hiɛŋ, N zhɛ ma duma ụshɛrɛya hiŋ, ahiɛba agwụdụ na nyemenji na anaa 'nyanganɛ.

²¹Hio shishongono agwụdụ na a gwụmanga, ahia ta aŋ mahiuaŋ, iwɛbɛ po aa garatagwụ ee beni nu unyama iyimabiga.

²²Ama N zhɛ mo bicingo iyimabiga mi, N zha shɛ mo lono maa a shɛ ya iyimɛyɛ o. N zhɛ ma duma ụshɛrɛya wa agwụdụ mi, maa mo bogwu a na ebiye na a na awɛ.

²³N zhɛ ma pana aŋ yɛu mi ugondu ge Devid maa sha bi'iywa ba aba bu ko gba, ubwa zhɛ na pana aŋ iyimɛyɛ, bɛɛ zhɛ ba ngbaraka aŋ, bɛɛ zhɛ na pana aŋ iyimɛyɛ.

²⁴Gamba AGWANGWAMA N zhɛ ma sha Agwatana aba, yɛu mi ugondu ge Devid ubwa zhɛ ba sha uhiu wa ba, Gamba AGWANGWAMA N dumwa.

²⁵N zhɛ ma twa-unu wa amɛ-olom na aba. N zhɛ ma bacɛnga isundɛ ehilo ye elele nɛ namɛ na cɛnjɛ ta ata, iwɛ maa iyimabiga nama suu ne ehilo, iwɛ maa e eri buweci na awapa lapiya.

²⁶N zhɛ ma nda maa a nama tutu rungwutwonu ishɛmɛ mi tijilo[106] maa ma pana aŋ uwebiye. N zhɛ ma pana aŋ uwebiye ye eshilo apata na aka na teni cɛŋ. Uwebiye ye eshilo zhɛ ya nama apata.

²⁷I'wɛ'wɛ zhɛ na 'wala tụ'walụ, iyimɛyɛ ye ehilo zhɛ na mata tebiye. Bụtụ be elele zhɛ ba nama suu na cɛnjɛ tu bwa. Aka na Ngee jeji hwuŋ uhwohwo u tijama na oo to atwa mi ne embi, Ngɛɛ bɛcinjɛ aŋ na tijama ta aba, nazhɛ ɛɛ zhɛ a mapa maa Gamba n shɛ AGWANGWAMA.

²⁸Nazhɛ aa zha shɛ a sha ya iyimɛyɛ ye edenji, isundɛ ehilo du kaa zha shɛ ya ya aŋ ya o. Ɛ zhɛ a nama suu na cɛnjɛ ta ata, i zasa iyi elele nɛ zhɛ yo zwono aŋ ya inyɛsɛ o.

²⁹N zhɛ ma pana aŋ ntuma mu na mu ta 'yajɛ ugwungwu maa imunɛ hwuwowu na cɛnjɛ ta ata. Edenji du zha shɛ no mbisogo aŋ ya n-ndumwa o.

³⁰Bụtụ aba be elele zhɛ ba mapa maa Gamba ma jilanɛ atwa Isrɛl, ɛ zhɛ a mapa du kaa maa atwa mi aa shɛ. Gamba AGWANGWAMA Mokondo N dumwa.

³¹Ahiɛba hiɛ shɛ agwụdụ mi, ibɛ shɛ agwụdụ ata namɛ ne ehilo tiyaga, Ahiɛba hiɛ shɛ atwa mi, Ngaa shɛ du Agwatana hiŋ, Gamba AGWANGWAMA Mokondo N dumwa.