Read bassa IZIKƐL 40 Bible Online

IZIKƐL 40 - bassa bible

IZIKƐL 40

¹Ta atu ulwa shiywa woshi-na-shɛba-shɛ-ta ni ijitɛ umpwa nu upiana ata, na ti'ima. Aka ata du ibɛ Jɛrusalɛm ulwa shiywa umpwa-na-shɛba-shi-neshi te e leshiji uŋ. Nụ ụjita ata gbaa Ngaa hwụjɛ ukpahiŋ u'ala wa AGWANGWAMA nu u'waba mu, bee n shepi bee hwuri.

²Nazhɛ Agwatana n shepi no shizobu shɛ bwa, na cɛnjɛ ti Isrɛl bee m peteni ni ishɛmɛ ike nɛ zeci. Ngaa kwụbɛ shimwono shi gembi ufwugwo nu umbe mu,[121] shɛ na shɛ shɛ gana ụshɛpwụ ụ'wụtụ.

³Aka na ti bee n shepi to gwumwongonu apata, Ngaa kwụbɛ bụtụ bu ko na ụpɛshɛka ubwa wa ta gana itumburɛ. Bụtụ ata 'waŋnɛ uhwohwo ubiye na aa manganga ụnjɛswa iyi keeni bukwuto bi iyi tumanganga bee shikeni no odubo.

⁴Bɛɛ hiɛŋ, Ɛ-yɛu bụtụ, Ngbaraka tebiye, shɛlaga du tebiye maa peni abashɛ iyi elele nɛ Ngɛɛ zhɛ mo bu mbisono, iwɛbɛ po aa bu shapɛ epe. Gabụ bi zhɛ bo mbiso atwa Isrɛl iyi elele nɛ abụ kwụbɛ hwayɛ epe tilɛɛ.

⁵Iyi nɛ Ngaa kwụbɛ i shɛ umwono wa Agwatana, u 'yajɛ uba na rungwutwonu uŋ no tupohondo. Bụtụ ata 'waŋnɛ bukwuto bi iyi tumanganga ni i'ɛlɛ ibwɛ, ụnjɛswa bukwuto ata shɛ imbele i'ɛlɛ icihiŋ keeni madagazhɛ mu ko. Ibɛ bụtụ ata shepi bukwuto ata bee menji uzoto keeni mo'inswo mu uba ata. Uzoto ubwa ụ shɛ imbele i'ɛlɛ umpwa na ashashɛ, mo'inswo mu bwa mɛ shɛ imbele i'ɛlɛ umpwa na ashashɛ.

⁶Nazhɛ bee zhe no odubo ata namɛ geri bu uwaŋna-banụ, bee munji ni idwɛtwɛ ɛtɛ, bee mengenji odubo ata, mo'inswo ma aba mɛ shɛ okwuto oko.

⁷Uhwaŋna tudulo uko namba na aba odubo ata a na 'yajɛ shimwono shɛ na a'yacɛ a nama, shɛ tatụ shɛ namɛ nu u'ala ye, shɛ tatụ shɛ namɛ nu u'ala na. Shimwono sha ata hwɛɛ shɛ ba shɛ nangwụ ụnjɛswa tu uholo. Ụnjɛswa tu uholo shɛ ba ụ shɛ avwuna umpwa, mo'inswo ma adatụ shɛ ba mɛ shɛ me'ilwo mo okwuto oko. Angba ata 'yajɛ odubo oko na heri, aba oo tono amɛ umwono uko ụ'wụtụ na namɛ geri bu umwono ata wa Agwatana.

⁸Bee mengenji shɛmɛ shi shimwono sha ata, baa kwụbɛ maa uzoto una we elele ụ shɛ imbele i'ɛlɛ i tindɛtu.

⁹Ubwa shɛ ukwunanga wa angba ata, ubwa du kaa gwumwongonu nu umwono wa Agwatana. Mo'inswo mụ ụdatụ ubwa mɛ shɛ imbele i'ɛlɛ iyebi nu ukwunanga ubwa.

¹⁰Shimwono shɛ ga a'yacɛ a nama nu ụzalụ hweehwe bu uhwaŋna ata tudulo, hwɛɛ shɛ ba shɛ nangatangwụ, to mo'inswo ma adatụ na namɛ na ashashɛ shɛ ba du nangwụ hwɛɛ.

¹¹Nazhɛ bụtụ ata menji uholo wa angba ata, waa shɛ avwuna woshi-na-ba-eyebi, ụnjɛswa ubwa ụ shɛ avwuna umpwa-na-ba-ecihiŋ.

¹²Tuma tu ko tu namba ti kepi umbe shimwono sha ata a'yacɛ a nama, ti zeci shi tebiye o, uzoto tuba shɛ ombolo u'ala oko, nụ ụzalụ uko, gana ata du mo'inswo mu ụdatụ ata mu namɛ. Ụzalụ uyebi na amɛ shimwono sha ata ụ shɛ imbele i'ɛlɛ icihiŋ.

¹³Bee menji ụdatụ[122] wa angba ata te kwune no odubo ye uuwa i ci odubo na, waa namɛ avwuna buhanda-na-ba-eyebi (42).

¹⁴Ukwunanga wa amɛ umwono ata zhe tutu geri bu ukpogwu. Bee menji du igɛsɛjɛ umwono ata, yaa namɛ avwuna talacɛ-na-ba-eneshi.

¹⁵Ụnjɛswa umwono ata te kwuni no odubo angba ata tutu i ci uba ata jilanɛ uŋ ụ shɛ avwuna dupu-nu-talacɛ-na-ba-a-ta (85),

¹⁶Ụdatụ shimwono sha ata 'yagajɛ agbahwụ ticwɛŋ cwɛŋ hwɛɛ, ta adatụ na jejeji shɛmɛ shi shimwono sha ata. A njɛ ofwoto ishiwɛ nụ ụdatụ ata jeji shimwono sha ata na angba ata.

¹⁷Nazhɛ bụtụ ata m becinji no odubo ata, eti teni nu ukpogwu. Uba ata namɛ no tupohondo 'yajɛ shɛmɛ talacɛ shɛ na oo mo nu bwa, i 'yajɛ ofwo na ee dibeni na atayɛ, nu umbe shɛ ba.

¹⁸Ofwo ata zhajɛ uuwa ee ci ukpogwu ata. Ukpogwu ata u tupohondo namɛ tuta to tudubono tu ukpogwu ata namɛ na amɛ.

¹⁹Nazhɛ bụtụ ata mengenji ụdụlụ na banɛ no odubo ata namɛ uzwoozwo uuwa i ci tupohondo to odubo ukpogwu ata namɛ na amɛ, waa namɛ avwuna dipi-tɛtu-nu-woshi (170).

²⁰Nazhɛ bụtụ ata mengenji ụjɛswa keeni uholo wo odubo ata ngbaracɛ tuzuba, a gata oo tono nu ukpogwu ata namɛ no tupohondo.

²¹Shimwono sha ata shi iyi tuswaka shɛ namɛ shɛ tatụ tu upada ye tu upada na, adatụ ata jejeji shu, tu una ata gembi, bimenji bu bwa hwɛɛ bɛ shɛ bu ko na ma shɛ ta shɛ namɛ no odubo ehiiŋ. Ụnjɛswa upada ata bo odubo ụ shɛ avwuna dupu-nu-talacɛ-na-ba-a-ta (85), uholo wa aba ụ shɛ avwuna buhanda-na-ba-eyebi (42).

²²Umwono ata gembi, ta agbahwụ ubwa, ti ishiwɛ ɛtɛ aa njɛ nu bwa nangatangwụ, i shɛ gana una ata namɛ no odubo ata ngbaracɛ geri bu uwanna-banụ. O mo n-ndụtwụ mu tumungo mi cenje nazhɛ teni no odubo ata, amɛ ata a'wụtụ aba namɛ nu ukwunanga, ebi ci aŋ asha bi zhɛ nu ukpogwu ata.

²³Ebi teni nu ukpogwu ata no odubo ata ngbaracɛ tuzuba, apata ɛbi zhɛ ba kwụba odubo ukpogwu ata wa amɛ, gana na ta a na uwaŋna-banụ shɛ. Nazhɛ bụtụ ata mengenji ụdụlụ shidubo sha ata shi yebi, waa shɛ avwuna dipi-tɛtu-nu-woshi (170).

²⁴Nazhɛ bụtụ ata n zeriji tuta, atu kwụbananɛ odubo anya apata a na ngbaracɛ tuta. Bee mengenji aŋ, baa kwụbɛ maa a nangwụ na a na vwɛ.

²⁵Shimwono shɛ na shɛ namɛ no odubo ga shɛ 'yajɛ agbahwụ gana me she ebe. Ụnjɛswa wo odubo ata hwɛ hwɛɛ shɛ avwuna dupu-nu-talacɛ-na-ba-a-ta (85), uholo wa aba ụ shɛ avwuna buhanda-na-ba-eyebi (42).

²⁶Odubo ata 'yajɛ n-ndụtwụ mu tumungo mi cenje nazhɛ ci aŋ, amɛ ata a'wụtụ du kaa aba shɛ ukwunanga, asha ukpogwu ata abu zhaganɛ. A njɛ du ofwoto ishiwɛ na amɛ ụdatụ ata geri ba angba ata.

²⁷Odubo ata zhɛ nu ukpogwu wa amɛ du namɛ apata. Bụtụ ata mengenji ụdụlụ shidubo sha ata shi yebi, waa shɛ avwuna dipi-tɛtu-nu-woshi (170).

²⁸Nazhɛ bụtụ ata n zeriji eti teni no odubo ata namɛ tuta eti zhe nu ukpogwu ata wa amɛ, bee mengenji odubo ata, ibɛ bimenji ba aba namɛ bu ko no shidubo shɛ uba shɛ na shɛ namɛ no tupohondo.

²⁹Shimwono sha aba shi iyi tuswaka, na shɛngba shɛ bwa keeni angba ata odubo hwɛɛ, nangwụ na ma shɛ ta shɛ namɛ no shidubo shɛ vwɛ. Shimwono sha ata shɛ namɛ no shidubo shɛ ga shɛ 'yajɛ du agbahwụ tutu rungwutwonu, ụnjɛswa shɛ ba hwɛɛ ụ shɛ avwuna dupu-nu-talacɛ-na-ba-a-ta (85), uholo shɛ ba ụ shɛ avwuna buhanda-na-ba-eyebi (42).

³⁰Ụnjɛswa wa angba ata u rungwutwonu ukpogwu ata ụ shɛ avwuna dupu-nu-talacɛ-na-ba-a-ta (85), uholo wa aba ụ shɛ avwuna umpwa.

³¹Angba ubwa ngbaracɛ geri bu ukpogwu ata namɛ no tupohondo. A njɛ du ofwoto ishiwɛ na adatụ ubwa, n-ndụtwụ mu tụndatụ oo mungo nazhɛ e ci iŋ.

³²Nazhɛ bụtụ ata n zerjii eti teni no odubo ata uwaŋna-banụ eti zhe nu ukpogwu ata wa amɛ. Bee mengenji odubo ata, aa namɛ bimenji bu ko na ma shɛ shɛ vwɛ.

³³Shimwono sha aba sha a'yacɛ, na shɛngba shɛ bwa, ta angba odubo ubwa, ta adatụ na jejeji shɛmɛ shɛ bwa hwɛɛ shɛ namɛ bimenji bu ko na ma shɛ shidubo shɛ vwɛ. Shɛ 'yagajɛ agbahwụ hwɛɛ ta ma shɛ ta sha angba. Ụnjɛswa shɛ ba hwɛɛ ụ shɛ avwuna dupu-nu-talacɛ-na-ba-a-ta (85), uholo shɛ ba ụ shɛ avwuna buhanda-na-ba-eyebi (42).

³⁴Angba ata ngbaracɛ geri bu ukpogwu ata u tupohondo, a njɛ ofwoto ishiwɛ na adatụ ata namɛ geri ba angba ata. N-ndụtwụ mu tụndatụ ɛbi zhɛ bo mungo nazhɛ ci odubo ata.

³⁵Nazhɛ bụtụ ata n zeriji no odubo ata namɛ tuzuba. Bee mengenji aŋ, aa namɛ bimenji bu ko na ma shɛ shɛ vwɛ.

³⁶A 'yajɛ du shimwono sha a'yacɛ, na shɛngba shɛ bwa, ta angba ata odubo, a shɛ bimenji bu ko na ma shɛ shɛ vwɛ, i 'yajɛ du agbahwụ tutu rungwutwonu shu. Ụnjɛswa shɛ ba hwɛ hwɛɛ ụ shɛ avwuna dupu-nu-talacɛ-na-ba-a-ta (85), uholo shɛ ba ụ shɛ avwuna buhanda-na-ba-eyebi (42).

³⁷Angba ata ngbaracɛ geri bu ukpogwu ata u tupohondo, a njɛ ofwoto ishiwɛ na adatụ ubwa. N-ndụtwụ mu tụndatụ ɛbi zhɛ bo mungo nazhɛ ci odubo ata.

³⁸Tijaja ta amɛ umwono uko tu namba ti 'yajɛ odubo, apata oo tono na amɛ umwono ata aa nyashɛnga usunda iyimabiga ɛtɛ ɛɛ zhɛ o hwoŋzhingo nụ ụrụpɛ.

³⁹Eteburu eneshi namba, na amɛ odubo angba ata, eyebi shi nu upada ye, eyebi shi nu upada na, no ofwo ata aa kwụna iyi ụrụpɛ tuhwoŋzhingo, nụ ụrụpɛ iwɛwɛ, keeni ụrụpɛ tụwụma.

⁴⁰Eteburu eneshi gana ata namba sasana no tupohondo ta angba ata, eyebi shi nu upada ye, eyebi shi nu upada na gunu tɛ ɛbi zhɛ bo tono odubo ata namɛ tuzuba.

⁴¹Eteburu ata aa kwụna iyimabiga nɛ aa ta arụpɛ namɛ atụndatụ hwɛ hwɛɛ aba. Eneshi shi na amɛ umwono, eneshi shi no tupohondo nu ukpogwu ata.

⁴²Eteburu ata aa njɛ na atayɛ na ee shebi eneshi shi nu umwono ata ee seteni, apata aa imanganga iyimabiga ụrụpɛ tuhwoŋzhingo keeni arụpɛ vwɛ. Uzoto wa aba ụ shɛ ombolo u'ala oko, uholo wa aba ụ shɛ ombolo u'ala oko na ashashɛ ụnjɛswa wa aba ụ shɛ, ombolo u'ala oko na ashashɛ. Ne eteburu ata aa patangana i'wɛŋnɛ ye elele nɛ aa nda uhwara tɛ ɛ zhɛ a kwụna iyimabiga nɛ aa ta ụrụpɛ.

⁴³Eteburu ata hwɛɛ 'yajɛ shɛkama tutu rungwutwonu izhɛmi ya aba. Ne eteburu ata aa patangana usunda we elele na oo to ụrụpɛ tuhwoŋzhingo.

⁴⁴Bee n zeriji nu ukpogwu ata wa amɛ. Shɛmɛ sho shimwono shi yebi shɛ namba shɛ haŋpɛ nu ukpogwu ata wa amɛ, una uko namɛ geri bo odubo ata namɛ tuzuba waa ngbaracɛ tuta, una uyebi namɛ geri bo odubo tuta waa ngbaracɛ tuzuba.[123]

⁴⁵Nazhɛ bụtụ ata m mbishi, bɛɛ hiɛŋ, Una ata umwono u ngbaracɛ tuta ụ shɛ iwɛ onongbo na a nda ugondu nu umwono wa Agwatana,

⁴⁶una ata umwono u ngbaracɛ tuzuba ụ shɛ iwɛ onongbo na a nda ugondu nu utukwu-ụrụpɛ. Onongbo ata aba shɛ miaụŋ-me-eyi mu Zadok; aba kiri shɛ atwa ụlamụ Livai, aba du kiri ee leneni maa o no gwumwonu no ofwo ata AGWANGWAMA a nama maa a na ndana bụ iyi.

⁴⁷Nazhɛ bụtụ ata mengenji ukpogwu ata wa amɛ, ibɛ uholo ubwa ụ shɛ avwuna dipi-tɛtu-nu-woshi (170), gana ata du ụnjɛswa ubwa namɛ. Esugwuumi ubwa nangatangwụ, utukwu-ụrụpɛ shikeni nu umbe umwono ata wa Agwatana.

⁴⁸Bee n zeriji no ofwo angba umwono ata wa Agwatana, bee mengenji angba ata, Ụnjɛswa wa aba ụ shɛ avwuna woshi-na-ba-eneshi zalụ hweehwe, uholo wo odubo ata oo tono na amɛ ụ shɛ avwuna atụndatụ, apanya adatụ ubwa a shɛ avwuna a ta.

⁴⁹Ụnjɛswa shigbudu shɛ na bụtụ zhɛ bo mungo nazhɛ to odubo ata ụ shɛ avwuna talacɛ-na-ba-eneshi. Uholo na beni no odubo ata i ci aba ubwa ụ shɛ avwuna woshi, zalụ hweehwe.