Read bassa IZIKƐL 41 Bible Online

IZIKƐL 41 - bassa bible

IZIKƐL 41

¹Nazhɛ bụtụ ata n zeriji sasana, nu umwono ata wa ashashɛ, ubwa shɛ ohwolu ata tijilo. Bee mengenji angba ata ɛbi zhɛ bo tono nazhɛ teni umwono ata: uholo wa aba ụ shɛ avwuna umpwa zalụ hweehwe.

²ụnjɛswa wo ofwo aba tutono a shɛ avwuna umpwa-na-ba-ecenje, mo'inswo mụ ụdatụ ubwa mɛ shɛ avwuna atụndatụ. Bee mengenji ashashɛ amɛ umwono ata, ụnjɛswa ubwa ụ shɛ avwuna dupu-ne-eshe-umpwa-na-ba-atụndatụ (68), uholo ubwa ụ shɛ avwuna talacɛ-na-ba-eneshi.

³Bee teni na amɛ umwono ata umɛwɛɛ bee mengenji uŋ. Bee mengenji ta angba ata oo tono nazhɛ e teni uŋ: uholo wa aba ụ shɛ avwuna atatụ, ụnjɛswa ofwo ata tutono ụ shɛ avwuna umpwa, mo'inswo mụ ụdatụ ubwa mɛ shɛ avwuna umpwa-na-ba-eyebi.

⁴Bee mengenji amɛ ohwolu ata tijilo, aa nangwụ tụ ụnjɛswa tu uholo, ụ shɛ avwuna talacɛ-na-ba-eneshi. Nazhɛ bɛɛ n hiɛŋ, Epe aba shɛ ohwolu ata tijilo me tijilo.

⁵Nazhɛ bụtụ ata menji mo'inswo mu ụdatụ wa amɛ umwono ata wa Agwatana, maa shɛ avwuna umpwa. O mo shimwono shɛgwumwatangwụ shɛ na uholo shɛ ba shɛ avwuna eceecenje tutu rungwutwonu ụdatụ ata umwono wa Agwatana.

⁶Shimwono shɛ ga shɛ shɛ shimwono sha azuba, una una 'yajɛ tusata tu tatụ, tusata te elele ti 'yajɛ shɛmɛ talacɛ. Mo'inswo mụ ụdatụ umwono ata wa Agwatana kaa ma kaana ga tugwumwa na tusata te elele no shimwono sha ata sha azuba, iwɛ maa atukpa na oo to shimwono sha ata shɛ nama nu ukpogwu hwɛɛ.

⁷Iwɛbɛ po yaa shɛ abu ngbaracɛ tupohondo tụ ụdatụ umwono ata wa Agwatana wa sha maa u nangwụ mo'inswo te kwune ni ihiŋhiŋ. O mo shigbudu shɛ na shi helenji no tupohondo tụ ụdatụ ata umwono wa Agwatana tutu rungwutwonu, na shɛ ba oo mungo shimwono sha ata te kwuni nu una uhiiŋ i ci una wa ashashɛ tutu una ata ụtatụ.

⁸N kwụbɛ maa e hwuricingeni tuma tu umwono ata na azuba tutu rungwutwonu, uzoto tuhwuricingono ta tuma ta ata tɛ shɛ avwuna umpwa.

⁹Mo'inswo mụ ụdatụ shimwono shɛ ga mɛ shɛ avwuna atụndatụ I 'yajɛ shidubo shi yebi, oko namɛ tuzuba oko namɛ tuta.

¹⁰Ohwolu oko namba haŋpɛ na ashashɛ ata ee hwuricingeni tuma ta ata onongbo a nama, uholo wa aba ụ shɛ avwuna talacɛ-na-ba-eneshi tutu rungwutwonu umwono ata wa Agwatana.

¹¹Shimwono sha ata shɛ namɛ na azalụ shɛ 'yajɛ shidubo, oko namɛ tuzuba, oko namɛ tuta, uholo tuma tu na tu sotulonu ofwo ata uuwa rungwutwonu ụ shɛ avwuna atụndatụ.

¹²Umwono uko na ụnjɛswa ubwa ụ shɛ avwuna dipi-tɛtu (150), uholo ubwa ụ shɛ avwuna dipi-yebi-ne-eshe-umpwa-ni-bɛ-icenje (67), mo'inswo mu uba na rungwutwonu uŋ mɛ shɛ avwuna atụndatụ, no ofwo ata ohwolu haŋpɛ geri bu uwaŋna-twonuo bu ukwunanga umwono ata wa Agwatana.

¹³Nazhɛ bụtụ ata mengenji tupohondo tu umwono ata wa Agwatana, ụnjɛswa ubwa ụ shɛ avwuna dipi-tɛtu-nu-woshi (170). Bee menji du te kwuni na aba umwono ata wa Agwatana uuwa i ci ohwolu ata haŋpɛ tutu ukwunanga umwono ata geri bu uwaŋna-twonuo waa shaananɛ du avwuna dipi-tɛtu-nu-woshi (170).

¹⁴Uholo umwono ata wa Agwatana geri-be-eshe ubwa medenji ukpogwu umwono ata wa Agwatana ụ shɛ du avwuna dipi-tɛtu-nu-woshi (170).

¹⁵Bee menji ụnjɛswa umwono ata ngbaracɛ geri bu ukpogwu uwaŋna-twonuo tutu imɛ shɛngba shɛ bwa apada hweehwe, waa shaananɛ avwuna dipi-tɛtu-nu-woshi (170). E sweni angba ata oo dulo oo tono umwono ata wa Agwatana, no ofwo ohwolu ata tijilo, keeni ofwo ata Tijilo me Tijilo,

¹⁶ogbogolo te kwuni na cɛnjɛ uuwa i ci agbahwụ. E kepi du agbahwụ ata.

¹⁷A njɛ ofwoto swoswoswo na amɛ ụdatụ umwono ata wa Agwatana te kwuni na cɛnjɛ uuwa henici uzoto wa akpa.

¹⁸Aa njɛ ofwoto ishiwɛ, ti iyi-uumwa ɛtɛ 'yajɛ apiambɛ. Aa njɛ bishiwa, o shiyono iyi-uumwa, gana ata yaa mama 'wanụ uuwa rungwutwonu umwono ata. Iyi-uumwa ɛtɛ inɛ inɛ 'yajɛ apɛshɛka eyebi:

¹⁹upada uko ụ shɛ ụpɛshɛka butugwumwa na ngbaracɛ bishiwa ata, upada uyebi ụ shɛ ụpɛshɛka bizeci na ngbaracɛ du bishiwa ata nu upada ye. Gana aa njɛ iŋ ta uuwa rungwutwonu ụdatụ ata,

²⁰te kwune na cɛnjɛ uuwa henici uzoto ukpa a ndanjɛ ofwoto iyi-uumwa keeni a na ishiwɛ nụ ụdatụ.

²¹Ogbogolo akpa shidubo sha ata nangwụ uholo hwɛɛ tụ ụnjɛswa. I 'yajɛ iyi ike ee shi nu umbe angba ata oo tono ofwo ata Tijilo me Tijilo, i shɛ gana

²²utukwu-ụrụpɛ ụ'wụ'wụ. Uzoto ubwa ụ shɛ avwu na a ta, ụnjɛswa ubwa ụ shɛ avwuna eneshi[124] ogongo ubwa nangatangwụ. Ni i'wɛ'wɛ aa njɛ akatakpa ubwa,[125] te esugwulumi ubwa, ti i'ɛŋbu ibwɛ. Ibɛ bụtụ ata n hiɛŋ, Uteburu ga u shi no ofwo na AGWANGWAMA a nama.

²³To ohwolu tijilo ata namɛ no tupohondo, keeni ohwolu Tijilo me Tijilo, a na a na 'yajɛ shidubo shi yebi.

²⁴Akpa ata una una wa kapɛshɛngwa apada hweehwe.

²⁵A njɛ ofwoto ishiwɛ keeni a na iyi-uumwa nɛ 'yajɛ apiambɛ nu ukpa ata wo ohwolu tijilo ata namɛ no tupohondo, gana ata aa njɛ na adatụ. I 'yajɛ ugbogolo na urigeni tupohondo to odubo angba ata.

²⁶Shimwono shɛ ga shɛ 'yajɛ agbahwụ, aa njɛ du ofwoto ishiwɛ na adatụ shɛ ba.