Read bassa IZIKƐL 43 Bible Online

IZIKƐL 43 - bassa bible

IZIKƐL 43

¹Nazhɛ bụtụ ata n zeriji eti zhe no odubo ata namɛ geri bu uwaŋna-banụ,

²apata Ngaa kwụbɛ ụjɛrụma wa Agwatana Isrɛl tu waa banɛ geri bu uwaŋna-banụ. Ngaa hwụjɛ rụhwụŋ ra Agwatana ti bee ci gana tungwulo te meni mu ufwugwo, ibɛ ụjɛrụma ata ubwa wa ta nu unyizo.

³Ozobu ga shɛ gana a na ala Ngaa kwụbɛ la aka na Agwatana zhajɛ maa nda Jɛrusalɛm ufwu, keeni a na ala Ngaa kwụbɛ la nụ ụpalanụ Urefu Kiba. Ngee leyi Ngee weci na cɛnjɛ mo ubwo ubwo.

⁴Nazhɛ ezezeji ụjɛrụma ata wa AGWANGWAMA teni no odubo ata uwaŋna-banụ ee zhe ee teni nu umwono wa Agwatana.[127]

⁵Nazhɛ Mpiala ma AGWANGWAMA mi n shepi mee tecinji nu ukpogwu ata wa amɛ, Ngaa kwụbɛ tụ ụjɛrụma wa AGWANGWAMA shini umwono ata wa Agwatana.

⁶Aka na ta bụtụ ata shikeni boo n dongonu, Ngaa hwụjɛ ta bụtụ bu ko[128] ba njɛ n-ndumwa ne mi tu baa namɛ na amɛ umwono ata wa Agwatana:

⁷Bɛɛ hiɛŋ, Ɛ-yɛu bụtụ, epe idwɛtwɛ mi namɛ keeni ofwo na ohwulu ɛvwɛvwɛjɛ mi namɛ. N zhɛ ma nama epe na ashashɛ atwa Isrɛl maa ma ya tugwama na ashashɛ aba unyizo-nom. Ta atwa Isrɛl, ta shɛgwuma sha aba, a zha shɛ a hashɛgana ya izeci mi tijilo nu ntatanuwaŋ tɛzhɛba keeni shɛgwuma sha aba tuno[129] epe kwukwuŋ.

⁸Shɛgwuma sha aba shi mo n-ndụtwụ no shidubo sho shimwono sha aba ne eririri idwɛtwɛ yo odubo umwono mu, ee shikecenji i'wɛ'wɛ shidubo sha aba ne eririri i'wɛ'wɛ yo odubo umwono mu, ụdatụ kiri iti shiyeneni na ashashɛ. E heshigeni izeci mi tijilo tedure ni iyi-tupwaŋ nɛ aa ndanjɛ. Iwɛbɛ po Ngaa njɛ isɛbwɛ na aba Ngaa njɛ aŋ ufwu.

⁹Hwuwayɛ go, ge genji ya ntatanuwaŋ tɛzhɛba, maa e becenji n'wo ma shɛgwuma[130] sha aba no olugwo mi taa dụlụ. Nazhɛ Ngɛɛ zhɛ ma nama na ashashɛ aba unyizo-nom.

¹⁰Nazhɛ AGWANGWAMA to tuhwulo tu n-ndumwa tụdụma ne mi, bɛ hiɛŋ, Ɛ-yɛu bụtụ, mbiso atwa Isrɛl iwɛ umwono wa Agwatana, nda aŋ maa e seshi gana na aa imanganjɛ bimenji bu bwa. Nda maa ezuye shɛ aŋ iwɛ iyi iwɛ nɛ aa njɛ.

¹¹Yaa shɛ ezuye iyi nɛ aa njɛ 'imɛ aŋ, nazhɛ kapɛshɛngana aŋ gana na aa imanganjɛ iwɛ umwono ga: kapɛshɛngana aŋ tisemberi tu bwa, ta shɛngba shɛ bwa hwɛɛ, to shidubo shɛ bwa, tu gana na ogongo ubwa namɛ, tu gana na te e sheji iyi elele nu bwa hwɛɛ, tu undwa keeni unu-tupana na namba nu bwa. 'Nyatana aŋ ijɛ maa a kwụbɛ gana na maa a untangana andwa ubwa keeni shikpogo shɛ bwa na shihaŋsa sha aba.

¹²Undwa umwono wa Agwatana na: Ofwo elele tutu rungwutwonu ihiŋhiŋ ishɛmɛ gɛ a shɛ ofwo na ee shiri swooŋ, aa njɛ tijilo tu na tu hwuri ofwo vwɛ hwɛɛ. Gana undwa umwono ga wa Agwatana ụ shɛ ta.

¹³Tumanganga tu utukwu-ụrụpɛ na, bimenji ata ee mengenji umwono wa Agwatana, ubwa du ee shepi ee mengenji uŋ. E shiri ukporo tutu rungwutwonu embi utukwu ata. Me'ilwo mu bwa mɛ shɛ ombolo u'ala oko, uholo ubwa ụ shɛ avwuna eyebi, u 'yajɛ bishaka na oo mo tutu rungwutwonu ukporo ata, uzoto[131] ubwa ụ shɛ madagazhɛ mu ko.

¹⁴Te kwune ne embi utukwu ata ụrụpɛ uuwa u hwuwi tusata ti hiiŋ tɛ shɛ avwuna atatụ. Tusata ti yebi ti ci shi tusata ti hiiŋ uholo, tuma ta tuba tu namɛ ombolo u'ala oko tutu rungwotwonu, uzoto tuba ụ shɛ avwuna atụndatụ. Tusata ta ata tu 'wa ma tuta ti 'nyanɛ sasana, uholo tuba ụ shɛ avwuna eyebi tutu rungwutwonu.

¹⁵Uzoto ụmbalụ utukwu ata ụ shɛ avwuna atụndatụ. Utukwu ata 'yajɛ mahiuaŋ mi neshi mu na mi cimbengeni te kwuni nụ ụmbalụ ata, mɛ shɛ ombolo u'ala oko.

¹⁶Ụmbalụ ihiŋhiŋ ɛtɛ ubwa nangwụ, tu uholo tụ ụnjɛswa, geri geri shɛ avwuna woshi.

¹⁷Tusata ta ata ta ashashɛ du tu nangatangwụ, tu uholo tụ ụnjɛswa, geri geri shɛ avwuna woshi-na-ba-eneshi, u 'yajɛ izhɛmi nɛ oo mo tutu rungwutwonu, uholo ibɛ shɛ ashashɛ ombolo u'ala uko. Uholo ukporo ata shɛ avwuna eyebi tutu rungwutwonu. N-ndụtwụ mu na oo mungo utukwu ata mu namɛ geri bu uwaŋna-banụ.

¹⁸Nazhɛ bụtụ ata n hiɛŋ, Ɛ-yɛu bụtụ, AGWANGWAMA Mokondo hiɛŋ, Hwulaga iyi nɛ shɛ shikpogo shi utukwu ga. Aka na to o mo utukwu ga, bɛ shɛ ba pana ụrụpɛ tuhwoŋzhingo nu bwa maa zhizhenji du mehieŋ mu usunda ata oo to ụrụpɛ nu bwa.

¹⁹Bɛ shɛ ba pana onongbo ata shɛ ụlamụ Livai a na banɛ nu umwamwa Zadok usemberi buna iwɛ ụrụpɛ iwɛwɛ, aba kiri shɛ a zhajɛ no ofwo mi maa a n ndanɛ iyi. Gamba AGWANGWAMA Mokondo m peni-unu ga.

²⁰Bɛ shɛ ba sala mehieŋ mu bwa maa sụkwụtwa mahiuaŋ ma ata mu utukwu-ụrụpɛ te esugwulumi ata ubwa eneshi hwɛɛ, ti izhɛmi ibwɛ tutu rungwutwonu. Gana ɛbi zhɛ ba nda utukwu ga ụrụpɛ ta maa shiri uŋ swooŋ.

²¹Bɛ shɛ ba shapa usemberi ata buna oo to ụrụpɛ maa hwoŋzhinji bu no tupohondo to ohwolu ata tijilo nu ukpogwu umwono wa Agwatana, no ofwo ata ee teri maa o no hwoŋzhingo iyi.

²²Ni iyi tuholo, bɛ shɛ ba shapa upi na zasa ụngwụ we elele maa to ụrụpɛ iwɛwɛ. Nda utukwu ata rụmbɛɛ ne mehieŋ mu bwa gana ata abɛ njɛ na mu na ata mu usemberi ata buna.

²³Aka na abɛ njɛ inɛ ɛtɛ ebu hwuwwi, shapa usemberi buna nu usemberi udagba, kede a 'yaga ụngwụ we elele hwɛɛ aba o.

²⁴Suje aŋ maa shɛkanɛ aŋ no ofwo mi, maa onongbo zhizhenji aŋ manɛ, nazhɛ ɛɛ zhɛ ma n taga ụrụpɛ tuhwoŋzhingo na aba.

²⁵Na shɛkana upi, nu usemberi buna, nu udagba iyi-heri iwɛ ụrụpɛ iwɛwɛ tutu ijitɛ icenje. Kede a 'yaga tụsụnyasụ te elele o.

²⁶Jitɛ icenje ibɛ onongbo shɛ o shilo utukwu ata ụrụpɛ swooŋ, maa a imanganjɛ uŋ iwɛ ụrụpɛ tuta iwɛ iwɛwɛ tu'urugono.

²⁷Yaa shɛ ijitɛ ɛtɛ ulwa, onongbo shɛ okwuno ụrụpɛ tuta nu utukwu ata, te kwuni nu ụjita ụ tụndatụ i zhɛ ya geri-be-eshe, tụ ụrụpɛ tuhwoŋzhingo, tu una wa amɛ-olom. Nazhɛ Ngɛɛ zhɛ ma 'yaga amɛ-olom ne hiŋ hwɛɛ. Gamba AGWANGWAMA Mokondo N dumwa.