Read bassa IZIKƐL 44 Bible Online

IZIKƐL 44 - bassa bible

IZIKƐL 44

¹Nazhɛ bụtụ ata n zeriji no odubo ata namɛ no tupohondo geri bu uwaŋna-banụ bo ohwolu ata tijilo, odubo ta kaa kepi.

²Nazhɛ AGWANGWAMA n hiɛŋ,[132] Gana ga odubo ga zhɛ a kapa, a zha shɛ a kapɛshɛnga aŋ o. I zasa butugwumwa be elele ee leneni maa nda uhwara na aba o, iwɛnɛ ti yaa shɛ Gamba AGWANGWAMA na shɛ Agwatana Isrɛl n teni la na aba. Iwɛbɛ po aa shɛ a kapa aŋ.

³Yɛu tugwama nɛ ta patanɛ eri bo tono maa ya iyimɛyɛ tijilo no ofwo mi. Bɛ shɛ bo tono, baa shɛ ba banananɛ no odubo angba ata bee ge teni.

⁴Nazhɛ bụtụ ata n zeriji eti beni no odubo ata namɛ tuzuba, eti zhe nu umbe umwono wa Agwatana. Gana na tu Ngaa mbiyanɛ, Ngaa kwụbɛ te ezezeji ụjɛrụma wa AGWANGWAMA shini umwono ata wa AGWANGWAMA. Ibɛ po Ngoo momo po na cɛnjɛ mo ubwo ubwo.

⁵Nazhɛ AGWANGWAMA n hiɛŋ, Ɛ-yɛu bụtụ, pana abashɛ iyi elele nɛ abụ kwụbɛ keeni iyi nɛ abụ hwụjɛ. N zhɛ mo bu mbiso iwɛ andwa keeni unu-tupana umwono wa Agwatana. Shiyono eshe tebiye maa mepi atwa na shɛ o no tono a na bana nu umwono wa Agwatana keeni atwa na ee leneni shi.

⁶Mbiso atwa ata Isrɛl[133] a na 'yajɛ tigezhe maa, Gamba AGWANGWAMA Mokondo, N hiɛŋ, Oo ahiɛba atwa Isrɛl, N zha shɛ mo lono ya ni iyi-tupwaŋ ye elele nɛ ahia nda o.

⁷E heshigeni umwono mu, iwɛnɛ ee leneni agaiŋ ata jeji shi teleyi ta shɛmɛ keeni a na tu'waba, maa e teni no ohwolu mi tijilo, na aka na ta a ma n taga ụrụpɛ na manɛbɛ keeni mehieŋ. Atwa mi bweji[134] unu mu tutwa ni iyi-tupwaŋ nɛ aa nda.

⁸Shɛ ahiɛba hi untanganɛ iyi mi tijilo nɛ ahi ga shɛ hia untangana no ohwolu mi tijilo, ama agaiŋ aba ehi utegeni ya maa a na nda uŋ ụlụkpashɛ hiŋ.

⁹Iwɛbɛ po Ngaa jɛmɛ Gamba AGWANGWAMA Mokondo, Ngɛɛ hiɛŋ, I zasa bugaiŋ be elele na jeji shi teleyi ta amɛ keeni a na tu'waba, zhɛ bo tono ohwolu mi tijilo, okwo yaa shɛ agaiŋ a na namɛ na ashashɛ atwa Isrɛl.

¹⁰Nazhɛ AGWANGWAMA n hiɛŋ, Gamba ma pana Alivai, na atwa Isrɛl a na n jineci la, a zhɛba ya ntatanuwaŋ ma aba ulwapɛ.

¹¹Ugondu na ee eri ma n ndana no ohwolu mi tijilo ụ shɛ maa a na ngbaraka shidubo shu umwono mu keeni maa a na nda ugondu umwono ata mu. E eri a kwụna iyimabiga ye elele nɛ atwa to ụrụpɛ tuhwoŋzhingo keeni arụpɛ anya, a shɛ a na nama nu ugondu wa aba maa a na ndana atwa ata ugondu.

¹²Ama iwɛnɛ aa untanganɛ la atwa Isrɛl na tɛzhɛba tu ntatanuwaŋ ma aba; aa 'yagajɛ atwa Isrɛl uuwa aa njɛ iwɛwɛ. Ibɛ po Gamba AGWANGWAMA Mokondo Ngee keleni aŋ unu ta 'yajɛ ikɛnyi maa ɛ zhɛ a pana aŋ ulwapɛ tilɛɛ.

¹³A shɛ shɛ ma n ndana ya ugondu tunongbo, okwo tugwumwonu a shɛ shɛ o gwumwonu ya ni iyi mi ye elele nɛ shɛ iyi tijilo okwo maa e teni ofwo ata uhwuri ofwo vwɛ ne tijilo. Ulwapɛ Ngee peni aŋ iwɛ tupwaŋ ta ata aa njɛ ta.

¹⁴Okwo ti yaa shɛ gana ata, aba Ngɛɛ zhɛ mo utogono igbɛtɛtɛ umwono wa Agwatana keeni ugondu we elele na ụ shɛ wa nda nu umwono wa Agwatana.

¹⁵Ama AGWANGWAMA Mokondo hiɛŋ, Onongbo ata a na shɛ ụlamụ Livai a na shɛ ajalalo Zadok, a n zhɛbɛ na tɛcara no ohwolu mi tijilo gana elele, aka na ta atwa Isrɛl vwɛ vwụrɛ la ee n genji. Iwɛbɛ po aa shɛ a zhajɛ ya hwuwayɛ go no ofwo na Ngaa namɛ maa a na ma ndana iyi, aba zhɛ no mo hwoŋzhingono manɛbɛ keeni mehieŋ ma arụpɛ.

¹⁶Aba kiri zhɛ o tono no ohwolu ata mi tijilo, maa a njɛ ugondu nu utukwu-ụrụpɛ mu, maa a na untangana tɛzhɛba nu umwono wa Agwatana.

¹⁷Aka na ee teni no odubo ata zhɛ nu ukpogwu wa amɛ umwono wa Agwatana, a shɛ o urugono tugwuno ti ilinɛn. A shɛ shɛ o urugono tugwuno te elele tu na aa nɛ ne tizhe, na aka na ta a nda ugondu nu ukpogwu ata wa amɛ kwo kaa na amɛ umwono ata wa Agwatana o.

¹⁸A shɛ a pala ereweni no ohiuhiu aba maa o hwuŋtongono ewereci tugwuno ti linɛn, ama a shɛ shɛ o umpo amazhɛya elele ne shimbi sha aba maa e bwezhi o.

¹⁹A shɛ o ushogo i'wɛŋnɛ ɛtɛ ugondu ee ge uregeni maa e tileni iŋ nu umwono ata tijilo, nazhɛ maa e beni nu ukpogwu ata u tupohondo. A shɛ o urogono i'wɛŋnɛ inyɛ iwɛ maa kede tijilo ti i'wɛŋnɛ ɛtɛ ya aba ee ge uregeni ti zeri atwa ata vwɛ o.[135]

²⁰Onongbo shɛ shɛ a na 'nyanga tukpala o, a shɛ shɛ kaa du o no sho tihiŋzhe zhuuŋ o. A shɛ a na hwaga tụ te teni cɛŋ.

²¹Onongbo shɛ shɛ a na swa mayaga me elele nazhɛ e teni nu ukpogwu ata wa amɛ o.

²²I zasa bunongbo shɛ ba zana bululo kwo kaa biyikwo na ee becinji o. Biyikwo bi Isrɛl na ta shɛ usapa kiri aa shɛ a zana keeni bululo bo bunongbo kiri.

²³Onongbo shɛ o mbisogono atwa mi tuswoswoswo ti iyi nɛ jirimi ni iyi nɛ jirimi shi, ni iyi nɛ hashɛganụ sụ, ni iyi nɛ hashɛganụ.

²⁴Onongbo aba shɛ a na dumangana atwa elele a na 'yajɛ uwuru n-ndumwa gana na ta andwa mi namɛ. A shɛ a untangana nsono mi mi gana na ta andwa mi keeni onu-tupana muba namɛ, aa shɛ du a na untangana Ijitɛ-ụhinjanụ mi ne tijilo.

²⁵Bunongbo shɛ shɛ bu mama hashɛgana no ru'wo tutumongono, semi ga shɛ ru'wo re emeci ubwa, kwo kaa miaụŋ mu bwa kwo kaa yɛu-bino bwa ye eyi kwo kaa bụngwụfwụ bwa na ta cɛnɛ shɛ kiri baa shɛ bu mama hashɛgana iwɛ aba.

²⁶Na aba na tu baa mama njɛ shɛshɛshɛ,[136] bɛ shɛ ba nama ijitɛ icenje,

²⁷nazhɛ bɛɛ zhɛ bo tono nu ukpogwu ata wa amɛ umwono wa Agwatana maa ta ụrụpɛ iwɛ tumama nyashɛnga tu bwa, iwɛ maa bu na ndaanana ugondu nu umwono wa Agwatana. Gamba AGWANGWAMA Mokondo N dumwa.

²⁸Onongbo shɛ shɛ a 'yaga ogwu elele o, Gamba n shɛ ogwu aba, a shɛ shɛ kaa du a 'yaga i'wɛŋnɛ ye elele ni Isrɛl o. Gamba n shɛ i'wɛŋnɛ ya aba.

²⁹Iyi ụrụpɛ tiya, ni iyi ụrụpɛ iwɛwɛ keeni iyi ụrụpɛ tụwụma aba 'yajɛ iŋ, aba shɛ a lashɛga iyi elele nɛ ee n shileni swooŋ.

³⁰Onongbo aba shɛ a 'yaga tụ'walụ ti hiiŋ tu na ti ngezeni nụ ụzhɛ hwɛɛ na amɛ iyi nɛ ɛɛ jwɛ ne ehilo keeni iyi elele nɛ ee m peni. Aka elele hiɛ shɛ hi na pana aŋ urobwo iyimɛyɛ ihiiŋ nɛ banɛ na cɛnjɛ ti hiŋ, iwɛ maa uwebiye-tupana nama nu nhwaŋ mi hiŋ.

³¹Onongbo shɛ shɛ a ya ụnụnụ we elele kwo kaa usunda ehilo we elele na meme 'weji o, okwo kaa unaa na unya usunda kwụnɛ o.