Read bassa IZIKƐL 6 Bible Online

IZIKƐL 6 - bassa bible

IZIKƐL 6

¹AGWANGWAMA jɛmɛ n-ndumwa ne mi, bɛɛ hiɛŋ,

²Ɛ-yɛu bụtụ, pana eshe bu geri bu nshama mɛ cɛnjɛ ti Isrɛl, maa dumanganɛ mụ tigesere tu na ti zhɛ ta wumana mụ,

³hiɛŋ mụ, Ahiɛba nshama mi Isrɛl, hwulaga ma n-ndumwa mi mi, Gamba AGWANGWAMA na shɛ Agwatana. Iyi nɛ Omo hi mbiso ahiɛba nshama, ne tikpekwu ti hiŋ na.

⁴Otukwu-ụrụpɛ hiŋ zhɛ a sha osombo, otukwu iturɛre hiŋ tuhwoŋzhingo zhɛ a bwaratagwụ. N zhɛ ma kwụna atwa hiŋ nu umbe ntatanuwaŋ mi hiŋ.

⁵N zhɛ mo tulono n'wo ma atwa Isrɛl nu umbe ntatanuwaŋ ma aba, Ngɛɛ zhɛ kaa maa garataga o'umpwo hiŋ tutu rungwutwonu otukwu-ụrụpɛ hiŋ.

⁶Ɛ zhɛ o hwuŋzotongo ashɛpwụ Isrɛl kpaaŋ, ɛɛ zhɛ o hwuŋzotongo ofwo ata hiŋ zeteji keeni otukwu ata hiŋ ụrụpɛ, ɛ zhɛ a bwarataga ntatanuwaŋ ma ata mi hiŋ, ɛɛ zhɛ o logo otukwu ata hiŋ iturɛre, ɛ zhɛ e iricingo kaa ugondu we elele na ahiɛ njɛ kpaaŋ.

⁷Ɛ zhɛ a kwụna atwa na ashashɛ hiŋ, nazhɛ atwa na ta vwɛ zhɛ a mapa maa Gamba AGWANGWAMA na.

⁸Ama okwo ti yaa shɛ gana ata, N zhɛ ma waŋpana atwa oko maa kede a kwụnɛ aŋ o, ɛ zhɛ a banangana, na aka na ta a garatagwụ aa namanjɛ na ashashɛ a'una edenji.

⁹Aka na ee suji atwa hiŋ a na benengeni, aa namɛ na ti'ima na ashashɛ edenji, nazhɛ ɛɛ zhɛ e teyinje amɛ mi tụhaŋtụ a na Ngaa 'yajɛ iwɛ tuwɛle tu na aa nda na shɛmɛ sha aba keeni shishe sha aba. N zhɛ ma pana aŋ ulwapɛ iwɛ tɛganga tu na ee n genji aa 'watatagwụ ntatanuwaŋ ma aba. Ɛ zhɛ mama shana iyi inyizhi iwɛ iyi iwɛ keeni iyi-tupwaŋ nɛ aa ndanjɛ hwɛɛ.

¹⁰Nazhɛ ɛɛ zhɛ a mapa maa Gamba AGWANGWAMA na, maa N sugeni shi aŋ abara ga ne ebe maa mo zwono aŋ inyɛsɛ kwakwa o.

¹¹AGWANGWAMA Mokondo hiɛŋ, Puso ma i'ɛlɛ hiŋ, maa hi to eshigidi ni ivwunɛ hiŋ, maa hi hiɛŋ, Adooyi! Iwɛ iyi tugworozwo keeni iyi-tupwaŋ ye elele nɛ atwa Isrɛl ndanjɛ kpaaŋ, iwɛbɛ po ujasa, ni imunɛ-tiya keeni igwumɛgwumɛ iwɛ zhɛ ya kwụna aŋ.

¹²Igwumɛgwumɛ iwɛ zhɛ ya kwụna atwa na namɛ taa dụlụ, ujasa zhɛ wa kwụna atwa na gwumwongonu, imunɛ-tiya zhɛ ya kwụna atwa na ge benengeni a na ga ta vwɛ. Gana Ngɛɛ zhɛ ma nda aŋ tedure ni isɛbwɛ mi ti'ishijɛ ta.

¹³Aka na tu n'wo ma atwa aba mi tilegeni tutu rungwutwonu otukwu-ụrụpɛ aba, te tikpekwu tu na ti zeteji, ti ehiŋhiŋ nshama, te ecilo i'wɛ'wɛ i turumo rumo ye elele keeni ucilo ukpekpeshi ụ'wụtụ we elele, ibɛ shɛ ofwo na aa shana a pana ntatanuwaŋ ma aba me elele arụpɛ iturɛre ụhiụŋ ụlataụ hwɛɛ. Nazhɛ ɛɛ zhɛ a mapa maa Gamba AGWANGWAMA na.

¹⁴N zhɛ ma sakana aŋ u'ala mu maa i wumanɛ aŋ, maa ma nda cɛnjɛ ta aba osombo tutu ofwo elele na aa namanjɛ kpaaŋ, te kwune nu ụshɛka ata namɛ tuta tutu i ci Ribla[17] na shɛ ụshɛpwụ ata namɛ tuzuba. Nazhɛ ɛɛ zhɛ a mapa maa Gamba AGWANGWAMA na.