Read bassa DANIƐL 10 Bible Online

DANIƐL 10 - bassa bible

DANIƐL 10

¹ Ti ga Sairos yɛ tugwama ti Pɛsia, yaa namɛ shiywa shɛ tatụ, nazhɛ n-ndumwa mu ko mu kapɛshɛngwanụ Daniɛl na oo po izeci ti gɛ Bɛltɛshaza. N-ndumwa ma ata kaa mɛ shɛ iwɛ-tɛkana, maa shɛ kaa n-ndumwa mu ujasa ụ'wụtu; bee eshiciji kaa n-ndumwa ma ata tedure no ozobu.

²Gamba ga Daniɛl, N to-ụkwụla alade atatụ na aka ata.

³N yɛ shɛ iyimɛyɛ ụlatụ ye elele o, N yɛ shɛ usunda o, N swe shi kaa meni mụ tụ'walụ ta afwafwa o, N sụkwụtwa sụ kaa manɛbɛ kwukwuŋ, uuwa i ci aka na alade ata atatụ keshici.

⁴Tu upiana uhiiŋ[17] namɛ ijitɛ woshi-ni-bɛ-neshi nu uywa ata, Ngee shikeni nu ugbongboro Urefu ata ụ'wụtụ, ɛɛ hiɛŋ Tigris,

⁵ti Ngee shepi eshe Ngaa mbiyanɛ, Ngaa kwụbɛ butubwenyi bu ko na urigeni tugwuno ti ilinɛn, na kaa umpi umazhɛya wa azhɛnarɛya tụrụmbɛɛ ne embi ubwa ti bee shikeni nu umbe mu.

⁶Tu'waba tu bwa ta ta gana kuresoliti,[18] ụpɛshɛka ubwa ụ shɛ gana ɛbɛrɛ na bajɛ tụla, eshe ubwa shɛ gana ezezeji ulwa; aragbam ubwa keeni ivwunɛ ibwɛ a shɛ gana utumburɛ na wa ta ngere ngere; rụhwụŋ ru bwa rɛ shɛ gana rundu ra atwa ofwugwo.

⁷Gamba ga Daniɛl kiri kaa N kwụbɛ ozobu ata, atwa na namɛ ne mi kwụbɛ shɛ aŋ o; ama tuba igɛhi 'imɛ aŋ, ibɛ po ee gezhiji aa swacɛ.

⁸Gabata Ngaa vwɛ ya Ngooko, tu Ngaa kwụbɛ ozobu ata a'wụtụ, N zasa ya kaa ikɛnyi ye elele o, ụpɛshɛka mu sheyinji waa shɛ gana ru'wo ru na ru fwoshi. M mama zasa ya o.

⁹Nazhɛ Ngaa hwụjɛ rụhwụŋ ru bwa, aka na tu Ngaa hwụjɛ rụ, Ngee leyi Ngee ubi eshe na cɛnjɛ M meme mepi shi ya tebiye o.

¹⁰Nazhɛ u'ala uko n ishicinjɛ wee n shikicinji, i'ɛlɛ mi no shilulo shi mi kaa shi ta zhɛgɛda waa.

¹¹Nazhɛ butumwa ata n hiɛŋ, A-Daniɛl, Agwatana mo bu lubo duwa. Ishijɛ maa shikono, shɛlaga n-ndumwa mu ga Ngɛɛ zhɛ mo bu mbiso tebiye; iwɛnɛ ta a n tumwanɛ utumwa no ofwo bu. Aka na tu baa jɛmɛ iwɛ gɛ, Ngɛɛ ishijɛ Ngee shikeni to, ama N ta zhɛgɛda waa kaa.

¹²Nazhɛ boo to tuhwulo, bɛɛ hiɛŋ, A-Daniɛl, ta nda inyɛsɛ o. Agwatana hwugwa adua bụ te kwuni taa nụ ụjita ata uhiiŋ obu hoŋswo maa meme zucinje na agba Agwatana iwɛ maa ti'eshicigo tụ bụ, tụ bụ 'yagana ule no olugwo Agwatana. Tɛzhajɛ ti mi tɛ shɛ ajɛshɛgwa adua bụ.

¹³Ama uhiu cɛnjɛ-ta-tugwama ti Pɛsia[19] n kepeni uhwaŋna ijitɛ woshi-nu-boo-ko. Nazhɛ ga Maikɛl ata shɛ bụtụ bu ko na ashashɛ ehiu atumwa Agwatana azuba zhajɛ maa mo m mbiyono, iwɛnɛ po Ngooko ɛɛ gɛnjɛ, Ngaa namɛ apata na agwuma Pɛsia.

¹⁴Hwuwayɛ go, N zhajɛ maa mo bu eshicigono iyi nɛ zhɛ yo vwutono atwa bụ geri-be-eshe. Iwɛnɛ po ozobu ata a ta shɛ iwɛ geri-be-eshe.

¹⁵Aka na baa dumanga n-ndumwa mu ga ne mi, Ngee zucinje eshe mi na cɛnjɛ, N dumanɛ shɛ kaa iwɛ ye elele o.

¹⁶Nazhɛ butumwa ba Agwatana ba azuba na shɛ gana butugwumwa ndɛrishinjɛ u'ala ubwa bee timengeni ihwumbwe mi. Nazhɛ Ngee ushije unu mu Ngee kwuni n-ndumwa. Ngɛɛ hiɛŋ bụtụ ata shikeni nu umbe mu, Iyɛri mi, ozobu ga aba po Ngee lwegeji tebiye, ibɛ po tɛzhɛgɛda ti mi tu hwuwowu su.

¹⁷Gana naa Gamba na n shɛ gana yɛu bu ugondu eri ba duma n-ndumwa na bụ na shɛ iyɛri mii? N zasa ya kaa ikɛnyi o, ɛdicɛ kaa Ama hwungwa ya.

¹⁸Ibɛ po bụtụ ata na shɛ gana butugwumwa n timengeni sasana, nazhɛ Ngaa 'yajɛ ya ikɛnyi.

¹⁹Bɛɛ n hiɛŋ, Agwatana mo bu lubo duwa, ta nda ya inyɛsɛ o; ga amɛ bu lemi ya! 'Yaga ya ikɛnyi; ima-isɛbwɛ tebiye. Aka na baa duma iwɛ gɛ ne mi, Ngee keeni ikɛnyi ti'yaga, Ngɛɛ hiɛŋ bụ, Iyɛri mi, Duma ya iwɛ; iwɛnɛ to obu m pwonuo ikɛnyi.

²⁰Nazhɛ bɛɛ hiɛŋ, Bi mepi ecilo no po Ngaa zhajɛ hŋ? Hwuwayɛ go N zhɛ mo gwulo maa ma sukakana uhiu wa atwa Pɛsia. Aka na Ngee hwuri ugwulwo, nazhɛ uhiu we Egrik zhɛ wa zhajɛ.

²¹Ama tuba N zhɛ mo bu mbiso tugwo iyi tɛkana nɛ ee 'nyeci nu utakada ata. I zasa kaa bụtụ be elele na m mbiyeni maa ta sukakana aŋ o, semi ga Maikɛl na shɛ uhiu wa atumwa Agwatana azuba atwa bu Isrɛl kiri.