Read bassa DANIƐL 5 Bible Online

DANIƐL 5 - bassa bible

DANIƐL 5

¹Jito oko nụ ụrụmɛ, Agwuma gɛ Bɛlshaza njɛ iyimɛyɛ isene i'wɛtwɛ, baa suyanɛ atwa akpakwụ-a-ta (1,000) a na shɛ atwa nzeci; ee kwuni ya mayaga tuswa hwɛɛ aba.

²Aka na ti gɛ Bɛlshaza ta swa mayaga, bee peni atwa unu maa ge suje ekwepi keeni nkolo ma azhɛnarɛya keeni azụrụfa anaa na bishi bwa[8] gɛ Nɛbukadnɛza bɛcinjɛ la nu umwono wa Agwatana na namɛ nu Jɛrusalɛm, iwɛ maa ubwa, na atwa ubwa nzeci, ne eyikwo ubwa keeni eyikwo ubwa magɛgashɛ e swe mayaga na aba.

³Gwunu ata ee suje ekwepi keeni nkolo ma azhɛnarɛya na azụrụfa a na ɛɛ bɛcinjɛ la nu umwono wa Agwatana na namɛ nu Jɛrusalɛm; ibɛ agwuma, na atwa ubwa nzeci, ne eyikwo ubwa keeni eyikwo ubwa magɛgashɛ swe mayaga na aba.

⁴Gana na te e swe mayaga ma ata, aa shɛtana ya tuwa ta azhɛnarɛya, na ma tu tu azụrụfa, na ma tu utumburɛ, na ma tu tu ụshɛmbɛrɛ, na ma tu tu ụ'wụ'wụ keeni ma tu tu utayɛ.

⁵Gwunu ata ivwɛ u'ala bụtụ banɛ yee 'nyeci ti'nyeci no tugbolocongo tụ ụdatụ umwono umwamwa wa agwuma, to dongonu uteburu ụsụtụla. Agwuma kaa ngbaracɛ tu u'ala ata wa nda ti'nyeci.

⁶Ibɛ po agwuma heshigeni eshe ubwa, ohwulu herikeni bu, ivwunɛ ibwɛ lwegeji, shilulo shɛ bwa sha zhɛgɛda rekpe rekpe.

⁷Ibɛ po agwuma keri n'ungwa maa ga suyanɛ anjɛ-tishino, na awa-inibi keeni ashɛjɛ, bee mbishi atwa ata ti'inta Babulon, bɛɛ hiɛŋ, Bụtụ be elele na rɛcɛ hwayɛ ti'nyeci tu ga, na kaa m mbishi ecilo tuba, ɛ zhɛ o urugono bu utogwo uduhwa ushenje, ɛ zhɛ kaa a shana bu shɛgba sha azhɛnarɛya ni i'ilu ibwɛ; ubwa kaa zhɛ ba sha bụtụ bu tatụ na atwa na shɛ ehiu cɛnjɛ tu ga hwɛɛ.

⁸Nazhɛ atwa ti'inta agwuma teni hwɛɛ aba; ama e eri shi a rɛta ti'nyeci ta ata o, okwo ecilo tuba e eri shi o mbiso bu o.

⁹Ibɛ po ohwulu keeni agwuma Bɛlshaza tuhorukono tebiye, eshe ubwa zhɛshɛ okwo cwɛŋ o; shihaŋsa sha atwa ubwa nzeci shɛ garatagwụ hwɛɛ.

¹⁰Nazhɛ bino ba agwuma hwụjɛ rundu ra agwuma keeni azhɛgba ubwa, bee teni nu urubwo ata ee tileni aa swa mayaga. Bɛɛ hiɛŋ, Oo agwuma, ya urugbo unyizo-nom! Kede ohwulu ubu horukono! Ta hashɛgana kaa du eshe bu o!

¹¹Bụtụ bu ko namba na cɛnjɛ-ta-tugwama tu ga tụ bụ na Mpiala ma Agwatana tijilo mu namɛ na amɛ ubwa. Aka na ge shibi shɛ la agwuma, o to uhioko-uhwaŋna, na ti'inta keeni ti'eshicigo ta Agwatana ugbe no olugwo bụtụ ata. Ibɛ po bishi bu gɛ Nɛbukadnɛza njɛ bu uhiu wa ashɛjɛ, na anjɛ-tishino keeni awa-inibi, ta atwa ti'inta hwɛɛ.

¹²Ga Daniɛl ga aa kwụbɛtanɛ mpiala mi biye, ni iyi-tumapa, ni iyi ti'eshicigo, ne ecilo awalabụ tụdụma, keeni iyi nɛ sukwutogwu ugbe tɛta na amɛ ubwa ta, ubwa shɛ bụtụ ata agwuma keeni izeci ti gɛ Bɛltɛshaza. Tumwana maa a suyanɛ bụ, bi zhɛ ma bụ bacɛnganɛ ecilo ibɛ hwɛɛ.

¹³Nazhɛ ee tecinje Daniɛl na agba agwuma, agwuma hiɛŋ Daniɛl, Gabụ suu bɛ shɛ ga Daniɛl ata namɛ na ashashɛ miaụŋ mu Juda na bishi mi imɛ?

¹⁴N hwụjɛ iwɛ bụ maa Mpiala ma Agwatana tijilo mu namɛ na amɛ bụ, ibɛ po oo to uhioko-uhwaŋna, ne ti'eshicigo keeni ahaŋsa ebiye ugbe na amɛ bụ.

¹⁵O go sugwo atwa ti'inta keeni anjɛ-tuwa hwuwayɛ go na agba mi maa a rɛcɛ ti'nyeci tɛ ga, iwɛ maa du e m mbishi ecilo tuba; ama e eri shi mo m mbiso ecilo tuba o.

¹⁶Ama N hwụjɛ unabarɛ bụ maa bi eri bɛ bɛcinjɛ ecilo iyi, ebi eri kaa ba ta iyi nɛ sukwutogwu ugbe. Yaa shɛ ebi eri ba rɛta hwayɛ ti'nyeci tɛ ga, maa m mbishi ecilo tuba; asha ɛ zhɛ mo bu hwuŋtono utogwo uduhwa ushenje, ɛɛ zhɛ kaa ma bu shana shɛgba sha azhɛnarɛya ni i'ilu, gabụ kaa bi zhɛ ba sha bụtụ bụ tatụ ne ehiu cɛnjɛ tɛ ga hwɛɛ.

¹⁷Ga Daniɛl jishijɛ agwuma, bɛɛ hiɛŋ, Untangana apwaŋ bụ iwɛ ikɛnyi bu, kwo kaa pana binya bụtụ ule bu. N zhɛ kaa tuba ma bụ rɛtanga ti'nyeci tɛ ga maa mo bu mbiso ecilo tuba.

¹⁸Oo gabụ agwuma, Agwatana na Hwuri Kpaaŋ peni bishi bu gɛ Nɛbukadnɛza cɛnjɛ-ta-tugwama tu ga keeni tugombo ta tuba keeni ụjɛrụma u tuba.

¹⁹Iwɛnɛ ti bee gembicinji bu duwa duwa, ibɛ po atwa elele a zhɛgɛdaga, te edenji elele keeni rɛjɛmɛ swoswoswo, a sụmɛ bụ la inyɛsɛ. Atwa na kwụlanɛ bụ maa kwụna ba kwụna aŋ, atwa na kaa kwụlanɛ bụ maa a nama, ba ganga aŋ; atwa na kwụlanɛ bụ maa gombicingo bo gombicingo aŋ, atwa na kwụlanɛ bụ maa zucinje, be zucinje aŋ.

²⁰Ama aka na tu baa nda unyangana na amɛ ubwa, baa ta tɛshɛshɛpana, baa mama sata, ibɛ po ee peshinji bu ni idwɛtwɛ tugwama tu bwa, ee leshiji du tụ ụjɛrụma ubwa.

²¹Iwɛbɛ po ee becinji bu na ashashɛ atwa, aa njɛ ahaŋsa ubwa gana a na usunda ehilo, baa namɛ ni ilibɛ ne ehilo, baa ya ambɛ gana buna, ibɛ cime to zwogono bu na tu'waba; uuwa i ci aka na bee mepi maa Agwatana na Hwuri Kpaaŋ ubwa 'yajɛ ụhwada cɛnjɛ-ta-tugwama ta atwa elele, maa kaa bi eri ba pana tụ bụtụ be elele na kwụlanɛ bụ.

²²Ama gabụ yɛu ibwɛ gɛ Bɛlshaza, okwo te ebi mepi ijɛ hwɛɛ, bi meme zucinji shi waa kaa o.

²³Ama bi meme mungicinji, aba sukakana Agwangwama azuba. Ɛbi bɛcinjɛ i'wɛŋni'wɛŋni umwono ubwa iwɛ maa hi na swa mayaga ni ibɛ, tu gabụ, ta atwa bụ ụjɛrụma, te eyikwo bu, te eyikwo bu magɛgashɛ. Aba shɛtana tuwa tụ bụ ta azhɛnarɛya, na ma tu tu azụrụfa, na ma tu tu utumburɛ, na ma tu tu ụshɛmbɛrɛ, na ma tu tu ụ'wụ'wụ keeni ma tu tu utayɛ, tu na kaa ti hieci shi uhwaŋna, tụ hwụjɛ shɛ iwɛ, ti mepi shi iyi. Ama bụ mụnɛ shɛ kaa Agwatana na ihwungwɛ bu namɛ ni i'ɛlɛ ibwɛ, na kaa ba untangana iyi elele nɛ aba nda ụjɛrụma o.

²⁴Iwɛbɛ po baa tumwanɛ u'ala ga maa u 'nyeci ti'nyeci tɛ ga.

²⁵Ti'nyeci ta ata ee 'nyeci ti hiɛŋ, MENE, MENE, TEKEL PASIN.

²⁶Ecilo n-ndumwa ma ata na: MENE: i shɛ, Agwatana rutwa ijitɛ tugwama tụ bụ, baa kwunuangwa tụ.

²⁷TEKEL: i shɛ, O bu mongwo ne bimenji, o towo ugbe maa bi ci shi o.

²⁸PERES: i shɛ, O dwotwogwonowoŋ cɛnjɛ-ta-tugwama tụ bụ ee peni atwa Mɛdɛn keeni atwa Pɛsia.

²⁹Nazhɛ gɛ Bɛlshaza peni miaụŋ-mu-ugondu ubwa unu gwunu ata maa ge urigeni Daniɛl utogwo uduhwa ushenje, a shanɛ bụ shɛgba sha azhɛnarɛya ni i'ilu ibwɛ, maa e enenji iwɛ ubwa hwɛɛ maa ubwa zhɛ ba sha bụtụ bụ tatụ ne ehiu cɛnjɛ-ta-tugwama tu ga.

³⁰Nụ ụrụmɛ ata ga kaa gom aa kwụnɛ Bɛlshaza agwuma Babulon.

³¹Ga Darius, Bumidia ata na shiywa shɛ bwa shɛ namɛ dupu-ne-eshe-umpwa-na-shɛba-shi-yebi (62) te e meci bu, leshiji cɛnjɛ-ta-tugwama ta ata.