Read bassa DANIƐL 9 Bible Online

DANIƐL 9 - bassa bible

DANIƐL 9

¹Tu ga Darius yɛu Ahasuerus[11] na shɛ Bimidia, yɛ tugwama tu Babulon yaa namɛ uywa uko,

²Nazhɛ Gamba ga Daniɛl, Ngee mepi ya ufwugwo shiywa shɛ na Jɛrusalɛm zhɛ wa sha osombo tedure na atakada na Ngaa rɛcɛ nu gana na ta AGWANGWAMA mbishi la Jɛrɛmia bigesere ata. Ibɛ shɛ shiywa dupu-nu-woshi (70).

³Nazhɛ Ngee shepi eshe Ngaa mbiyanɛ AGWANGWAMA na shɛ Agwatana, Ama nda adua, Ama tabwa bụ, ne ezumi tɛnda no tugwuno tụ ụcɛnjɛ tɛnda tu'urugono keeni ma'alụ tumama dula.

⁴Ngaa njɛ adua no ofwo AGWANGWAMA na shɛ Agwatana mi, Omo lono kaa du unu iwɛwɛ ya atwa mi, Ngɛɛ hiɛŋ: Oo AGWANGWAMA, gabụ Agwatana ụ'wụtụ 'wụtụ, ta bụ muna ụjɛrụma. Gabụ kaa ba untangana unu bu tutwa keeni tulubo tụ bụ ti biye no ofwo atwa na mo bu lubo a na kaa a nda iyi nɛ ebi peni aŋ unu ibɛ,

⁵Tɛ njɛ iwɛwɛ, tu 'wanjɛ. Tɛ shɛ ogworozwo, atɛ njɛ kaa tigezhe; tụ vwụrɛ eti genji unu bu tụpana keeni andwa bụ.

⁶Ti shiri shi kaa acɛbɛ tu na miaụŋ mụ bụ mu ugondu mu na mɛ shɛ egesere bu, a na o mbiso shɛgwuma shi tu, ne ehiu tu, ne eshi tu, keeni atwa cɛnjɛ tu ga hwɛɛ iwɛ ni izeci bu o.

⁷Oo AGWANGWAMA, gabụ bɛ shɛ bụtụ bi tiririri, ama atuba ti meme sugeni ụpụrụsa ga. Inɛ gɛ i shɛ iwɛ-tɛkana no ofwo atwa na jɛjɛ nu Juda, ta atwa na jɛjɛ nu Jɛrusalɛm keeni atwa Isrɛl elele na ebi gereteji na cɛnjɛ cɛnjɛ tu na tu gwumwongonu keeni ma tu na tụ dụlụmɛ, iwɛnɛ atụ bụ shanɛ shɛ atwa tɛcara.

⁸Oo AGWANGWAMA, ezuye tɛ 'imɛ, ta shɛgwuma shi tu, te ehiu tu, te eshi tu, iwɛnɛ atụ bụ njɛ iwɛwɛ.

⁹AGWANGWAMA na shɛ Agwatana tu, okwo ta atụ bụ ndanɛ tigezhe, gabụ kaa bo hioko inyɛmɛnyɛmɛ ya atwa bụ maa gengeni aŋ.

¹⁰Tụ hwụjɛ shɛ unu bu, gabụ AGWANGWAMA na shɛ Agwatana tu, maa ta untangana undwa na ebi ti peni tedure na miaụŋ mụ bụ mu ugondu a na shɛ egesere o.

¹¹Atwa Isrɛl hwɛɛ bweji undwa bụ, na tuvwula tu na aa vwụrɛ aa lacɛ maa a hwụjɛ-unu bu. Iwɛbɛ po ụshɛrɛya, nu unu-tukalana keeni tuwa-tuta tu na ti 'nyeci nu undwa Moses yɛu ɛtɛ bu ugondu ɛtɛ 'imɛ iwɛnɛ atụ bụ njɛ iwɛwɛ.

¹²Gabụ bụ ụrụcɛnjɛ n-ndumwa ma ata abɛ jɛmɛ la no ohiuhiu tu, tedure nu ufwu tɛnda na ebu tu sugeni te hwuleji. Ebi peni Jɛrusalɛm ulwapɛ na hwuri ụshɛpwụ we elele na namɛ na cɛnjɛ tu unyizo ga.

¹³Ulwapɛ ata zhajɛ no ohiuhiu tu te teni cɛŋ nu gana na ti yee 'nyeci nu undwa Moses hwɛɛ. Oo AGWANGWAMA na shɛ Agwatana tu, ti mekeni shi okwo tumakana maa to bu lomicingo amɛ tedure ni iwɛwɛ tu tɛganga kwo kaa maa ta 'wa iwɛ-tɛkana bu o.

¹⁴Oo AGWANGWAMA na shɛ Agwatana tu, gabụ kaa bi imanjɛ maa iti peni ulwapɛ ga, bɛ njɛ iŋ kaa iwɛnɛ ti iyi elele nɛ aba nda teni cɛŋ, iwɛnɛ atụ hwụjɛ shɛ unu bu.

¹⁵Oo AGWANGWAMA na shɛ Agwatana tu, gabụ bu bɛcinjɛ la atwa bụ na cɛnjɛ ti Ijipti nu ukpahiŋ bụ, abu 'yajɛ kaa izeci tutu i ci hwayɛ ga. Tɛ njɛ iwɛwɛ, atɛ njɛ tugworozwo.

¹⁶Oo AGWANGWAMA, gabụ bi lesheji la atwa bụ cala, iwɛ inɛ ɛtɛ, ta uranga ya isɛbwɛ bu tɛnda nu Jɛrusalɛm. Gabụ bi 'yajɛ ụshɛpwụ ga keeni ishɛmɛ ɛtɛ tijilo. Atwa elele na namɛ na cɛnjɛ cɛnjɛ ti nya, a ngbaracɛ Jɛrusalɛm keeni atwa bu cwɛŋ iwɛ iwɛwɛ keeni iyi iwɛ nɛ eshi tu njɛ la.

¹⁷Oo Agwatana tu, hwuwayɛ go, hwuga ya adua mi keeni tutabwa tu na Ama bu tabwa, maa gwuricinje eshe bu maa a na ta no ohwolu ga bu tijilo a na ga shɛ osombo.

¹⁸Oo Agwatana mi, shilo acɛbɛ bụ maa hwụjɛ; utu mbiyanɛ maa kwụbɛ ụbaụta na etu zweni nu bwa keeni amɛ-tụhaŋtụ na namanɛ ụshɛpwụ ga aa suyana izeci bu nu bwa. Shɛ iwɛnɛ ata nda iyi tiririri upo ata bụ tabwa o, semi iwɛ inyɛmɛnyɛmɛ ɛtɛ bu i'wɛtwɛ.

¹⁹Oo AGWANGWAMA, hwuga iwɛ tu! Oo AGWANGWAMA, iti gengeni! Oo AGWANGWAMA, shilo acɛbɛ maa njɛ kakayɛ; ta nda ti'insu o, iwɛ maa bụtụ be elele mepi maa gabụ bɛ shɛ Agwatana! Gabụ kaa bi 'yajɛ ụshɛpwụ ga ta atwa na zweni nu bwa.

²⁰Aka na Ngaa ta nda adua, Omo lono-unu iwɛwɛ mi keeni iwɛwɛ ya atwa mi Isrɛl, Ama tabwa kaa AGWANGWAMA na shɛ Agwatana mi iwɛ maa hicinjɛ Umwono ubwa tijilo.

²¹Aka na Ngaa ta duma iwɛ na adua mi, ge Gebrɛl, na Ngaa kwụbɛ la no ozobu ala ihiiŋ, hirɛ ngawụụ, baa zhajɛ pi mi na aka ụrụpɛ ụrụmɛ.

²²Baa zhajɛ, bɛɛ n hiɛŋ, A-Daniɛl, M banɛ Ngaa zhajɛ hwuwayɛ go maa ma bụ pana ti'inta maa eshiciji tigesere tɛ ga.

²³Aka na ebu kwuni Agwatana tutabwa, bɛɛ bi jishijɛ, ibɛ po Ngaa zhajɛ maa Mo bu mbiso ajɛshɛgwa ata. Bo bu lubo duwa, iwɛ inɛ ɛtɛ no shilo acɛbɛ maa eshiciji iwɛ ozobu ata Omo bu mbiso.

²⁴Shiywa sha ata shi cenje kpalụ dupu-nu-woshi[12] shɛ shɛ ụnjɛswa wa aka na Agwatana jwe maa tufwurungo atwa bu keeni ụshɛpwụ ata bụ u tijilo maa e beni ni iwɛwɛ keeni undwa ata wa aba tubwada. Ɛ zhɛ a gangana aŋ iwɛwɛ ya aba maa e shikicinji tiririri tu unyizo-nom, iwɛ maa ozobu ata keeni tigesere ta ata ti sɛ, maa a njɛ umwono wa Agwatana shɛshɛshɛ sasana.

²⁵Mapa, maa eshiciji iŋ maa: te kwuni na aka na te e peni-unu maa ge meeneni Jɛrusalɛm, uuwa i ci aka na uhiu na Agwatana teri[13] zhɛ wa zhajɛ, shiywa shi cenje kpalụ cenje[14] shi zhɛ sha kashɛka. Ɛ zhɛ kaa a maanana Jɛrusalɛm, u zhɛ wa 'yaga ikɛnyi, wɛɛ zhɛ kaa wo shikono shiywa shi cenje kpalụ dupu-ne-eshe-umpwa-na-shɛba-shi-yebi,[15] ama aka ata zhɛ a sha aka amɛ-tụhaŋtụ.

²⁶Nu ukwunanga u tụkwụna ta alaacɛ tu uhiu ata na Agwatana teri, ejeshi uhiu ata ukpahiŋ zhɛ a nda ụshɛpwụ ata, tu Umwono ata wa Agwatana ufwu. Ukwunanga ibɛ we ci gana na te meni ma zhagajɛ, ɛ zhɛ a 'waŋnɛ ujasa keeni ofwo ti'iricingo unaa na Agwatana ga imwangwa.

²⁷Uhiu ata zhɛ wa twa-unu na 'yajɛ ikɛnyi na atwa ofwugwo shiywa shi cenje,[16] aka na ta ashashɛ aka ata henici, bi zhɛ ba kapa uhwaŋna wa arụpɛ keeni apwaŋ tu'waŋnɛ. Ɛ zhɛ kaa o shilo iyi-tupwaŋ nɛ ya sha bụtụ inyɛsɛ ne eririri ukerikeje Umwono wa Agwatana, i zhɛ kaa ya nama apata uuwa i ci aka na bụtụ na peteni iŋ apata ci ukwunanga na Agwatana ga imwangwa iwɛ ubwa.