Read bassa HOSIA 10 Bible Online

HOSIA 10 - bassa bible

HOSIA 10

¹Atwa Isrɛl shɛ gana ukparɛ ufwafwa na 'weri la tebiye. Ama gana na ti iyi ya kaana aŋ tɛzhɛmana, gobwonu du aa kaana otukwu-ụrụpɛ tuma. Gana na ta cɛnjɛ ta aba ta kaana ugombo, gobwonu du aa kaana ntatanuwaŋ mu na mu pilanụ tumama shabana, maa a na zhɛba mụ.

²I shɛ tilɛɛ maa e peni atwa ata a shɛ ehelekeci n-ndumwa-tụwụma iwɛ iwɛwɛ nɛ aa ndanjɛ. Agwatana[28] zhɛ a bwarataga otukwu ata aba ụrụpɛ, maa iricingo ntatanuwaŋ ma ata ma aba ee ge shebi.

³Aka fwalaa atwa ga zhɛ ɛ hiɛŋ, Tu zasa agwuma o, iwɛnɛ ta atɛ njɛ shɛ inyɛsɛ ya AGWANGWAMA. Ama okwo atɛ 'yajɛ agwuma, imbe kwuŋ du bɛɛ zhɛ ma tu ndanaa?

⁴N-ndumwa mo hondo aa dumanga, oo shilogo-onu ụzagwụ keeni unu-tutwa na te shi eshe. Orugwusu aba a kaana gu ugombo, gana ambɛ na 'yajɛ mangayɛ mụ 'wụtụ, anaa na unshɛ no okporo igwunɛ.

⁵Atwa na jɛjɛ nu Samaria zhɛ a nda inyɛsɛ, ɛɛ zhɛ a ta-ụkwụla, iwɛnɛ ta a vwụnjɛ yɛu buna[29] ba azhɛnarɛya ni Bɛt-avɛn. Ta aba, to onongbo na ga ndana itɛtɛnuwɛŋ ɛtɛ iyi, ɛ zhɛ a twana iŋ u'wo. Ɛɛ zhɛ mama 'waŋ na cɛnjɛ iwɛnɛ te e shepi iŋ ee hwuri na ti'ima.

⁶Ɛ zhɛ a shapa itɛtɛnuwɛŋ ɛtɛ a zha na Asiria, maa e peni iŋ uhiu tugwama tụ 'wụtụ upwaŋ. Ezuye kaa zhɛ a sha atwa Ifrem, ụpụrụsa tuba zhɛ wa sha atwa Isrɛl, iwɛnɛ aa 'wa ahaŋsa na ee heŋshi ni ikɛnyi aba.

⁷Ɛ zhɛ a shapa agwuma Samaria gana na itekwu ya shapa ụhaŋtụ ụ'wụtụ na patanɛ na azuba ibɛ.

⁸Ɛ zhɛ a nda ihiŋhiŋ tikpekwu tu na tu namɛ na Avɛn no ofwo ata wa atwa Isrɛl a nda iwɛwɛ ufwu hwɛɛ. Esepi keeni okolokwu-shɛngala aba zhɛ ɛ unshɛ ya no otukwu ata aba ụrụpɛ. Nazhɛ atwa ata zhɛ ɛ hiɛŋ tilegbe, Iti intanɛ ma! Ɛɛ zhɛ ɛ hiɛŋ tikpekwu, Utu uregeni ma!

⁹Oo ahiɛba atwa Isrɛl, hi genji shi iwɛwɛ tɛnda, te kwune la hwayɛ ni Gibia o. Shɛ iwɛbɛ hŋ po ujasa zhɛ wo vwutono aŋ ni Gibia?

¹⁰N zhɛ ma sukakana[30] anjɛ ga iwɛwɛ, maa ma pana aŋ ulwapɛ. Edenji zhɛ momo togotogwu maa a sukakanɛ aŋ, ɛ zhɛ a pana aŋ ulwapɛ iwɛ iwɛwɛ ya aba ifwugwo nɛ aa ndangana.

¹¹Ge Ifrem shɛ la gana usemberi buna na ee mbisegeni ugondu tɛnda tebiye, na kaa bo lubo la iyimɛyɛ izɛgwu turukoto. Ama N heŋshi maa Ma patana bụ ụ'wụ'wụ ni i'ilu[31] ɛtɛ ibwɛ i pilanụ.[32] Ngaa njɛ ụlamụ Juda maa a na hwaŋ itimɛ, Ngaa njɛ ụlamụ Isrɛl maa a na bwarataga alakpa ni ikɛnyi aba.

¹²Shikicingo ma tiririri, maa hi cwi tụ'walụ[33] to tulubo ti tikpeke, bwarataga ma cɛnjɛ ti itimɛ hiŋ tu na aa hwɛŋ shɛ. Iwɛnɛ ta aka ci ya maa hi dwelekeci AGWANGWAMA, maa zhajɛ, maa mo hi dudugono tiririri gana eshilo.

¹³Ama hiɛ bɛrɛ iyi iwɛ, ehi gwubi ya orugwusu. Hiɛ yɛ tụ'walụ tu na ụzagwụ meci. Iwɛnɛ ta ahiɛ patanɛ ihɛŋtu hiŋ ujasa rishe, keeni unyama wa asaza hiŋ a na 'yajɛ ikɛnyi.

¹⁴Iwɛbɛ po ujasa zhɛ wa zhaganɛ atwa bụ, ɛ zhɛ kaa a nda uba bụ ufwu hwɛɛ. I zhɛ ya sha hwuŋ gana ụjita ata agwuma ga Shalman[34] njɛ la ụshɛpwụ ata ụ'wụtụ ɛɛ hiɛŋ Bɛt-abɛl ufwu nu ujasa. Ee bwereteji ono miaụŋ na cɛnjɛ, ta miaụŋ ma aba hwɛɛ.

¹⁵Ahiɛba atwa Bɛtɛl,[35] iyi gɛnɛ ɛtɛ ibɛ du zhɛ ma hi zhaganɛ hwuŋ, iwɛ tugworozwo ti hiŋ tụ 'wụtụ tu na ahiɛ njɛ. Ɛ zhɛ a nda agwuma Isrɛl ufwu hwɛ hwɛɛ.