Read bassa HOSIA 11 Bible Online

HOSIA 11 - bassa bible

HOSIA 11

¹AGWANGWAMA hiɛŋ, Aka na ge Isrɛl ta shɛ la yɛu ticwɛŋ, N lubi bu, Ngaa suyanɛ bụ maa yɛu mi ye eyi nɛ banɛ ni Ijipti.

²Ama nu gana na ta Ama kaana aŋ tusuyana,[36] gobwonu du kaa oo mo n gozhigono.[37] A uranjɛ ụrụpɛ tuta na tuwa ti Beal, oo hwoŋzhingono ntatanuwaŋ iturɛre.

³Gamba m mbisegeni Ifrem tahaŋnụ tizha, Ngaa 'waŋnɛ atwa ubwa na aragbamụ mi;[38] ama ee mepi shi waa kaa maa Gamba n nɛnjɛ aŋ o.

⁴Gamba mɛ mbɛ aŋ ni ihwehwe mi iwɛ-tumapa, keeni tulubo tu na ti 'yajɛ ikɛnyi, Ngee peshinji aŋ, ụ'wụ'wụ-i'ilu. Ngee kwuzhi Ngee penenji aŋ iyimɛyɛ.

⁵Ɛ zhɛ o gwulo na cɛnjɛ ti Ijipti, atwa Asiria kaa aba zhɛ a sha agwuma aba, iwɛnɛ ta a lacɛ tugwure pi mi.

⁶Otokwobi, aba zhɛ a kaba ashɛpwụ aba a'wụtụ a'wụtụ hwɛɛ. Ɛ zhɛ kaa o hwuŋzotongo shidubo shɛ uba. Ujasa ata zhɛ wa kapana tuhaŋsa ta aba[39] uhwaŋna.

⁷Atwa mi vwụrɛ ee n genji, okwo aa suyanɛ aŋ no ofwo Bụtụ ata na Hwuri Kpaaŋ, i zasa kaa bụtụ be elele na zhɛ bo gombicingo aŋ kwukwuŋ.

⁸Oo ahiɛba atwa Ifrem, gana naa Ngee eri ma hi lakaa? Oo ahiɛba atwa Isrɛl, gana naa Ngee eri ma hi gangaa? N eri mo hi iricingo suu gana na Ngee iricinji la atwa na jɛjɛ na Adma? Kwo kaa gana na Ngaa njɛ la atwa na namɛ ni Zɛboim? Amɛ mi zha shɛ o lono maa ma hi nda gana ata o, tulubo tu na Ngee hi lubi tu hwuleji ugombo.

⁹N zha shɛ ma hi pana ulwapɛ i ci gana na ti isɛbwɛ mi namɛ o, N zha shɛ kaa mo iricingo ya atwa Ifrem o. Iwɛnɛ po Agwatana Ngaa shɛ, shɛ butugwumwa Ngaa shɛ o, Gamba Bụtụ bi Tijilo na namɛ na ashashɛ hiŋ na, N zha shɛ ma zhajɛ ya pi hiŋ ni isɛbwɛ o.[40]

¹⁰Ɛ zhɛ a 'wa AGWANGWAMA, bɛɛ zhɛ no ngwulono gana bizeci, aka na bee ngwuleni, miaụŋ mu bwa mi zhɛ ma banɛ geri bu uwaŋna-twonuo, ma zhajɛ pu bwa na tɛzhɛgɛdaga.

¹¹Ɛ zhɛ a banɛ ni Ijipti a zhajɛ na tɛzhɛgɛdaga, gana shanụnụ, ɛɛ zhɛ a banɛ na Asiria a zhajɛ, gana nkworukwo. N zhɛ me jicinje aŋ nu nhwaŋ ma aba sasana. N dumwa Gamba AGWANGWAMA!

¹²AGWANGWAMA hiɛŋ, Atwa Ifrem, e n hweri, oo n rungwutwonu nụ ụzagwụ, inɛ ihwɛ Isrɛl i shɛ na tuhalakaka. Ama Agwatana te mepi atwa Juda waa, a ta shanɛ kaa Bụtụ ata bi Tijilo atwa tɛcara.