Read bassa HOSIA 13 Bible Online

HOSIA 13 - bassa bible

HOSIA 13

¹Na aka ihiiŋ la, aka elele na tụ ụlamụ Ifrem dumanɛ iwɛ, alamụ Isrɛl a na vwɛ a nda inyɛsɛ, aa muna aŋ ụjɛrụma. Ama taa ta a njɛ iwɛwɛ, iwɛ tuwa ti Beal tu na aa zhɛba, ibɛ po ɛɛ zhɛ o 'wo.

²Atwa Ifrem uranjɛ iwɛwɛ tɛnda tedure nu ntatanuwaŋ mu na atwa tugwoni njɛ, ibɛ shɛ tuwa ta ata ta azụrụfa, i'ɛlɛ butugwumwa kaa njɛ mụ. Nazhɛ ɛɛ hiɛŋ ya, Tana iŋ ma ụrụpɛ! Kwutongo ma unu na tuwa tu ga aa njɛ gana buna.

³Iwɛbɛ po atwa ata zhɛ a sha gana uzhikwozhikwo na wa nda nu uvwungwa, keeni cime tu na ta gbatụ tu'waŋ nu uvungwa dididi. Ɛ zhɛ a sha gana afụrɛkɛcɛ na uvwugo wa hiɛrɛcɛnga na akpakpata, kwo kaa gana nshikwo mu na ma bana na agbahwụ.

⁴Gamba n shɛ AGWANGWAMA na shɛ Agwatana hiŋ, na ihi bɛcinjɛ la na cɛnjɛ ti Ijipti. Hi zasa Agwatana anya o, semi Gamba. Ngooko kaa kiri N shɛ bibicinji hiŋ.

⁵Gamba ma hi ngbaraka la nụ ụshɛka, na cɛnjɛ ta ata tu hwoo.

⁶Ama aka na ahia ya iyimɛyɛ ohio shigo,[42] iyi elele ihi gembi ya, ahia kaana ya tumama sata. Ibɛ po isɛbwɛ mi ihi 'wi ya.

⁷Iwɛbɛ po Ngɛɛ zhɛ ma shana aŋ gana bizeci, N zhɛ mo ubono ni ipɛlu uhwaŋna maa mo hi gwubogo gana ugebi.

⁸N zhɛ mo ubo aŋ gana ucwee na ee suji miaụŋ mu bwa. N zhɛ ma aŋsatanga iyi nɛ ee uregeni shɛgba sha aba. N zhɛ ma twala aŋ apata, gana na bizeci ba twala iyi, kwo kaa gana isundɛ ehilo nɛ zhɛ ya aŋsatanga aŋ.

⁹Oo ahiɛba atwa Isrɛl, N zhɛ mo hi iricingo, gaaba tɛ zhɛ me hi mbiyonoo?[43]

¹⁰Cee agwuma hiŋ[44] na tɛ zhɛ mo hi bicingo namɛ ya hwuwayɛ goo? Cee ehiu hiŋ elele a na tɛ zhɛ ma hi jilanɛ namɛ yaa? Aba shɛ atwa ata ahiɛ lụpɛ la ilupwɛ ya aba, ɛhi hiɛŋ, Iti peni agwuma keeni ehiu.

¹¹N njɛ isɛbwɛ, Ngee hi peni shɛgwuma, aka na isɛbwɛ mi ishijɛ Ngee leshiji shu sasana.

¹²O 'nywotwo iyi iwɛ Ifrem, aa intwanua iwɛwɛ ibwɛ no ofwo na aa swaka iyi.

¹³Ụngwụ-tuhwuga zhɛ wo jitono bu, gana biyikwo na ụngwụ tumata to, ama bɛ shɛ kaa yɛu nɛ incɛ shɛ. Inɛɛ nɛ kaa lacɛ tubanɛ ni igwune tumata.

¹⁴N tɛ zhɛ suu mo bicingo atwa ga ne e'uye? N tɛ zhɛ suu mɛ lɛshijɛ aŋ no tu'wo? O-tu'wo, cee tishikpe tụ bụ tu namɛɛ? E'uye, cee ti'iricingo tụ bụ tu namɛɛ? N zha shɛ ma nda ya inyɛmɛnyɛmɛ ya atwa ga kwukwuŋ.

¹⁵Okwo bee sebi na ashashɛ miaụŋ-mo-bino bwa,[45] uvwugo wa AGWANGWAMA kaa zhɛ wa banɛ nụ ụshɛka geri bu uwaŋna-banụ, wa hwuŋcɛnga ɛmɛzhinjɛ, keeni meni ma aba ma a'ibwa. Mi zhɛ mo sugo uduciyta ubwa wo ogwumishi we elele.

¹⁶Ụshɛpwụ ata wa atwa Samaria zhɛ wa 'waŋna tijama tu bwa, iwɛ tigezhe tu na waa tana Agwatana ubwa. Utokwobi, ubwa zhɛ wa nda iwɛ ubwa. Ɛ zhɛ a pɛpɛtangana miaụŋ ma aba mi shenje na cɛnjɛ. Ɛ zhɛ a bagataga shɛmɛ she eyikwo aba a na 'yajɛ shifubo.