Read bassa HOSIA 14 Bible Online

HOSIA 14 - bassa bible

HOSIA 14

¹Oo ahiɛba atwa Isrɛl, gwure ma pa AGWANGWAMA na shɛ Agwatana hiŋ. Iwɛwɛ hiŋ ihi eni udukwutwa tutwa maa hi leyegeji.

²Sugo ma n-ndumwa mu ga maa hi gwuri pa AGWANGWAMA, hiɛŋ bụ ma, Iti gengeni kaa iwɛwɛ ye elele nɛ atɛ bɛ njɛ, maa iti leshiji tedure ni iwɛ bu tumapa, nazhɛ ɛti zhɛ tu na bụ shɛkanɛ arụpɛ na banɛ ni ihwumbwe tu.

³Atwa Asiria eri shi mo ti bicingo kwukwuŋ, idɛkwɛ ujasa kaa du eri shi ma tu lashaga o. Ti zha shɛ tɛ hiɛŋ ya tuwa tu na atɛ njɛ ni i'ɛlɛ tu, maa tuba tɛ shɛ Agwatana tu o. Oo AGWANGWAMA, gabụ bo hioko inyɛmɛnyɛmɛ miaụŋ-me-e'weteji.

⁴AGWANGWAMA hiɛŋ, N zhɛ ma nɛnga ugwulwo wa aba ukwunyi, N zhɛ mo lubo aŋ arahaŋ. N zha shɛ kaa ma nda ya isɛbwɛ na aba o.

⁵N zhɛ ma shana ya atwa Isrɛl gana cime. Ɛ zhɛ a bwadụ gana tusumbo, ɛ zhɛ a ta tini gana osobu na namɛ nu uwapa Lebanon.

⁶A'walụ ubwa zhɛ a barashagwụ, bi zhɛ ba pilanụ gana ụ'wụ'wụ buta. Ɛ zhɛ a 'yaga nhiụŋ mi biye, gana osobu ata namɛ nu uwapa Lebanon.

⁷Ɛ zhɛ e gwure pi mi maa a nama tuta tu uhwuŋnu mu,[46] ɛ zhɛ na saba gana iyi nɛ aa bɛrɛ ni itimɛ.[47] Ɛ zhɛ na nda tusumbo gana ukparɛ ufwafwa na aa hwɛŋ ni itimɛ, nhiụŋ ma aba mụ ụlatụ mi zhɛ ma sha gana meni ma afwafwa na unshɛ ni Lebanon.[48]

⁸Atwa Ifrem zhɛ hiɛŋ, Imbe ta shɛ inee tu nu ntatanuwaaŋ?[49] N zhɛ mɛ jishijɛ ya shidua sha aba, Ngɛɛ zhɛ ma ima aŋ ya u'ala. N zhɛ ma sha ya uhwuŋnu wa aba gana ụ'wụ'wụ ugwugwa na lemi, na namɛ rumwoo. Tụ'walụ ti hiŋ ti zhɛ tu na banɛ ya no olugwo mi.

⁹Gaaba incɛɛ? Asha ge eshicigo ijɛ hwɛɛ. Gaaba ba manganga iwɛɛ? Ubwa zhɛ ba mapa iŋ hwɛɛ. Iyi elele nɛ AGWANGWAMA a nda, teni cɛŋ, atwa tiririri aba a 'wa iŋ. Ama atwa na a bwada-undwa, a twa udukwutwa ni ibɛ.