Read bassa HOSIA 2 Bible Online

HOSIA 2 - bassa bible

HOSIA 2

¹Hiɛŋ ma miaụŋ-mo-bino hiŋ maa, Atwa mi, maa hi hiɛŋ angwụfwụ hiŋ maa, E hieci inyɛmɛnyɛmɛ ya aba.

²Tabwa ma bino hiŋ, bɛ shɛ shɛ ya biyikwo mi o, N shɛ shɛ ya kaa du bwolo bwa o, go ushigo igbɛtɛtɛ ɛtɛ tuwɛle nu ụpɛshɛka ubwa, keeni uzawa tɛcara tu bwa tu na tu namɛ na ashashɛ mosubo mu bwa.

³Shibwonu, N zhɛ mo shilo bu mohondo gana ụjita ata bino bwa meci bu la. N zhɛ kaa ma nda bụ maa hwotono gana ụshɛka keeni cɛnjɛ tu undolo, N zhɛ kaa ma kwụna bụ ni i'uyɛ.

⁴N zha shɛ kaa du mo hioko inyɛmɛnyɛmɛ miaụŋ mu bwa o, iwɛnɛ tu maa shɛ miaụŋ mu tuwɛle.

⁵Iwɛnɛ po bino ba aba njɛ iyi ye ezuye a'wụtụ. Bɛɛ hiɛŋ, N zhɛ ma 'wa atwa ilubwe mi, anaa na ma m pana iyimɛyɛ keeni meni, tu ukpasa keeni ugbokwo-biywoywo, ta manɛbɛ keeni iyi tuswa.

⁶Iwɛbɛ po Ngɛɛ zhɛ ma kapa uhwaŋna ubwa na alagba. N zhɛ kaa ma ma bụ nu uba, iwɛ maa kede kwụba ya uhwaŋna u tudulo.

⁷Bi zhɛ bo urugono atwa ilubwe ibwɛ nu usumwa, bi zha shɛ kaa bo jitono aŋ o. Bi zhɛ ba dwalakaka aŋ, bi zha shɛ kaa ba ta aŋ ugbe o. Nazhɛ bɛɛ zhɛ bɛ hiɛŋ, N zhɛ mo gwulo no ofwo bwolo mi bu ngwụshɛ. I n zhɛmanɛ la na aka ata uhwuri hwuwayɛ.

⁸Bi mepi shi kaa maa Gamba m peni bu la iyimɛyɛ izɛgwu, ne meni ma afwafwa, na manɛbɛ o, maa ga azụrụfa, na azhɛnarɛya ubwa keeni ugombo anaa na boo sugo ya baa zhɛba tuwa ti Beal.[6]

⁹Iwɛbɛ po Ngɛɛ zhɛ ma lashɛganana iyimɛyɛ mi izɛgwu nɛ Ngee peni bu la na aka tugwubo. N zhɛ kaa mo sugonono ukpasa keeni ugbokwo-biywoywo ata Ngee urigeni la mohondo mu bwa.

¹⁰N zhɛ mo shilo bu ya hwuwayɛ go mohondo, ne eshe atwa ilubwe ibwɛ. Za kaa bụtụ be elele na zhɛ ba ala maa lashɛga bụ ni i'ɛlɛ mi o.

¹¹N zhɛ kaa mo ngwuricingo unyasa ubwa hwɛɛ, tu nsono mu bwa mu uywa, ti ipiɛnɛ ibwɛ ifwo, ti ijitɛ ibwɛ ụhinjanụ keeni aka nsono mu bwa mu na bee jwe hwɛɛ.

¹²N zhɛ mo iricingo ikpɛri ibwɛ ya afwafwa, keeni i'wɛ'wɛ ibwɛ yo owowo, igɛtɛ bɛɛ hiɛŋ maa atwa ilubwe ibwɛ, aba peni bu, iwɛnɛ tu baa ndanɛ aŋ iyi. N zhɛ ma nda maa gɛ itimɛ ibwɛ ya afwafwa i shɛ gana uwapa, iwɛ maa isundɛ ehilo yɛ iŋ hwɛɛ.

¹³N zhɛ kaa ma pana bụ ulwapɛ, iwɛnɛ ti isɛbwɛ mi 'wi bu na aka na tu boo hwoŋzhingono tuwa ti Beal iturɛre, iwɛnɛ ti bɛ mɛmɛ njɛ tisemberi ta tikanɛ ta atakwụ, baa 'wa atwa ubwa ilubwe.

¹⁴Iwɛbɛ po Ngɛɛ zhɛ ma insa bụ, maa ma zarɛga bụ nụ ụshɛka, maa mo mbiso bu n-ndumwa ma amɛ-olom.

¹⁵N zhɛ mo gwuricingono bu itimɛ ibwɛ ya afwafwa, Ngɛɛ zhɛ ma nda maa Ulomu Eko ụ shɛ odubo ashɛlatụ. Apata bɛɛ zhɛ ba zunga azunga gana na tu baa zụnjɛ la tu baa ta shɛ yɛu towo, gana ụjita ata baa banɛ la na cɛnjɛ ti Ijipti.

¹⁶Nazhɛ AGWANGWAMA hiɛŋ, Bi zhɛ mɛ n hiɛŋ jita ata, O-bwolo mi, bi zha shɛ mɛ n hiɛŋ ya, A-tuwa ti mi ti Beal kwukwuŋ.

¹⁷N zhɛ ma bacɛnga izeci tuwa ti Beal nu unu ubwa, N zha shɛ mo lonono bu maa bu na suyana iŋ ya kwukwuŋ.

¹⁸Na aka ata ibɛ Ngɛɛ zhɛ ma twa-unu ni isundɛ ehilo hwɛɛ, keeni shanụnụ she elele, keeni iyi nɛ yo hombilo iwɛ maa kede a gwụcɛnjɛ ya atwa mi o. N zhɛ du ma bacɛnga to otokwobi ti itɛ keeni ujasa na cɛnjɛ ta ata, N zhɛ ma nda maa atwa mi nama na amɛ-olom suu.

¹⁹Nazhɛ Ngɛɛ zhɛ ma zha ya adalụ hiŋ; N zhɛ ma zha ya adalụ hiŋ ne tiririri keeni na tɛcara; No tulubo, keeni ni inyɛmɛnyɛmɛ hiŋ tihioko, N zhɛ ma nda maa hiɛ shɛ atwa mi unyizo-nom.

²⁰N zhɛ ma zha adalụ hiŋ na tɛcara, nazhɛ ɛhi zhɛ hia mapa AGWANGWAMA.

²¹AGWANGWAMA hiɛŋ, Na aka ata, nazhɛ Ngɛɛ zhɛ mɛ jishijɛ tụla, tụla tuba ti zhɛ tɛ jishijɛ cɛnjɛ tu unyizo ne eshilo,

²²nazhɛ cɛnjɛ ti zhɛ tɛ jishijɛ tedure ni iyimɛyɛ izɛgwu tumata, te meni ma afwafwa, keeni manɛbɛ, aba tuba zhɛɛ jishijɛ Jɛzrɛl.

²³N zhɛ m mama bilaga bụ na cɛnjɛ tu ga, N zhɛ mo hioko ya inyɛmɛnyɛmɛ bụtụ na Ngɛɛ hiɛŋ la, N zha shɛ mo hioko inyɛmɛnyɛmɛ ibwɛ o. N zhɛ kaa mɛ hiɛŋ ya atwa na Ngɛɛ hiɛŋ la, A shɛ shɛ atwa mi o, Ahiɛba hiɛ shɛ ya atwa mi. Nazhɛ ɛɛ zhɛɛ hiɛŋ, Gabụ bɛ shɛ ya Agwatana tu.