Read bassa EMOS 4 Bible Online

EMOS 4 - bassa bible

EMOS 4

¹Ahiɛba eyikwo na namɛ ni Ishɛmɛ Samaria, shɛlaga ma n-ndumwa mu ga, ahiɛba na hio nyomongo gana inɛ nɛ aa biga nu Bashan, ni Ishɛmɛ Samaria. Ahiɛba eyikwo na hia nda okofwo keeni atwa na mama zasa tuhwulo. Ahiɛba hiɛ hiɛŋ olwo hiŋ, Ɛtɛ shapɛrɛganɛ ma mayaga maa ta swa.

²AGWANGWAMA Mokondo shiri-unu ne tijilo tu bwa, bɛɛ hiɛŋ, Kwụba ijitɛ ike me hi teni ba, aka na ɛɛ zhɛ mo hi mbombilo na shɛkama, ta bụtụ hiŋ bu umɛwɛɛ, ɛ zhɛ a ima bụ na akama gana na aa ima bijana.

³AGWANGWAMA hiɛŋ, Hi zhɛ hia bananga na tụbagatagwụ tu uba, bụtụ bụtụ zhɛ ba bana na tụbagwụ tu na tu namɛ ne eririri agba ubwa. Ɛ zhɛ ma hi 'waŋ ni Ishɛmɛ Hamon.[8]

⁴AGWANGWAMA Mokondo hiɛŋ, Atwa Isrɛl, zhajɛ ma ni Bɛtɛl maa hiɛ njɛ iwɛwɛ, zhajɛ ma ni Gilgal maa hi keeni iwɛwɛ tɛnda gana elele na ehi eri. Ne suje ma usunda hiŋ ụrụpɛ nu uvwungwa we elele, ti iyi-a'umpwa hiŋ ijitɛ itɛtɛtu.[9]

⁵Oo ahiɛba atwa Isrɛl, ta ma ụrụpɛ hiŋ ugwoje ni iyimɛyɛ nɛ 'yajɛ Ifucingɛ. Bana ma hi enenji iwɛ apwaŋ hiŋ u tukwulangana a na ehi peni, nda ma maa bụtụ be elele mepi iwɛ ibɛ, iwɛnɛ ti yaa shɛ iyi nɛ ohio lubo tɛnda ta!

⁶N hi kalanɛ imunɛ-tiya na ashɛpwụ hiŋ, maa hi nama uzawa iyimɛyɛ tucwomwo ne shine shi hiŋ[10] no ofwo elele, taa hwayɛ hi gwuri shi no ofwo mi o.

⁷Ibɛ du po Ngaa lacɛ maa eshilo ihi ngbeni, aka na ti iyimɛyɛ tugwubo ta vwɛ ipiɛnɛ itɛtu. Nga ma nda maa eshilo no ngbo na ashɛpwụ oko, maa kede ngbo na a na vwɛ o, boo ngbo eshilo ne ehilo oko, ama a na ata eshilo ngbeni shi, iyimɛyɛ ya aba ya lụmba.

⁸AGWANGWAMA hiɛŋ, Atwa ashɛpwụ oko a bana urungo na anya ashɛpwụ maa e swe meni, ama mi zha shɛ kaa ma nama maa mu waŋnɛ aŋ tuswa o, taa hwayɛ hi gwuri shi no ofwo mi o.

⁹AGWANGWAMA hiɛŋ, Kpalụ gembi ufwugwo Ngaa tumwanɛ ubata keeni ugarɛrɛ wee iricinji iyimɛyɛ hiŋ, tu ntuma mi hiŋ ma shifwafwa. Ovworo yɛ i'wɛ'wɛ yo owowo hiŋ keeni i'wɛ'wɛ hiŋ buta hwɛɛ. Taa hwayɛ hi gwuri shi no ofwo mi o.

¹⁰AGWANGWAMA hiɛŋ, N hi 'wɛnjɛ tishikpe gana ala Ngaa njɛ ni Ijipti, Ngaa njɛ maa a shɛrɛ miaụŋ mi hiŋ mu na mu ta wanŋɛ nu utokwobi nu ujasa, aa 'imɛ du idɛkwɛ hiŋ. Ngaa njɛ maa nhiụŋ ma atwa na 'wi nu ugba hiŋ mi shini n-nyanụ mi hiŋ, taa hwayɛ hi gwuri shi no ofwo mi o.

¹¹AGWANGWAMA hiɛŋ, N njɛ umeseyi hiŋ uko ufwu, gana na Ngaa njɛ la[11] Sụdụm keeni Gụmụra ufwu, umeseyi na vwɛ na ashashɛ hiŋ benengeni gana ukwungwurusu na ɛɛ vwɛ nu ulwa na wo hwoŋno, taa hwayɛ hi gwuri shi no ofwo mi o.

¹²Oo ahiɛba atwa Isrɛl, iyi nɛ Ngɛɛ zhɛ ma hi nda na, mama 'imɛ ma. Iwɛnɛ Ngɛɛ zhɛ ma hi nda ijɛ, mama 'imɛ ma maa hiɛ njɛ ulwapɛ na Ngɛɛ zhɛ ma hiɛ pana.

¹³Kwụba ma bụtụ na mo nshama, na njɛ mpiala mu uvwugo, na du njɛ maa ụjita no sho nu uvwungwa. Bɛ njɛ maa ga bụtụ na mapa tuhaŋsa tu bwa;[12] ubwa ba zha tahaŋnụ no ofwo na zeteji na cɛnjɛ tu unyizo. Ɛ hiɛŋ izeci ibwɛ, AGWANGWAMA na Hwuri Kpaaŋ.