Read bassa EMOS 8 Bible Online

EMOS 8 - bassa bible

EMOS 8

¹Iyi nɛ AGWANGWAMA na shɛ Agwatana m mbiseni no ozobu anya na, N kwụbɛ igwumi nɛ tụ'walụ tu na tɛ nɛ zweni.

²Bɛɛ hiɛŋ, Emos, imbe abụ kwụbɛɛ? Ngɛɛ jishijɛ bụ, Ngɛɛ hiɛŋ, N kwụbɛ igwumi nɛ tụ'walụ tu na tɛ nɛ zweni. Nazhɛ AGWANGWAMA n hiɛŋ, Ukwunanga[22] wa atwa mi Isrɛl ci ya, N zha shɛ mo sheyingo ahaŋsa mi sasana nu ulwapɛ ga Ngɛɛ zhɛ ma pana aŋ o.

³AGWANGWAMA na shɛ Agwatana hiɛŋ, Shɛzunga[23] shɛ na aa zunga nu umwono wa AGWANGWAMA shi zhɛ sha jɛshɛrɛga u'wo u tugboo. N'wo mi zhɛ ma bala no ofwo ofwo, ɛ zhɛ na 'waŋ kaa n'wo ma ata saiiŋ saiiŋ.[24]

⁴Hwulaga ma, ahiɛba na hio rukoto atwa na zasa iyi, ahia nda okofwo na namɛ nu u'una ga umungwuta.

⁵Ahi mama hiaŋnụ, Jita na kwuŋ du isene gɛ upiana ufwo zhɛ yo hwuwowu, iwɛ maa ta sanga iyimɛyɛ tu izɛgwuu? Aka na kwuŋ du Ụjita-ụhinjanụ zhɛ wo hwuwowu, iwɛ maa to kwunonono iŋ tusangaa? Nazhɛ maa ta sanga te hwuri mazhanga, maa te zucinje bimenji maa te teni te gembi, iwɛ maa ta ya atwa na ata sangana imwere ne bimenji tu bo orugwusu.

⁶Ti zhɛ ta sanga afwa iyimɛyɛ wit ta zhanjɛ, maa ta sa okofwo maa a shɛ ajama tu, iwɛnɛ te e eri shi a tụpa utashɛ wa aba okwo nu ulumo na aa sa ubida uvwuna uko.

⁷AGWANGWAMA shiri-unu iwɛ tumama sata ti Jekob, bɛɛ hiɛŋ, Isɛbwɛ ugondu wa aba ụwɛ we elele zha shɛ mo n 'wo kwukwuŋ.

⁸Iwɛbɛ po cɛnjɛ ti zhɛ to zhingotu, atwa elele na kaa jɛjɛ na tuba zhɛ a ta-ụkwụla. Cɛnjɛ ta ata hwɛ hwɛɛ ti zhɛ tɛ shɛŋ gana Urefu Nayɛl. Nazhɛ to vwundwo, ta hwaŋ sasana gana Urefu Ijipti.

⁹AGWANGWAMA na shɛ Agwatana hiɛŋ, Aka zhɛ o to, ti Ngɛɛ zhɛ ma nda maa ga uwaŋna teni na aka bu uwaŋna tishikoko, unyizo zhɛ wo 'wo tishi na aka na tu uwaŋna 'waŋ hwɛɛ.

¹⁰N zhɛ mo sheyingo nsono mi hiŋ mi tɛzhɛba maa mɛ shɛ ụkwụla-tuta, maa shɛzunga shi hiŋ shɛ shɛ u'wo-ụzhɛla. N zhɛ ma nda maa bụtụ be elele njɛ ụcɛnjɛ maa urugono tugwuno tụ ụkwụla-tuta, maa waŋfwunga tukpala. Hi zhɛ hia sha gana atwa na a nda ụcɛnjɛ yɛu ya aba ye eyi mokondo nɛ 'wi. Ụjita ata zhɛ wa wụmangwụ tutu ukwunanga ubwa.

¹¹AGWANGWAMA na Hwuri Kpaaŋ hiɛŋ, Aka zhɛ o to ti Ngɛɛ zhɛ ma karɛ imunɛ-tiya na cɛnjɛ tu ga, shɛ imunɛ iyimɛyɛ, kwo kaa i'uyɛ meni o, ama imunɛ keeni i'uyɛ n-ndumwa mi mi tuhwuga.

¹²Atwamwa zhɛ no rungo te beni ni itekwu ike i ci itekwu inyɛ, tu upada tuzuba tu upada tuta. Ɛ zhɛ o tonongo olugwo elele maa e dwelekeci n-ndumwa mi mi, ama a zha shɛ kaa o gwushigo mu o.

¹³Aka na aka ata ci hwuŋ, miaụŋ mu towo ne esemberi a na 'yajɛ ulapiya, mi zhɛ mo 'wo izhilwe iwɛ i'uyɛ nɛ iri aŋ.

¹⁴Atwa elele na to ntatanuwaŋ ma atwa Samaria, a na hiɛŋ, N to-tuwa tu Dan keeni atwa na hiɛŋ, N to-tuwa ti Biɛshiba, atwa ata zhɛ a laya, a zha shɛ ɛ ishijɛ ya kwukwuŋ.