Read bassa JONA 1 Bible Online

JONA 1 - bassa bible

JONA 1

¹AGWANGWAMA mbishi Jona yɛu Amitai iwɛ jitoo ko, bɛɛ hiɛŋ,

²Ishijɛ maa zhegeni atwa Ninivɛ[1] na shɛ ụshɛpwụ ata ụ'wụtụ, maa enengeni aŋ ufwu na we teni aŋ; iwɛnɛ tu Ngaa kwụbɛ tugworozwo ta aba.

³Ama go Jona ishijɛ maa gozhigono AGWANGWAMA maa zha Tashish. Ibɛ po bee zwi nu Jopa, baa kwụbɛ ụhaŋtụ uko ụ'wụtụ na zhɛ Tashish no ofwo na maa gozhigono AGWANGWAMA, baa cɛpɛ utashɛ, bee teni nu bwa maa zhagaga na atwa ata zhɛ Tashish.

⁴Ama AGWANGWAMA karɛ uvwugo uko ụ'wụtụ ni itekwu ɛtɛ, uvwugo ata kaa 'yajɛ ikɛnyi tebiye, ibɛ po ụhaŋtụ ata wa jala tụbwadụ.

⁵Nazhɛ inyɛsɛ shɛ eheŋteni ụhaŋtụ ata, bụtụ bụtụ ugananɛ tuwa tu bwa, aa bwajɛ i'wɛŋnɛ nɛ ge zweni nụ ụhaŋtụ ata aa 'wɛŋ iŋ ni itekwu iwɛ maa ụhaŋtụ zhijɛ. Tobwolo go Jona zuwo taa tuta tụ ụzalụ uko na amɛ ụhaŋtụ ata, bee weci bee leyi malabụ mụ 'wụtụ.

⁶Iwɛbɛ po iyɛri ụhaŋtụ ata zhajɛ, bɛɛ hiɛŋ bụ, Malabụ ree obo woto? Ishijɛ maa tabwa tuwa tụ bụ! Nekeshi tu ma tu pana ahaŋsa oko maa kede ta nda ufwu o.

⁷Ibɛ po eheŋteni ụhaŋtụ ata mama hiaŋnụ, Hwure tu 'wɛŋ ma icɛcɛ[2] maa ta mapa bụtụ na po ebe ga utu vwuteni. Aa 'wɛŋ ga icɛcɛ ɛtɛ, icɛcɛ 'imɛ Jona.

⁸Ibɛ po ɛɛ hiɛŋ bụ, Ta bu tabwa, iti mbishi iwɛ bụtụ na po ebe ga utu vwuteni. Imbe shɛ ugondu buu? Ce abu banɛɛ? Ce shɛ cɛnjɛ tụ bụụ? Udenji naa abɛ shɛɛ?

⁹Bɛɛ jishijɛ aŋ, bɛɛ hiɛŋ, N shɛ Bihibru; ma zhɛba AGWANGWAMA na shɛ Agwatana azuba, na njɛ itekwu keeni cɛnjɛ tu hwoo.

¹⁰Go Jona mbishi aŋ du maa AGWANGWAMA boo gozhigono. Nazhɛ etwenyi ata njɛ inyɛsɛ duwa, ɛɛ hiɛŋ bụ, Iwembe po abɛ njɛ ijɛɛ? Iwɛnɛ po etwenyi ata mwopwo ya maa AGWANGWAMA boo gozhigono.

¹¹Nazhɛ ee heŋteni bu, ɛɛ hiɛŋ, Imbe ɛti zhɛ ta bu nda maa adanga itekwu gɛ gwurisenii? Iwɛnɛ po abwagara na itekwu ɛtɛ ya nda a kaana ga tụwụmangwụ.

¹²Go Jona jishijɛ aŋ, bɛɛ hiɛŋ, N shepi ma hi keri ni itekwu gɛ, nazhɛ adanga itekwu gɛ zhɛ o gwurusono. M mepi maa iwe mi ibɛ po uvwugo ga ụ'wụtụ u hi vwuteni.

¹³Okwo ti yaa shɛ gana ata, etwenyi ata heŋteni ụhaŋtụ ata ni ikɛnyi maa ɛ zɛtɛ uŋ nu uhaŋsa, ama e eri shi o, iwɛnɛ ta adanga na itekwu ɛtɛ ya nda a kaana ga tụwụmangwụ.

¹⁴Iwɛbɛ po ee keri AGWANGWAMA ụhiɛŋshɛ, ɛɛ hiɛŋ, Oo AGWANGWAMA, ta bu tabwa, to lono maa iti peni ulwapɛ iwɛnɛ ɛti zhɛ ta kala bụtụ ga n-ndumwa-wụmɛ ni itekwu gɛ o. Oo AGWANGWAMA, gabụ bi leni maa gɛ ijɛ kpaaŋ i njɛ.

¹⁵Nazhɛ ee shepi ga Jona ee keri ni itekwu ɛtɛ, nazhɛ adanga itekwu ɛtɛ gwuriseni.

¹⁶Nazhɛ atwa ata sụmɛ AGWANGWAMA inyɛsɛ duwa duwa, ee peni AGWANGWAMA ụrụpɛ na ee ge shileni bu unu.

¹⁷Nazhɛ AGWANGWAMA njɛ maa ga bijana bu ko bụ 'wụtụ tweri Jona. Go Jona namɛ nu ugbokwo bijana ata iwɛŋnɛ itɛtu keeni ijitɛ itɛtu.