Read bassa TƐRƐCƐ 18 Bible Online

TƐRƐCƐ 18 - bassa bible

TƐRƐCƐ 18

¹Nazhɛ AGWANGWAMA hiɛŋ Aron, Gabụ, na miaụŋ mụ bụ me eyi keeni nhwaŋ me eshi hiŋ, hi zhɛ hia 'waŋna tijama ta tụwụma no ohwolu tijilo. Gabụ na miaụŋ ma ata mụ bụ kaa kiri hi zhɛ hia 'waŋna tijama tu ugondu tunongbo.

²Suje du miaụŋ-mo-bino bu mu na mɛ shɛ ụlamụ Livai a na shɛ ụlamụ shibi maa o no bu mbiyono ugondu tɛnda na aka na aba nda ugondu na miaụŋ mụ bụ na amɛ udulo ata tiseyida.

³Aba zhɛ na bụ ndana iyi maa a na nda ugondu we elele na ụ shɛ una wa aba nu udulo ata, ama a shɛ shɛ o tumongono i'wɛŋni'wɛŋni yo ohwolu ata tijilo kwukwuŋ kwo kaa utukwu ata ụrụpɛ o, iwɛ aka na ɛɛ zhɛ o 'wo hwɛɛ tu gabụ du.

⁴A shɛ o togwu na bụ maa a 'waŋna tijama tu udulo tu'ulwatagwụ tungbaraka keeni ugondu we elele na namɛ nu udulo ata. Kede binya bụtụ be elele gwumwongonu ya no ofwo na abụ namɛ o.

⁵Ahiɛba kiri hiɛ shɛ hia ụrɛcɛnga tijama tu ugondu tɛnda no ohwolu ata tijilo keeni utukwu-ụrụpɛ, iwɛ maa kede isɛbwɛ mi kezhe ya no ohiuhiu atwa Isrɛl hwɛɛ o.

⁶Gamba n twolwo atwa bụ a na shɛ atwa Livai maa e beni na ashashɛ atwa Isrɛl, maa e hi peni upwaŋ, maa kaa e tileneni aŋ AGWANGWAMA swooŋ maa a na nda ugondu nu udulo tu'ulwatagwụ.

⁷Ama gabụ na miaụŋ mụ bụ kiri hiɛ shɛ hia untangana ugondu tunongbo iwɛ utukwu-ụrụpɛ keeni iwɛ ohwolu ata tijilo ibɛgɛlɛ jilanɛ. Inɛ ɛtɛ ibɛ shɛ tijama ti hiŋ, iwɛnɛ ti Ngee hi peni upwaŋ tunongbo. Bụtụ binya be elele na zhajɛ yaa maa dongonu, ga a kwụnɛ bụ.

⁸Nazhɛ AGWANGWAMA hiɛŋ Aron, Gamba m bi peni apwaŋ elele na ee m peni, anaa na shɛ arụpɛ tijilo elele na atwa Isrɛl m peni. M bi peni aŋ ta miaụŋ mụ bụ maa a shɛ urobwo hiŋ unyizo-nom.

⁹Apwaŋ elele na shɛ a na tijilo na hwuri hwɛɛ, anaa na ee hwoŋzhinji shi, gabụ bi 'yajɛ a na ata; aba shɛ: ụrụpɛ tiya, na arụpɛ iwɛwɛ, na arụpɛ tụwụma. Ụrụpɛ we elele na aa n shɛkanɛ, na shɛ ụrụpɛ tijilo, gabụ bi 'yajɛ una ata ta miaụŋ mụ bụ me eyi.

¹⁰No ofwo tijilo na hwuri hwɛɛ kiri ahiɛ shɛ hi na ya aŋ. Butubwenyi be elele shɛ ba ya aŋ, teyinje ma maa i shɛ iyi tijilo.

¹¹Inɛɛ nɛ shaananɛ inee hiŋ na apwaŋ arụpɛ aba elele a na shɛ a na tuvwurongo a na atwa Isrɛl e m peni, ahiɛba hiɛ 'yajɛ. M bi peni aŋ ta miaụŋ mụ bụ me eyi keeni mu na mo o tutu geri-be-eshe. Bụtụ be elele na kaa namɛ shɛshɛshɛ ni ihwɛ bụ, bɛ shɛ ba ya aŋ.

¹²Gabụ Ngee peni iyi ihiiŋ nɛ atwa jicinje ee peni AGWANGWAMA; ibɛ shɛ manɛbɛ ma buta mi biye, ne meni ma tụ'walụ ta afwafwa mi biye ni iyimɛyɛ izɛgwu ibiye ye elele.

¹³Tụ'walụ ta cɛnjɛ tu na tɛ nɛ hiiŋ, tu na ee sugeni AGWANGWAMA, gabụ bi 'yajɛ tụ. Bụtụ be elele na namɛ shɛshɛshɛ ni ihwɛ bụ bɛ shɛ ba ya tụ.

¹⁴Iyi elele nɛ atwa Isrɛl shileni AGWANGWAMA swooŋ, gabụ bi 'yajɛ iŋ.

¹⁵Iyi elele nɛ iyimabiga meci hiiŋ nɛ atwa Isrɛl peni AGWANGWAMA, gabụ bi 'yajɛ iŋ, ta bụtụ, ti iyimabiga. Ama i shɛ tilɛɛ maa bɛ shɛ ba saanana yɛu bụtụ ye eyi ihiiŋ keeni iyimabiga ihiiŋ nɛ hashɛganụ.

¹⁶A shɛ a sa miaụŋ mu na ee meci upiana uko na azụrụfa na ulumo wa aba ụ shɛ ɛshɛkɛl a ta a na shɛ ulumo wo ohwulu tijilo.

¹⁷Bɛ shɛ shɛ ba saanana yɛu ihiiŋ nɛ inɛ, na agwụdụ keeni iyweywe meci o; a shɛ inɛ tijilo. Zhizhongo mehieŋ ma aba nu utukwu-ụrụpɛ, hwoŋzhingo manɛbɛ ma aba maa i shɛ ụrụpɛ na oo to tedure nu ulwa, ụ shanɛ AGWANGWAMA ụhiụŋ ụlatụ.

¹⁸Ama gabụ bi 'yajɛ usunda wa aba, ibɛ shɛ ukosobu keeni i'unte ɛtɛ ya aba u'ala ubiye ee vwurenji.

¹⁹Apwaŋ tijilo elele na atwa Isrɛl peni AGWANGWAMA, gabụ bi 'yajɛ aŋ hwɛɛ, ta miaụŋ mụ bụ me eyi, ta miaụŋ mụ bụ mo o, ta ajalalo bu tutu unyizo-nom. Inɛ gɛ i shɛ unu manɛ na Ngaa twa na bụ, tụ gabụ keeni ajalalo bu.

²⁰Nazhɛ AGWANGWAMA hiɛŋ bụ, Bɛ shɛ shɛ ba 'yaga i'wɛŋnɛ yo ogwu kwo kaa urobwo cɛnjɛ te elele na ashashɛ aba o. Gamba n shɛ urobwo keeni ogwu bu na ashashɛ atwa Isrɛl.

²¹Nazhɛ AGWANGWAMA hiɛŋ, M pwonuo Alivai iyi-u'umpwa ye elele nɛ atwa Isrɛl palajɛ iwɛ maa i shɛ iyi-yo-ogwu aba iwɛ ugondu wa aba na aa nda nu udulo tu'ulwatagwụ na Ngaa ma nama.

²²Te kwuni na aka ga atwa Isrɛl a na vwɛ, a shɛ shɛ o dongonu udulo tu'ulwatagwụ o, iwɛ aka na ulwapɛ iwɛwɛ ya aba zhɛ wa kwụna aŋ.

²³Alivai kiri aba shɛ a nda ugondu nu udulo ata ụ tu'ulwatagwụ, aba du kaa shɛ a 'waŋna tijama tu bwa te elele. Inɛ gɛ i shɛ okpogo na ajalalo hiŋ zhɛ a untangana no ofwo elele na awaŋnɛ hiŋ teje. Alivai kaa shɛ shɛ a 'yaga ogwu elele na ashashɛ atwa Isrɛl kwukwuŋ.

²⁴M pwonuo Alivai iyi-umpwa ye elele nɛ atwa Isrɛl peni AGWANGWAMA upwaŋ maa i shɛ iyi-yo-ogwu aba. Iwɛ ecilo ata Ngɛɛ hiɛŋ aŋ kede a yɛ ya ogwu elele na ashashɛ atwa Isrɛl o.

²⁵Nazhɛ AGWANGWAMA hiɛŋ Moses,

²⁶Mbiso Alivai maa, Aka elele na ehi leshiji iyi-u'umpwa nɛ banɛ no olugwo atwa Isrɛl, igɛtɛ Ngee hi peni maa i shɛ iyi-yo-ogwu hiŋ, hiɛ shɛ hi nɛ vwɛ iyi-u'umpwa na amɛ ibɛ maa hi peni AGWANGWAMA upwaŋ na banɛ ni ibɛ maa i shɛ iyi-u'umpwa nɛ banɛ ni iyi-u'umpwa.

²⁷Ɛ zhɛ a pana abashɛ iwɛ upwaŋ iyimɛyɛ izɛgwu nɛ banɛ na akpakpata, keeni tishidingo te meni mụ tụ'walụ ta afwafwa mu na mu banɛ no onunu muba.

²⁸Gabata du ahiɛ shɛ hi na shɛkana AGWANGWAMA upwaŋ na banɛ ni iyi-a'umpwa hiŋ elele a na ehi leshiji no olugwo atwa Isrɛl hwɛɛ. Ni ibɛ du ahiɛ shɛ hi na pana Aron na shɛ bunongbo upwaŋ na shɛ una wa AGWANGWAMA.

²⁹Iyi elele nɛ ee hi peni, ga shɛ inɛɛ nɛ ngezeni na amɛ ibɛ ɛhi vwɛ maa hi peni AGWANGWAMA urobwo tijilo.

³⁰Hiɛŋ Alivai, maa, Aka elele na ɛɛ vwɛ ụpadụ ata na ngezeni ee peni upwaŋ wa aba, ɛ zhɛ a rɛta iŋ maa i banɛ na akpakpata kwo kaa no onunu meni ma afwafwa.

³¹Gana na ti yaa shɛ iyi nɛ ee hi peni iwɛ ugondu na ahia nda nu udulo tu'ulwatagwụ, ya iŋ ma no ofwo elele, tụ gabụ ta atwa umwamwa bụ.

³²Yaa shɛ ohi pwonuo AGWANGWAMA inɛɛ nɛ ngezeni na amɛ ibɛ, okwo ahiɛ yɛ ya inɛɛ nɛ vwɛ, n-ndumwa zha shɛ ma hi wụma ya iwɛ ibɛ o. Ta ya ma kaa apwaŋ tijilo atwa Isrɛl elele tobwolo hi te peni shi AGWANGWAMA inɛ ibwɛ nɛ ngezeni o. Yaa shɛ ahiɛ njɛ gana ata, asha hi heshigeni apwaŋ ata, asha hi zhɛ hio 'wo.