Read bassa TƐRƐCƐ 19 Bible Online

TƐRƐCƐ 19 - bassa bible

TƐRƐCƐ 19

¹Nazhɛ AGWANGWAMA hiɛŋ Moses keeni Aron,

²Andwa na Ngee hi peni-unu wa aba na: Mbiso ma atwa Isrɛl maa ga a bu shapɛrɛganɛ unasa buna bi shenje na zasa tụsụnyasụ, bu naa na kaa ee te peteni shi ụ'wụ'wụ-i'ilu maa a njɛ ugondu itimɛ tuhwaŋ nu bwa kwukwuŋ.

³Pana bụ Ɛleaza bunongbo, maa e becinji bu no tupohondo tu ugba ata maa bụtụ bu ko shɛrɛ bụ ne eshe ubwa.

⁴Ga gɛ Ɛleaza seri mehieŋ ma ata mu bwa na buvwa bwa maa zhizhongo mu geri bu umbe bu udulo ata ụ tu'ulwatagwụ kpalụ cenje.

⁵Ge e hwoŋzhinji buna ata hwɛɛ, tu u'waba ubwa, tu usunda ubwa, te mehieŋ mu bwa, ti i'wɛŋnɛ ibwɛ ya amɛ, ne eshe bunongbo ata.

⁶Go bunongbo ata teri i'wɛ'wɛ yo osobu keeni hisop[15] keeni tihiŋzhe tụ ụgwụdụ tu na tɛ shɛ uduhwa ushenje maa 'waŋ na ashashɛ ulwa ata wo hwoŋzhingo unasa ata buna.

⁷Go bunongbo ata nyashɛnjɛ ya i'wɛŋnɛ ɛtɛ bee ge urigeni, maa dula du meni, nazhɛ bɛɛ zhɛ be gwure nu ugba tu'ulwa. Go bunongbo ata nama na tuhashɛganụ tutu ụrụmɛ.

⁸Ga bụtụ ata na hwoŋzhinji unasa ata buna nyashɛnjɛ du i'wɛŋnɛ ɛtɛ bee ge urigeni, maa dula du meni, bɛ shɛ du ba nama na tuhashɛganụ tutu ụrụmɛ.

⁹Ga bụtụ na namɛ shɛshɛshɛ suji ma'alụ mu unasa ata maa tulono mu no tupohondo tu ugba ata no ofwo na namɛ shɛshɛshɛ. Ga a intanɛ mụ apata iwɛ tu'ulwatagwụ ta atwa Isrɛl hwɛɛ, iwɛ ti'imanganga te meni mụ tụrụmbɛɛ, iwɛ iwɛwɛ tɛnyashɛnga.

¹⁰Ga bụtụ ata na suji ma'alụ ma buna ata, nyashɛnjɛ du i'wɛŋnɛ nɛ bee ge urigeni, maa nama na tuhashɛganụ tutu ụrụmɛ. Ijɛ i shɛ ya shana atwa Isrɛl keeni bugaiŋ na ba nda ụlashɛ na ashashɛ aba okpogo unyizo-nom.

¹¹Bụtụ be elele na timengeni ru'wo ra bụtụ be elele, bɛ shɛ ba nama na tuhashɛganụ tutu ijitɛ icenje.

¹²Ga bụtụ ata mama nyashɛnjɛ ne meni ma ata aa nyashɛnga bụtụ nụ ụjita ụtatụ keeni nụ ụjita ucenje, nazhɛ bɛɛ zhɛ ba nama shɛshɛshɛ. Ama yaa shɛ baa mama nyashɛnjɛ shɛ nụ ụjita ata ụtatụ keeni nụ ụjita ata ucenje, asha bu ta zha shɛ ba nama shɛshɛshɛ o.

¹³Bụtụ be elele na kaa timengeni ru'wo, baa mama nyashɛnjɛ shɛ, asha bi heshigeni ohwolu tijilo AGWANGWAMA, kede a rɛcɛ bụ na atwa Isrɛl vwɛ o, iwɛnɛ te e zhizhenji shi bu meni ma ata aa nyashɛnga bụtụ. Bu zasa shɛshɛshɛ o. Tuhashɛganụ tu bwa kaa tu namba pu bwa.

¹⁴Undwa ga ụ shɛ iwɛ aka na bụtụ bu ko 'wi na amɛ udulo ata, ta bụtụ na ga namba nu udulo ata ti bee 'wi, ta bụtụ na teni nu udulo ata tobwolo bụtụ ata uwo, a shɛ a nama na tuhashɛganụ tutu ijitɛ icenje.

¹⁵Iyi elele nɛ kaa aa nda uhwara ni ibɛ gana ihiulwe kwo kaa ikwɛshɛ, yaa shɛ ee ge urigeni shi iŋ, asha i hashɛganụ du.

¹⁶Bụtụ be elele na timengeni ru'wo ra bụtụ na aa kwụnɛ nu utokwobi kwo kaa ru'wo ra bụtụ na meme 'weji, kwo kaa u'umpwo bụtụ bu ko kwo kaa u'uye, bɛ shɛ ba nama na tuhashɛganụ tutu ijitɛ icenje.

¹⁷Ge seri ma'alụ ma buna ata bụ ụrụpɛ tuhwoŋzhingo maa e zweni mu ni ikwɛshɛ ike maa e zweni mu meni mu ufwo, iwɛ tɛnyashɛnga ti iyi nɛ hashɛganụ.

¹⁸Nazhɛ ga bụtụ bu ko na namɛ shɛshɛshɛ jarɛ ụ'wụ'wụ ata ɛɛ hiɛŋ, hisop maa shiyono uŋ ne meni ma ata, maa zhizhongo mu nu udulo ata, ti i'wɛŋni'wɛŋni ibwɛ hwɛɛ, ta atwa na zweni na amɛ ubwa, ta bụtụ ata timengeni ru'wo ra bụtụ ata aa kwụnɛ, ta bụtụ ata timengeni u'umpwo bụtụ keeni u'uye.

¹⁹Bụtụ na namɛ shɛshɛshɛ, ubwa shɛ bo zhizhongo bụtụ ata hashɛganụ meni ma ata nụ ụjita ụtatụ keeni ụjita ucenje. Ga bụtụ ata du ga namɛ shɛshɛshɛ nyashɛnjɛ i'wɛŋnɛ ibwɛ, maa dula meni, nazhɛ bɛɛ zhɛ ba nama shɛshɛshɛ nụ ụrụmɛ ata.

²⁰Bụtụ be elele na kaa hashɛganụ, na kaa mama nyashɛnjɛ shɛ, bɛ shɛ shɛ aa rɛta na ashashɛ atwa tu'ulwa ta ata o, iwɛnɛ te e zhizhenji shi bu meni ma ata mi tishɛshɛshɛ, asha bi heshigeni ohwolu tijilo AGWANGWAMA, iwɛbɛ po baa zasa shɛshɛshɛ.

²¹I shɛ i tilɛɛ maa ga bụtụ ata na zhizhenji bụtụ meni ma ata mi tishɛshɛshɛ nyashɛnjɛ du i'wɛŋnɛ ibwɛ, bụtụ be elele na kaa timengeni meni ma ata mi tishɛshɛshɛ, zhɛ ba hashɛganụ tutu ụrụmɛ. Inɛ ɛtɛ i shɛ undwa wa aba tutu unyizo-nom.

²²Iyi elele nɛ kaa bụtụ ata na hashɛganụ timengeni, ijɛ ɛtɛ du hashɛganụ. Bụtụ be elele na kaa du timengeni ijɛ ɛtɛ, bi zhɛ ba hashɛganụ tutu ụrụmɛ.