Read bassa TƐRƐCƐ 27 Bible Online

TƐRƐCƐ 27 - bassa bible

TƐRƐCƐ 27

¹Ɛ hiɛŋ nzeci mu miaụŋ ma ata mo o mu Zɛlofɛhad na shɛ yɛu Hɛfɛ, bụjalụ Giliad, bujalalo Maki, binyabɛshɛ Manasɛ na shɛ yɛu Josɛf: ga Mala, na Noa, no Hogla, ne Milka keeni Tiza.

²Ee zhe ee shikekeni nu umbe Moses, keeni Ɛleaza bunongbo, keeni ehwurembe keeni tu'ulwatagwụ ta ata hwɛɛ, no ofwo odubo udulo tu'ulwatagwụ na agba AGWANGWAMA, ɛɛ hiɛŋ,

³Bishi tu 'wi nụ ụshɛka, ama bu zasaba na ashashɛ atwa Kora a na teni la AGWANGWAMA tigezhe o, ama bu 'wi iwɛ iwɛwɛ ikɛnyi ibwɛ. Bu zasa kaa miaụŋ-me-eyi o.

⁴Iwembe po izeci bishi tu zhɛ ya ina ni Isrɛl gaa? Iti peni ma i'wɛŋnɛ nɛ maa ta 'yaga na ashashɛ miaụŋ-mo-bino me bishi tu.

⁵Go Moses suji n-ndumwa ma ata ma aba no ofwo AGWANGWAMA.

⁶Nazhɛ AGWANGWAMA hiɛŋ Moses,

⁷Miaụŋ-mo-o mu Zɛlofɛhad mi teni cɛŋ ni iyi nɛ aa jɛmɛ. Pana aŋ ma ogwu na maa a yɛ na ashashɛ atwa bishi ba aba, ga shɛ aba ebi peni ogwu bishi ba aba.

⁸Mbiso atwa Isrɛl maa, Yaa shɛ bụtụ 'wi, baa zasa yɛu-ye-eyi, asha ge peni yɛu ibwɛ yo o ogwu ubwa.

⁹Yaa shɛ baa zasa kaa du yɛu-yo-o, asha pana miaụŋ-mo-bino bwa ogwu ubwa.

¹⁰Yaa shɛ baa zasa kaa miaụŋ-mo-bino, asha pana ohongwu kwo kaa atagwụ ubwa ogwu ubwa.

¹¹Yaa shɛ bishi bwa zasa ohongwu kwo kaa atagwụ, asha pana bụtụ na baa 'yajɛ ụmatụ nu bwa kpɛmkpɛm ogwu ubwa, ga shɛ ubwa yɛ aŋ. Atwa Isrɛl a shɛ o shiyono undwa ga eshe gana na ta AGWANGWAMA peni Moses unu ibɛ.

¹²Nazhɛ AGWANGWAMA hiɛŋ Moses, Zhaga mungo Ishɛmɛ gɛ Abarim, maa kwụbɛ cɛnjɛ ta ata Ngee peni atwa Isrɛl.

¹³Aka na abụ kwụbɛ tụ, bi zhɛ du bo 'wo gana na ta batagwụ bụ ga Aron 'wi,

¹⁴iwɛnɛ ahiɛ n ndanɛ tigezhe nu unu na Ngee hi peni nụ Ụshɛka Zin na aka na ta tu'ulwatagwụ ti Isrɛl hwɛɛ tu ma gagwụmana ahiɛ m mụnɛ shɛ ụjɛrụma ne eshe aba no ofwo ata ɛɛ hiɛŋ Mɛriba. (Mɛriba ata, ibɛ shɛ umɛzhinjɛ meni na mu namɛ ni Kadɛsh nụ Ụshɛka Zin).

¹⁵Go Moses hiɛŋ AGWANGWAMA,

¹⁶Gabụ na bɛ shɛ AGWANGWAMA na shɛ Agwatana na peni atwa elele uraiŋ. Ma bụ tabwa maa teri bụtụ bu ko na zhɛ ba 'yagaga atwa tu'ulwatagwụ tu ga hwɛɛ,

¹⁷na kaa du eri na 'yagaga aŋ na tubana keeni tugwure; iwɛ maa kede tu'ulwa ta AGWANGWAMA kpaaŋ tɛ shɛ gana agwụdụ na zasa bi'iywa o.

¹⁸Nazhɛ AGWANGWAMA hiɛŋ Moses, Shapa Joshua yɛu-ye-eyi Nụn, na shɛ bụtụ na mpiala mu namɛ na amɛ ubwa, maa peteni bu i'ɛlɛ nu uhiuhiu.

¹⁹Shikicingo bu nu umbe Ɛleaza bunongbo keeni umbe tu'ulwatagwụ tu ga kpaaŋ, maa peni bu unu ne eshe aba.

²⁰Pana bụ ahwada bụ oko iwɛ maa tu'ulwatagwụ ta atwa Isrɛl hwɛɛ tu na hwuga-unu ubwa.

²¹Ubwa zhɛ no shikono nu umbe bunongbo gɛ Ɛleaza maa bu no hoŋtono iwɛ ubwa tedure nụ ụshɛrɛya Urim na namɛ nu umbe AGWANGWAMA. Tedure nu n-ndumwa mu bwa, ibɛ tu'ulwatagwụ ta atwa Isrɛl kpaaŋ ti zhɛ tu na bana, tedure nu n-ndumwa mu bwa kaa du tɛ ɛ zhɛ ti ne gwure. Ni inɛ gɛ ibɛ gɛ Ɛleaza zhɛ no sokokono Joshua keeni tu'ulwatagwụ ta atwa Isrɛl hwɛɛ gana na maa a na nda na ashɛrɛya aba elele.

²²Go Moses njɛ ga gana na ta AGWANGWAMA peni bu unu. Bee shikicinji Joshua nu umbe bunongbo gɛ Ɛleaza keeni umbe tu'ulwatagwụ ta ata hwɛ hwɛɛ.

²³Nazhɛ bee petengeni bu i'ɛlɛ nu uhiuhiu, bee peni bu unu nu gana na ta AGWANGWAMA ge peni bu unu.