Read bassa TƐRƐCƐ 28 Bible Online

TƐRƐCƐ 28 - bassa bible

TƐRƐCƐ 28

¹Nazhɛ AGWANGWAMA hiɛŋ Moses,

²Pana atwa Isrɛl unu maa ga a na ma panɛ apwaŋ mi iyimɛyɛ, ibɛ shɛ apwaŋ mi ụhiụŋ ụlatụ, anaa na aa ma m pana tedure nu ulwa. Ga a na ma panɛ aŋ na aka ibɛ nɛ ee shiri gom.

³Mbiso aŋ maa arụpɛ na ɛɛ zhɛ na panɛ AGWANGWAMA tedure nu ulwa na: Iyi nɛ ɛɛ zhɛ na 'waŋnɛ iyi-heri tutu, i shɛ, miaụŋ-ma-agwụdụ me eyi mi yebi mu naa na mu ta namɛ uywa uko te e meci aŋ, mu naa na kaa mu zasa tụsụnyasụ.

⁴Hi zhɛ hia ta ụrụpɛ ni yɛu-ụgwụdụ ike nu uvwungwa, maa hi to ụrụpɛ ni yɛu-ụgwụdụ iyebi nụ ụrụmɛ,

⁵medenji apwaŋ mihiuŋ mi tilee lee mi iyi-u'umpwa bimenji bi ikwureni bugongo bu ko, mu na ee hiŋtetenji na manɛbɛ ma buta mi biye mu ubene uko nu ukangasu, iwɛ ụrụpɛ tiya.

⁶Inɛ gɛ ibɛ shɛ ụrụpɛ tuhwoŋzhingo na ɛɛ zhɛ na uranga AGWANGWAMA tụpana tedure nu ulwa, unaa na oo to la hiiŋ ni Ishɛmɛ Sainai, unaa na kaa shanɛ AGWANGWAMA ụhiụŋ ụlatụ.

⁷Iyi nɛ ɛhi zhɛ hia madanga yɛu-ụgwụdụ ata inɛ inɛ iwɛ ụrụpɛ tuswa, i shɛ mayaga mu ubene uko nu ukangasu, no ohwolu tijilo ɛhi zhɛ hia 'wanga AGWANGWAMA ụrụpɛ tuswa.

⁸Hi zhɛ hia ta ụrụpɛ ni yɛu-ụgwụdụ iyebi nụ ụrụmɛ gana ebe ahi ga njɛ nụ ụrụpɛ uvwungwa, medenji ụrụpɛ tiya keeni ụrụpɛ ubwa u tuswa. I shaananɛ du kaa ụrụpɛ na ɛɛ zhɛ na ta tedure nu ulwa na shanɛ AGWANGWAMA ụhiụŋ ụlatụ.

⁹Ụrụpɛ Ụjita-ụhinjanụ ụ shɛ na miaụŋ-ma-agwụdụ mi yebi mu na mu ta shɛ uywa uko te e meci aŋ, mu na mu zasa tụsụnyasụ, medenji bimenji bo mihiuŋ mi tilee lee mu nkwuronu mo tugongo mi yebi mu na ee hiŋtetenji na manɛbɛ ma buta mi biye maa i shɛ ụrụpɛ tiya keeni ụrụpɛ tuswa.

¹⁰Inɛ ɛtɛ i shɛ ụrụpɛ tuhwoŋzhingo una Ụjita-ụhinjanụ we elele medenji ụrụpɛ na shɛ aa uranga tuta keeni ụrụpɛ ubwa u tuswa.

¹¹Iyi nɛ ɛhi zhɛ hi na pana AGWANGWAMA ụrụpɛ tuhwoŋzhingo nụ ụjita na tu upiana banɛ hiiŋ na: ibɛ shɛ inɛ iyebi, nu udagba uko, na miaụŋ-ma-agwụdụ me eyi mi cenje mu na mu ta namɛ uywa uko te e meci aŋ, mu naa na kaa mu zasa tụsụnyasụ.

¹²Medenji ụrụpɛ tiya ne mihiuŋ mi tilee lee mu nkwuronu mo tugongo tu tatụ mu na mi hiŋtetenji na manɛbɛ ma buta, iwɛ buna ata be elele keeni mihiuŋ mi tilee lee mu nkwuronu mo tugongo ti yebi mu na mi hiŋtetenji na manɛbɛ ma buta iwɛ udagba ata uko;

¹³Mihiuŋ mi tilee lee mi ikwureni bugongo bu ko mu na mi hiŋtetenji na manɛbɛ ma buta na shɛ ụrụpɛ tiya i shɛ iwɛ yɛu-ụgwụdụ ye elele. Ụ shɛ kaa ụrụpɛ tuhwoŋzhingo na aa ta tedure nu ulwa, na kaa shanɛ AGWANGWAMA ụhiụŋ ụlatụ.

¹⁴Arụpɛ tuswa na ɛɛ zhɛ na 'waŋnɛ iwɛ aba a shɛ meni mụ tụ'walụ ta afwafwa me ebene eyebi na ashashɛ, iwɛ buna ata be eyi bu ko, meni mụ tụ'walụ ta afwafwa me ebene eyebi iwɛ udagba ata uko, meni ma afwafwa mu ubene uko na ashashɛ mɛ shɛ iwɛ yɛu-ụgwụdụ inɛ inɛ. Inɛ ɛtɛ ibɛ shɛ ụrụpɛ tuhwoŋzhingo na shɛ aa pana aka elele na tu upiana ufwo banɛ tutu botogwu uywa.

¹⁵Iyi nɛ shɛ maa e keeni ụrụpɛ ata tuhwoŋzhingo iyi-heri, medenji ụrụpɛ ibɛ u tuswa i shɛ upi uko, ubwa ɛɛ zhɛ a pana AGWANGWAMA iwɛ ụrụpɛ iwɛwɛ.

¹⁶Ụrụpɛ Isene Tɛkashɛka tụpana AGWANGWAMA ụ shɛ nụ ụjita umpwa-ni-bɛ-ineshi nu upiana ata uhiiŋ.

¹⁷Nụ ụjita umpwa-ni-bɛ-itɛ nu upiana ata, ibɛ shɛ Isene iyimɛyɛ nɛ zasa Ifucingɛ; ɛ zhɛ a ya iŋ tutu ijitɛ icenje.

¹⁸Hiɛ shɛ hio sotulonu tusotulonu te tijilo nụ ụjita uhiiŋ, hiɛ shɛ shɛ hia nda kaa ugondu we elele o.

¹⁹Pana ma AGWANGWAMA ụrụpɛ tuhwoŋzhingo ni inɛ ye eyi iyebi, nu udagba uko, medenji miaụŋ-ma-agwụdụ me eyi mi cenje mu na mu ta namɛ uywa uko te e meci aŋ, mu naa na kaa mu zasa tụsụnyasụ.

²⁰Hiɛ shɛ hia pana ụrụpɛ tiya ne mihiuŋ mi tilee lee mu nkwuronu mo tugongo mu tatụ mu na ee hiŋtetenji na manɛbɛ ma buta iwɛ buna be eyi be elele, mihiuŋ mu nkwuronu mo tugongo ti yebi, iwɛ udagba uko,

²¹mihiuŋ mi tilee lee mi ikwureni bugongo bu ko mɛ shɛ iwɛ miaụŋ ma ata ma agwụdụ mi cenje inɛ inɛ.

²²Hiɛ shɛ du hia ta ụrụpɛ iwɛwɛ nu upi uko, iwɛ iwɛwɛ tu'urugono.

²³Na nda inɛ gɛ medenji ụrụpɛ tuhwoŋzhingo na ɛhi zhɛ hi na ta nu uvwungwa we elele.

²⁴Gana ata du gbaa ɛhi zhɛ hi na pana AGWANGWAMA ụrụpɛ tiya tedure nu ulwa iyi-heri, i shanɛ bụ kaa ụhiụŋ ụlatụ ijitɛ icenje. Inɛ ɛtɛ namɛ swooŋ nụ ụrụpɛ tuhwoŋzhingo na aa uranga tuta keeni ụrụpɛ ubwa u tuswa.

²⁵Hiɛ shɛ hi na nda tusotulonu te tijilo nụ ụjita ata ucenje, hiɛ shɛ shɛ hia nda kaa ugondu ikɛnyi we elele o.

²⁶Aka na ahia pana AGWANGWAMA ụrụpɛ isene iyimɛyɛ ifwo ye ehilo ijitɛ icenje cenje tijicinje nụ ụjita uhiiŋ, hiɛ shɛ hia 'yaga tusotulonu te tijilo, hiɛ shɛ shɛ kaa hia nda ugondu ikɛnyi we elele o.

²⁷Pana ma AGWANGWAMA ụrụpɛ tuhwoŋzhingo na shanɛ bụ ụhiụŋ ụlatụ ni inɛ ye eyi iyebi, nu udagba uko, na miaụŋ-ma-agwụdụ me eyi mi cenje mu na mu ta namɛ uywa uko te e meci aŋ.

²⁸Medenji ụrụpɛ wa aba tiya, no mihiuŋ mi tilee lee mu nkwuronu mo tugongo tu tatụ mu na mi hiŋtetenji na manɛbɛ ma buta, iwɛ buna ata be elele, keeni mihiuŋ mu nkwuronu mo tugongo ti yebi iwɛ udagba ata uko,

²⁹keeni iyi-u'umpwa ike, iwɛ miaụŋ ma ata ma agwụdụ inɛ inɛ.

³⁰Pana ma ụrụpɛ iwɛwɛ tu'urugono nu upi uko.

³¹Na pana ma ụrụpɛ tuhwoŋzhingo a na tu'uranga, medenji ụrụpɛ ubwa u tiya, medenji a na ga. Na yalaga ma iyimabiga nɛ ahia pana arụpɛ ga iwɛ maa kede a 'yaga tụsụnyasụ te elele o.