Read bassa TƐRƐCƐ 29 Bible Online

TƐRƐCƐ 29 - bassa bible

TƐRƐCƐ 29

¹Hiɛ shɛ hio sotulonu tusotulonu tɛ tɛzhɛba nụ ụjita uhiiŋ nu upiana ucenje,[22] hiɛ shɛ shɛ kaa hia nda ugondu we elele na 'yajɛ ikɛnyi o. Ụ shɛ ụjita hiŋ wa akakacɛ tuhwulo.

²Pana ma AGWANGWAMA ụrụpɛ tuhwoŋzhingo, na shanɛ bụ ụhiụŋ ụlatụ, na buna be eyi bu ko, nu udagba uko keeni miaụŋ-ma-agwụdụ me eyi mi cenje mu na mu zasa tụsụnyasụ te elele, mu na mu ta namɛ uywa uko te e meci aŋ.

³Medenji ụrụpɛ tiya iyi-u'umpwa itatụ ne bimenji bo mihiuŋ mi tilee lee mu nkwuronu mo tugongo mu tatụ mu na ee hiŋtetenji na manɛbɛ ma buta iwɛ buna ata bu ko, iyi-u'umpwa iyebi i mihiuŋ mu nkwuronu mo tugongo mi yebi mɛ shɛ iwɛ udagba ata uko,

⁴medenji iyi-u'umpwa ike, iwɛ miaụŋ ma ata ma agwụdụ inɛ inɛ.

⁵Hiɛ shɛ du hia ta ụrụpɛ iwɛwɛ nu upi uko, iwɛ maa e urigeni iwɛwɛ hiŋ.

⁶Na nda ma inɛ gɛ medenji ụrụpɛ tuhwoŋzhingo upiana ufwo, nu ụrụpɛ ubwa u tiya, medenji ụrụpɛ tuhwoŋzhingo una tu'uranga keeni ụrụpɛ ubwa u tiya keeni ụrụpɛ wa aba u tuswa, gana na to shikpogo shi ibɛ shɛ namɛ. Arụpɛ ga aa pana tedure nu ulwa shanɛ AGWANGWAMA ụhiụŋ ụlatụ.

⁷'Yaga ma tusotulonu tɛ tɛzhɛba nụ ụjita umpwa nu upiana ucenje, ta ya ma iyimɛyɛ o, ta nda ma du ugondu we elele na 'yajɛ ikɛnyi nụ ụjita ata o.

⁸Pana ma AGWANGWAMA ụrụpɛ tuhwoŋzhingo na shanɛ bụ ụhiụŋ ụlatụ: na buna be eyi bu ko, nu udagba uko, na miaụŋ-ma-agwụdụ me eyi mi cenje, mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

⁹Medenji ụrụpɛ wa aba u tiya ne mihiuŋ mi tilee lee mu nkwuronu mo tugongo tu tatụ, mu na ee hiŋtetenji na manɛbɛ ma buta iwɛ buna ata bu ko, ne mihiuŋ mi tilee lee mu nkwuronu mo tugongo ti yebi, mɛ shɛ iwɛ udagba ata uko,

¹⁰keeni ikwureni bugongo bu ko, iwɛ miaụŋ ma ata ma agwụdụ inɛ inɛ.

¹¹Hiɛ shɛ du hia ta ụrụpɛ iwɛwɛ nu upi uko, una ata namɛ swooŋ nụ ụrụpɛ iwɛwɛ tu'urugono keeni ụrụpɛ tuhwoŋzhingo na aa uranga tuta, na arụpɛ aba tiya keeni arụpɛ aba tuswa.

¹²'Yaga ma tusotulonu tɛ tɛzhɛba nụ ụjita umpwa-ni-bɛ-itɛ nu upiana ucenje, untanganana ma AGWANGWAMA isene titeyinje tu ga ti ijitɛ icenje, ta nda ma ugondu ikɛnyi we elele o.

¹³Pana ma AGWANGWAMA ụrụpɛ tuhwoŋzhingo tedure nu ulwa, na shanɛ bụ ụhiụŋ ụlatụ, ni inɛ ye eyi umpwa-ni-bɛ-itɛtu, na adagba eyebi, na miaụŋ-ma-agwụdụ me eyi umpwa-na-muba-mi-neshi mu na mu ta namɛ uywa uko te e meci aŋ, mu naa na kaa mu zasa tụsụnyasụ te elele.

¹⁴Medenji ụrụpɛ tiya, ne mihiuŋ mi tilee lee mu nkwuronu mo tugongo tu tatụ, iwɛ inɛ ɛtɛ umpwa-ni-bɛ-itɛtu ne mihiuŋ mi tilee lee mu nkwuronu mo tugongo ti yebi, mu na ee hiŋtetenji na manɛbɛ ma buta, iwɛ adagba ata eyebi bu na bu na,

¹⁵keeni mihiuŋ mi tilee lee mi ikwureni bugongo bu ko, iwɛ miaụŋ ma ata ma agwụdụ umpwa-na-muba-mi-neshi inɛ inɛ.

¹⁶Hiɛ shɛ hia ta ụrụpɛ iwɛwɛ nu upi uko, una ata namɛ swooŋ nụ ụrụpɛ tuhwoŋzhingo na aa uranga tuta; nụ ụrụpɛ ubwa u tiya keeni ụrụpɛ ubwa u tuswa.

¹⁷Iyi nɛ ɛhi zhɛ hia pana ụrụpɛ ti iyi heri, i shɛ: esemberi inɛ umpwa-na-ba-eyebi, na adagba eyebi, na miaụŋ-ma-agwụdụ me eyi umpwa-na-muba-mi-neshi mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

¹⁸Pana ma arụpɛ tiya keeni arụpɛ tuswa iwɛ esemberi ata inɛ, na adagba ata keeni miaụŋ ma ata ma agwụdụ, gana na te e shiri okpogo ibɛ, nu gana na tu ufwugwo wa aba namɛ.

¹⁹Hiɛ shɛ du hia ta ụrụpɛ iwɛwɛ nu upi uko, una ata namɛ swooŋ nụ ụrụpɛ tuhwoŋzhingo na aa uranga tuta, nụ ụrụpɛ ubwa u tiya keeni ụrụpɛ ubwa u tuswa.

²⁰Iyi nɛ ɛhi zhɛ hia pana ụrụpɛ nụ ụjita ụtatụ i shɛ: esemberi inɛ umpwa-nu boo-ko, na adagba eyebi, na miaụŋ-ma-agwụdụ me eyi umpwa-na-muba-mi-neshi, mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

²¹Pana ma arụpɛ tiya keeni arụpɛ tuswa iwɛ esemberi ata inɛ, na adagba ata keeni miaụŋ ma ata ma agwụdụ, gana na te e shiri okpogo ibɛ, nu gana na tu ufwugwo wa aba namɛ.

²²Hiɛ shɛ du hia ta ụrụpɛ iwɛwɛ nu upi uko, una ata namɛ swooŋ nụ ụrụpɛ tuhwoŋzhingo na aa uranga tuta, nụ ụrụpɛ ubwa u tiya keeni ụrụpɛ ubwa u tuswa.

²³Iyi nɛ ɛhi zhɛ hia pana ụrụpɛ nụ ụjita uneshi i shɛ: esemberi inɛ umpwa, na adagba eyebi, keeni miaụŋ-ma-agwụdụ me eyi umpwa-na-muba-mi-neshi, mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

²⁴Pana ma arụpɛ tiya keeni arụpɛ tuswa iwɛ esemberi ata inɛ, na adagba ata keeni miaụŋ ma ata ma agwụdụ, gana na te e shiri okpogo ibɛ, nu gana na tu ufwugwo wa aba namɛ.

²⁵Hiɛ shɛ du hia ta ụrụpɛ iwɛwɛ nu upi uko, una namɛ swooŋ nụ ụrụpɛ tuhwoŋzhingo na aa uranga tuta, nụ ụrụpɛ ubwa u tiya keeni ụrụpɛ ubwa u tuswa.

²⁶Iyi nɛ ɛhi zhɛ hia pana ụrụpɛ nụ ụjita utana i shɛ: esemberi inɛ ecinjishi, na adagba eyebi, na miaụŋ-ma-agwụdụ me eyi umpwa-na-muba-mi-neshi mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

²⁷Pana ma arụpɛ tiya keeni arụpɛ tuswa iwɛ esemberi ata inɛ, na adagba ata keeni miaụŋ ma ata ma agwụdụ, gana na te e shiri okpogo ibɛ, nu gana na tu ufwugwo wa aba namɛ.

²⁸Hiɛ shɛ du hia ta ụrụpɛ iwɛwɛ nu upi uko, una namɛ swooŋ nụ ụrụpɛ tuhwoŋzhingo na aa uranga tuta, nụ ụrụpɛ ubwa u tiya keeni ụrụpɛ ubwa u tuswa.

²⁹Iyi nɛ ɛhi zhɛ hia pana ụrụpɛ nụ ụjita ucihiŋ i shɛ: esemberi inɛ atụndatụ, na adagba eyebi, na miaụŋ-ma-agwụdụ me eyi umpwa-na-muba-mi-neshi, mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

³⁰Pana ma arụpɛ tiya keeni arụpɛ tuswa iwɛ esemberi ata inɛ, na adagba ata keeni miaụŋ ma ata ma agwụdụ, gana na te e shiri okpogo ibɛ, nu gana na tu ufwugwo wa aba namɛ.

³¹Hiɛ shɛ du hia ta ụrụpɛ iwɛwɛ nu upi uko, una namɛ swooŋ nụ ụrụpɛ tuhwoŋzhingo na aa uranga tuta, nụ ụrụpɛ ubwa u tiya keeni ụrụpɛ ubwa u tuswa.

³²Iyi nɛ ɛhi zhɛ hia pana ụrụpɛ nụ ụjita ucenje i shɛ: esemberi inɛ ecenje, na adagba eyebi, na miaụŋ-ma-agwụdụ me eyi umpwa-na-muba-mi-neshi, mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

³³Pana ma arụpɛ tiya keeni arụpɛ tuswa iwɛ esemberi ata inɛ, na adagba ata keeni miaụŋ ma ata ma agwụdụ, gana na te e shiri okpogo ibɛ, nu gana na tu ufwugwo wa aba namɛ.

³⁴Hiɛ shɛ du hia ta ụrụpɛ iwɛwɛ nu upi uko, una namɛ swooŋ nụ ụrụpɛ tuhwoŋzhingo na aa uranga tuta, nụ ụrụpɛ ubwa u tiya keeni ụrụpɛ ubwa u tuswa.

³⁵Hiɛ shɛ hio sotulonu tusotulonu tɛ tɛzhɛba nụ ụjita ụtụndatụ, hiɛ shɛ shɛ kaa hia nda ugondu ikɛnyi we elele o.

³⁶Ama hiɛ shɛ hia pana AGWANGWAMA ụrụpɛ tuhwoŋzhingo tedure nu ulwa, na shanɛ bụ ụhiụŋ ụlatụ; nu usemberi buna bu ko, nu udagba uko, keeni miaụŋ-ma-agwụdụ me eyi mi cenje, mu na mu ta namɛ uywa uko te e meci aŋ, mu na kaa mu zasa tụsụnyasụ te elele.

³⁷Pana ma arụpɛ tiya keeni arụpɛ tuswa iwɛ usemberi ata buna, keeni iwɛ udagba ata keeni iwɛ miaụŋ ma ata ma agwụdụ, gana na te e shiri okpogo ibɛ, nu gana na tu ufwugwo wa aba namɛ.

³⁸Hiɛ shɛ du hia ta ụrụpɛ iwɛwɛ nu upi uko, una namɛ swooŋ nụ ụrụpɛ tuhwoŋzhingo na aa uranga tuta, nụ ụrụpɛ ubwa u tiya keeni ụrụpɛ ubwa u tuswa.

³⁹Inɛ gɛ ibɛ ɛhi zhɛ hi na pana AGWANGWAMA na aka nsono mi hiŋ mu na ehi shiri aka muba. Inɛ gɛ kaa namɛ swooŋ na apwaŋ hiŋ na ehi shiri-unu keeni apwaŋ hiŋ tukwulangana iwɛ ụrụpɛ hiŋ tuhwoŋzhingo, na arụpɛ hiŋ tiya keeni arụpɛ hiŋ tuswa, keeni arụpɛ hiŋ amɛ-olom.

⁴⁰Go Moses mbishi atwa Isrɛl iyi elele nɛ AGWANGWAMA peni bu unu ibɛ gom.