Read bassa TƐRƐCƐ 3 Bible Online

TƐRƐCƐ 3 - bassa bible

TƐRƐCƐ 3

¹Atwa ga aba shɛ atwa umwamwa Aron keeni Moses na aka na ta AGWANGWAMA jɛmɛ n-ndumwa no Moses ni Ishɛmɛ Sainai.

²Ga Aron 'yajɛ miaụŋ-me-eyi mi neshi, nzeci ma aba na: ga Nadab, ubwa shɛ yɛu ibwɛ ihiiŋ, na Abihu, nɛ Ɛleaza, keeni Itama

³E dudugeni aŋ manɛbɛ, ee tileni aŋ swooŋ maa a shɛ onongbo, maa a na nda ugondu tunongbo.

⁴Ama ga Nadab keeni Abihu 'wi nu umbe AGWANGWAMA nụ ụshɛka Sainai na aka na ta a shananɛ AGWANGWAMA ulwa na shɛ shɛ una tijilo. A zasa kaa miaụŋ o. Ata Ɛleaza keeni Itama tuba njɛ ugondu tunongbo ne eshe bishi ba aba ga Aron.

⁵Nazhɛ AGWANGWAMA hiɛŋ Moses,

⁶Suje ụlamụ wa Alivai maa o gwumwongonu, maa teri aŋ maa a na ndana Aron na shɛ bunongbo ugondu.

⁷Aba zhɛ na nda iyi nɛ bee eni aŋ tɛnda iwɛ udulo tu'ulwatagwụ keeni iwɛ ugondu tu'ulwa hwɛɛ,

⁸Aba zhɛ na ngbaraka i'wɛŋni'wɛŋni udulo ata ụ tu'ulwatagwụ hwɛɛ, aba du zhɛ no shiyono iyi ya atwa Isrɛl eshe maa a na nda ugondu nu udulo ata ụ tu'ulwatagwụ.

⁹Ga shɛ Alivai kiri a shɛ a na ndana Aron na Miaụŋ mu bwa iyi na ashashɛ atwa Isrɛl hwɛ hwɛɛ.

¹⁰Ga shɛ ga Aron na miaụŋ mu bwa kiri ebi teri maa a untangana ugondu tunongbo. Yaa shɛ binya bụtụ zhɛ ba kara maa gwumwongonu, ga kwụnɛ bụ.

¹¹Nazhɛ AGWANGWAMA hiɛŋ Moses,

¹²N suji Alivai na ashashɛ atwa Isrɛl maa a n shanɛ yɛu umbe nɛ bajɛ igwune tumata te bino bwa. N teri Alivai swooŋ maa a shɛ e nee mi.

¹³Iwɛnɛ po yɛu umbe ye elele i shɛ inee mi. Te kwuni nụ ụjita ata Ngaa kwụnɛ la miaụŋ mu umbe na cɛnjɛ ti Ijipti hwɛɛ, ibɛ po Ngee meme tileneni miaụŋ mu umbe mi Isrɛl hwɛɛ swooŋ. Ta butugwumwa, tu usunda, Gamba n 'yajɛ; Gamba AGWANGWAMA na.

¹⁴Nazhɛ AGWANGWAMA hiɛŋ Moses, nụ Ụshɛka ata Sainai,

¹⁵Rɛta miaụŋ-me-eyi ma Alivai gana na ta amwamwa nhwaŋ me eshi aba mu namɛ. Yɛu-ye-eyi ye elele nɛ i ulwawa upiana uko te e meci iŋ, i zhɛ geri-be-eshe, muba ɛbi zhɛ ba rɛta.

¹⁶Go Moses rɛcɛ aŋ ga gana na ta AGWANGWAMA peni bu unu.

¹⁷Nzeci mu miaụŋ-me-eyi ma Alivai na: gɛ Gɛshon, no Kohat keeni Mɛrari.

¹⁸Nzeci mu miaụŋ-me-eyi mu umwamwa Gɛshon na: ge Libni keeni Shimei.

¹⁹Nzeci mu miaụŋ-me-eyi mu umwamwa Kohat na: ga Amram, ne Izha, ne Hibron keeni Uziɛl.

²⁰Nzeci mu miaụŋ-me-eyi mu umwamwa Mɛrari na: ga Mali keeni Mushi. Atwa ga aba shɛ amwamwa Alivai, gana na tu nhwaŋ me eshi aba mu namɛ.

²¹Umwamwa wa atwa Libni keeni atwa Shimei banɛ no olugwo Gɛshon, atwa ata aba shɛ amwamwa Gɛshon.

²²Ufwugwo we etwenyi aba na aa rɛcɛ anaa na ee meci te kwune nu upiana uko i zhɛ geri-be-eshe, namɛ igbɛɛ-itɛtu-na-akpakwụ-ecenje-ni-dibi-yebi (7,500).

²³Atwa ga umwamwa Gɛshon, aba a dwa ugba wa aba na aba udulo tu'ulwatagwụ geri bu uwaŋna-twonuo.

²⁴Ge Iliasaf yɛu Laɛl, ubwa shɛ uhiu wa atwa umwamwa Gɛshon.

²⁵Iyi nɛ shɛ ugondu wa atwa umwamwa Gɛshon, i shɛ maa a na ngbaraka udulo ata, to tu'urugono ta amɛ ubwa, to tu'urugono ta aba ubwa keeni ibɛgɛlɛ ɛtɛ i tugwuno to odubo udulo ata ụ tu'ulwatagwụ,

²⁶to tugwuno ta ata ee kepi ukpogwu udulo ata tutu rungwutwonu, ti ibɛgɛlɛ ɛtɛ i tugwuno ee sweci no odubo ata oo tono ukpogwu ata keeni utukwu ata ụrụpɛ. Ti ihwehwe udulo ata keeni i'wɛŋni'wɛŋni nɛ i shɛ iwɛ ugondu ibɛ hwɛɛ.

²⁷Go Kohat, ubwa shɛ ugwunukwoshi wa atwa umwamwa Amram, nu umwamwa wa atwa Izha, na atwa umwamwa Hibron keeni atwa umwamwa Uziɛl.

²⁸Ufwugwo we etwenyi aba na aa rɛcɛ anaa na ee meci te kwuni nu upiana uko i zhɛ geri-be-eshe, namɛ igbɛɛ-ineshi-na-akpakwụ-atatụ (8,600).[3] Ugondu wa atwa umwamwa Kohat ụ shɛ maa a na ngbaraka ohwolu ata tijilo.

²⁹Umwamwa ga Kohat aba zhɛ na dwa ugba wa aba tuta tu udulo ata ụ tu'ulwatagwụ.

³⁰Ge Ɛlizafan, ubwa shɛ uhiu wa atwa umwamwa Kohat.

³¹Iyi nɛ ee peni aŋ tungbaraka i shɛ Ikpɛtɛ Unu-tutwa, nu uteburu, nu uteburu-ụsụtụla, no otukwu-ụrụpɛ, ti i'wɛŋni'wɛŋni ugondu wo ohwolu ata tijilo inɛɛ nɛ onongbo a nda ugondu ni ibɛ. Aba du 'yagananɛ tungbaraka ti ibɛgɛlɛ ɛtɛ i tugwuno aa swata no odubo ohwolu ata tijilo na hwuri kpaaŋ keeni iyi elele nɛ aa nda ugondu ni ibɛ hwɛɛ.

³²Gɛ Ɛleaza yɛu Aron bunongbo, ubwa shɛ uhiu wa Alivai na kaa bo shiyono atwa na a ngbaraka ohwolu ata tijilo eshe.

³³Gɛ Mɛrari, ubwa shɛ ugwunukwoshi wa atwa umwamwa Mali keeni atwa umwamwa Mushi, atwa ata aba shɛ amwamwa Mɛrari.

³⁴Ufwugwo we etwenyi aba na aa rɛcɛ anaa na ee meci te kwune nu upiana uko i zhɛ geri-be-eshe hwɛɛ namɛ igbɛɛ-itɛtu-nu-kpakwụ (6,200).

³⁵Go Zuriɛl yɛu Abihail, ubwa shɛ uhiu wa atwa umwamwa Mɛrari. Aba a dwa ugba wa aba tuzuba tu udulo ata ụ tu'ulwatagwụ.

³⁶Ugondu wa aba ụ shɛ maa a na imanganga shɛkpada shu udulo ata ụ tu'ulwatagwụ; ti imbele ibwɛ, ta atukpa ubwa, ti i'wɛ'wɛ ibwɛ tɛshɛla. Ta akwụka ubwa keeni i'wɛŋni'wɛŋni ugondu ubwa hwɛɛ.

³⁷Aba du 'yagananɛ ti'imanganga ta atukpa ata rungwutwonu umwamwa ata, ti i'wɛ'wɛ ibɛ i tɛshɛla, tu n-ngbalụ mu bwa keeni ihwehwe ibwɛ hwɛɛ.

³⁸Go Moses keeni Aron na miaụŋ mu bwa me eyi, aba shɛ a dwa ugba wa aba geri bu uwaŋna-banụ, nu umbe udulo ata ụ tu'ulwatagwụ. Aba 'yajɛ ugondu we elele tɛnda na amɛ ohwolu ata tijilo tụlụkpashɛ ta atwa Isrɛl. Binya bụtụ be elele na kara maa gwumwonu apata, ɛ zhɛ a kwụna bụ.

³⁹Etwenyi amwamwa Alivai a na go Moses keeni Aron rɛcɛ nu gana na ta AGWANGWAMA peni aŋ unu, aba shɛ atwa na ee meci te kwune nu upiana uko i zhɛ geri-be-eshe. Hwɛɛ aba namɛ igbɛɛ-umpwa-nu-boo-ko (22,000).

⁴⁰Nazhɛ AGWANGWAMA hiɛŋ Moses, Rɛta etwenyi na shɛ miaụŋ mu umbe ma atwa Isrɛl hwɛɛ. Aba shɛ atwa na ee meci te kwune nu upiana uko i zhɛ geri-be-eshe. 'Nyata nzeci ma aba.

⁴¹Bɛɛ hiɛŋ bụ, N sugeni Alivai tụlụkpashɛ ta miaụŋ mu umbe ma atwa Isrɛl hwɛɛ. Ti iyimabiga ya Alivai tụlụkpashɛ ta miaụŋ mu umbe mi iyimabiga ya atwa Isrɛl hwɛɛ. Gamba AGWANGWAMA na.

⁴²Go Moses rɛcɛ ga miaụŋ mu umbe ma atwa Isrɛl hwɛɛ, gana na ta AGWANGWAMA peni bu unu.

⁴³Ufwugwo we etwenyi na shɛ miaụŋ mu umbe a na ee meci te kwune nu upiana uko i zhɛ geri-be-eshe hwɛɛ aba namɛ igbɛɛ-umpwa-nu-boo-ko-nu-kpakwụ-nu-dupu-nu-woshi-na-ba-a-tatụ (22,273).

⁴⁴Nazhɛ AGWANGWAMA hiɛŋ Moses,

⁴⁵N tileneni Alivai swooŋ tụlụkpashɛ tu miaụŋ mu umbe ma atwa Isrɛl hwɛɛ. N tileneni du iyimabiga ya Alivai swooŋ tụlụkpashɛ ti iyimabiga ya atwa Isrɛl hwɛɛ. Gamba AGWANGWAMA na.

⁴⁶Gana na tu miaụŋ mu umbe me eyi ma atwa Isrɛl mu patanɛ na atwa Livai kpakwụ-nu-dupu-nu-woshi-na-ba-a-tatụ (273), bɛ shɛ ba saanana aŋ.

⁴⁷Bụtụ bụtụ aba shɛ ba tụpa azụrụfa arinya a ta, na shɛ ulumo wa azụrụfa ohwolu tijilo, aba shɛ bimenji ba agira woshi.

⁴⁸Sugo ukwuribi ata ee seeneni atwa ata ga patanɛ maa peni Aron na miaụŋ mu bwa me eyi.

⁴⁹Go Moses leshiji ga ukwuribi ata ni i'ɛlɛ ya atwa ata ga patanɛ.

⁵⁰Ukwuribi ata bee leshiji no olugwo miaụŋ mu umbe ma atwa Isrɛl namɛ azụrụfa arinya akpakwụ-e-cihiŋ-ni-dipi-tɛtu-ne-eshe-umpwa-na-ba-ta (1,365), ibɛ shɛ ulumo wa azụrụfa ohwolu tijilo.

⁵¹Nazhɛ go Moses peni Aron keeni miaụŋ mu bwa me eyi ukwuribi ata u tusaanana, gana na ta AGWANGWAMA peni bu unu.