Read bassa TƐRƐCƐ 31 Bible Online

TƐRƐCƐ 31 - bassa bible

TƐRƐCƐ 31

²Tụpana ma Amidia tụlụkpashɛ ta atwa Isrɛl, na aba inɛ ɛtɛ nazhɛ ɛbi zhɛ bo 'wo.

³Go Moses mbishi ga atwa Isrɛl, bɛɛ hiɛŋ aŋ, Tala ma etwenyi oko na ashashɛ hiŋ maa a mama 'imɛ iwɛ ma a sukakanɛ Amidia nu ujasa maa a njɛ itɛpwɛ ya AGWANGWAMA.

⁴Ga ụlamụ wa atwa Isrɛl we elele vwɛ atwa akpakwụ-a-ta maa e zhe ujasa.

⁵Ibɛ po ụlamụ wa atwa Isrɛl we elele bwajɛ ga etwenyi akpakwụ-a-ta a-ta hwɛɛ, ibɛ ufwugwo wa aba hwɛɛ namɛ ya atwa igbɛɛ icihiŋ (12,000) a na mama 'imɛ maa e zhe ujasa.

⁶Go Moses tumwanɛ atwa ata akpakwụ-a-ta a-ta a na banɛ nụ ụlamụ wa atwa Isrɛl we elele. Ge Finihas yɛu Ɛleaza bunongbo, ubwa untanganɛ aŋ, ti iyi-uhwugwa nɛ banɛ no ohwolu ata tijilo hwɛɛ keeni akakacɛ a na maa o no hwulo, maa o no mbiso aŋ iyi nɛ i shɛ maa a njɛ.

⁷Ee zhe ga aa njɛ ujasa na Amidia, gana na ta AGWANGWAMA peni Moses unu. Aa kwụnɛ etwenyi aba elele hwɛɛ.

⁸A kwụnɛ du shɛgwuma sha Amidia shɛ ta: gɛ Ɛvi, nɛ Rɛkɛm, no Zu, no Hu keeni Rɛba. A kwụnɛ du Balam yɛu Bio nu utokwobi.

⁹Nazhɛ atwa Isrɛl 'imɛ eyikwo atwa Amidia, ta miaụŋ ma aba, ee suji du i'wɛŋnɛ ya aba hwɛɛ, ti inɛ ya aba, ta agwụdụ aba hwɛɛ ee hwuri maa i shɛ ufwa wa ba ujasa.

¹⁰E hwoŋzhenji du ashɛpwụ atwa Amidia hwɛɛ keeni agba aba na oo go sotulongonu hwɛɛ.

¹¹Ee suji iyi elele nɛ ujasa ga yɛ aa njɛ inɛ ya aba, ta atwa, ti iyimabiga hwɛɛ.

¹²Ee suje atwa ata ujasa yɛ, ti i'wɛŋnɛ ɛtɛ no ofwo Moses keeni Ɛleaza bunongbo, keeni ofwo tu'ulwa ta atwa Isrɛl hwɛɛ, nu ugba wa aba na aa namɛ, nu udadarɛ Moab na namɛ nu ụpalanụ Urefu Jodan ne eririri tɛkasha ti Jɛriko.

¹³Ibɛ po go Moses, nɛ Ɛleaza bunongbo keeni ehwurembe tu'ulwatagwụ ta atwa Isrɛl kpaaŋ beni nu ugba ata aa ga namɛ, ee teji aŋ uhwaŋna maa a twa na aba no tupohondo tu ugba wa aba.

¹⁴Go Moses njɛ isɛbwɛ ne ehiu ejeshi, keeni eberezhe ejeshi akpakwụ-a-ta a-ta keeni eberezhe ejeshi dipi-yeyebi a na jiye ujasa.

¹⁵Bɛɛ hiɛŋ aŋ, Iwembe po ehi genji eyikwo maa a namaa?

¹⁶Teyinje ma maa eyikwo ga aba 'wa la tusokokono tu Balam ni iwɛ Pio, aba zeriji la atwa Isrɛl maa a 'wanganɛ AGWANGWAMA, ibɛ po la kaa tishikpe tɛ zhaganɛ tu'ulwatagwụ ta atwa AGWANGWAMA hwɛɛ.

¹⁷Iwɛ inɛ ɛtɛ kwụna ma yɛu-ye-eyi ye elele keeni biyikwo be elele na mwopwo butubwenyi hwuwayɛ go.

¹⁸Ama ganga ma miaụŋ-mo-o mu na mi te mepi shi etwenyi iwɛ ikɛnyi hiŋ.

¹⁹Ama ga bụtụ be elele na kwụnɛ bụtụ nu ujasa keeni bụtụ be elele na timengeni ru'wo gɛga no tupohondo tu ugba ijitɛ icenje. Hiɛ shɛ hi mama nda shɛshɛshɛ nụ ụjita ụtatụ keeni ụjita ucenje, te eyikwo ata ɛhi imɛ nu ujasa.

²⁰Hiɛ shɛ hia nyashanga tugwuno ti hiŋ shɛshɛshɛ keeni i'wɛŋnɛ nɛ aa njɛ nu u'waba keeni iyi nɛ aa njɛ ne tihiŋzhe ti iyweywe hwɛɛ, ti i'wɛŋnɛ ye elele nɛ aa njɛ ni i'wɛ'wɛ.

²¹Gɛ Ɛleaza bunongbo mbishi atwa ata jiye ujasa, bɛɛ hiɛŋ aŋ, Shikpogo shɛ na AGWANGWAMA peni Moses na:

²²ge nyeshi iyi elele nɛ ulwa eri shi wo hwoŋzhingo, gana azhɛnarɛya, na azụrụfa, nu utumburɛ, nụ ụshɛmbɛrɛ, ni itezere keeni bundala,

²³Iyi elele nɛ eri yo hwoŋno nu ulwa, ge shiyeni iŋ ne meni ma ata ma nyashɛnga iyi shɛshɛshɛ.

²⁴I shɛ i tilɛɛ maa hiɛ nyashɛnjɛ tugwuno ti hiŋ nụ ụjita ucenje, nazhɛ ɛhi zhɛ hia nama shɛshɛshɛ, nazhɛ ɛɛ zhɛ mo hi lonono maa hi gwure nu ugba tu'ulwa no ofwo atwa vwɛ.

²⁵Nazhɛ AGWANGWAMA hiɛŋ Moses,

²⁶Gabụ keeni Ɛleaza bunongbo keeni ehiu nhwaŋ me eshi tu'ulwatagwụ tu ga hwɛɛ, rɛta ma i'wɛŋnɛ ɛtɛ ujasa yɛ, ta atwa, ti iyimabiga.

²⁷Dwotwogonu ma i'wɛŋnɛ ɛtɛ orubwo eyebi ta nangatangwụ. Go urubwo uko ụ shɛ una we ejeshi na ge zhe ujasa, maa urubwo uyebi ụ shɛ una tu'ulwatagwụ kpaaŋ.

²⁸Ge ejeshi na ge zhe ujasa palaganɛ AGWANGWAMA ụdalụ wa aba. Gɛ ɛ vwɛ iyi ike na amɛ akpakwụ-eyebi-ni-dipi-yebi (500) ni i'wɛŋnɛ ɛtɛ ga shɛ inɛ ya aba, ta atwa ata ɛɛ gɛ imɛ, ti inɛ, tu nzhinyacɛ, ta agwụdụ, kwo kaa iyweywe.

²⁹Sugo tudwonu ta ashashɛ inɛ ya aba maa peni Ɛleaza bunongbo, maa i shɛ upwaŋ na aa palaganɛ AGWANGWAMA.

³⁰Ga atwa vwɛ ni Isrɛl bwajɛ iyi dupu dupu na amɛ tudwonu ta ashashɛ ni inɛɛ nɛ ga shɛ urobwo wa aba, ta atwa, ti inɛ, tu nzhinyacɛ, ta agwụdụ, ti iyweywe kwo kaa iyimabiga inyɛ ye elele. Sugo iŋ maa peni Alivai a na a ngbaraka udulo wa AGWANGWAMA.

³¹Go Moses keeni Ɛleaza bunongbo njɛ gana na ta AGWANGWAMA peni aŋ unu.

³²I'wɛŋnɛ nɛ etwenyi na zhe ujasa suji na amɛ i'wɛŋnɛ ɛtɛ ujasa yɛ namɛ igbɛɛ-akpakwụ-atatụ-ni-bɛ-itɛtu-na-akpakwụ-a-ta-ni-bɛ-itɛ (675,000),

³³inɛ namɛ igbɛɛ-talacɛ-ni-bɛ-cenje (72,000),

³⁴nzhinyacɛ mu namɛ igbɛɛ-talacɛ-na-akpakwụ-a-ta (61,000),

³⁵eyikwo na te mepi shi etwenyi namɛ igbɛɛ-umpwa-ni-bɛ-icihiŋ (32,000).

³⁶Tudwonu ta ashashɛ agwụdụ a na shɛ urobwo we ejeshi na zhe ujasa, ufwugwo wa aba namɛ igbɛɛ-kpakwụ-ni-dipi-yebi-ni-bɛ-tindɛtu-na-akpakwụ-eyebi-ni-dipi-yebi (337,500),

³⁷Agwụdụ na aa palaganɛ AGWANGWAMA namɛ akpakwụ-atatụ-nu-dupu-nu-woshi-na-ba-a-ta (675),

³⁸inɛ ya aba namɛ igbɛɛ-umpwa-ni-bɛ-tindɛtu (36,000), inɛɛ nɛ aa palaganɛ AGWANGWAMA namɛ dupu-nu-woshi-ni-bɛ-yebi (72),

³⁹nzhinyacɛ ma aba mu namɛ igbɛɛ-umpwa-ni-bɛ-itɛ-na-akpakwụ-eyebi-ni-dipi-yebi (30,500), inɛɛ nɛ aa palaganɛ AGWANGWAMA namɛ dupu-ne-eshe-umpwa-nu-boo-ko (61),

⁴⁰atwa aba namɛ igbɛɛ-tindɛtu (16,000), atwa na aa palaganɛ AGWANGWAMA namɛ atwa talacɛ-na-ba-eyebi (32).

⁴¹Go Moses suji iŋ bee peni Ɛleaza bunongbo, inɛ ɛtɛ ibɛ shɛ upwaŋ na aa palaganɛ AGWANGWAMA, gana na ta AGWANGWAMA peni Moses unu.

⁴²Tudwonu ta ashashɛ tu na tu vwɛ ni inɛɛ nɛ go Moses peni ejeshi, i shɛ inɛ ya atwa tu'ulwatagwụ ti Isrɛl hwɛɛ,

⁴³agwụdụ aba namɛ du igbɛɛ-kpakwụ-ni-dipi-yebi-ni-bɛ-tindɛtu-na-akpakwụ-eyebi-ni-dipi-yebi (337,500)

⁴⁴inɛ ya aba namɛ igbɛɛ-umpwa-ni-bɛ-tindɛtu (36,000),

⁴⁵nzhinyacɛ ma aba mu namɛ igbɛɛ-umpwa-ni-bɛ-itɛ-na-akpakwụ-eyebi-ni-dipi-yebi, (30,500),

⁴⁶atwa aba namɛ igbɛɛ-tindɛtu (16,000),

⁴⁷Go Moses bwajɛ iyi ike ike na amɛ iyi dupu dupu, ta atwa, ti iyimabiga, bee peni Alivai a na a ngbaraka umwono tu'ulwatagwụ wa AGWANGWAMA gana na ta AGWANGWAMA peni bu unu.

⁴⁸Nazhɛ ehiu a na untanganɛ ejeshi akpakwụ-a-ta a-ta keeni a na dipi-yeyebi zhajɛ no ofwo Moses,

⁴⁹ɛɛ hiɛŋ bụ, Tɛ rɛcɛ ejeshi na namɛ ni i'ɛlɛ tu, i zasa bụtụ okwo bu ko 'inɛ na amɛ aba o.

⁵⁰Iwɛbɛ po atu 'waŋnanɛ AGWANGWAMA apwaŋ na shɛ iyi tisemberi ya azhɛnarɛya, no shikpokwu, no shi'umwo, na tɛkanɛ, na shɛtakwụ keeni tụmbwụ ti i'ilu, iwɛ maa ta nda iyi iwɛwɛ tu'urogono na agba AGWANGWAMA.

⁵¹Go Moses keeni Ɛleaza bunongbo leshiji i'wɛŋnɛ ɛtɛ tisemberi nɛ aa njɛ na azhɛnarɛya hwɛɛ,

⁵²ufwugwo ibɛ hwɛɛ namɛ ɛshɛkɛl igbɛɛ-tindɛtu-na-akpakwụ-atatụ-ni-dipi-tɛtu (16,750).

⁵³Bụtụ bụtụ na amɛ atwa na zhe ujasa untanganɛ i'wɛŋnɛ ibwɛ nɛ bee suje nu ujasa.

⁵⁴Go Moses keeni Ɛleaza bunongbo suje i'wɛŋnɛ ɛtɛ ya azhɛnarɛya nɛ ee leshiji no olugwo eberezhe ejeshi akpakwụ-a-ta a-ta keeni a na dipi-yeyebi, ee tileni iŋ nu umwono tu'ulwa wa AGWANGWAMA iwɛ maa i shanɛ atwa Isrɛl iyi titeyinje na agba AGWANGWAMA.