Read bassa TƐRƐCƐ 36 Bible Online

TƐRƐCƐ 36 - bassa bible

TƐRƐCƐ 36

¹Nazhɛ ehiu nhwaŋ ma amwamwa Giliad yɛu Maki, na shɛ bụjalụ Josɛf, zhe no ofwo Moses keeni ofwo ehwurembe avwɛ atwa Isrɛl.

²Ɛɛ hiɛŋ aŋ, AGWANGWAMA ibi peni la unu maa dwotwogonu atwa Isrɛl cɛnjɛ ta aba tedure ni icɛcɛ tu'waŋ. Bee bi peni du unu sasana maa hwoŋshi miaụŋ-mo-o mu Zɛlofɛhad cɛnjɛ ti yɛu-bino tu.

³Ama yaa shɛ aa cɛnɛ alamụ anya na atwa Isrɛl, asha ɛ zhɛ a bacɛnga ogwu aba no ogwu eshi tu maa e keeni ogwu ụlamụ ata aa cɛnɛ; ni icɛcɛ tu'waŋ kaa ɛɛ zhɛ a bacɛnga aŋ.

⁴Aka na tu uywa iyi tugwurocongo u ci, te e gwurecenji cɛnjɛ te elele tu na ee ge senji la no ofwo atwa na ga 'yajɛ tụ la hiiŋ, asha cɛnjɛ ta miaụŋ-mo-o mu Zɛlofɛhad ti zhɛ ta zha maa ti keeni ma tụ ụlamụ ata aa cɛnɛ, ama ụlamụ tu tuba zhɛ wa vwụnga tụ ya.

⁵Go Moses peni atwa Isrɛl unu nu gana na ta AGWANGWAMA jɛmɛ la, bɛɛ hiɛŋ, Ụlamụ Manasɛ teni cɛŋ ni iyi nɛ aa jɛmɛ.

⁶Iyi nɛ AGWANGWAMA peni-unu ibɛ iwɛ miaụŋ-mo-o mu Zɛlofɛhad i shɛ maa, Ga a tuna bụtụ be elele na kwụlanɛ aŋ, ama tuba ga shɛ na amɛ ụlamụ wa aba ukɛnyi wa aba kiri.

⁷Cɛnjɛ to ogwu ta atwa Isrɛl tɛ shɛ shɛ ta bana nụ ụlamụ uko maa ti teni nụ ụlamụ unya o. Bụtụ bi Isrɛl be elele bɛ shɛ ba untangana cɛnjɛ te eshi ubwa nụ ụlamụ wa aba.

⁸Yɛu-yo-o ye elele nɛ 'yajɛ cɛnjɛ to ogwu nụ ụlamụ we elele ni Isrɛl, bɛ shɛ ba tuna bụtụ bu umwamwa ụlamụ bishi bwa, iwɛ maa ga bụtụ be elele tuba untangana cɛnjɛ to ogwu bishi bwa.

⁹Ogwu cɛnjɛ tụ ụlamụ we elele tɛ shɛ shɛ ta bana nụ ụlamụ uko maa ti teni nụ ụlamụ unya o. Ga alamụ atwa Isrɛl na untangana cɛnjɛ ta aba.

¹⁰Ibɛ po miaụŋ-mo-o mu Zɛlofɛhad mɛ njɛ gana na ta AGWANGWAMA peni Moses unu.

¹¹Ibɛ po ga Mala, ne Tiza, no Hogla, ne Milka keeni Noa a na shɛ miaụŋ-mo-o mu Zɛlofɛhad mɛ cɛnɛ nkwonyi ma aba.

¹²A cɛnɛ na amɛ amwamwa ụlamụ Manasɛ yɛu Josɛf, ibɛ po aa untanganɛ cɛnjɛ te bishi ba aba na amɛ umwamwa ụlamụ wa aba.

¹³Inɛ gɛ kpaaŋ ibɛ shɛ shikpogo keeni unu na AGWANGWAMA peni la atwa Isrɛl tedure no Moses na adadarɛ Moab nụ ụpalanụ Urefu Jodan, ne eririri tɛkasha ti Jɛriko.