Read bassa TƐRƐCƐ 9 Bible Online

TƐRƐCƐ 9 - bassa bible

TƐRƐCƐ 9

¹Nazhɛ AGWANGWAMA mbishi Moses iwɛ nụ Ụshɛka Sainai, nu upiana uhiiŋ nu uywa uyebi na ta a banɛ na cɛnjɛ ti Ijipti, bɛɛ hiɛŋ,

²Ga atwa Isrɛl na untangana isene iyimɛyɛ tɛkashɛka tɛnda na aka ibɛ nɛ ee shiri.

³Hi zhɛ hi na nda iŋ nụ ụrụmɛ ụjita umpwa-ni-bɛ-ineshi nu upiana ga,[6] na aka ibɛ nɛ ee shiri, gana na ta andwa ibɛ no shikpogo shi ibɛ shɛ namɛ.

⁴Go Moses mbishi ga atwa Isrɛl maa ga a na nda isene iyimɛyɛ tɛkashɛka.

⁵Ibɛ po aa njɛ ga isene iyimɛyɛ ɛtɛ tɛkashɛka nụ ụrụmɛ ụjita ata umpwa-ni-bɛ-ineshi nu upiana ata uhiiŋ nụ Ụshɛka Sainai. Atwa Isrɛl njɛ iyi elele te teni cɛŋ nu gana na ta AGWANGWAMA peni Moses unu ibɛ gom.

⁶Ama etwenyi oko njɛ shɛ isene ɛtɛ iyimɛyɛ tɛkashɛka nụ ụjita ata o, iwɛnɛ te e meme heshigeni no ru'wo ru na ee timengeni. Ibɛ po ee zhe pu Moses keeni Aron nụ ụjita ata gbaa,

⁷ɛɛ hiɛŋ aŋ, Tu hashɛganụ, iwɛnɛ eti timengeni ru'wo, iwembe tuba atɛ shɛ shɛ to togotogwu na atwa vwɛ Isrɛl maa ta pana AGWANGWAMA upwaaŋ?

⁸Go Moses jishijɛ aŋ, bɛɛ hiɛŋ, Nda ma zhiiŋ maa ma hwuga iyi nɛ AGWANGWAMA zhɛ ma m pana-unu iwɛ hiŋ.

⁹Ibɛ po AGWANGWAMA hiɛŋ Moses,

¹⁰Mbiso atwa Isrɛl maa, Yaa shɛ bụtụ hiŋ be elele kwo kaa ajalalo hiŋ hashɛganụ iwɛnɛ ti bee timengeni ru'wo, kwo kaa iwɛnɛ bee zhe tahaŋnụ taa dụlụ, bi eri ba ndana waa AGWANGWAMA isene iyimɛyɛ tɛkashɛka.

¹¹A shɛ a nda iŋ nụ ụjita ata umpwa-ni-bɛ-ineshi nu upiana ata uyebi nụ ụrụmɛ. Ga a yɛ iŋ na akara na zasa Ifucingɛ keeni atụla.

¹²Ta ganga ma iyimɛyɛ ɛtɛ ye elele maa iyi heleni iŋ o, ta bwada ma kaa du u'umpwo usunda ata kwukwuŋ o. Ga njɛ iŋ nu gana na to shikpogo shi ibɛ shɛ namɛ hwɛɛ.

¹³Ama bụtụ na namɛ shɛshɛshɛ, na kaa zhe shi tahaŋnụ, baa njɛ shɛ kaa isene ɛtɛ tɛkashɛka, ge becinji bu na ashashɛ atwa ubwa, iwɛnɛ ti bee peni shi AGWANGWAMA upwaŋ ubwa na aka ibɛ nɛ ee shiri, bụtụ ata shɛ ba 'waŋna tijama ti iwɛwɛ ibwɛ.

¹⁴Yaa shɛ kaa ya kwụlanɛ bugaiŋ na ba nda ụlashɛ na ashashɛ hiŋ, maa ndana AGWANGWAMA isene ɛtɛ tɛkashɛka, hiɛ shɛ hio lonono bu maa ga nda iŋ gana na ta andwa keeni shikpogo shi ibɛ shɛ namɛ hwɛɛ. Undwa hiŋ shɛ wa sha uko na bụtụ be elele, ta bụlashɛ, ti yɛu-cɛnjɛ.

¹⁵Nụ ụjita na ee shikicinji udulo ata ụ tu'ulwatagwụ na shɛ udulo tiseyida, Nazhɛ udomu kezhe wee urigeni uŋ. Ụrụmɛ shɛ ibɛ udomu ata ge urigeni udulo ata ụ shɛ gana ulwa uuwa gi iyi yo holo.

¹⁶Gabata yaa shɛ tutu, udomu ata wo urugono udulo ata nu uwaŋna, ụjita shi, wa sha tuba gana ulwa.

¹⁷Aka elele na tu udomu ata ushigwo nu udulo ata, nazhɛ atwa Isrɛl o kwuno tahaŋnụ ta aba, ofwo elele kaa udomu ata shikeni, nazhɛ atwa Isrɛl du zhɛ a dwa ugba wa aba u tunama.

¹⁸Atwa Isrɛl o kwuno tahaŋnụ ta aba nu unu-tupana wa AGWANGWAMA, nu unu-tupana wa AGWANGWAMA kaa du aa dwa ugba wa aba. Gana elele tu udomu ata ilegeji tu waa patanɛ nu udulo ata, gobwonu du ɛɛ zhɛ a gɛga nu ugba ata.

¹⁹Atwa Isrɛl o shiyono unu na AGWANGWAMA peni aŋ eshe, aka elele na tu udomu ata ta patanɛ nu udulo ata, a zha shɛ o kwuno tahaŋnụ ta aba o.

²⁰Aka oko udomu ata wa patana nu udulo ata ijitɛ imbɛnɛ kiri. Bɛjɛjɛ ba aba nu ugba wa aba bɛ shɛ nu unu-tupana wa AGWANGWAMA, tukwuno ta tahaŋnụ ta aba kaa du ta sha nu unu-tupana wa AGWANGWAMA.

²¹Aka oko udomu ata wa nama te kwuni nụ ụrụmɛ tutu uvwungwa. O kwuno tahaŋnụ ta aba gunu na tu udomu ata pashɛngwa. Aka elele na tu udomu ata pashɛngwa ibɛ du ɛɛ zhɛ o kwuno tahaŋnụ ta aba.

²²Okwo waa patanɛ ijitɛ iyebi, kwo kaa upiana uko, kwo kaa uywa uko, kwo kaa wee ilegeji uhwuri gana ata tu waa patanɛ nu udulo ata wa atwa Isrɛl ɛ zhɛ a nama nu ugba ata. Ama aka elele na tu waa pashɛngwa, nazhɛ ɛɛ zhɛ ɛ ishijɛ.

²³O shiyono unu na AGWANGWAMA peni aŋ tedure no Moses eshe. Nu unu-tupana wa AGWANGWAMA oo kwuno tahaŋnụ ta aba, nu unu-tupana wa AGWANGWAMA kaa du aa dwa ugba wa aba.