Read bassa MAIKA 4 Bible Online

MAIKA 4 - bassa bible

MAIKA 4

¹Aka zhɛ o to hwuŋ ti ishɛmɛ ɛtɛ oo mo umwono wa AGWANGWAMA zhɛ yo zoto ye hwulo nshama me elele. Ɛ zhɛ a kaana iŋ uzoto uhwuri tikpekwu te elele kpaaŋ, atwamwa kaa zhɛ na fwunga ni bɛ.

²Ibɛ po edenji ofwugwo zhɛ a zhajɛ, ɛ hiɛŋ. Mizha tu munji ma ishɛmɛ ya AGWANGWAMA,[13] nu umwono wa Agwatana Jekob, iwɛ maa mo tu mbisogono ihwɛŋnɛ ibwɛ, maa ta 'wa ụpapụ ubwa na bee shiri. Iwɛnɛ po nu Zayon apata undwa zhɛ wa banɛ, nu Jɛrusalɛm tuba n-ndumwa ma AGWANGWAMA mi zhɛ ma banɛ.

³Ubwa zhɛ na kwunangana edenji ofwugwo ashɛrɛya aba, bɛɛ zhɛ na kwunangana edenji a na dụlụmanjɛ ashɛrɛya aba, ɛ zhɛ o dubo otokwobi aba maa a shɛ n-ngowo, ɛɛ zhɛ o dubo nsanụ ma aba maa mɛ shɛ afwuya. Edenji zha shɛ no momo josonu ya o, a zha shɛ du kaa o soso ya ujasa tujasa o.

⁴Bụtụ bụtụ zhɛ ba gɛga nu ucilo wa afwafwa ubwa keeni i'wɛ'wɛ ibwɛ yo owowo, i zasa bụtụ be elele na kaa zhɛ no zwono aŋ ya inyɛsɛ o, iwɛnɛ ta AGWANGWAMA na Hwuri Kpaaŋ dumwa.

⁵Nazhɛ edenji elele zhɛ na zhɛba izeci tuwa ta aba, ama ti zhɛ tuba tu na zhɛba izeci ya AGWANGWAMA na shɛ Agwatana tu, tutu unyizo-nom.

⁶AGWANGWAMA hiɛŋ, Aka ata ci hwuŋ, N zhɛ mo sotulonu atwa na hinyangwụ, N zhɛ me gwurecenji atwa na ee suji la na ti'ima, keeni atwa na Ngee heshigeni la shɛmɛ.

⁷N zhɛ ma nda maa ga atwa ata hinyangwụ avwɛ, maa ma nda tuba atwa na ee unzhi la maa a shɛ udenji ụ'wụtụ 'wụtụ. AGWANGWAMA ubwa kaa zhɛ a sha Agwuma aba ni Ishɛmɛ Zayon te kwuni na aka ga, tutu unyizo-nom.

⁸Gabụ Jɛrusalɛm, na vwụnjɛ ya bi'iywa bu unyama ba atwa Agwatana, ɛ zhɛ me bu gwuricingeni ụhwada wa ala bụ ụngwụshɛ ibɛ shɛ cɛnjɛ-ta-tugwama tu Jɛrusalɛm.

⁹Imbe po ebi keri n'ungwa taawụụ? Bu zasa ya suu agwuma? Atwa na ma bụ pana la shihaŋsa suu 'wegeni upo aba nda ụbaụta gana biyikwo na ụngwụ tumata to?

¹⁰Oo ahiɛba atwa Jɛrusalɛm, na mama mbata ma, maa hi no 'nyongo gana biyikwo na zhɛ tumata, i shɛ tilɛɛ maa beni nụ ụshɛpwụ hwuwayɛ go, maa zhe ne ehilo na namɛ kpataa maa jwe ugba bụ apata. Bi zhɛ ba zha Babulon, apata ɛɛ zhɛ ma bụ lashɛga. Apata kaa du AGWANGWAMA zhɛ mo bu bicingo ni i'ɛlɛ ya atwa i'ime bu.

¹¹Edenji ofwugwo ulwatagwụ hwuwayɛ go maa a bụ sukakanɛ, ɛɛ hiɛŋ, Ge heshigeni bu, ti zhɛ ta ngbaraka tuhwuŋzwo tu Zayon ne eshe tu.

¹²Ama e mepi shi kaa tuhaŋsa ta AGWANGWAMA o, e eshiciji shi kaa du ti'imanganga tu bwa o, maa bi zhɛ bo sutono aŋ maa e jibi aŋ gana na oo dubo ohiu na akpakpata o.

¹³Oo ahiɛba atwa Jɛrusalɛm, ishijɛ ma maa hi jibi atwa i'ime hiŋ gana na oo dubo ohiu. N zhɛ ma hi nda maa hiɛ shɛ gana buna be eyi, maa hi 'yaga ukpahiŋ gana mahiuaŋ ma ashɛmbɛrɛ keeni ogwogwozwo ɛtumburɛ, maa hi bwereteji edenji rukwu rukwu, ahiɛba hi zhɛ hi mo n tulonono titeni ta aba to orugwusu, Gamba AGWANGWAMA na 'yajɛ cɛnjɛ tu unyizo kpaaŋ, tu uduciya wa aba.