Read bassa MAIKA 6 Bible Online

MAIKA 6 - bassa bible

MAIKA 6

¹Hwuga ma iwɛ nɛ AGWANGWAMA a duma. Ishijɛ ma, maa hi swegeni nshama ukara hiŋ, ge tingbekwu tụ hwụjɛ iyi nɛ ɛhi zhɛ hie sweji.

²Oo ahiɛba nshama, hwuga ma uwuru na AGWANGWAMA 'yajɛ, ahiɛba okoshilo unyizo na namɛ unyizo-nom, AGWANGWAMA 'yajɛ uwuru na atwa ubwa Isrɛl.

³Oo ahiɛba atwa mi, imbe kwuŋ Ngaa hiɛ njɛɛ? Ni imbe kwuŋ Ngaa hiɛ 'waŋnɛ shɛ ihwungwɛɛ? N jishijɛ ma de!

⁴Gamba n hi bɛcinjɛ na cɛnjɛ ti Ijipti, Ngɛɛ hi bɛcinjɛ nu umwono tijama, nazhɛ Ngaa tumwanɛ Moses na Aron keeni Meriam maa a hi 'yagaga.

⁵Oo ahiɛba atwa mi, teyinje ma iyi nɛ ga Balak agwuma Moab heŋshi la maa ma hi nda, keeni iyi nɛ ga Balam yɛu-ye-eyi Bio jishijɛ bụ, ti iyi nɛ teni na tahaŋnụ ti hiŋ te kwune ni Shitim tutu i ci Gilgal, maa hi mepi ugondu na AGWANGWAMA njɛ maa mo hi bicingo.

⁶Imbe kwuŋ Ngɛɛ zhɛ ma 'waŋnɛ nu umbe AGWANGWAMA, maa mo kwuzo nu umbe Agwatana na namɛ taa na azubaa? Iyi ụrụpɛ tuhwoŋzhingo suu Ngɛɛ zhɛ ma 'waŋnɛ? Yɛu buna na ta namɛ uywa uko te e meci iŋ suu Ngɛɛ zhɛ ma 'waŋnɛ iwɛ ụrụpɛ tuhwoŋzhingo?

⁷Amɛ AGWANGWAMA suu zhɛ o lomo maa lashɛga adagba akpakwụ-a-ta (1,000) keeni manɛbɛ mu na ma fwunga gana ohwulwo[18] igbɛɛ-itɛ? (10,000) Okwo yɛu mi ihiiŋ nɛ shɛ tụ'walụ ta tu'waba ti mi suu Ngɛɛ zhɛ ma pana bụ iwɛ undwa mu tubwada keeni iwɛwɛ nɛ Ama nda?

⁸Oo gabụ bụtụ ga, AGWANGWAMA ubu mbiswonuo iyi nɛ shɛ iyi ibiye keeni iyi nɛ baa jala no ofwo bu, ibɛ shɛ maa na nda iyi i tishiriri, maa na mapana atwa iwɛ ni inyɛmɛnyɛmɛ tihioko, keeni tahaŋnụ tizha ne timeme zucinje na agba Agwatana bụ.

⁹AGWANGWAMA suyanɛ atwa ụshɛpwụ ata, bɛɛ hiɛŋ, I shɛ iyi ti'inta maa bụtụ sụmɛ izeci mi inyɛsɛ, hwulaga ma ahiɛba uwaŋnɛ ụshɛpwụ ga keeni tusotulonu tu bwa![19]

¹⁰Isɛbwɛ uduciya u tugwozorwo tu na tu zweni nu umwono wo ogworozwo eri mo n 'wo suu? Mo imo timenji ta ata to orugwusu ee keleni-unu.

¹¹Gana naa Ngee eri ma gangana bụtụ na 'yajɛ bimenji ata bo orugwusu, keeni bu na bi imwere tiyaa?

¹²Azhɛgba ụshɛpwụ ata 'yajɛ abwagara, atwa ụshɛpwụ ata kaa shɛ ejwe-ụzagwụ, aa halakaka atwa nu n-ndumwa mu unu wa aba.

¹³Ibɛ po Ngee hi kwunuo ufwu keeni osombo tɛnda iwɛ iwɛwɛ hiŋ.

¹⁴Hi zhɛ hi na ya iyi, hi zha shɛ kaa hio shigo, imunɛ kaa zhɛ na hi gwuma waa, hi zhɛ hio sutono iyi, ama shɛ ahiɛba kaa hi zhɛ hia 'yaga iŋ o, iyi elele nɛ ehi sweci, N zhɛ mo lono maa utokwobi njɛ iŋ ufwu nu ujasa.

¹⁵Hi zhɛ hia bila iyimɛyɛ, ama hi zha shɛ hia dwa iŋ o, hi zhɛ hio dubo tụ'walụ ta buta, maa hiɛ njɛ manɛbɛ, ama hi zha shɛ kaa hia sụkwụtwa mụ o, hi zhɛ hia nda meni mu tụ'walụ ta afwafwa, ama hi zha shɛ kaa hia swa mụ o.

¹⁶N zhɛ ma bu nda osombo, Ngɛɛ zhɛ ma nda maa atwa no sumono atwa na jɛjɛ na amɛ bụ, iwɛnɛ ta a untanganɛ itɛtɛnuwɛŋ ɛtɛ go Omri shikicinji, keeni ugondu ihwɛ Ahab[20] hwɛɛ, ehi to tuhwulo na tu'watatagwụ ta ti'imanganga ta aba. Iwɛbɛ po Ngɛɛ zhɛ ma hi nda ufwu, ɛhi zhɛ hia shana atwa iyi tutwa.