Read bassa HAGAI 2 Bible Online

HAGAI 2 - bassa bible

HAGAI 2

¹Ti ga Darius yɛ tugwama, yaa namɛ shiywa shi yebi, ni ipiɛnɛ icenje, ni ijitɛ woshi-nu-boo-ko, nazhɛ AGWANGWAMA dumananɛ n-ndumwa tedure na Hagai na shɛ bigesere ata, bɛɛ hiɛŋ,

²Mbiso ugwomina Juda gɛ Zɛrubabɛl yɛu Shiɛltiɛl, nu uhiu wo onongbo go Joshua yɛu Jehozadak, keeni atwa na vwanganɛ kpaaŋ maa,

³Gaaba ta namba na ashashɛ hiŋ te teyinje gana na ụzhɛ umwono ga namɛ laa? Gana na tuba waa hiɛ shanɛ ya hwuwayɛɛ? U hi shanɛ shɛ gana iyi tɛgadaga hŋ?

⁴AGWANGWAMA hiɛŋ, Ɛ-Zɛrubabɛl, O-Joshua yɛu Jehozadak na shɛ uhiu wo onongbo, ta ahiɛba atwa vwɛ, ga u'waba ihiɛ hiɛ hwɛɛ hiŋ. AGWANGWAMA na Hwuri Kpaaŋ hiɛŋ, Mizha nda ma ugondu, iwɛnɛ po N namɛ ne hiŋ.

⁵Gana na Ngee hi shileni la unu aka na ta ahiɛ banɛ ni Ijipti, gana ata ga kaa Mpiala mi mi[3] mu namɛ na ashashɛ hiŋ, ta nda ma inyɛsɛ o.

⁶Gana AGWANGWAMA na Hwuri Kpaaŋ jɛmɛ na, bi hiɛŋ, Na aka fwalaa na te e ci, N tɛ zhɛ mo zhingoto azuba keeni cɛnjɛ tu unyizo keeni itekwu kpalụ ko gba.

⁷AGWANGWAMA na Hwuri Kpaaŋ hiɛŋ, N zhɛ du kaa mo zhingitono edenji elele kpaaŋ, nazhɛ ɛɛ zhɛ e suje aduciya wa aba kpaaŋ nu umwono ga, nazhɛ Ngɛɛ zhɛ mo shidingo uduciya[4] nu umwono ga.

⁸AGWANGWAMA na Hwuri Kpaaŋ hiɛŋ, Ta azhɛnarɛya, ta azụrụfa, Gamba n 'yajɛ.

⁹AGWANGWAMA na Hwuri Kpaaŋ hiɛŋ, Ụzhɛ umwono ga[5] zhɛ wo hwulo una ala ụngwụshɛ,[6] epe kaa Ngɛɛ zhɛ ma nda maa i zhɛmanɛ atwa mi maa a 'yaga du amɛ-olom.

¹⁰Ti ga Darius yɛ tugwama, yaa namɛ shiywa shi yebi, nu upiana ucinjishi,[7] ni ijitɛ woshi-ni-bɛ-neshi, nazhɛ AGWANGWAMA jɛmɛ n-ndumwa na Hagai na shɛ bigesere ata, bɛɛ hiɛŋ,

¹¹AGWANGWAMA na Hwuri Kpaaŋ, hiɛŋ, Hiɛŋ onongbo maa ge e heŋshi iwɛ iheŋtene gɛ.

¹²Yaa shɛ bụtụ fwuleji usunda na aa njɛ tijilo nu utogwo ubwa, nazhɛ utogwo ata ubwa timengeni iyi elele gana ukara, kwo kaa urombwo, kwo kaa mayaga, okwo manɛbɛ keeni iyimɛyɛ iyiri ye elele nɛ aa nduwa, asha ijɛ ɛtɛ utogwo ata ubwa timengeni suu zhɛ du ye jirumo? Onongbo jishijɛ, ɛɛ hiɛŋ, Awo.

¹³Nazhɛ ga Hagai heŋteneni aŋ, bɛɛ hiɛŋ, Yaa shɛ bụtụ meme heshigeni iwɛnɛ bee timengeni ru'wo, yaa shɛ bee timengeni beye iyimɛyɛ gɛ ike, asha iyimɛyɛ ɛtɛ suu du hashɛganụ? Onongbo jishijɛ, ɛɛ hiɛŋ, Iiŋ, i hashɛganụ.

¹⁴Nazhɛ ga Hagai hiɛŋ, AGWANGWAMA na Hwuri Kpaaŋ hiɛŋ, Gana yaa shanɛ atwa ga keeni udenji ga a na namɛ nu umbe mu ta. Gana ata du ugondu i'ɛlɛ ya aba we elele ụ shɛ, iyi elele nɛ aa pana ụrụpɛ nu utukwu mu hashɛganụ.

¹⁵Ma hi tabwa maa hi heŋshi iyi nɛ ihi teneni la uuwa i ci aka ga, nazhɛ maa hi shepi utayɛ maa hi kwuneneni umwono ga wa AGWANGWAMA tuma.

¹⁶Aka na bụtụ zhe la nu urubwo na ga lanɛ ne bimenji bi iyimɛyɛ woshi, ama tuba umpwa gba namba, aka na bụtụ zhe no okwokwo na maa sarɛ meni mụ tụ'walụ ta afwafwa nhiŋlwo dupu, ama nhiŋlwo woshi gba bee gwure na muba.

¹⁷AGWANGWAMA hiɛŋ, N njɛ maa ulwa keeni ugarɛrɛ 'imɛ iyimɛyɛ hiŋ, Ngee hwelipi iŋ du na atayɛ-eshilo, taa hwayɛ hi lacɛ tɛjɛshɛrɛga maa hi gwure pi mi.

¹⁸Ama na ngbaraka ma ya te kwuni na aka ga zhɛ geri-be-eshe, te kwuni nụ ụjita ga woshi-ni-bɛneshi nu upiana ga ucinjishi, na haŋsa ma te kwuni nụ ụjita ga ee hwuwi ukoshilo umwono wa AGWANGWAMA tishilo.

¹⁹Okwo ti izɛgwu vwɛ shɛ ya nu urubwu, ta afwafwa, to owowo, ti i'wɛ'wɛ ya apomɛgranati keeni i'wɛ'wɛ buta te 'weri shi, te kwuni na aka ga zhɛ geri-be-eshe, N zhɛ ma hi pana uwebiye.

²⁰AGWANGWAMA dumananɛ n-ndumwa na Hagai na aka yebi nụ ụjita ata woshi-ni-bɛ-neshi nu upiana ata uko uko, bɛɛ hiɛŋ,

²¹Mbiso Zɛrubabɛl ugwomina Juda maa, N zhɛ mo zhingitono azuba keeni cɛnjɛ tu unyizo.

²²Ngɛɛ zhɛ du ma bizhanga shɛgwuma na tugwama ta aba, N zhɛ kaa ma lashaga tu ukpahiŋ wa aba. N zhɛ mo ubo ihɛŋtu ujasa, ta asụcɛ ibɛ, idɛkwɛ ya aba zhɛ yo 'wo, asụcɛ ibɛ zhɛ mama kwụnanụ.

²³AGWANGWAMA na Hwuri Kpaaŋ hiɛŋ, Ụjita ata ci hwuŋ, N zhɛ ma bu shapa gabụ gɛ Zɛrubabɛl yɛu Shiɛltiɛl na shɛ yɛu mi ugondu, ma bu nda gana bukanɛ na aa nda iyi useyida u ticinji. AGWANGWAMA na Hwuri Kpaaŋ hiɛŋ, Gamba m bu twolwo.