Read bassa ZƐKARIA 12 Bible Online

ZƐKARIA 12 - bassa bible

ZƐKARIA 12

¹N-ndumwa mu na AGWANGWAMA jɛmɛ iwɛ atwa Isrɛl na, bi hiɛŋ, Gamba AGWANGWAMA ata na berishiji azuba, na shiri ukoshilo u cɛnjɛ tu unyizo, na kaa njɛ bụtụ, N hiɛŋ,

²N zhɛ ma nda Jɛrusalɛm gana ukwopi mayaga no ofwo edenji elele a na rungwutwonu uŋ, ɛ zhɛ a swa, a na nda gologolo gana eswe-mayaga. N zhɛ ma sukakana Juda, tu Jɛrusalɛm, ta ashɛpwụ aba a na vwɛ hwɛɛ.

³Na aka ata, N zhɛ ma nda Jɛrusalɛm maa ụ shɛ gana utayɛ na zhineni tinice no ofwo edenji elele, edenji elele na kaa mekeni maa e nice uŋ, ɛ zhɛ a ala-ụngwụ. Nazhɛ edenji unyizo kpaaŋ zhɛ a twa-unu maa a sukakanɛ uŋ.

⁴Gamba AGWANGWAMA, N hiɛŋ, Aka ata ci hwuŋ, N zhɛ mo zwono budakwa be elele inyɛsɛ, ma patana kaa bụsụcɛ ba budakwa be elele ụmpɛ. Ama atwa Juda Ngɛɛ zhɛ mo shiyono eshe, Ngɛɛ zhɛ mo lubicingo tuba idɛkwɛ ya atwa i'ime ya aba.

⁵Nazhɛ ehwurembe Juda zhɛ mama hiaŋnụ, Atwa na jɛjɛ nu Jɛrusalɛm 'yajɛ ikɛnyi, iwɛnɛ ta AGWANGWAMA na Hwuri Kpaaŋ shɛ Agwatana aba.

⁶Aka ata ci hwuŋ, N zhɛ ma nda ehwurembe Juda gana ikwɛshɛ nɛ yo hwoŋno na ashashɛ i'wɛ'wɛ nɛ oo to itulu, gana ulwa na wo gorogo na ashashɛ eshi ohiu, nazhɛ ɛɛ zhɛ a nda edenji na rungwutwonu aŋ nu u'ala ubiye, tu u'ala ugwulwo ufwu. Atwa Jɛrusalɛm tuba zhɛ a nama no ohwolu aba nu Jɛrusalɛm.

⁷Gamba AGWANGWAMA, N zhɛ ma pana atwa Juda tụlasụ hiiŋ, iwɛ maa kede ụjɛrụma ihwɛ Devid keeni ụjɛrụma wa atwa na namɛ nu Jɛrusalɛm u hwuri una Juda o.

⁸Aka ata ci hwuŋ, Gamba AGWANGWAMA, N zhɛ ma jilanɛ atwa na namɛ nu Jɛrusalɛm, okwo yaa shɛ bụtụ na ge lweji na ashashɛ aba, bi zhɛ ba sha gana Devid nụ ụjita ata. Atwa ihwɛ Devid tuba zhɛ a 'yagaga aŋ gana butumwa ba AGWANGWAMA ba azuba, gana Agwatana ni ikɛnyi ibwɛ.

⁹Aka ata ci hwuŋ, N zhɛ ma nda gana na maa mo iricingo edenji ata a sukakana Jɛrusalɛm kpaaŋ.

¹⁰N zhɛ mɛ 'wɛŋ mpiala mu uwanyi keeni mpiala mu tutabwa ni ihwɛ Devid keeni ofwo atwa na namɛ nu Jɛrusalɛm. Ɛ zhɛ a mbiyana bụtụ ata ee sepi iyi, ibɛ po ɛɛ zhɛ a ta-ụkwụla iwɛ ubwa, gana na ta bụtụ ba ta-ụkwụla iwɛ yɛu ibwɛ ye eyi mokondo. Ɛɛ zhɛ du a twana bụ u'wo gboo gana na ta bụtụ ba twana yɛu ibwɛ ye eyi ihiiŋ u'wo.

¹¹Ụkwụla-tuta na zhɛ wa nama nu Jɛrusalɛm na aka ata zhɛ wo gombo gana unaa na namɛ la iwɛ Hadad-rimon nu udadarɛ Migido.

¹²Cɛnjɛ ti zhɛ ta ta-ụkwụla, umwamwa zhɛ wa ta-ụkwụla abaaba ne eyikwo aba; umwamwa ihwɛ Devid ne eyikwo aba, umwamwa ihwɛ Natan ne eyikwo aba,

¹³Umwamwa ihwɛ Livai ne eyikwo aba, umwamwa Shimei ne eyikwo aba;

¹⁴keeni amwamwa elele na vwɛ ya ne eyikwo aba du.