Read bassa ZƐKARIA 3 Bible Online

ZƐKARIA 3 - bassa bible

ZƐKARIA 3

¹Nazhɛ AGWANGWAMA m mbiseni Joshua ata shɛ uhiu wo onongbo, ti bee shikeni nu umbe butumwa ba AGWANGWAMA ba azuba, ge Setan tuba shikeni nu u'ala ubwa ubiye maa suyana bụ ụshɛrɛya.

²Ama AGWANGWAMA hiɛŋ Setan,[2] Gamba AGWANGWAMA, N zhɛ ma bu tazhɛgana, Gamba n shɛ AGWANGWAMA na teri Jɛrusalɛm, N zhɛ ma bu tazhɛgana! Bụtụ ga i shɛ gana ukwungwurusu na ɛɛ vwɛ nu ulwa.

³Go Joshua shikeni nu umbe butumwa ata ba azuba, bee urigeni utogwo na 'yajɛ tiri.

⁴Ibɛ po butumwa ata ba azuba hiɛŋ atwa ata shikekeni pu bwa, Ushigo ma utogwo ata tiri bụtụ ata urigeni. Bɛɛ hiɛŋ Joshua, N sugwo iwɛwɛ bụ, N zhɛ mo bu urugono ya utogwo ufwo.

⁵Bɛɛ hiɛŋ aŋ, Pala bụ ma[3] ureweni nu uhiuhiu, maa hi urigeni bu otogwo ofwo, ee peri bu ga ureweni ata, ee hwuŋteni bu ga otogwo ata, ama butumwa ata ba azuba tuba shikeni beye dashɛ.

⁶Ibɛ po butumwa ata ba AGWANGWAMA ba azuba mbishi Joshua, bɛɛ hiɛŋ,

⁷AGWANGWAMA na Hwuri Kpaaŋ hiɛŋ, Yaa shɛ abụ untanganɛ andwa mi, aba nda kaa ugondu na Ngee bi eni, nazhɛ ɛbi zhɛ ba untangana umwono mu maa no shiyono okpogwu ga rungwutwonu uŋ eshe. Nazhɛ Ngɛɛ zhɛ ma bụ pana ohwolu na ashashɛ atwa ga mi shikekeni epe.

⁸Oo O-Joshua, gabụ uhiu wo onongbo, shɛlaga, ta atwa vwɛ bụ onongbo a na gɛgajɛ nu umbe bu, hiɛ shɛ atwa na useyida u geri-be-eshe hiŋ zhɛmɛ, N zhɛ mo hi mbisono yɛu mi ugondu igɛtɛ i shɛ a'wa'walụ.[4]

⁹AGWANGWAMA na Hwuri Kpaaŋ hiɛŋ, N zhɛ mo shilo utayɛ na 'yajɛ apada ecenje,[5] nu umbe Joshua, N zhɛ ma ta ụŋ i'nyɛtɛ, Ngɛɛ zhɛ mo sugo iwɛwɛ cɛnjɛ tu ga na amɛ ụjita uko gba.

¹⁰AGWANGWAMA na Hwuri Kpaaŋ hiɛŋ, Nụ ụjita ata ibɛ bụtụ be elele na ashashɛ hiŋ zhɛ ba suyana yɛu-bino bwa nu uhwuŋnu ikpɛri ya afwafwa ubwa keeni i'wɛ'wɛ ibwɛ yo owowo.