Read bassa ZƐKARIA 6 Bible Online

ZƐKARIA 6 - bassa bible

ZƐKARIA 6

¹Ngaa mbiyanɛ sasana azuba, Ngaa kwụbɛ ihɛŋtu ujasa ineshi ti yaa banɛ no tuhwolu tu nshama mi yebi mu na mɛ shɛ ɛtumburɛ.

²Idɛkwɛ ishenje, ibɛ yo kokwulo ụhaŋtụ ata uko, idɛkwɛ ishi tuba yo kokwulo una uyebi.

³Idɛkwɛ icɛnjɛ, ibɛ yo kokwulo una ụtatụ, idɛkwɛ ubusubusu tuba yo kokwulo ụhaŋtụ uneshi.

⁴Nazhɛ Ngee unseni butumwa ata ba azuba, ba njɛ ne mi, Ngɛɛ hiɛŋ bụ, Imbe ihɛŋtu gɛ i shɛɛ?

⁵Bɛɛ n jishijɛ, bɛɛ hiɛŋ, Aba ganana a shɛ mpiala ma ata mu uvwugo mi neshi mu na mu banɛ na azuba, na aba na ti mee meme mbiseni na agba AGWANGWAMA na 'yajɛ cɛnjɛ tu unyizo kpaaŋ.

⁶Ụhaŋtụ ata idɛkwɛ ishi yo kokwulo, u zhɛ geri ba cɛnjɛ tu tuzuba, una ata idɛkwɛ icɛnjɛ yo kokwulo, u zhɛ geri ba cɛnjɛ tu uwaŋna-twonuo, una ata idɛkwɛ ubusubusu yo kokwulo, u zhɛ geri ba cɛnjɛ tu tuta.

⁷Aka na ti idɛkwɛ ɛtɛ ubusubusu nɛ kaa 'yajɛ ukpahiŋ banɛ, yaa njɛ izɛlɛgwu maa i rinji cɛnjɛ tu unyizo. Nazhɛ butumwa ata hiɛŋ iŋ, Zhaga hikokono ma cɛnjɛ tu unyizo hwɛɛ. Yee zhe yee hikekeni tu ga hwɛɛ.

⁸Nazhɛ baa n ugananɛ, bɛɛ hiɛŋ, Kwụba idɛkwɛ ye zhɛ geri ba cɛnjɛ tu tuzuba, i gwuriseni isɛbwɛ ya AGWANGWAMA[10] na cɛnjɛ ta ata tu tuzuba.

⁹Nazhɛ AGWANGWAMA m mbishi iwɛ, bɛɛ hiɛŋ,

¹⁰Lashaga azụrụfa keeni azhɛnarɛya no olugwo atwa ata banɛ na ti'ima tu Babulon jiye, aba shɛ ga Hɛldai, no Tobija keeni Jɛdaya, maa zhe ni ihwɛ Josia yɛu Zɛfania gunu ụjita ata.

¹¹Sugo azụrụfa na azhɛnarɛya ata, nda udara[11] maa peteni Joshua yɛu Jehozadak na shɛ uhiu wo onongbo nu uhiuhiu.

¹²Hiɛŋ bụ, Gana AGWANGWAMA na Hwuri Kpaaŋ jɛmɛ na, bi hiɛŋ, Bụtụ ata ɛɛ hiɛŋ izeci ibwɛ, A'wa'walụ, bi zhɛ ba bubaga no ofwo na baa namɛ, maa ma umwono wa AGWANGWAMA.

¹³Ubwa shɛ bụtụ na zhɛ ba ma umwono wa AGWANGWAMA, ubwa du kaa zhɛ ba lashɛga ụjɛrụma na teni cɛŋ na agwuma, bɛɛ zhɛ ba untangana atwa ubwa ni idwɛtwɛ ibwɛ. Bunongbo ata zhɛ bo shikono ni idwɛtwɛ ibwɛ, ebeyebi ata zhɛ a nda ugondu na amɛ-olom.

¹⁴Ɛ zhɛ ne teyinje udara ga nu umwono ata wa AGWANGWAMA, maa tuba ụ shɛ ụjɛrụma ata Hɛldai no Tobija, nɛ Jɛdaya keeni Josia yɛu Zɛfania.

¹⁵Atwa na namɛ taa dụlụ zhɛ a zhagajɛ maa e mbiyeni aŋ umwono ata wa AGWANGWAMA tuma. Aka na oo mo uŋ ee hwuwi, nazhɛ ɛhi zhɛ hia mapa maa AGWANGWAMA na Hwuri Kpaaŋ ubwa n tumwanɛ no ofwo hiŋ. Ijɛ zhɛ ya nda ti yaa shɛ ahiɛ hwụjɛ-unu wa AGWANGWAMA na shɛ Agwatana hiŋ tebiye.