Read bassa ZƐKARIA 9 Bible Online

ZƐKARIA 9 - bassa bible

ZƐKARIA 9

¹N-ndumwa ma AGWANGWAMA ma sukakana cɛnjɛ tu Hadrak, tijama ta muba kaa du tu patanɛ ụshɛpwụ Damaskos. Iwɛnɛ po eshe atwa keeni alamụ Isrɛl hwɛɛ ngbaracɛ geri ba AGWANGWAMA.[14]

²Tu Hamat ata namɛ apata du, tu Taya keeni Saidụn, ti iyi elele nɛ aa shɛ egwoni ni bɛ.

³Atwa Taya meme meni uba ukpahiŋ, ee suteni azhɛnarɛya gana upwupwutu, azụrụfa balanɛ aŋ gana tiri ti ihwɛŋnɛ ya amɛ ụshɛpwụ.

⁴Ama AGWANGWAMA zhɛ a lashaga i'wɛŋni'wɛŋni ibwɛ hwɛɛ. Bɛɛ zhɛ bo kwubishigo du uduciya ubwa ni itekwu, ulwa kaa zhɛ wo hwoŋzhingo ụshɛpwụ ata kwunduu.

⁵Atwa na namɛ nụ ụshɛpwụ ata ɛɛ hiɛŋ Ashkɛlon zhɛ a kwụba iŋ, inyɛsɛ kaa zhɛ ya sha aŋ. Atwa Gaza du zhɛ a kwụba iŋ, ɛɛ zhɛ no hwuŋpilongwu na cɛnjɛ iwɛ ụngwụ na aa hwuga, gobwonu du atwa Ekron, iwɛnɛ ta ashɛlatụ hwuwonowoŋ aŋ. Gaza zhɛ wa vwunga agwuma aba, i zasa kaa bụtụ zhɛ ba nama ya na Ashkɛlon.

⁶Atwa na zasa ụlamụ, zhɛ a nama na Ashdod, ibɛ AGWANGWAMA hiɛŋ, N zhɛ mo iricingo tubusa ta atwa Filistia hwɛɛ.

⁷N zhɛ ma bacɛnga aŋ nu usunda mehieŋ tiya, ti iyimɛyɛ nɛ ee ge jirimi tiya. Tumwata ta atwa kpaaŋ ti zhɛ ta sha atwa mi, ɛ zhɛ a sha gana udenji uko nu Juda. Ekron zhɛ wa sha gana atwa Jɛbus.

⁸N zhɛ ma 'yaka umwono mu, N zha shɛ mo lono maa ejeshi elele na nda atwa mi tuhwulo, i zasa kaa bụtụ ba abwagara be elele zhɛ na kashɛka uŋ o. N kwụbwa gana na aa pana atwa mi ụbaụta.

⁹Ahiɛba atwa Zayon, bwada ma unyasa ụ'wụtụ! Ahiɛba atwa Jɛrusalɛm, ugana ma n'ungwa me ewili, Kwụba ma agwuma hiŋ ta e ci pi hiŋ! Be ci na tufwuga keeni tụlasụ, ama bu meme zucinje baa jɛjɛ na aba izhinyɛci, na aba biywoywo bi izhinyɛci nɛ izhinyɛci meci.

¹⁰AGWANGWAMA hiɛŋ, N zhɛ ma bacɛnga ihɛŋtu ujasa ni Ifrem, ti idɛkwɛ ujasa nu Jɛrusalɛm, ɛ zhɛ a kwusataga itɛ ya aba ujasa, Agwuma ata zhɛ a kalanɛ edenji amɛ-olom, bi zhɛ ba ya tugwama tu bwa te kwune no olugwo na itekwu kwune uuwa i ci ofwo na itekwu kwunanjɛ, te kwune no olugwo ata Urefu kwune uuwa i ci ukwunanga cɛnjɛ tu unyizo.

¹¹AGWANGWAMA hiɛŋ, Yaa shɛ inɛɛ bụ, N zhɛ mɛ jwɛ atwa bụ na tijama tu u'ibwa ata zasa meni, iwɛ unu na Ngaa twa la na bụ, tedure ne mehieŋ mụ ụrụpɛ.

¹²Gwulo ma nu uba hiŋ, ahiɛba ajama ti'ima a na 'yajɛ ashɛlatụ. Hwuwayɛ go ibɛ Ngaa jɛmɛ kpataa maa, N zhɛ me hi gwuricingeni uwebiye kpalụ yebi, iwɛ ụbaụta ata ahiɛ njɛ la.

¹³N zhɛ ma nda uhwara na atwa Juda gana uta bijeshi, ma nda uhwara na atwa Isrɛl gana a'inla ubwa. N zhɛ mo vwurongo miaụŋ-me-eyi mu Zayon gana utokwobi, ma jasa miaụŋ me Egrik.

¹⁴AGWANGWAMA zhɛ a bananɛ atwa ubwa, bɛɛ zhɛ ba kala a'inla ubwa gana ɛbɛrɛ. AGWANGWAMA Mokondo na Hwuri Kpaaŋ zhɛ o hwulupono ukakacɛ, bɛɛ zhɛ bo rungo gana ujipo na banɛ tuta.

¹⁵AGWANGWAMA na Huri Kpaaŋ zhɛ a jilanɛ atwa ubwa, ibɛ po ɛɛ zhɛ e iricingo atwa i'ime ya aba kpaaŋ. Ɛ zhɛ a lasụ aŋ na atayɛ ikwele,[15] ɛɛ zhɛ na ugaga gana atwa na swe mayaga. Ɛ zhɛ o shino ofwo gana mehieŋ mu na mi shini nu ugbamgbam na ee dudugeni nu utukwu-ụrụpɛ.

¹⁶AGWANGWAMA na shɛ Agwatana aba zhɛ o bicingo aŋ jita ata, gana iyimabiga nɛ shɛ atwa ubwa. Nazhɛ ɛɛ zhɛ na ta na cɛnjɛ tu bwa gana udara na aa njɛ tisemberi ni ikwɛmbɛ.

¹⁷Hioko ma gana na yɛɛ zhɛ ya zhɛma keeni yɛɛ zhɛ ya pilanụ na cɛnjɛ tu ga! Iyi izɛgwu cɛnjɛ tu ga zhɛ ya nda maa miaụŋ mi tisemberi mu waŋnɛ, meni mụ tụ'walụ ta afwafwa ma tuba mi zhɛ ma nda maa showo shɛ waŋnɛ.