Read bassa MATIU 10 Bible Online

MATIU 10 - bassa bible

MATIU 10

¹Ge Jisus suyanɛ eseshi-iyi ubwa umpwa-na-ba-eyebi pu bwa, bee peni aŋ ụhwada, maa a na bacɛnga mpiala mụ wɛ, maa a na nɛnga igwumɛgwumɛ ye elele kpaaŋ.

²Nzeci ma atumwa ata umpwa-na-ba-eyebi na: bụtụ bi hiiŋ i shɛ ga Saimon (na ɛɛ hiɛŋ ga Pita) ni yɛu-bino bwa ga Andru; ne Jemis yɛu Zɛbɛdi keeni yɛu-bino bwa ga Jon,

³ne Filip, na Batolomu, na Tamos, na Matiu bile-bụ-ụdalụ, ne Jemis yɛu Alifios, na Tadios;

⁴na Saimon ata i shɛ bụtụ bi Kenan, keeni Judas Iskariot, ata sengeni bu atwa ne tidere.

⁵Ge Jisus tumwanɛ atwa ga umpwa-na-ba-eyebi utumwa, bee peni aŋ unu, bɛɛ hiɛŋ, Ta zhaga ma na ashashɛ atwa na shɛ shɛ Eju o, to tono ma kaa du ụshɛpwụ udenji Samaria o.

⁶Ama ga shɛ pa atwa Isrɛl a na shɛ gana agwụdụ na 'inɛ, ehi zhe.

⁷Tɛ ɛhi zhɛ bata, na ananga ma maa, Cɛnjɛ-ta-tugwama ta azuba tu gwumwonu.

⁸Na nɛnga ma agwumashɛ, hi na hicanjɛ atwa na 'wi, na nɛnga ma atwa na 'yajɛ ụngwụ-uwaŋna maa a nama shɛshɛshɛ, na bacɛnga ma atumwa-ibiri. Arahaŋ ee hi peni, arahaŋ du ɛhi zhɛ hia pana.

⁹Ta 'waŋna ma azhɛnarɛya, okwo azụrụfa, okwo ɛtumburɛ na amɛ shɛrɛta she embi hiŋ o,

¹⁰okwo ulapa na tahaŋnụ ti hiŋ o, okwo n-nduka mi yebi, okwo abida, okwo okwuto. Iwɛnɛ ta bɛnjɛ-bu-ugondu teni cɛŋ maa e peni bu iyimɛyɛ ibwɛ.

¹¹Ụshɛpwụ we elele na ɛhi zhɛ hio tono, okwo wee gembi, kwo kaa waa gwumwa, dwalakaka ma iwɛ bụtụ na lanɛ, maa hiɛ gɛga ni ihwɛ bụtụ ata uuwa i ci aka na ɛhi zhɛ hia bana nụ ụshɛpwụ ata.

¹²Aka na ohio tono ihwɛ ɛtɛ, 'walụ ma tugwo atwa na namɛ ni ihwɛ ɛtɛ.

¹³Yaa shɛ atwa ihwɛ ɛtɛ lanɛ, asha ge uwebiye hiŋ nama ni ihwɛ ɛtɛ. Ama yaa shɛ atwa ihwɛ ɛtɛ kaa lanɛ shɛ, asha ge uwebiye hiŋ gwure pi hiŋ.

¹⁴Yaa shɛ kaa bụtụ be elele ihi leni shi, kwo kaa baa hwụjɛ shɛ iwɛ hiŋ, asha aka na ɛhi zhɛ hia bana ni ihwɛ ɛtɛ kwo kaa nu ụshɛpwụ ata, bibizo ma opwupwutu shivwɛvwɛjɛ shi hiŋ.

¹⁵Iwɛ-tɛkana Omo hi mbiso, maa i zhɛ yo dobogono hwuŋ Sụdụm keeni Gụmụra nụ ụjita ụshɛrɛya uhwuri ụshɛpwụ ata.

¹⁶Hioko ma, Ma hi tumwana utumwa gana agwụdụ na zhɛ na ashashɛ ogwusu. Ibɛ po ahiɛ shɛ hia inta gana ahwa, nama ma tuba suu gana nkwucimo.

¹⁷Ama na nda ma pece na atwa kpaaŋ, iwɛnɛ tɛ ɛ zhɛ mo hi sugo na agba atwa ụshɛrɛya, ɛɛ zhɛ mo hi kwuto no shimwono shɛ tụ'ụlwatagwụ sha aba.

¹⁸Ɛ zhɛ mo hi sugo ụshɛrɛya na agba ogwomina, ta agba shɛgwuma, iwɛ mi, maa hi le tiseyida no ofwo aba keeni no ofwo atwa na shɛ shɛ Eju.

¹⁹Aka na ɛɛ zhɛ mo hi sugo a pana aŋ, ta nda ma ahaŋsa eyeyebi, iwɛ iyi nɛ ɛhi zhɛ hia duma o, kwo kaa gana na maa hiɛ jɛmɛ iŋ o. Iwɛnɛ ti yaa shɛ Gamba n zhɛ ma hi pana iwɛ nɛ ɛhi zhɛ hia duma na aka ata.

²⁰Shɛ ahiɛba hi zhɛ hia duma o, semi Mpiala me Bishi hiŋ muba mi zhɛ ma duma iwɛ tedure ne hiŋ.

²¹Yɛu-bino zhɛ ya shapa yɛu-bino bwa ba pana atwa maa a kwụnɛ iŋ, bishi du zhɛ ba shapa yɛu ibwɛ, ba pana atwa maa a kwụnɛ iŋ, miaụŋ du mi zhɛ mɛ hwɛyijɛ, maa mu sukakanɛ atwa na meci aŋ maa a kwụnɛ aŋ.

²²Atwa kpaaŋ zhɛ mo hi imo iwɛ izeci mi. Ama bụtụ na 'imɛ-isɛbwɛ uuwa i ci uce ubwa zhɛ bo bino.

²³Aka na aa hiɛ shɛka nụ ụshɛpwụ uko, gozhigo ma hi zhe nụ ụshɛpwụ unya. Iwɛ-tɛkana Omo hi mbiso maa, hi zha shɛ hio botogwu kwukwuŋ ashɛpwụ Isrɛl hwɛɛ nazhɛ Yɛu Bụtụ gwure.

²⁴Biseshi-bi-iyi hwuri shi bimbisegeni bu bwa o, bujama kaa hwuri shi Agwangwama ubwa o.

²⁵I zhɛ ya gwumwa biseshi-bi-iyi maa sha gana bimbisegeni bu bwa, gobwonu du yɛɛ zhɛ ya gwumwa bujama[20] maa sha gana agwangwama ubwa. Yaa shɛ aa suyana agwuma-ihwɛ maa uhiu-ibiri, asha shɛ inɛ ya atwa ihwɛ ibwɛ suu zhɛ ya wụmangwụ ya?

²⁶Ibɛ po ta nda ma inyɛsɛ ya aba o. I zasa iyi nɛ ee urigeni, aa zha shɛ o ushigo, i zasa kaa iyi nɛ ee sweci, nɛ zha shɛ ya banɛ uvwi o.

²⁷Iyi nɛ Omo hi mbiso ne tishi, na duma iŋ ma nu uhioko-uhwaŋna. Iyi nɛ kaa ahia hwuga ne tusweci, na ananga iŋ ma nu ukogo umwono.

²⁸Ta nda ma inyɛsɛ ya atwa na a kwụna tu'waba, a na kaa eri shi a kwụna ohwulu o. Ama na nda ma inyɛsɛ bụtụ ata eri ba nda tu'waba keeni ohwulu ufwu nu ukwokwo ulwa.

²⁹E senji shi suu esunyisunyi eyebi ukpobwo uko gbalụ. Ama kaa i zasa bu naa na zhɛ ba laya na cɛnjɛ okwo bu ko uzawa tumapa te Bishi hiŋ o.

³⁰Ama inee hiŋ shɛ a rutwa okwo ufwugwo tihiŋzhe tu uhiuhiu hiŋ hwɛɛ.

³¹Iwɛ ecilo ata, ta nda ma inyɛsɛ o, hi 'yajɛ ule ehi hwuri esunyisunyi ofwugwo.

³²Bụtụ be elele na ma n lashɛga ne eshe atwa, N zhɛ du ma lashɛga bụ, ne eshe Bishi mi na namɛ na azuba.

³³Ama bụtụ be elele na kaa ma n laka ne eshe atwa, N zhɛ du ma laka bụ, ne eshe Bishi mi na namɛ na azuba.

³⁴Ta haŋsa ma maa N zhajɛ maa ma karɛ amɛ-olom nu unyizo, N zhe shi maa ma karɛ amɛ-olom o, semi amɛ-tụhaŋtụ.

³⁵N zhajɛ maa Mo bogwu bụtụ ne bishi bwa, maa Mo bogwu yɛu-yo-o no bino bwa, maa mo bogwu utashɛ no bino-bwolo.

³⁶Atwa ihwɛ bụtụ, aba zhɛ a sha atwa-i'ime ibwɛ.

³⁷Bụtụ be elele na kaa bo lubo bishi bwa, kwo kaa bino bwa n hwuri, asha bu n lanɛ shɛ o. Bụtụ be elele na kaa bo lubo yɛu ibwɛ ye eyi, kwo kaa yɛu ibwɛ yo o n hwuri, asha bu n lanɛ shɛ o.

³⁸Bụtụ be elele na kaa shepi shi ụ'wụ'wụ-ubatanɛ ubwa, maa ma n 'wa, asha bu n lanɛ shɛ o.

³⁹Bụtụ be elele na ba makana maa intana uraiŋ ubwa, asha nazhɛ baa inzhɛnga uŋ, ama bụtụ be elele na ba kala uraiŋ ubwa iwɛ mi, asha nazhɛ baa intana uŋ.

⁴⁰Bụtụ be elele na ma hi lashɛga, bu ma n lashɛga du, bụtụ be elele na kaa ma n lashɛga, asha ba lashɛga du bụtụ na n tumwanɛ.

⁴¹Bụtụ na ba lashɛga bigesere, iwɛnɛ tu baa shɛ bigesere, bi zhɛ ba lashɛga du ule bigesere, bụtụ na kaa ba lashɛga bụtụ bi tiririri, iwɛnɛ tu baa shɛ bụtụ bi tiririri, bi zhɛ ba lashɛga du ule bụtụ bi tiririri.

⁴²Bụtụ be elele na kaa shepi okwo ukwopi meni mo olom okwo uko, bee peni bụtụ bu ko gba na ashashɛ miaụŋ mi tisemberi maa swa, iwɛnɛ ta a shɛ eseshi-iyi mi, iwɛ-tɛkana Omo hi mbiso, maa ule ubwa za ti'ina o.