Read bassa MATIU 11 Bible Online

MATIU 11 - bassa bible

MATIU 11

¹Aka na ti ge Jisus peni eseshi-iyi ubwa umpwa-na-ba-eyebi unu, bee beni apata bee hwuri maa bu no mbisogono atwa iyi keeni maa bu na ananga na ashɛpwụ aba.[21]

²Tu ga Jon namɛ nu umwono-tishi, baa hwụjɛ iwɛ ugondu na ga Krast ba ndangana. Baa tumwanɛ eseshi-iyi ubwa utumwa, maa ɛ hiɛŋ bụ,

³Ga Jon hiɛŋ, Gabụ suu bɛ shɛ bụtụ ata be ci, okwo ta shɛlana binya bụtụ?

⁴Ge Jisus jishijɛ aŋ, bɛɛ hiɛŋ, Zhaga mbiso ma Jon iyi nɛ ahiɛ hwụjɛ keeni iyi nɛ ahiɛ kwụbɛ:

⁵sholubo sho ushogwu shishe, atwa na ivwunɛ ya aba ge 'wegeni a zha tahaŋnụ, aa nɛnga atwa na a gwumanga ụngwụ-uwaŋna aa nama shɛshɛshɛ, atwa na ga kwụrụmɛ a hwuga iwɛ, aa hicanjɛ atwa na ge 'wi, aa ananga na okofwo Anabarɛ Ebiye.

⁶Bụtụ na iyi njɛ shɛ ukwurishi iwɛ mi gwoje.

⁷Aka na te eseshi-iyi Jon zhɛ ugwulwo, ge Jisus kwuni ufwugwo wa atwa ata iwɛ Jon timbiso, bɛɛ hiɛŋ aŋ, Imbe po ehi beni ehi zhe la nụ ụshɛkaa? Maa hi kwubɛ suu eninjidegbe na mpiala mo zhingoto.

⁸Asha imbe ehi beni maa hi kwubɛ laa? Bụtụ na urigeni tugwuno tu na tu namɛ sunɛ sunɛ suu? Hioko ma, atwa na o urugono tugwuno tu tusunɛ sunɛ a namba nu nhwaŋ mɛ shɛgwuma!

⁹Ama imbe kwuŋ ehi beni ehi zhe la maa hi kwubɛɛ? Bigesere suu? Iiŋ, Mo hi mbiso, bụtụ ata hwuri bigesere.

¹⁰Bụtụ ata ubwa ee 'nyeci iwɛ ubwa, ɛɛ hiɛŋ, Hioko ma, N zhɛ ma tumwana butumwa mi nu umbe bu, ubwa zhɛ ma bụ imangana uhwaŋna.

¹¹Iwɛ-tɛkana Omo hi mbiso, maa i zasa bụtụ na namwawaŋ na ashashɛ atwa na eyikwo meci, uhwulwo Jon Bɛnjɛ-bu-ubaptizim o, ama bụtụ na namɛ na Cɛnjɛ-ta-tugwama ta azuba, okwo baa 'nyanɛ, asha bu hwuri bu.

¹²Te kwuni na aka i'enenji Jon, Bɛnjɛ-bu-ubaptizim, uuwa i ci aka ga, Cɛnjɛ-ta-tugwama ta azuba ta nda ụbaụta na atwa abwagara, a na a kapangana tụ maa a 'imɛ tụ ni iji.

¹³Atakada egesere kpaaŋ keeni Undwa Moses, a dumwa la tigesere iwɛ Jon.

¹⁴Yaa shɛ kaa yaa hiɛ kwụlanɛ maa hi leni iwɛ gɛ, asha ubwa shɛ ge Elaija ata, na shɛ ba zhajɛ.

¹⁵Bụtụ na 'yajɛ acɛbɛ, ga bu na hwuga!

¹⁶Bɛɛ hiɛŋ, Ni imbe Ngɛɛ zhɛ ma manga atwa uwaŋnɛ ga, maa a sụbɛɛ? A shɛ gana miaụŋ mu na mɛ jɛjɛ nu ugba udukwo, a na mama suyaganụ,

¹⁷ɛɛ hiɛŋ, Ti hi hwulegeni akpasana, hiɛ hiɛbɛ shɛ kaa tɛhiɛba o! Atɛ hiɛ zunganganɛ azunga tiriri, hiɛ cwɛ shɛ kaa u'wo.

¹⁸Ga Jon zhajɛ la, bɛ yɛ shɛ iyimɛyɛ, bu swe shi meni o, atwa hiɛŋ, Butumwa-bi-ibiri namɛ na amɛ ubwa.

¹⁹Yɛu bụtụ zhajɛ ya, baa ya, baa swa, aa hiaaŋnanɛ, Hioko ma, bụtụ na 'yajɛ tidederishe ti iyimɛyɛ, keeni buswe bu meni mụ tụ'walụ ta afwafwa, biyejilo be-ele-ụdalụ keeni bu na ba atwa-iwɛwɛ. E menji ugondu na ti'inta ta nda kpaaŋ, aa kwụbɛ maa u teni cɛŋ.

²⁰Nazhɛ ge Jisus mbiseji ashɛpwụ na baa njɛ ugondu wa arụhwajɛ na aba n-ndumwa, iwɛnɛ ta a jɛshɛrɛjɛ shɛ shɛhaŋsa sha aba, bɛɛ hiɛŋ:

²¹Ahiɛba atwa Korozin, hi zhɛ hia nda hwuŋ adangboo! Ahiɛba atwa Bɛtsaida, hi zhɛ hia nda hwuŋ adangboo! Ɛɛ gɛ hiɛŋ nu Taya keeni Saidụn aa njɛ ugondu wa arụhwajɛ na aa njɛ no ofwo hiŋ, asha a jɛshɛrugwa cala cala, harɛ oo urugwonuo tugwuno tụ ụcɛnjɛ-tɛnda,[22] aa dụla ma'alụ.

²²Ama Mo hi mbiso maa, I zhɛ yo dobogono hwuŋ Taya keeni Saidụn nụ ụjita ụshɛrɛya ihi hwuri.

²³Ahiɛba atwa Kapanaum, ɛ zhɛ suu mo hi gombicingo na azuba? Awo, ɛ zhɛ mo hi zucingo tutu e'uye. Ɛɛ gɛ hiɛŋ nu Sụdụm aa njɛ ugondu wa arụhwajɛ na aa njɛ no ofwo hiŋ, asha ɛ gɛ tɛ zhɛ a nama taa hwayɛ.

²⁴Ama Mo hi mbiso maa, i zhɛ yo dobogono hwuŋ atwa Sụdụm nụ ụjita ụshɛrɛya ihi hwuri.

²⁵Na aka ata ge Jisus jishijɛ, bɛɛ hiɛŋ, Oo, Ada, N njɛ ugwoje bu, gabụ na bɛ shɛ Agwangwama azuba, hwɛɛ tu unyizo ga, iwɛnɛ ebi sweci ijɛ iwɛ maa kede atwa ti'inta, na atwa na eshicinji iyi kwụbɛ iŋ o, ebi kepishingeni iŋ tuba atwa tukwakwa.

²⁶Ada, iiŋ, gana yaa bụ kwụlanɛ tebiye ta.

²⁷Bishi mi n utegeni iyi elele hwɛɛ, i zasa bụtụ mepi Yɛu semi Bishi bwa, i zasa kaa du bụtụ mepi Bishi, semi Yɛu ibwɛ, keeni bụtụ na yaa kwụlanɛ yɛu ɛtɛ maa kapɛshɛngana bụ gana na Bishi bwa shɛ.

²⁸Zhajɛ ma pi mi hwɛɛ hiŋ, ahiɛba na hi lukwumenji, ta ahiɛba na i'wɛŋnɛ iri, maa Ma hi pana ụhinjanụ.

²⁹Shapa ma ụ'wụ'wụ mu i'ilu,[23] maa hi betiteni uŋ nu n'ilu mi hiŋ, maa hi no soso no olugwo mi, iwɛnɛ tu Ngaa shɛ bụtụ na meme-zucinje, keeni bụtụ na ahaŋsa ubwa namɛ suu, iwɛ maa hi to ụhinjanụ ugbe iwɛ shihwulu shi hiŋ.

³⁰Ụ'wụ'wụ mu i'ilu zasa iwɛ tu'waŋna o, i'wɛŋnɛ mi kaa namɛ hɛkɛlɛ.