Read bassa MATIU 14 Bible Online

MATIU 14 - bassa bible

MATIU 14

¹Aka na ti gɛ Hɛrod na shɛ uhiu cɛnjɛ ta ata hwụjɛ unabarɛ Jisus.

²Bɛɛ hiɛŋ miaụŋ-mu-ugondu ubwa, Ga Jon Bɛnjɛ-bu-ubaptizim hiɛ no tu'wo, iwɛbɛ po ugondu ga ụrụhwajɛ ukpahiŋ wa nda tedure nu bwa.

³Gɛ Hɛrod 'imɛ la Jon bee kepi bu nu umwono-tishi, iwɛ Hɛrodias biyikwo bi yɛu-bino bwa ge Filip,[27]

⁴iwɛnɛ ti ga Jon hiɛŋ bụ, Undwa leni shi maa zeni bu o.

⁵Gɛ Hɛrod ba jala maa kwụna Jon, ama ba nda inyɛsɛ ya atwa ofwugwo, iwɛnɛ ta atwa kpaaŋ rɛcɛ maa ga Jon shɛ bigesere.

⁶Aka na tu ụjita titeyinje ta tumata ti Hɛrod ci, Ibɛ yɛu-yo-o Hɛrodias hiɛbɛ tɛhiɛba na ashashɛ aba, tɛhiɛba ta ata kaa tu kwụlanɛ Hɛrod tebiye.

⁷Ibɛ po gɛ Hɛrod shileni yɛu ɛtɛ unu harɛ boo to-tuwa, maa bi zhɛ ba pana bụ, iyi elele nɛ baa lụpɛ bụ.

⁸Ibɛ po bino bi yɛu ɛtɛ, mbishi iŋ, iyi nɛ yaa shɛ ya lụpa agwuma. Ibɛ po yɛu ɛtɛ hiɛŋ agwuma, N shiyeneni uhiuhiu Jon Bɛnjɛ-bu-ubaptizim nɛ ɛkpɛtɛ hwuwayɛ hwuwayɛ go.

⁹Ama amɛ agwuma hashɛganụ, ama bi peni waa kaa atwa ubwa unu maa ge peni bu uŋ iwɛnɛ boo go towo-tuwa, ne eshe atwa na gɛgajɛ a ya iyi nu bwa.

¹⁰Baa tumwanɛ butumwa nu umwono-tishi maa ge mwe uhiuhiu Jon.

¹¹Ee zhe ga ee mwe uŋ, ee shiyeni uŋ nɛ ɛkpɛtɛ, ee peni yɛu ɛtɛ yo o, bee shepi uŋ, bee peni bino bwa.

¹²Nazhɛ eseshi-iyi Jon zhajɛ ee shepi ru'wo ru bwa, ee ni ru. Nazhɛ ee zhe ee mbishe Jisus.

¹³Aka na ti ge Jisus hwụjɛ iwɛ ɛtɛ, bee beni apata, bee teni nụ ụhaŋtụ bwooko, bee zhe no ofwo na bụtụ zasaba. Aka na ta atwa ofwugwo hwụjɛ iŋ, ee beni nụ ụshɛpwụ ụshɛpwụ aa 'wa bụ ni ivwunɛ.

¹⁴Aka na tu baa banɛ nụ ụhaŋtụ ata, baa kwụbɛ ufwugwo ata ụ'wụtụ, ibɛ po inyɛmɛnyɛmɛ ya aba shɛ bụ, baa nɛnjɛ atwa aba a na a gwumanga.

¹⁵Aka na tụ ụrụmɛ shɛ, eseshi-iyi Jisus zhajɛ pu bwa, ɛɛ hiɛŋ bụ, Epe shɛ ụshɛka, aka kaa koshikwo. Hiɛŋ atwa ga maa ge zhe na ashɛpwụ maa o so iyimɛyɛ maa a yɛ.

¹⁶Ge Jisus hiɛŋ aŋ, I shɛ shɛ tilɛɛ maa e beni e zhe na ashɛpwụ o. Pana aŋ ma iyimɛyɛ maa a yɛ.

¹⁷Ama ɛ hiɛŋ bụ, Ibrɛd itɛ gba kaa ati 'yajɛ epe keeni ijɛnɛ iyebi kiri.

¹⁸Ge Jisus hiɛŋ aŋ, Suje iŋ ma epe pi mi.

¹⁹Bee peni atwa ofwugwo ata unu maa ga a gɛgaga na ambɛ. Aka na bee suji ibrɛd ɛtɛ itɛ keeni ijɛnɛ ɛtɛ iyebi, bee shepi eshe na azuba, baa tabwa Agwatana maa pana iŋ uwebiye. Aka na bee hwuŋzerenji iŋ, bee peni eseshi-iyi ubwa, eseshi-iyi ubwa shepi iŋ ee peni atwa ata.

²⁰Nazhɛ atwa ata kpaaŋ yɛ iŋ, ee shigeji. Ee suji owunzu ibrɛd ɛtɛ vwɛ, keeni ijɛnɛ ɛtɛ, i shini shɛrɛgada umpwa-na-shɛba-shi-yebi.

²¹Atwa na yɛ ibrɛd ɛtɛ, a shɛ gana etwenyi igbɛɛ-iyebi-na-akpakwụ-a-ta, a 'imɛ shɛ kaa eyikwo na miaụŋ o.

²²Gunu ata ge Jisus tɛtajɛ eseshi-iyi ubwa maa ge e teni nu ụhaŋtụ, maa a 'yagana bụ umbe, maa e keshi hileniye itekwu. Bɛɛ hiɛŋ atwa ofwugwo ata, Hwulo ma ya.

²³Aka na ti ge Jisus hiɛŋ atwa ata, Tugwo ma oo, nazhɛ bee munji ni ishɛmɛ bwooko maa nda adua. Aka na tụ ụrụmɛ shɛ, baa namɛ apata bwooko gba.

²⁴ụhaŋtụ kaa namwawaŋ na ashashɛ itekwu cebe na aka ata, adanga kaa o zhingoto ụhaŋtụ, iwɛnɛ ta a twa nu uvwugo.

²⁵Aka na ta aasavwungwa a'wụtụ ci, ge Jisus patanɛ na azuba meni, baa zha tahaŋnụ, bɛɛ zhɛ geri ata eseshi-iyi ubwa namɛ.

²⁶Aka na te eseshi-iyi ubwa kwụbɛ bụ, tu baa zha tahaŋnụ na azuba meni, ibɛ po inyɛsɛ shɛ aŋ, aa uganɛ, ɛɛ hiɛŋ, ụbaratụ ye ma!

²⁷Gunu ata, ge Jisus dumanɛ iwɛ na aba, bɛɛ hiɛŋ aŋ, Ga amɛ hiŋ lemi, Gamba, ta nda ma inyɛsɛ o.

²⁸Ga Pita jishijɛ bụ, bɛɛ hiɛŋ, Agwangwama, Yaa shɛ gabụ ta, asha m peni-unu, maa ma zhajɛ du tahaŋnụ na azuba meni maa Ma zhajɛ pụ bụ.

²⁹Ge Jisus hiɛŋ bụ, Zhajɛ! Ga Pita kezhe ga nu ụhaŋtụ, bee kwuni tahaŋnụ tizha na azuba meni ma ata, maa zha no ofwo Jisus.

³⁰Ama aka na tu baa kwụbɛ tu uvwugo[28] wa nda, ibɛ po inyɛsɛ shɛ bụ, bee kwuni ti'ilo, baa uganɛ, bɛɛ hiɛŋ, Agwangwama, n le o!

³¹Gunu ata ge Jisus nderishinji u'ala ubwa, bɛɛ imɛ bụ, bɛɛ hiɛŋ bụ, Bu 'yajɛ rishe-tɛtɛtana cwɛŋ, iwɛmbe po abɛ njɛ oruwoo?

³²Aka na te e teni nụ ụhaŋtụ, uvwugo hwuwowu.

³³Ibɛ po atwa na zweni nụ ụhaŋtụ ata zhɛbɛ bụ, ɛɛ hiɛŋ, Iwɛ-tɛkana, gabụ ga bɛ shɛ Yɛu ya Agwatana gom!

³⁴Aka na te e keshi itekwu ɛtɛ, ee ci cɛnjɛ ti Gɛnɛsarɛt.

³⁵Atwa na namɛ apata eshicinji bu, ibɛ po aa tumwanganɛ atwamwa na cɛnjɛ ta ata kpaaŋ, maa ge sugeni bu agwụmashɛ elele kpaaŋ.

³⁶Nazhɛ atwa ata lụpɛ bụ maa e timengeni okwo izhɛmi tugwuno tu bwa kwakwa. Atwa elele na kaa timengeni bu, a zhɛmananɛ.