Read bassa MATIU 2 Bible Online

MATIU 2 - bassa bible

MATIU 2

¹Aka na te e meci Jisus ni Bɛtlɛhɛm ata namɛ na cɛnjɛ tu Judia na aka agwuma Hɛrod, ibɛ po atwa oko shihaŋsa[5] banɛ geri bu uwaŋna-banụ aa zhajɛ Jɛrusalɛm,

²ɛɛ hiɛŋ, Ce agwuma Eju ofwo na ee meci namɛɛ? Tụ kwụbɛ ikpɛsu ibwɛ, ti yaa tu bananɛ geri bu uwaŋna-banụ, ibɛ po atɛ zhajɛ maa ta zhɛba bụ.

³Aka na agwuma gɛ Hɛrod hwụjɛ iwɛ gɛ, amɛ ubwa hashɛganụ, gobwonu du shɛmɛ sha atwa Jɛrusalɛm shɛ hashɛganụ kpaaŋ aba.

⁴Aka na tu boo sotulonu ehiu onongbo kpaaŋ keeni atwa na shɛ embisegeni Undwa, bee heŋteni aŋ ofwo na ɛɛ zhɛ a mata Krast.

⁵Ɛɛ hiɛŋ bụ, Ni Bɛtlɛhɛm ata namɛ nu Judia. Iwɛnɛ po gana bigesere 'nyeci na, maa.

⁶Gabụ Bɛtlɛhɛm ata namɛ na cɛnjɛ tu Juda, bi zha shɛ ba 'nyana kwukwuŋ na amɛ a'una Juda o, iwɛnɛ ti yaa shɛ no olugwo bu bi'yagajɛ na zhɛ ba ya tugwama ta atwa mi Isrɛl zhɛ ba banɛ.

⁷Aka na ti gɛ Hɛrod suyanɛ atwa ata shihaŋsa swɛɛ, bee hweyigeni no olugwo aba, nazhɛ boo to aka na ti ikpɛsu ɛtɛ banɛ ugbe gom.

⁸Baa tumwanɛ aŋ, bɛɛ hiɛŋ, Zhaga ma Bɛtlɛhɛm, jalakacɛ ma yɛu ɛtɛ tebiye, gunu na ɛhi cɛ iŋ ugbe, gwure ma hi m mbishi iwɛ maa Ma zha du mɛ zhibɛ iŋ.

⁹Na aba na ta a hwụjɛ iwɛ nɛ agwuma jɛmɛ, ɛɛ ishijɛ oo to tuhwulo ta tahaŋnụ ta aba, ibɛ ikpɛsu ɛtɛ aa ga kwụbɛ ti yaa banɛ nu uwaŋna-banụ hwuleni aŋ umbe yee zhe yee shikeni ne eririri azuba ofwo ata yɛu ɛtɛ namɛ.

¹⁰Aka na ta a kwụbɛ ikpɛsu ɛtɛ, aa bwadụ nu unyasa ụ'wụtụ.

¹¹Aka na ee teni nu umwono ata, aa kwụbɛ yɛu ɛtɛ, ne Meri bino bi bɛ, ee kwuzenji aa zhɛbɛ iŋ. Nazhɛ ee kepeshenji mkpata mu uduciya wa aba ee peni iŋ apwaŋ azhɛnarɛya, nu frankinsɛns keeni umuru.

¹²Ama Agwatana mbishi aŋ nu ụwalabụ maa kede e beni ya Hɛrod nu ugwulwo wa aba o, ɛɛ ishijɛ ee duri uhwaŋna unya ee ji na cɛnjɛ ta aba.

¹³Aka na ta atwa ata shihaŋsa hwuri, nazhɛ butumwa ba Agwangwama ba azuba bananɛ Josɛf nu ụwalabụ, bɛɛ hiɛŋ bụ, Ishijɛ maa shepi yɛu gɛ, to bino bi bɛ, maa hwuri na cɛnjɛ ti Ijipti, nama apata uuwa i ci aka na Ngɛɛ zhɛ Mo bu mbiso inyɛwɛŋ. Iwɛnɛ ti gɛ Hɛrod zhɛ ba jalakaka yɛu gɛ tụkwụna.

¹⁴Bɛɛ ishijɛ ga, bee shepi yɛu ɛtɛ, to bino bi bɛ na amɛ ụjita, bee hwuri na cɛnjɛ ti Ijipti,

¹⁵baa namɛ apata uuwa i ci aka tu'wo ti Hɛrod. Inɛ gɛ teni iwɛ maa iwɛ nɛ Agwangwama dumwa la nu unu bigesere sɛ, inɛ hiɛŋ, Ni Ijipti Ngɛɛ bɛcinjɛ yɛu mi.

¹⁶Ti gɛ Hɛrod kwụbɛ maa atwa ata shihaŋsa helekeci bu, ibɛ po isɛbwɛ ya gwuzhaga na amɛ ubwa duwa, baa tumwanɛ atwa maa ga a kwụnɛ miaụŋ-me-eyi mi Bɛtlɛhɛm keeni mu naa na mu namɛ na tubabɛshɛ ta aba, mu na mu tuwo shiywa shi yebi te e meci mu uuwa zwe, na aka gana na boo go hwoyigwonuo na atwa ata shihaŋsa.

¹⁷Nazhɛ iwɛ nɛ bigesere gɛ Jɛrɛmia dumwa la sɛ, inɛ bɛɛ hiɛŋ,

¹⁸A hwụjɛ rụhwụŋ ru u'wo u tugboo nu Rama keeni ụkwụla ụ'wụtụ tuta, Ge Rechɛl ba twa-u'wo miaụŋ mu bwa, baa lacɛ ti'ingatanga, iwɛnɛ tu ma zasaba ya.

¹⁹Ama ti gɛ Hɛrod 'wi, butumwa ba Agwangwama ba azuba bananɛ Josɛf nu ụwalabụ ni Ijipti,

²⁰bɛɛ hiɛŋ bụ, Ishijɛ maa shepi yɛu gɛ, to bino bi bɛ maa zhe na cɛnjɛ ti Isrɛl. Iwɛnɛ po atwa na ga jalakaka la uraiŋ ibɛ uwo.

²¹Bɛɛ ishijɛ ga, bee shepi yɛu ɛtɛ to bino bi bɛ, bee hwuri na cɛnjɛ ti Isrɛl.

²²Ama aka na tu go Josɛf hwụjɛ maa ga Akɛlaus yɛ tugwama te bishi bwa gɛ Hɛrod nu Judia, ibɛ po inyɛsɛ shɛ bụ maa gwulo apata. Ama aka na ta Agwatana tɛtaganɛ bụ unu nụ ụwalabụ, bee kezhingeni, bee teni na cɛnjɛ tu Galili.

²³Bee zhe baa jɛjɛ nu ụshɛpwụ uko ɛɛ hiɛŋ, Nazarɛt, iwɛ maa iwɛ nɛ egesere dumwa la sɛ, inɛ hiɛŋ, Ɛ zhɛ ɛ hiɛŋ bụ maa bụtụ bu Nazarɛt.[6]