Read bassa MATIU 22 Bible Online

MATIU 22 - bassa bible

MATIU 22

¹Ge Jisus jishɛgananɛ aŋ, nu n-ndudmwa tumanganjɛ, bɛɛ hiɛŋ,

²Cɛnjɛ-ta-tugwama ta azuba tɛ shɛ gana agwuma oko na ndanɛ yɛu ibwɛ ye eyi towo.

³Baa tumwanɛ miaụŋ-mu-ugondu ubwa, mee zhe maa suyaganɛ atwa ata boo go mbiswogwo, maa a zhajɛ towo, ama i kwụlanɛ shɛ aŋ maa a zhajɛ o.

⁴Baa tumwananɛ miaụŋ-mu-ugondu mi nya, bɛɛ hiɛŋ. Zhaga mbishe ma atwa ata Ngaa nga suywanua, Hioko ma, N imwangwa iyimɛyɛ mi i tiya, aa shɛlwa inɛ mi keeni iyimabiga mi nɛ nyemenji. Zhajɛ ma ya maa hiɛ yɛ iyimɛyɛ towo!

⁵Ama i tatụlanụ sụ aŋ o, bu na bu ko hwuri ni itimɛ ibwɛ, binya bụtụ zhe no ofwo ugondu tihinya tu bwa.

⁶Atwa vwɛ aba 'imɛ miaụŋ ma ata mu ugondu, aa njɛ aŋ ụpụrụsa, aa kwụnɛ aŋ.

⁷Aka na ta agwuma hwụjɛ iwɛ ɛtɛ, baa njɛ isɛbwɛ, baa tumwanɛ asaza ubwa, ee iricinji atwa ata, bee hwoŋzhinji ụshɛpwụ wa aba.

⁸Nazhɛ bɛɛ hiɛŋ miaụŋ mu bwa mu ugondu, Iyimɛyɛ towo i ci ya tiya, atwa na Ngaa nga suyanɛ a lanɛ shɛ o.

⁹Zhaga ma ya ne ekpekiti, atwa elele na ɛhi kwubɛ hwayɛ, suyanɛ aŋ ma no ofwo iyimɛyɛ towo tiya.

¹⁰Miaụŋ ata mu ugondu mi beni ga mee zhe ni ihwɛŋnɛ, mee suje atwa elele na ɛɛ kwubɛ, ta atwa awɛ, ta atwa ebiye. Nazhɛ agaiŋ shini ya umwono ata towo pwomuu.

¹¹Aka na ta agwuma teni maa kwụba agaiŋ ata, baa kwụbɛ ya apata bụtụ bu ko na urigeni shi utogwo towo.

¹²Agwuma heŋteni bu, bɛɛ hiɛŋ, E-biyejilo mi, gana na bwa ya ebi teni epe ebu urigeni shi utogwo towoo? Ama bụtụ ata dumanɛ shɛ iwɛ ye elele o.

¹³Nazhɛ agwuma hiɛŋ miaụŋ mu bwa mu ugondu, umpo bu ma i'ɛlɛ, ti ivwunɛ, maa hi keri bu ne tishi to tupohondo. Apata u'wo-tutwa keeni ene tiya namɛ.

¹⁴Atwa ofwugwo aa ga suyanɛ, ama atwa na ee teri twa sụ ufwugwo.

¹⁵Nazhɛ Afarisi zhe aa njɛ ushaura maa a 'imɛ Jisus nu n-ndumwa mu na baa duma.

¹⁶Aa tumwanɛ eseshi-iyi aba, na atwa Hɛrod, ɛɛ hiɛŋ bụ, E-Bimbisegeni, ti mepi maa gabụ bɛ shɛ bụtụ bɛ tɛkana, na tɛkana kaa du obo mbisogono atwa uhwaŋna wa Agwatana, bu 'wa sụ kaa du iwɛ tuswoswoswo tu gana na atwa namanjɛ o. Bɛ njɛ shɛ kaa du iwɛ bu na atwa tuzanga o.

¹⁷Iti mbishi kaa, Undwa leni suu maa tu na tụpa Sisa ukwuribi ụdalụ, okwo u leni shi?

¹⁸Ama ge Jisus mepi kaa tuhaŋsa ta aba tụ wɛ, bɛɛ hiɛŋ aŋ, Ahiɛba atwa na a nda iyi tɛnda-te-eshe, iwɛmbe po ahi ma mangaa?

¹⁹M mbiseni ma ukwuribi ata ụdalụ! Aa panɛ bụ urinya uko.

²⁰Bɛɛ hiɛŋ aŋ, Ụsụbwa aba na kwuŋ swanɛ nu ukwuribi ga, keeni ti'nyeci tɛ gaa?

²¹Ɛɛ hiɛŋ bụ, Ga Sisa. Nazhɛ ge Jisus hiɛŋ aŋ, Iyi elele nɛ i shɛ inɛ Sisa, na pana ma Sisa, inɛ ye elele nɛ kaa i shɛ inɛ ya Agwatana, na pana ma Agwatana.

²²Aka na ta a hwụjɛ iwɛ ɛtɛ, yaa dama aŋ duwa, ee genji bu, ee hwuri.

²³Nụ ụjita ata uko uko, Asadusi a na hiɛŋ maa tihiɛ tu zasaba o, zhajɛ pi Jisus, ee unseni bu,

²⁴ɛɛ hiɛŋ, E-Bimbisegeni, go Moses hiɛŋ, Yaa shɛ bụtụ be elele zeni biyikwo, bee 'wi, bee meci shi kaa miaụŋ, asha gɛ yɛu-bino bwa zeni biyikwo ata tizhaada, iwɛ ma matanga yɛu-bino bwa miaụŋ.

²⁵Miaụŋ-me-eyi mi cenje mu namba na ashashɛ tu. Bu na bi hiiŋ zeni biyikwo, bee 'wi, bi meci shi yɛu o, yɛu-bino bwa zeni biyikwo ata tizhaada.

²⁶Gobwonu du yaa shaananɛ, ta bụtụ bụ tatụ, gana go yaa shanɛ aŋ hwɛɛ aba ebe cenje.

²⁷Nu umɛwɛɛ ibɛ, biyikwo ata du 'wi.

²⁸Biyikwo aba tuba bɛɛ zhɛ ba sha hwuŋ na ashashɛ atwa ata ecenje nɛ tihiɛɛ? Iwɛnɛ po kpaaŋ aba kaa zwonuo bu la.

²⁹Ge Jisus jishijɛ aŋ, bɛɛ hiɛŋ, Iwɛnɛ ehi mepi shi Utakada Iwɛ ya Agwatana kwo kaa ukpahiŋ wa Agwatana, ibɛ po ahiɛ 'inɛ.

³⁰Iwɛnɛ po nɛ tihiɛ, a zha shɛ a zana hwuŋ eyikwo, okwo tụmbụla, a zha shɛ a pana du o, ɛ zhɛ a sha hwuŋ gana atumwa na namɛ na azuba.[49]

³¹Hi ta rɛcɛ shɛ suu iwɛ nɛ Agwatana ihi mbishi, iwɛ tihiɛ ta atwa na 'wi? Bi hiɛŋ,

³²Gamba n shɛ Agwatana Abraham, na Agwatana Azik, keeni Agwatana Jekob. Bɛ shɛ shɛ Agwatana atwa na 'wi o, semi Agwatana atwa na shɛ buumwa.

³³Aka na ta atwa ofwugwo ata hwụjɛ iwɛ gɛ, nazhɛ imbisegeni ibwɛ dama aŋ duwa.

³⁴Aka na ta Afarisi hwụjɛ maa ge Jisus lasụ Asadusi nu n-ndumwa, aa ụlwatagwụ.

³⁵Nazhɛ bụtụ aba bu ko na shɛ Bụtụ-bu-undwa menji Jisus ni iheŋtene, bɛɛ hiɛŋ bụ,

³⁶E-Bimbisegeni, unu-tupana naa kwuŋ ụ shɛ una ụ'wụtụ nu Undwaa?

³⁷Ge Jisus jishijɛ bụ, bɛɛ hiɛŋ, Bɛ shɛ bo lubo Agwangwama na shɛ Agwatana bụ, na amɛ bụ kpaaŋ, to ohwulu bu kpaaŋ, ta ahaŋsa bụ kpaaŋ,

³⁸Inɛ ɛtɛ ibɛ shɛ unu-tupana ụ'wụtụ, ubwa du kaa shɛ una uhiiŋ.

³⁹Una uyebi ụ shɛ du gana bwa, una ata hiɛŋ, No lubo uyebi bu gana na obu momo lubo.

⁴⁰Andwa Moses kpaaŋ, keeni iyi nɛ ee 'nyeci na atakada egesere, a datanɛ onu-tupana ga eyebi.

⁴¹Aka na ta Afarisi ụlwatagwụ, ge Jisus heŋteni aŋ,

⁴²bɛɛ hiɛŋ, Imbe kwuŋ ehi heŋshi iwɛ Krast ataa? Yɛu aba kwuŋ baa shɛɛ? Ɛɛ jishijɛ bụ, ɛɛ hiɛŋ, Yɛu Devid.

⁴³Ge Jisus jishijɛ aŋ, bɛɛ hiɛŋ, Asha gana na ya Mpiala mi zeriji la Devid bɛɛ hiɛŋ bụ, Agwangwamaa? Ge Devid kaa hiɛŋ bụ,

⁴⁴Agwangwama, hiɛŋ Agwangwama mi, Gɛga nu u'ala ubiye mu uuwa i ci aka na Ngee tileni atwa-i'ime bu tuta tɛ ɛvwɛvwɛjɛ mi.

⁴⁵Yaa shɛ ge Devid hiɛŋ bụ, Agwangwama, asha gana na baa shɛ ya yɛu ibwɛɛ?

⁴⁶I zasa bụtụ be elele eri bɛ jishijɛ bụ ya iheŋtene ɛtɛ o. Te kwuni na aka ata, i zasa ya bụtụ be elele 'yajɛ eshe-hwoo maa unsono bu i'unsene elele kwukwuŋ.