Read bassa MATIU 23 Bible Online

MATIU 23 - bassa bible

MATIU 23

¹Nazhɛ ge Jisus jɛmɛ iwɛ na atwa ata ofwugwo keeni eseshi-iyi ubwa,

²bɛ hiɛŋ aŋ, Embisegeni Undwa keeni Afarisi gɛgajɛ na ajɛjɛ Moses.

³Iyi elele nɛ oo hi mbiso maa hi untangana, untangana iŋ ma, maa hi na nda, ama ta na nda ma tuba gana ata aa nda o, iwɛnɛ ta a njɛ shɛ iyi nɛ aa ananga.

⁴O umpo i'wɛŋnɛ nɛ zhineni,[50] Aa patangana atwa no shitutu, ama e jeri shi kaa maa e mbiyeni atwa i'wɛŋnɛ ɛtɛ tinice okwo na buvwa ba aba o.

⁵A nda ugondu wa aba kpaaŋ, iwɛ maa atwa na kwụba aŋ. Iwɛbɛ po aa nda nlayɛ ma aba maa mi helenji, a nda shizeje sho tugwuno ta aba te gembenji.

⁶O lubo ofwo ebiye na ajɛjɛ iyimɛyɛ nsono tiya, keeni ajɛjɛ ụjɛrụma no shimwono shɛ tụ'ụlwatagwụ,

⁷keeni a'walụ nu ugba udukwo, maa atwa nɛ hiɛŋ aŋ, E-mbisegeni.

⁸Ama to lono ma maa atwa na hi suyana maa, Bimbisegeni o, iwɛnɛ te Bimbisegeni hiŋ namɛ bu ko gba, ama hiɛ shɛ ya tuba miaụŋ-mo-bino hwɛɛ hiŋ.

⁹Ta na suyana ma bụtụ be elele maa, bishi hiŋ nu unyizo ga o, iwɛnɛ te bishi hiŋ namɛ bu ko gba, bu namɛ kaa na azuba.

¹⁰To lono ma maa atwa na hi suyana maa, a'yagajɛ o, iwɛnɛ ta Bi'yagajɛ hiŋ namɛ bu ko gba, ubwa shɛ ga Krast.

¹¹Ama bụtụ na hwuri atwa vwɛ na ashashɛ hiŋ, ubwa zhɛ ba sha yɛu-ugondu hiŋ.

¹²Bụtụ na meme-mungicinji, ɛ zhɛ e zucinje bu, bụtụ na kaa meme-zucinje, ɛ zhɛ o mungicingo bu.

¹³Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahia kapana atwa uhwaŋna Cɛnjɛ-ta-tugwama ta azuba. Ahiɛba ni ikɛnyi hiŋ, hi teni shi o, hi leneni shi kaa atwa na a jala tutono maa e teni o.

¹⁴[Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ehi suji i'wɛŋnɛ yo olulo ahiɛ yɛ,[51] gunu ata hio kwuno adua ụnjɛswa tɛnda maa atwa ihi kwụbɛ. Iwɛbɛ po ɛɛ zhɛ ma hi pana hwuŋ n-ndumwa-tụwụma mụ 'wụtụ uhwuri atwa vwɛ.]

¹⁵Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ohio rungo ofwo ofwo ni itekwu keeni cɛnjɛ, maa hi mbɛ bụtụ bu ko no ofwo hiŋ, aka na ɛhi mbɛ bụtụ ata, hia nda bụ yɛu ukwokwo ulwa ihi hwuri gana na ahiɛ shɛ kpalụ yebi.

¹⁶Ahiɛba a'yagajɛ a na shɛ sholubo, hi zhɛ hia nda hwuŋ adangboo! Iwɛnɛ ɛhi hiɛŋ, Yaa shɛ bụtụ to Umwono wa Agwatana, asha inɛ ɛtɛ shɛ shɛ iyi elele o, ama yaa shɛ bụtụ to ụzhɛnarɛya Umwono wa Agwatana, asha nazhɛ baa 'yajɛ tijama.

¹⁷Ahiɛba shɛlagwụ no sholubo! Inɛ nɛ gembi uhwuri inyɛɛ? Ụzhɛnarɛya suu okwo Umwono ata wa Agwatana, na wa nda ụzhɛnarɛya ata maa ụ shɛ ụzhɛnarɛya u tijilo?

¹⁸Ɛhi hiɛŋ sasana, Yaa shɛ bụtụ to utukwu-ụrụpɛ, asha inɛ ɛtɛ shɛ shɛ iyi elele o, ama yaa shɛ bụtụ to upwaŋ ata patanɛ nu utukwu-ụrụpɛ, asha nazhɛ baa 'yajɛ tijama.

¹⁹Ahiɛba sholubo! Inɛ nɛ gembi uhwuri inyɛɛ? Upwaŋ ata suu, okwo utukwu, na wa nda upwaŋ ata maa ụ shɛ upwaŋ u tijilo?

²⁰Bụtụ be elele na to utukwu-ụrụpɛ, asha bu to du iyi elele nɛ patanɛ nu bwa.

²¹Bụtụ be elele na kaa to Umwono wa Agwatana, asha bu to du bụtụ ata namɛ na amɛ ubwa.

²²Bụtụ be elele na to azuba, asha bu to du idwɛtwɛ ya Agwatana keeni bụtụ ata jɛjɛ ni bɛ.

²³Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ohio dwotwogonu tugombwo, no ongwoyi keeni tụmadụ orubwo umpwa, ahia pana Agwatana urubwo uko, ama hi 'wa sụ kaa iwɛ iyi Undwa nɛ uhwuri inɛ ɛtɛ o. Ibɛ shɛ ụshɛrɛya, ni inyɛmɛnyɛmɛ tihioko keeni rishe-tɛtɛtana. Inɛ ɛtɛ ahi ga shɛ hia nda hiiŋ, hiɛ shɛ shɛ kaa du hia ganga inɛ ebe tɛnda o.

²⁴Ahiɛba a'yagajɛ a na shɛ sholubo! Hio susogo meni iwɛ awaŋ, ama hi eri kaa hia twala okwo irihende!

²⁵Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahia nyashɛnga aba ukwopi keeni aba ikele shɛshɛshɛ, ama tuhwulo keeni eshe-iyi kaa shini na amɛ ibɛ.

²⁶Gabụ Bufarisi na lubeni! Nyashɛnga tugwo amɛ ukwopi shɛshɛshɛ, nazhɛ aba ubwa zhɛ a nama du shɛshɛshɛ.

²⁷Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahiɛ shɛ gana e'uye na aa shananjɛ ụhwụla, a na kaa zhɛmɛ igbɛtɛtɛ no tupohondo, ama o'umpwo atwa na 'wi keeni iyi elele nɛ kaa zasa shɛshɛshɛ shini na amɛ aba.

²⁸Gobwonu du ahi mama nda atwa tiririri ne eshe atwa, ama tɛnda-te-eshe keeni undwa tubwada kaa shini na shɛmɛ shi hiŋ.

²⁹Ahiɛba Embisegeni Undwa keeni Afarisi, ahiɛba na hia nda iyi tɛnda-te-eshe, hi zhɛ hia nda hwuŋ adangboo! Iwɛnɛ ahia ma e'uye egesere, ahia nda a na atwa tiririri tisemberi.

³⁰Ɛhi hiɛŋ, Yaa shɛ atu ga namba la na aka eshi tu cala, ti ga zha shɛ ta nama na aba, na tụkwụna tu na aa kwụnɛ la egesere ata o.

³¹Ama kaa hi meme le tiseyida, maa ahiɛba hiɛ shɛ miaụŋ ma atwa ata kwụnɛ la egesere ata.

³²Mizha hwaŋzhɛnga ma ya ugondu ata eshi hiŋ kwunuo la tɛnda.

³³Ahiɛba ahwa! Ahiɛba miaụŋ me egbezhi, gana na ehi eri hia banangana ụshɛrɛya ata ukwokwo ulwaa?

³⁴Iwɛbɛ po Ngɛɛ zhɛ ma hi tumwananɛ egesere, na atwa ti'inta keeni Embisegeni Undwa. Ama hi zhɛ hia kwụna atwa aba oko, ɛhi zhɛ hia tagana atwa aba oko nrɛ nụ ụ'wụ'wụ-ubatanɛ, ɛhi zhɛ hio kwuto atwa aba oko no shimwono shi hiŋ shɛ tụ'ụlwatagwụ, ɛhi zhɛ hi na shɛka aŋ nụ ụshɛpwụ ụshɛpwụ.

³⁵Iwɛ maa ga tijama te mehieŋ ma atwa tiririri mu na ehi dudweji nu unyizo ga, ti kezhe no ohiuhiu hiŋ, te kwune ne Ebɛl na shɛ bụtụ bi tiririri, uuwa i ci mehieŋ mu Zakaria yɛu Barakia, ata ahiɛ kwụnɛ na ashashɛ ohwolu tijilo nu utukwu-ụrụpɛ.

³⁶Iwɛ-tɛkana Omo hi mbiso maa, ijɛ kpaaŋ, zhɛ ye kezhe no ohiuhiu atwa uwaŋnɛ ga.

³⁷Oo Ahiɛba atwa Jɛrusalɛm, Ahiɛba atwa Jɛrusalɛm, ahiɛba akwụnɛ egesere, ahiɛba etegeni atwa na aa hiɛ tumwananɛ atayɛ, kpalụ gembi ufwugwo Ama jala la maa mo sotulonu miaụŋ mi hiŋ pi mi, gana na ta alụma a hwakana oywoywo ubwa na apiambɛ ubwa, ama hi jeri shi gana ata o!

³⁸Hioko ma, o hi gongwonuo umwono hiŋ, waa shɛ ya osombo.[52]

³⁹Mo hi mbiso maa, te kwuni na aka ga, hi zha shɛ hi ma n kwụba ya o, uuwa i ci aka na ɛhi zhɛ hiɛ hiɛŋ hwuŋ, Zhemonjino ma bụtụ ata be ci ni izeci ya Agwangwama.