Read bassa MATIU 24 Bible Online

MATIU 24 - bassa bible

MATIU 24

¹Ge Jisus beni nu Umwono wa Agwatana, boo mwo tahaŋnụ tu bwa, eseshi-iyi ubwa zhajɛ pu bwa maa e mbiseni bu tuma tu Umwano wa Agwatana.

²Ge Jisus jishijɛ aŋ, bɛɛ hiɛŋ, Hiɛ kwụbɛ shɛ ijɛ kpaaŋ hŋ? Iwɛ-tɛkana Omo hi mbiso maa, i zasa utayɛ we elele na ɛɛ zhɛ a ganga hwuŋ maa u patana ni ihiŋhiŋ unya epe, aa zha shɛ o hwuŋzo.

³Ti ge Jisus jɛjɛ ni Ishɛmɛ Buta, eseshi-iyi ubwa zhajɛ pu bwa swɛɛ, ɛɛ hiɛŋ bụ, Iti mbishi aka na ti ijɛ kpaaŋ zhɛ ya ndangana hwuŋ. Imbe zhɛ ya sha hwuŋ useyida tɛzhajɛ tụ bụ, keeni ukwunanga usara gaa?

⁴Ge Jisus jishijɛ aŋ, bɛɛ hiɛŋ, No shiyono ma eshe, maa kede bụtụ be elele ihiɛ inzhɛnjɛ o.

⁵Iwɛnɛ ta atwa ofwugwo zhɛ a zhajɛ hwuŋ ni izeci mi, ɛɛ zhɛ hiɛŋ, Gamba n shɛ ga Krast, ɛ zhɛ a inzhɛnga atwa ofwugwo.

⁶Hi zhɛ hia hwuga anabarɛ ajasa keeni erishi ajasa. Kede shihwulu shi hi horukono. I shɛ tilɛɛ maa ijɛ zhɛ ya ndangana kpaaŋ, ama tuba shɛ ukwunanga ibɛ ta o.

⁷Udenji uko zhɛ wɛ hwɛyijɛ wa sukakana udenji unya; tugwama tu ko ti zhɛ tɛ hwɛyijɛ, ta sukakana tugwama ti nya; atwa zhɛ a ya-imunɛ, cɛnjɛ ti zhɛ to zhingotu no ofwo gembi ufwugwo.

⁸Ijɛ kpaaŋ ta shɛ umozhigo gana ụngwụ tumata.

⁹Nazhɛ ɛɛ zhɛ mo hi sugo maa e hi peni ụbaụta, ɛ zhɛ ma hiɛ kwụna, edenji elele zhɛ mo hi imo iwɛ izeci mi.

¹⁰Ɛ zhɛ a nda rishe-tɛtɛtana ra atwa ufwugwo ukwurishi, ɛɛ zhɛ a layaga na aka ata, atwa zhɛ no momo songonu ne tidere; ɛɛ zhɛ no momo imonu.

¹¹Egesere tukata ofwugwo zhɛ a banɛ, ɛɛ zhɛ a inzhɛnga atwa ufwugwo;

¹²Tulubo ta atwa ofwugwo ti zhɛ tu na kaana tugwulo ne ekwunyi, iwɛnɛ ti iyi iwɛ zhɛ na kaana ugombo.

¹³Ama bụtụ be elele na 'imɛ-isɛbwɛ uuwa i ci uce, ubwa ɛɛ zhɛ o bicingo.

¹⁴Atwa zhɛ a ananga Unabarɛ ga Ubiye ụ Cɛnjɛ-ta-tugwama nu unyizo ga kpaaŋ, maa e le tiseyida no ofwo edenji elele, nazhɛ uce ibɛ u ci.

¹⁵Aka na ahiɛ kwụbɛ ti iyi-tupwaŋ nɛ ya nda iyi ufwu nɛ bigesere ga Daniɛl dumwa la iwɛ ibɛ, zhɛ yo shikono no ofwo tijilo, (ga bụtụ na ba rɛta na mapa ecilo ibɛ).

¹⁶Ga atwa na namɛ nu Judia na aka ata gezhiji maa e zhe nu nshama.

¹⁷Kede bụtụ na patanɛ no osokwu kezhe, maa sugo iyi ibwɛ nɛ namɛ nu umwono ubwa o.

¹⁸Kede kaa du bụtụ na namɛ ne ehilo gwure maa sugo utogwo ubwa o.

¹⁹Eyikwo na 'yajɛ shifubo, ta anaa na ta 'waŋnɛ miaụŋ mu na mu to subo, zhɛ a nda hwuŋ adangboo na aka ata!

²⁰Na nda ma adua maa kede usumwa hiŋ tugozhigo ụ shɛ na aka ushwo, kwo kaa nụ Ụjita-ụhinjanụ o.

²¹Aka ata zhɛ a sha aka ụbaụta na ta njɛ shɛ la gana ata kwukwuŋ, taa tu unyizo kwuni, uuwa i ci aka ga, na kaa zha shɛ wa nama ya i ci gana ata kwukwuŋ.

²²Yaa shɛ [Agwangwama] ga munananɛ shɛ ijitɛ ɛtɛ, asha i zasa bụtụ be elele gɛ zhɛ bo bino, ama bi zhɛ ba munanana ijitɛ ɛtɛ, iwɛ atwa na bee teri ni ikɛnyi ibwɛ.

²³Yaa shɛ bụtụ be elele mɛ hi hiɛŋ na aka ata, Hioko ma, ga Krast namɛ epe, kwo kaa, Bwee ye namɛ peye, ta tɛtana iŋ ma rishe o.

²⁴Iwɛnɛ ta akrast tukata keeni egesere tukata zhɛ a bala hwuŋ, ɛ zhɛ na ndangana iyi tudama i'wɛtwɛ keeni iyi ya arụhwajɛ, maa yaa shɛ e eri a inzhɛnjɛ okwo ta atwa na Agwatana go twolwo.

²⁵Hioko ma, N hi mbiswo iŋ, nazhɛ yɛɛ zhɛ yo to.

²⁶Ibɛ po okwo yaa shɛ ɛɛ hi hiɛŋ, Bwee ye namɛ nụ ụshɛka, ta zhaga ma o; kwo kaa, Hioko ma bwaa na namɛ na amɛ umwono, ta tɛtana iŋ ma rishe o.

²⁷Iwɛnɛ ta tizhajɛ ti Yɛu Bụtụ ti zhɛ ta sha hwuŋ gana na tɛ ɛbɛrɛ a banɛ geri bu uwaŋna-banụ, aa ta tutu uwaŋna-twonuo.

²⁸Ofwo na ru'wo ri iyi ru namɛ, apata du ogwulu[53] zhɛ a ụlwatagwụ.

²⁹Gunu na tụ ụbaụta ijitɛ ɛtɛ kwunanjɛ, uwaŋna zhɛ wo 'wo tishi, upiana zha shɛ wa ta o, mkpasu mi zhɛ mu na 'waŋtatangwụ na tụla, ukpahiŋ na namɛ na azuba zhɛ wo zhingotu.

³⁰Nazhɛ ɛ zhɛ a kwụba useyida Yɛu Bụtụ na tụla, edenji na namɛ nu unyizo ga kpaaŋ, zhɛ na pa shɛgba sha aba iyi, iwɛnɛ tɛ ɛ zhɛ a kwụba ti Yɛu Bụtụ ye ci no odomu na namɛ na tụla, nu ukpahiŋ keeni ụjɛrụma ụ'wụtụ.

³¹Bi zhɛ ba tumwanɛ atumwa ubwa azuba, maa a suyanɛ atwa na bee teri na rụhwụŋ ru ukakacɛ, maa a banɛ na akakalụ unyizo eneshi, maa sotulonu aŋ, te kwune nu uce wa azuba geri bu ko tutu uce wa azuba geri nya.

³²No soso ma iyi nụ ụ'wụ'wụ uwowo. Aka na ahiɛ kwụbɛ ta shɛ'walụ shɛ bwa shi kwuni ambɛ ofwo tusabɛ, asha hi mepi maa ushwo gwumwonu ya.

³³Gobwonu du yaa shɛ, aka na ta ahia kwụbaga hwuŋ ijɛ kpaaŋ, asha mapa ma maa bu gwumwonu, nu unu wo odubo.

³⁴Iwɛ-tɛkana Omo hi mbiso maa, uwaŋnɛ ga, zha shɛ wa kashɛka hwɛɛ nazhɛ ijɛ kpaaŋ ndanganɛ o.

³⁵Ta azuba, tu unyizo zhɛ a kashɛka kpaaŋ, ama n-ndumwa mi mi zha shɛ ma kashɛka kwukwuŋ.

³⁶Ama i zasa bụtụ be elele na mepi ụjita ata kwo kaa auwa ata o, ta atumwa na namɛ na azuba, okwo Yɛu ni ikɛnyi ibwɛ, mepi shi du o, semi Bishi kiri mepi.

³⁷Gana na ti yaa namɛ la na aka Noa, gobwonu du tizhajɛ ti Yɛu Bụtụ ti zhɛ ta sha hwuŋ.

³⁸Gana na ta atwa a ya la, aa swa, aa zana, aa pana tụmbụla, te meni ma ata mụ 'wụtụ mi te zhegeji shi, uuwa i ci aka na tu ga Noa teni nụ ụhaŋtụ ata ụ'wụtụ.

³⁹E mepi shi, uuwa i ci aka na meni ma ata mụ 'wụtụ mu suji aŋ hwɛɛ. Gobwonu du yɛɛ zhɛ ya sha hwuŋ na aka tizhajɛ ti Yɛu Bụtụ.

⁴⁰Atwa eyebi zhɛ o zwono ne ehilo na aka ata, ɛ zhɛ a shapa bụtụ bu ko, a ganga bụtụ bi yebi.

⁴¹Eyikwo eyebi zhɛ na naka inɛkɛ ni izhɛrɛ, ɛ zhɛ a shapa bu ko, a ganga bụ na bi yebi.

⁴²Ibɛ po no shiyono ma eshe, iwɛnɛ te ehi mepi shi ụjita na Agwangwama hiŋ zhɛ a zhajɛ.

⁴³Hi mepi du maa yaa shɛ agwuma-ihwɛ ge mepi aka na to buzundo be ci ni ihwɛ ibwɛ, bi gɛ zhɛ no shiyono eshe. Bu ga zha shɛ bo lono maa buzundo bwoji ukpa ubwa maa tono nu umwono ubwa o.

⁴⁴Iwɛ ecilo ata, ahiɛba du na mama ima ma, iwɛnɛ ti Yɛu Bụtụ ye ci na auwa na ehi heŋshi shi.

⁴⁵Gaaba shɛ yɛu-ugondu itɛcara nɛ kaa incɛ, inɛɛ nɛ agwuma-ihwɛ ibwɛ njɛ bụ uhiu wa atwa ihwɛ ibwɛ kpaaŋ, maa bu na pana aŋ iyimɛyɛ ya aba, na aka na teni cɛɛŋ?

⁴⁶Yɛu-ugondu nɛ agwuma-ihwɛ ibwɛ zhɛ o jitono tu baa nda gana ata zhɛ ye gwoje.

⁴⁷Iwɛ-tɛkana Omo hi mbiso maa, bi zhɛ bo sugo i'wɛŋnɛ ibwɛ kpaaŋ, bo utogono yɛu ɛtɛ ugondu.

⁴⁸Ama yaa shɛ yɛu ɛtɛ ugondu i tisashɛ hiɛŋ na amɛ ubwa, Agwuma-ihwɛ mi ta kpayawụ sụ ujiyo.

⁴⁹Nazhɛ bee kwuni miaụŋ-mu-ugondu mụ vwɛ ijibi, baa ya, baa swa ne eswegeni.

⁵⁰Agwuma-ihwɛ yɛu ɛtɛ ugondu zhɛ e jiye nụ ụjita na bee ge heŋshi shi, keeni na auwa na bee mepi shi.

⁵¹Bi zhɛ ba jaja bụ na ashashɛ,[54] bɛɛ zhɛ bo shilono bu urobwo ubwa na atwa na a nda iyi tɛnda-te-eshe. Apata u'wo-tutwa keeni ene tiya zhɛ a nama.