Read bassa MATIU 28 Bible Online

MATIU 28 - bassa bible

MATIU 28

¹Aka na tụ Ụjita-ụhinjanụ keshici, iyi heri nụ ụjita ulade, nu uvwungwa dididi, ge Meri biyikwo ata bu Magdala, ne Meri yebi zhe maa ɛ kwubɛ u'uye ata.

²Aa kwụbɛ ta cɛnjɛ to zhingotu duwa duwa, iwɛnɛ ta butumwa ba Agwangwama banɛ na azuba, bee kezhe. Baa zhajɛ bee jirinjii utayɛ ata beye, baa jɛjɛ nu bwa.

³Ụsụbwa ubwa ụ shɛ gana ɛbɛrɛ, tugwuno tu bwa tɛ cɛnjɛmɛ paawụụ.

⁴Inyɛsɛ ibwɛ shɛ angbaracɛ ebe u'uye, aa zhɛgɛda, ee tilegeni gana atwa na 'wegeni.

⁵Ama butumwa ata ba azuba hiɛŋ eyikwo ata, Ahiɛba eyikwo ga, ta nda ma inyɛsɛ o. M mepi maa hia jalakaka Jisus ata ee tegeni nrɛ nụ ụ'wụ'wụ-batanɛ.

⁶Bu zasaba ya epe o, bi hiwa gana ata tu baa dumwa la. Zhajɛ ma hiɛ kwụbɛ ofwo na ee ge wecicinji bu.[62]

⁷Zhaga ma kakayɛ maa hi mbishe eseshi-iyi ubwa maa, Bi hiwa no tu'wo, bi zhɛ mo hi hwulono ba zha Galili. Apata ɛhi zhɛ hia kwụba bụ. Zhaga ma, N hi mbiswo ya.

⁸Ee beni ga no olugwo u'uye ata kakayɛ, ni inyɛsɛ keeni unyasa ụ'wụtụ, ee gezhiji, ee mbishe eseshi-iyi ubwa.

⁹Eshigiri, ge Jisus twa na aba, tɛ ɛ zhɛ, bɛɛ hiɛŋ aŋ, Okwu ma yoo! Aa zhajɛ pu bwa, aa 'imɛ ɛvwɛvwɛjɛ ubwa dimi, aa zhɛbɛ bụ.

¹⁰Nazhɛ ge Jisus hiɛŋ aŋ, Ta nda ma inyɛsɛ o. Zhaga mbishe ma miaụŋ-mo-bino mi maa ga zhajɛ Galili, apata ɛɛ zhɛ ma n kwụba.

¹¹Aka na te eyikwo ata hwuri, nazhɛ umeseyi uko na ashashɛ angbaracɛ ata, teni nụ ụshɛpwụ ata ụ'wụtụ, ee mbishi ehiu onongbo unabarɛ iyi nɛ tenenji kpaaŋ.

¹²Ibɛ po aa ụlwatagwụ tu n-nyarɛ, aka na ta a njɛ ushaura, ee peni asaza ukwuribi duwa,

¹³ɛɛ hiɛŋ aŋ, Na duma ma maa eseshi-iyi ubwa aba zhajɛ nụ ụjita, ee zunji ru'wo ru bwa, aka na oto woto malabụ.

¹⁴Yaa shɛ iwɛ gɛ teni ugwomina na acɛbɛ, amɛ ubwa zhɛ o lomo no tu, ibɛ du zhɛ ya nda maa kede ohwulu ihi herikeni ya o.

¹⁵Ee leshiji ukwuribi, aa njɛ ga gana ata ee mbishi aŋ. Unabarɛ iwɛ ɛtɛ kaa mburusonu na ashashɛ Eju uuwa i ci taa hwayɛ.

¹⁶Nazhɛ eseshi-iyi umpwa-nu-boo-ko zhe Galili, no ofwo ishɛmɛ ɛtɛ ge Jisus peni aŋ la unu.

¹⁷Aka na ta a kwụbɛ bụ, aa mama 'wɛŋ na cɛnjɛ, nɛ ɛvwɛvwɛjɛ ubwa. Ama atwa oko na ashashɛ aba, a ta 'yajɛ waa oruwo.

¹⁸Ge Jisus zhajɛ, bɛɛ hiɛŋ aŋ, E m peni ya ụhwada we elele na namɛ na azuba keeni unaa na namɛ nu unyizo.

¹⁹Ibɛ po zhaga ma, nda ma edenji kpaaŋ eseshi-iyi. Nda aŋ ma ubaptizim, ni izeci Bishi, ni inɛ Yɛu keeni inɛ Mpiala mi Tijilo.

²⁰No mbisogono aŋ ma iyi elele nɛ Ngee hi peni-unu ibɛ. Hioko ma, N namɛ ne hiŋ tutu ukwunanga sara ga.