Read bassa MAK 14 Bible Online

MAK 14 - bassa bible

MAK 14

¹Tɛ ɛ hiɛŋ Isene Tɛkashɛka keeni Isene iyimɛyɛ nɛ zasa Ifucingɛ vwɛ waŋnabeyiko. Ibɛ po ehiu onongbo ne Embisegeni Undwa, a jalakaka gana na maa a 'imɛ Jisus ni inswɛ maa a kwụnɛ bụ.

²Ama ɛ hiɛŋ, Kede i shɛ na aka Isene ɛtɛ i Tɛkashɛka o, iwɛ aka na atwamwa zhɛ na nda rundu.

³Aka na ti ge Jisus namɛ ni Bɛtani nu umwono Saimon ata ba gwuma ụngwụ-uwaŋna. Ge Jisus jɛjɛ baa ya iyimɛyɛ. Biyikwo bu ko 'waŋnɛ manɛbɛ mụ ụhiụŋ mu na aa njɛ ni iyi nɛ ɛɛ hiɛŋ unadu tugom ni ikeke ike nɛ ɛɛ hiɛŋ alabasta, manɛbɛ ma ata kaa mi zhanjɛ tebiye. Biyikwo ata bweji iŋ bee dudugeni mu Jisus nu uhiuhiu.

⁴Ama atwa oko namba apata yaa gwumanɛ, ɛɛ hiɛŋ, Iwembe po aa njɛ manɛbɛ mu ga mụ ụhiụŋ ufwu gadagaa?

⁵E ge eri a sanga manɛbɛ mu ga uhwuri apamu umpwa, maa e peni okofwo. Ibɛ po shɛmɛ sha aba shɛ hashɛganụ ne biyikwo ata.

⁶Ama ge Jisus jishijɛ aŋ, bɛɛ hiɛŋ, Ganga bu ma. Iwembe po ahia dumangana bụ n-ndumwa mụ wɛɛ? Bu n ndwanua ugondu ubiye.

⁷Okofwo zhɛ a nama ne hiŋ aka elele, aka elele yaa hiɛ kwụlanɛ hi eri hia nda aŋ uwebiye, ama N zha shɛ ma nama ne hiŋ aka elele o.

⁸Bu nduwa iyi nɛ bee eri tɛnda. Bu dudugeni tu'waba ti mi manɛbɛ mu ga mụ ụhiụŋ ubiye maa imanga tụ iwɛ ụjita tuno ti mi.

⁹Iwɛ-tɛkana Omo hi mbiso maa, ofwo elele na aa ananga hwuŋ Anabarɛ Ebiye nu unyizo kpaaŋ, ɛ zhɛ a dumanana iyi nɛ biyikwo ga njɛ iwɛ maa e ne teyinje bu.

¹⁰Nazhɛ go Judas Iskariot na shɛ bụtụ bu ko na ashashɛ eseshi-iyi umpwa-na-ba-eyebi zhe no ofwo ehiu onongbo iwɛ maa sangana aŋ Jisus ne tidere.

¹¹Aka na te ehiu ata onongbo hwụjɛ iŋ, aa njɛ unyasa, ibɛ po ee shileni bu unu maa ɛ zhɛ a pana bụ ukwuribi. Nazhɛ baa jalakaka ya ohwolu maa sangana bu aŋ ne tidere.

¹²Aka na tụ ụjita na maa e kwuni Iyimɛyɛ uzawa Ifucingɛ tiya u ci, aka na ta a kwụnɛ iyi ụrụpɛ Isene Tɛkashɛka. Nazhɛ eseshi-iyi Jisus heŋteni bu, ɛɛ hiɛŋ, Cee ubu kwụlanɛ maa ta zha ta bu imangana iyimɛyɛ Tɛkashɛka nɛ ɛbi zhɛ ba yaa?

¹³Na aka ata ge Jisus tumwanɛ eseshi-iyi ubwa eyebi utumwa, bɛɛ hiɛŋ aŋ, Zhaga ma nụ ụshɛpwụ ga, hi zhɛ hia twa ne butubwenyi bu ko na 'waŋnɛ ihiulwe meni.

¹⁴'Wa bu ma no ofwo elele na bee teni, maa hi heŋteni agwuma-ihwɛ ɛtɛ maa, Bimbisegeni hiɛŋ, Cee umwono wa agaiŋ namɛ maa ma ya iyimɛyɛ Tɛkashɛka ne eseshi-iyi mii?

¹⁵Nazhɛ bụtụ ata zhɛ mo hi mbisono umwono wa azuba na gembi, na iyi ya ajɛjɛ tulonowoŋ, unaa na kaa du aa imwangwa i'wɛŋnɛ. Apata ɛhi zhɛ hi ma ti imangana iyimɛyɛ ɛtɛ Tɛkashɛka.

¹⁶Ibɛ po eseshi-iyi ubwa beni ga ee zhe nụ ụshɛpwụ, ee jiteni ga iyi gana na ti ge Jisus ge mbishi aŋ. Apata aa imanganɛ aŋ iyimɛyɛ Tɛkashɛka.

¹⁷Aka na tụ ụrụmɛ shɛ, ge Jisus zhe apata ne eseshi-iyi ubwa umpwa-na-ba-eyebi.

¹⁸Aka na ta a jɛjɛ aa ya iyimɛyɛ, ge Jisus hiɛŋ aŋ, Iwɛ-tɛkana Omo hi mbiso maa, bụtụ bu ko namba na ashashɛ hiŋ na zhɛ ma n sangana atwa ne tidere, ubwa shɛ bụtụ na ba ya iyimɛyɛ ne mi.

¹⁹Ibɛ po shɛmɛ sha aba shi kwuni tuhashɛganụ, ee heŋteni bu atwa oko oko, ɛɛ hiɛŋ, Gamba suu? Bụtụ ye bɛ hiɛŋ, Gamba suu?

²⁰Nazhɛ ge Jisus jishijɛ aŋ, bɛɛ hiɛŋ, Bụtụ bu ko na ashashɛ eseshi-iyi umpwa-na-ba-eyebi na ba kalanga u'ala ne mi ni ikwede.

²¹Yɛu Bụtụ zhɛ ya zhaga tilɛɛ gana na to o 'nyotwo iwɛ ubwa. Ama bụtụ ata na zhɛ ba sangana atwa Yɛu Bụtụ ne tidere, bi zhɛ ba nda hwuŋ adangboo! I gɛ zhɛ ya zhɛmana bụtụ ata ta atwa ubwa ge meci shi bu.

²²Aka na ta a jɛjɛ aa ya iyimɛyɛ, ge Jisus shepi ibrɛd, baa tabwa Agwatana maa pana iŋ uwebiye, boo dwonu iŋ, bee peni eseshi-iyi ubwa, bɛɛ hiɛŋ aŋ, M ma ma, inɛ gɛ shɛ tu'waba ti mi.

²³Nazhɛ bee shepi ukwopi baa njɛ ugwoje na Agwatana, bee peni aŋ; ee swe kpaaŋ aba.

²⁴Ge Jisus hiɛŋ aŋ, Inɛ gɛ shɛ mehieŋ mi mi mu Unu-tutwa,[53]

²⁵Iwɛ-tɛkana Omo hi mbiso maa, N zha shɛ ma swa ya meni mu ga mụ tụ'walụ ta afwafwa uuwa i ci ụjita na Ngɛɛ zhɛ ma swa mu na mu ufwo na Cɛnjɛ-ta-tugwama ta Agwatana o.

²⁶Aka na ta a zụnjɛ azunga, ee beni ee zhe ni Ishɛmɛ Buta.

²⁷Ge Jisus hiɛŋ aŋ, ɛ zhɛ ma hi nda ukwurishi kpaaŋ hiŋ iwe mi. Iwɛnɛ to o 'nywotwo, ɛɛ hiɛŋ, N zhɛ mo dubo bi'iywa-ba-agwụdụ, nazhɛ agwụdụ zhɛ a garatgwụ.

²⁸Ama na aba na tɛ ɛ n hicinjɛ, N zhɛ mo hi hwulono maa ma zha na cɛnjɛ tu Galili.

²⁹Ama ga Pita hiɛŋ Jisus, Okwo ɛɛ zhɛ a nda atwa vwɛ ukwurishi iwɛ bụ, a zha shɛ ma n nda ukwurishi iwɛ bụ kwukwuŋ.

³⁰Ge Jisus hiɛŋ Pita, Iwɛ-tɛkana Ngɛɛ zhɛ mo bu mbiso maa, Alụma zha shɛ a ugana hwayɛ kpalụ yebi, tɛ ɛbi zhɛ ba tala ashamanjɛ mi kpalụ tatụ maa bu m mepi shi o.

³¹Ama ga Pita jɛmɛ n-ndumwa ni ikɛnyi, bɛɛ hiɛŋ, Okwo yaa shɛ tilɛɛ maa Mo 'wo na bụ, N zha shɛ ma tala ashamanjɛ maa M bu mepi shi o. Gobwonu du atwa vwɛ dumanjɛ ya kpaaŋ aba.

³²Ee zhe no ofwo oko na ɛɛ hiɛŋ izeci ya aba, Gɛsɛmani, apata ge Jisus hiɛŋ eseshi-iyi ubwa, Gɛga ma epe tugwo, maa Ma zha ma nda adua.

³³Bee shepi Pita, ne Jemis keeni Jon, aa sanɛ nu bwa. Igɛhi kwuni bu ti'ima, ụbaụta sepi bu duwa.

³⁴Bɛɛ hiɛŋ aŋ, Amɛ mi hashɛganụ duwa, okwo tutu i ci tu'wo. Nama ma epe maa hi n 'yaka.[54]

³⁵Bee keeni izhɛ fwalaa, bee leyi na cɛnjɛ, baa njɛ adua, maa yaa shɛ yee ge deuri maa ga aka ata keshici bu.

³⁶Baa njɛ adua, bɛɛ hiɛŋ, Ada[55] iyi elele ibu deuleni tɛnda. Shapa ukwopi ga ụbaụta no olugwo mi, ama shɛ ukwulana mu Ama jala o, semi ukwulana bụ.

³⁷Bee gwure bee jiteni eseshi-iyi ubwa to o woto malabụ, bɛɛ hiɛŋ Pita, A-Saimon, bo woto suu malabụ? Bi eri shi suu ba nda ashɛlatụ okwo na aka ticwɛŋ?

³⁸Bɛɛ hiɛŋ aŋ, Na nda ma ashɛlatụ, maa hi na nda adua, iwɛ maa kede tumanga ti hi lasụ o. Mpiala mi leni gom, ama tu'waba tu lweji.

³⁹Bee gwuri baa njɛ adua, baa dumananɛ iwebe ike ike.

⁴⁰Bee gwuleneni no ofwo eseshi-iyi ubwa, bee jiteneni aŋ to o woto malabụ, iwɛnɛ te shishe sha aba shi zhinengeni na malabụ, e mepi shi iyi nɛ maa ɛ jishijɛ bụ o.

⁴¹Nazhɛ bee gwuleneni na aka ụtatụ, bɛɛ hiɛŋ aŋ, Hi to woto suu malabụ keeni ụhinjanụ tuta? Inɛ ɛtɛ gwumwa ya, aka ci ya! Hioko ma, o shopwo Yɛu Bụtụ oo pwonuo atwa-iwɛwɛ.

⁴²Ishijɛ ma tu hwuri ma. Bụtụ na ma n sangana atwa ne tidere, bu gwumwonu ya.

⁴³Gunu ata ti ge Jisus ta duma iwɛ ɛtɛ, go Judas na shɛ bụtụ bu ko na ashashɛ eseshi-iyi umpwa-na-ba-eyebi pushe, baa zhagajɛ na atwa ofwugwo a na 'wananjɛ otokwobi ne shekwute, ta a banɛ no olugwo ehiu onongbo, ne embesegeni Undwa keeni n-nyarɛ.

⁴⁴Bụtụ na sengeni bu atwa ne tidere pwonuo atwa ata tusakana, bɛɛ hiɛŋ aŋ, Bụtụ be elele na Ngaa ruwanɛ hwayɛ, asha ubwa atata, ima bu ma hi hwuri.

⁴⁵Aka na tu go Judas ci apata, bee hwuri pi Jisus mbwụụ, bɛɛ hiɛŋ bụ, E-Bimbisegeni! Baa ruwanɛ bụ.

⁴⁶Nazhɛ atwa ata gbodongonu Jisus, aa 'imɛ bụ.

⁴⁷Ama bụtụ bu ko na ashashɛ atwa Jisus na shikekeni apata, hwucice utokwobi ubwa, boo po bujama bo Bunongbo bụ 'wụtụ, bee vweri bu ụcɛbɛ.

⁴⁸Nazhɛ ge Jisus hiɛŋ aŋ, Hi bananjɛ suu ahi 'wananjɛ otokwobi, ne shekwute maa hi n 'imɛ gana bɛshɛrɛ?

⁴⁹N namɛ ne hiŋ nu Umwono wa Agwatana iyi-heri iyi-heri Omo mbisogono atwamwa iyi, hi n 'imɛ shɛ kaa o. Ama inɛ gɛ shɛ iwɛ maa iyi nɛ 'nywotwo nu utakada Iwɛ ya Agwatana sɛ.

⁵⁰Nazhɛ eseshi-iyi ubwa genji bu kpaaŋ aba ee gezhiji.

⁵¹Ama usemberi uko namba ga 'wa Jisus, na ge urigeni tugwuno ti ilinɛn kiri, ibɛ atwa ata 'imɛ bụ.

⁵²Bee gengeni aŋ tugwuno ta ata ti ilinɛn, bee gezhiji mohondo bee hwuri.

⁵³Nazhɛ ee zeriji Jisus po Bunongbo bụ 'wụtụ. Ehiu onongbo, tu n-nyarɛ, keeni embisegeni Undwa ụlwatagawa apata kpaaŋ aba.

⁵⁴Ga Pita 'wa Jisus ne ekwunyi, na ahanga na dụlụmɛ, bee teni nu ukpogwu Bunongbo ata bụ 'wụtụ, baa jɛjɛ ne edegeri baa hwatụ ulwa.

⁵⁵Ehiu onongbo, ta ajɛmɛ-ụshɛrɛya kpaaŋ aba, a jalakaka eseyida iwɛ Jisus iwɛ maa a kwụnɛ bụ, ama e gwushiji shi kaa.

⁵⁶Okwo ta atwa ofwugwo dumanganɛ Jisus tiseyida tu tukata, tiseyida ta aba kaa tu za unu uko.

⁵⁷Atwa oko ishijɛ ee shikeni aa dumanganɛ bu tiseyida tu tukata ɛɛ hiɛŋ,

⁵⁸Tụ hwụjɛ ti bɛɛ hiɛŋ, N zhɛ mo hwuŋzo Umwono ga wa Agwatana oo mo ni i'ɛlɛ, maa Ma ma unaa na ee me shi ni i'ɛlɛ ijitɛ itɛtu.

⁵⁹Ama okwo ti yaa shɛ gana ata tiseyida ta aba kaa tu za unu uko waa.

⁶⁰Nazhɛ Bunongbo bụ 'wụtụ ishijɛ bee shikeni na ashashɛ, bee heŋteni Jisus, bɛɛ hiɛŋ, Bɛ jishɛjɛ shɛ ree iwɛ ye elele, asha bụ hwụjɛ shɛ ree tiseyida tu ga atwa ga ma bu dumangana?

⁶¹Ama ge Jisus sumenji bu, bɛ jɛshɛjɛ shɛ bụ iwɛ ye elele o. Ibɛ po Bunongbo ata bụ 'wụtụ unseni sasana Jisus, bɛɛ hiɛŋ bụ, Gabụ suu bɛ shɛ ga Krast, yɛu ɛtɛ ya Agwatana nɛ oo zhemonjino?

⁶²Ge Jisus jishijɛ bụ, bɛɛ hiɛŋ, Gamba ganana. Hi zhɛ hia kwụba ti Yɛu Bụtụ jɛjɛ nu u'ala ubiye ukpahiŋ ụ'wụtụ, ti bee ci no odomu azuba.

⁶³Ibɛ po Bunongbo ata bụ 'wụtụ dwetweji tugwuno tu bwa, bɛɛ hiɛŋ, Ukekeshi tiseyida ti imbe to tu too?

⁶⁴Hi hwugwa tu baa dumanganɛ Agwatana n-ndumwa mụ wɛ nu unu ubwa. Inɛ nɛ ahiɛ kwụbɛɛ? Nazhɛ kpaaŋ aba peni Jisus n-ndumwa-tụwụma maa bu lanɛ no tu'wo.

⁶⁵Nazhɛ atwa oko kwuni Jisus mecemi tuzwogono, ee urigeni bu iyi ne eshe, aa tagana bu okwu, ɛɛ hiɛŋ bụ, Duma tigesere! Edegeri shepi bu aa pagana bụ awaŋpɛ.

⁶⁶Ti ga Pita namɛ nu ukpogwu, yɛu ike nɛ namɛ na ashashɛ miaụŋ-mu-ugondu showo sho Bunongbo bụ 'wụtụ zhajɛ.

⁶⁷Aka na tu baa kwụbɛ Pita tu baa hwatụ ulwa, baa ngbaracɛ Pita, bɛɛ hiɛŋ bụ, Bu namɛ du ne Jisus, bụtụ ga bu Nazarɛt.

⁶⁸Ama ga Pita teri ashamanjɛ, bɛɛ hiɛŋ bụ, M mepi shi o, N eshiciji shi du kaa iwɛ nɛ aba njɛ o. Nazhɛ baa ishɛjɛ apata bee teni ni igɛsɛji, gunu ata alụma uganɛ.[56]

⁶⁹Nazhɛ Yɛu ɛtɛ towo kwụbananɛ bụ, bee kwuni atwa na shikekeni apata timbiso, bɛɛ hiɛŋ aŋ, Bụtụ ga shɛ bụtụ bu ko na ashashɛ aba.

⁷⁰Ama ga Pita teleneni ashamanjɛ. Ti yaa namɛ fwalaa, atwa na shikekeni apata hiɛŋ Pita, Iwɛ-tɛkana, bu namɛ ga na ashashɛ aba, bụtụ bu Galili gom abɛ shɛ.

⁷¹Ama ga Pita kwuni tutwa, na tuwa-tuta, bɛɛ hiɛŋ aŋ, Iwɛ-tɛkana Omo hi mbiso! Maa, M mepi shi bụtụ go ahia njɛ iwɛ ubwa o!

⁷²Gunu ata alụma yebi uganɛ sasana. Nazhɛ ga Pita teyinje n-ndumwa ma ata ge Jisus mbishi bu la, bɛɛ hiɛŋ, Alụma zha shɛ a ugana hwayɛ kpalụ yebi, tɛ ɛbi zhɛ ba tala ashamanjɛ mi kpalụ tatụ maa bu m mepi shi o. Aka na ti bee heŋshi iwɛ ɛtɛ, bee tileni nu u'wo gboo.