Read bassa MAK 15 Bible Online

MAK 15 - bassa bible

MAK 15

¹Gunu ata ehiu onongbo, nu n-nyarɛ, ne embisegeni Undwa, keeni ajɛmɛ-ụshɛrɛya njɛ ushaura nu uvwungwa dididi, ee umpi Jisus, ee shepi bu ee peni Pɛilat.

²Ga Pɛilat unseni Jisus, bɛɛ hiɛŋ, Gabụ suu bɛ shɛ Agwuma Eju? Ge Jisus jishijɛ bụ, bɛɛ hiɛŋ, Gabụ du bu dumwa iŋ ya.

³Nazhɛ ehiu onongbo petengeni Jisus ashɛrɛya ofwugwo.

⁴Ga Pɛilat unseni Jisus sasana, bɛɛ hiɛŋ, Bɛ jɛshɛjɛ shɛ ree iyi elele? Hioko iyi ifwugwo nɛ aa bu suyanɛ ụshɛrɛya iwɛ ibɛ.

⁵Ama ge Jisus jishɛjɛ shɛ bụ iyi elele o, ibɛ po yaa dama Pɛilat.

⁶Ga Pɛilat ba shana baa bacɛngana aŋ bụtụ bu ko na ashashɛ ajama umwono-tishi na aka Isene, ubwa shɛ bụtụ na atwa njɛ orogwu iwɛ ubwa.

⁷Ama bụtụ bu ko namba ee kepi nu umwono-tishi na atwa na bɛrɛ ujasa, aba shɛ atwa na kwụnɛ atwa nu ujasa ata.

⁸Nazhɛ atwa ofwugwo munji na agba Pɛilat, ee kwuni bu orogwu tɛnda maa ndana aŋ gana na tu ba shana ba ndana aŋ.

⁹Ga Pɛilat heŋteni aŋ, bɛɛ hiɛŋ, Ihiɛ kwụlanɛ suu maa ma hi bacɛnganɛ Agwuma Eju?

¹⁰Iwɛnɛ ti bee mepi maa ni isɛbwɛngwɛ ehiu onongbo shapɛ Jisus pu bwa.

¹¹Ama ehiu onongbo mbiseji atwa ofwugwo maa ga shɛ ga Barabas baa bacɛnganɛ aŋ.

¹²Ga Pɛilat heŋteni aŋ sasana, bɛɛ hiɛŋ, Imbe tuba ahia jala maa ma nda bụtụ ga ɛhi hiɛŋ Agwuma Ejuu?

¹³Atwa ata uganɛ sasana, ɛɛ hiɛŋ, Tagana bụ nrɛ nụ ụ'wụ'wụ-ubatanɛ.

¹⁴Ga Pɛilat heŋteni aŋ, bɛɛ hiɛŋ, Iwembe kwuŋ poo? Imbe kwuŋ shɛ iyi iwɛ nɛ baa njɛɛ? Ama atwa ata uganɛ sasana duwa, ɛɛ hiɛŋ, Tagana bụ nrɛ nụ ụ'wụ'wụ-ubatanɛ.

¹⁵Ama gana na tu ga Pɛilat ba jala maa ndana atwa ata iyi nɛ aa jala, ibɛ po bee becingeni aŋ Barabas. Ama bu kwuci Jisus nazhɛ bee shepi bu bee peni aŋ maa e tegeni bu nrɛ nụ ụ'wụ'wụ-ubatanɛ.

¹⁶Nazhɛ asaza zeriji Jisus nu ukpogwu uko na ɛɛ hiɛŋ izeci ubwa, Praitorion, aa suyaganɛ asaza kpaaŋ aa ụlwatagwụ apata.

¹⁷Nazhɛ ee urigeni Jisus utogwo uduhwa ushenje, ee pieci esepi adanya aa njɛ udara, ee peteni bu nu uhiuhiu.

¹⁸Ee kwuni bu a'walụ, ɛɛ hiɛŋ, Zaacɛ! Tumaka Agwuma Eju!

¹⁹Oo po bu bininjidegbe nu uhiuhiu, ee zwegeni bu mecemi, ee kwuzeni bu ni ivwunɛ ibwɛ.

²⁰Aka na te e hwuwi bu asada tɛnda hwɛɛ, ee ushiji bu utogwo ata uduhwa ushenje, nazhɛ ee urigeni bu ya utogwo ubwa. Ee becinji bu maa e shepi bu o to nu ubatanɛ.

²¹Nazhɛ asaza 'imɛ bụtụ bu ko na ɛɛ hiɛŋ izeci ibwɛ ga Saimon bụtụ bu Saren, na shɛ bishi Alikizanda no Rufos ti bɛɛ zhɛ ujiyo ehilo, maa 'waŋnana Jisus ụ'wụ'wụ-ubatanɛ ubwa.

²²Nazhɛ ee shepi Jisus no ofwo oko na ɛɛ hiɛŋ izeci ya aba, Golgota, (nɛ ecilo ibɛ shɛ ofwo ukokolo uhiuhiu).

²³Apata ee peni Jisus meni mụ tụ'walụ ta afwafwa mu na ee hiŋtetenji ni iyi nɛ ɛɛ hiɛŋ umuru, ama ge Jisus leshiji shi mu o.

²⁴Apata ee tegeni Jisus nrɛ nụ ụ'wụ'wụ-ubatanɛ, oo dwotwogonu tugwuno tu bwa ni icɛcɛ tu'waŋ maa e mepi iyi nɛ bụtụ bụtụ zhɛ ba 'yaga.

²⁵I shɛ gana aka ogogo ecinjishi nu usaka ibɛ ee tegeni Jisus nrɛ nụ ụ'wuụ'wụ-ubatanɛ ata.

²⁶Nazhɛ ee 'nyeci iyi nɛ ɛɛ hiɛŋ ge Jisus njɛ, ɛɛ hiɛŋ AGWUMA EJU.

²⁷E tegeni du ashɛrɛ eyebi nrɛ nu bwa, bu ko namɛ geri bu u'ala ubiye ubwa, bu na bi yebi namɛ geri bu u'ala ugwulwo ubwa.

²⁸[Inɛ ɛtɛ i shɛ iwɛ maa Iwɛ ya Agwatana i sɛ, inɛ hiɛŋ, A rɛcɛ bụ na atwa na bweji undwa.][57]

²⁹Atwa na a kashaka apata a dumangana du Jisus n-ndumwa mụ wɛ, oo zhingoto ohiuhiu aba, ɛɛ hiɛŋ, Iiŋ, gabụ ga bi hiɛŋ bi zhɛ bo hwuŋzo Umwano wa Agwatana maa meeneni uŋ ijitɛ itɛtu!

³⁰Kezhe nụ ụ'wụ'wụ-ubatanɛ ga, maa meme bicinji.

³¹Gobwonu du ehiu onongbo, ne embisegeni Undwa a nda Jisus asada, aa mama hiaŋnụ, Bibicinji ba anya atwa, na eri shi kaa momo bicingo.

³²Gabụ ga Krast, Agwuma Isrɛl, kezhe nụ ụ'wụ'wụ-ubatanɛ hwuwayɛ go maa ta kwụba maa ta bụ tɛtɛna-rishe. Atwa ata ee tegeni nrɛ nụ ụ'wụ'wụ-ubatanɛ nu bwa, twagajɛ bu du.

³³Aka na tu uwaŋna shikeci, tishi tu layɛ nu unyizo kpaaŋ, uuwa i ci geri bu uwaŋna tinyingana.

³⁴Aka na tu uwaŋna nyinganɛ, geri bo ogogo atatụ, ge Jisus uganɛ duuwa, bɛɛ hiɛŋ, Ilai, Ilai, lama sabakitani? (Ecilo ibɛ i shɛ, Agwatana mi, Agwatana mi, iwembe po ebi n jinecii?)

³⁵Aka na tu umeseyi uko na ashashɛ atwa na shikekeni apata hwụjɛ iŋ, ɛɛ hiɛŋ, Bwoonu ba suyana Elaija.

³⁶Ibɛ po bụtụ bu ko gezhiji, bee shepi ụhwụŋkwụŋ, bee shiyeni uŋ ne meni mụ tụ'walụ ta afwafwa mu na mi sembi, bee hwuŋteni uŋ nu usanga bininjidegbe, bee peni Jisus maa swa. Ɛɛ hiɛŋ, Ti zhɛ ta kwụba okwo ge Elaija zhɛ ba zhajɛ maa kezhicinje bu.

³⁷Ge Jisus uganɛ sasana duuwa, nazhɛ baa dwa ihwungwɛ.

³⁸Nazhɛ ibɛgɛlɛ yo odubo amɛ umwono wa Agwatana bagwụ te kwune ni ihiŋhiŋ tutu uvwi.

³⁹Aka na tu uhiu wa asaza dipi-yebi na shikeni apata kwụbɛ[58] ti ge Jisus dwa ihwungwɛ gana ga keeni iyi nɛ njɛ, bɛɛ hiɛŋ, Iwɛ-tɛkana, bụtụ ga shɛ ga Yɛu ya Agwatana!

⁴⁰Eyikwo oko namba apata a na ngbaracɛ Jisus taa dụlụ, ge Meri biyikwo bu Magdala, namba na aba, ti ge Meri bino ba ata Jemis ata gwumwa, no Josɛs keeni Salome,

⁴¹anaa na ga 'wa bụ a ndana bụ iyi aka na tu baa namɛ nu Galili, medenji eyikwo anya ofwugwo a na a zhagaga la nu bwa nu Jɛrusalɛm.

⁴²Aka na tụ ụrụmɛ shɛ, go Josɛf bụtụ ba Arimatia, na shɛ bụtụ bụ 'wụtụ na ashashɛ ajɛmɛ-ụshɛrɛya, na kaa du ba nda ashɛlatụ Cɛnjɛ-ta-tugwama ta Agwatana, zhajɛ. Baa njɛ eshe-hwoo bee zhe pu Pɛilat, baa lụpɛ bụ ru'wo ri Jisus.

⁴³Iwɛnɛ po ụjita ata ụ shɛ ụjita tumama imanga tɛ ɛ hiɛŋ Ụjita-ụhinjanụ vwɛ waŋna beyiko.

⁴⁴Yaa dama Pɛilat ti ge Jisus 'wi kakayɛ. Ibɛ po baa suyanɛ uhiu wa asaza dipi-yebi, bee unseni bu okwo ge Jisus uwo cebe.

⁴⁵Aka na tu uhiu wa asaza ata dipi-yebi mbishi bu maa ge Jisus uwo cebe, nazhɛ bee peni Josɛf ru'wo ri Jisus.

⁴⁶Go Josɛf so tugwuno ti ilinɛn, bee kezhicinje ru'wo ri Jisus, bee pipi ru no tugwuno ta ata ti ilinɛn, bee wecicinji ru nu u'uye na ee hini nu utayɛ uko ụ'wụtụ. Nazhɛ bee jirenji utayɛ uko ụ'wụtụ, bee ubi unu u'uye ata.

⁴⁷Ge Meri biyikwo ata bu Magdala, ne Meri bino Josɛs kwụbɛ kaa ofwo ata ee ni Jisus.