Read bassa MAK 5 Bible Online

MAK 5 - bassa bible

MAK 5

¹Aka na ti ge Jisus ne eseshi-iyi ubwa keshi hileniye itekwu ɛtɛ, ee teni cɛnjɛ ta atwa Gɛrasa.[15]

²Aka na ti ge Jisus banɛ nụ ụhaŋtụ, gunu ata bụtụ bu ko na mpiala mụ wɛ mu namɛ na amɛ ubwa banɛ nu u'uye baa twa nu bwa.

³Ne e'uye kiri bụtụ ata ba nama. Za bụtụ be elele na eri bo umpo bu, okwo ogbo e eri shi a ta bụ o.

⁴A shana aa ta bụ ashɛnjɛ no shigbo, ama bo dwotwogonu shigbo, baa dwatwaga ashɛnjɛ. Za bụtụ na 'yajɛ ukpahiŋ maa gɛgɛcɛnga bụ o.

⁵Aka elele ba nama ne e'uye, tu nshama, tụ ụjita tu uwaŋna. Bu na ugaga, bu na mama shɛlanga atayɛ.

⁶Aka na ta bụtụ ata kwụbɛ Jisus taa dụlụ, bee gezhiji bee kwuzeni bu.

⁷Baa uganɛ duwa, bɛɛ hiɛŋ Jisus, Imbe shɛ inee mi na bụ gabụ ge Jisus Yɛu ya Agwatana na Hwuri Kpaaaŋ? Ma bu tabwa ni izeci ya Agwatana, to mo mbisono ụbaụta duwa o.

⁸Bɛ jɛmɛ iwɛ gɛ, iwɛnɛ ti ge Jisus hiwaŋ mụ, Gabụ mpiala mụ wɛ, banɛ na amɛ bụtụ ga.

⁹Nazhɛ ge Jisus unseni mu,[16] bɛɛ hiɛŋ, Gana naa ɛɛ hiɛŋ izeci buu? Mɛɛ jishijɛ Jisus, mɛɛ hiɛŋ, Ɛ hiɛŋ izeci mi ti ga Lijon, iwɛnɛ te eti gembi ufwugwo.

¹⁰Nazhɛ mpiala ma ata mu tabwa Jisus maa kede bacɛnga mụ na cɛnjɛ ta ata o.

¹¹Nkomu mu ufwugwo mi tileni ne embi ishɛmɛ ike nɛ namɛ apata maa yaga.

¹²Nazhɛ mpiala ma ata mụ wɛ mu tabwa Jisus, mɛɛ hiɛŋ, Utu tumwanɛ ka maa to tono na shɛmɛ sho nkomu mu ga.

¹³Gunu ata ge Jisus leneni mu. Ibɛ po mpiala ma ata mụ wɛ mu bananjɛ mee tenenji na shɛmɛ sho nkomu ma ata. Nkomu ma ata kaa mi ci ugbaa uko, maa hwayɛgwa mee gezhiji, mee zwi nu ugbongboro, maa 'waŋ ni itekwu ɛtɛ, mee 'wi.

¹⁴Nazhɛ atwa na ga biga nkomu ma ata gezhiji ee zhe aa jɛmɛ iwɛ ɛtɛ nụ ụshɛpwụ ụ'wụtụ te shihilo. Ibɛ po atwamwa zhajɛ maa a kwụbɛ iyi nɛ teni.

¹⁵Aka na ta atwa ata zhajɛ pi Jisus, aa kwụbɛ bụtụ ata bo orizhonu na ga 'yajɛ la Lijon, tu baa jɛjɛ, bee urigeni tugwuno, baa namɛ fwaaŋ; nazhɛ inyɛsɛ shɛ aŋ.

¹⁶Ibɛ po atwa na kwụbɛ iwɛ ɛtɛ zhe ee mbishe atwamwa iyi nɛ teneni bụtụ ata bo orizhonu, ti iwɛ nkomu ma ata.

¹⁷Ibɛ po atwa cɛnjɛ ta ata kwuni Jisus tutabwa[17] maa ga bana na cɛnjɛ ta aba maa hwulo nyapadụ.

¹⁸Aka na ti ge Jisus teni nụ ụhaŋtụ, nazhɛ bụtụ ata ga 'yajɛ la mpiala mụ wɛ tabwa Jisus maa 'wa bụ.

¹⁹Ge Jisus leneni shi bu o, ama bi hiɛŋ bụ, Zhaga jiyo ni ihwɛ bu maa mbishi atwa bu iyi i'wɛtwɛ nɛ Agwangwama ubu ndanɛ, gana na bee hieci inyɛmɛnyɛmɛ bu.

²⁰Ibɛ po bụtụ ata sanɛ ga, bee kwuni iyi i'wɛtwɛ nɛ ge Jisus ndanɛ bụ tu'ananga ni Dikapolis.[18] Yaa dama atwa kpaaŋ.

²¹Aka na ti ge Jisus teni nụ ụhaŋtụ, bee keshi hileniye, ufwugwo ụ'wụtụ ụlwatagwụ sasana pu bwa tu baa namɛ nụ ụpalanụ itekwu ɛtɛ.

²²Nazhɛ bụtụ bu ko na ashashɛ ehiu umwono Tụ'ụlwatagwụ na ɛɛ hiɛŋ izeci ibwɛ, ga Jairos zhajɛ pi Jisus. Aka na tu baa kwụbɛ Jisus, bee leyi nɛ ɛvwɛvwɛjɛ ubwa.

²³Baa tabwa Jisus duwa, bɛɛ hiɛŋ bụ, Yɛu mi yo o nɛ ta gwumwa, zhɛ ba tu'wo. Sukwu sukwu, zhajɛ ka maa peteni bu i'ɛlɛ bu iwɛ maa zhɛmanana.

²⁴Ge Jisus sanɛ ga nu bwa. Ama atwa ofwugwo ụ'wụtụ 'wa Jisus aa hwụngwụlangana bụ.

²⁵Biyikwo bu ko namba ba bana mehieŋ shiywa umpwa-na-shɛba-shi-yebi.

²⁶Biyikwo ata nduwa ụbaụta duwa, baa njɛ i'wɛŋnɛ ibwɛ ye elele ufwu na awa-inibi ofwugwo. Ama ụngwụ ubwa kaa debeji shi o, ama wa wụmangwụ ga tụwụmangwụ.

²⁷Aka na te biyikwo ata hwụjɛ unabarɛ Jisus, baa zhajɛ na aba Jisus na ashashɛ ufwugwo ata, bee timengeni utogwo Jisus.

²⁸Iwɛnɛ ti bɛ; hiɛŋ, Okwo utogwo ubwa ubaba Ngee timengeni hwayɛ, N zhɛ ma zhɛmanana.

²⁹Gunu ata mehieŋ mu bwa mu na mu ga zhɛnga mu dwa, baa hwụjɛ kaa du na tu'waba tu bwa maa ụngwụ ubwa hwuwowu.

³⁰Gunu ata kaa du ge Jisus mepi maa ukpahiŋ beni na tu'waba tu bwa. Ge Jisus jishirijɛ na ashashɛ ufwugwo ata, bɛɛ hiɛŋ, Gaaba timengeni utogwo muu?

³¹Ibɛ po eseshi-iyi ubwa jishijɛ bụ, ɛɛ hiɛŋ, Bụ kwụbɛ yibwa ufwugwo ga ma bu hwụngwụlangana hŋ, ɛbi tɛ hiɛŋ waa maa, Gaaba n timengenii?

³²Ge Jisus ba mbiyangana maa kwụba bụtụ ata njɛ iŋ.

³³Ibɛ po biyikwo ata zhajɛ, baa zhɛgɛda, iwɛnɛ ti inyɛsɛ shɛ bụ, iwɛnɛ ti bee mepi iyi nɛ teneni bu. Baa zhajɛ, bee leyi nɛ ɛvwɛvwɛjɛ Jisus, bee mbishi Jisus iwɛ-tɛkana elele kpaaŋ.

³⁴Ge Jisus hiɛŋ bụ, Ɛ-yɛu mi yo o, rishe rụ bụ tɛtɛtana rụ bụ nɛnjɛ. Zhaga ya na amɛ-olom, bu zhɛmananɛ ụngwụ bụ.

³⁵Aka na ti ge Jisus ta duma iwɛ ɛtɛ, ibɛ atwa oko banɛ ni ihwɛ uhiu we ebe umwono Tụ'ụlwatagwụ aa zhajɛ, ɛɛ hiɛŋ bishi bi yɛu ye ebe ya gwuma, Yɛu bu uwo. Iwembe po abu ta zuga waa Bimbisegenii?

³⁶Ama ge Jisus 'wa sụ iwɛ nɛ atwa ata jɛmɛ o. Bɛɛ hiɛŋ uhiu ata umwono Tụ'ụlwatagwụ, Ta nda inyɛsɛ o, tɛtana yibwa rishe kiri.

³⁷Ama ge Jisus leni shi maa bụtụ be elele 'wa bu o, semi ga Pita, ne Jemis, na Jon yɛu-bino Jemis.

³⁸Aka na te e ci ihwɛ ɛtɛ, ge Jisus kwụbɛ ta atwamwa a nda ti'nyama, aa twagana-u'wo, aa ugagaga duwa.

³⁹Aka na ti ge Jisus teni nu umwono ata, bɛɛ hiɛŋ aŋ, Iwembe po ahia nda ti'nyama, ahia twagana-u'woo? Yɛu gɛ kaa 'wi shi, malabụ kwakwa boo woto.

⁴⁰Aa hiɛnjɛ bụ ilɛtu ya asada. Ama aka na ti ge Jisus unzhi aŋ kpaaŋ maa e beni no tupohondo, nazhɛ be zeriji bishi keeni bino bi yɛu ɛtɛ medenji atwa na ga namɛ nu bwa, bee teni no ofwo ata yɛu ɛtɛ namɛ.

⁴¹Nazhɛ ge Jisus imɛ yɛu ɛtɛ u'ala, bɛɛ hiɛŋ bụ, Talita koum,[19] (ecilo ibɛ shɛ, Ɛ-yɛu-yo-o nɛ ta gwumwa M bi hiɛŋ, Ishijɛ.)

⁴²Nazhɛ yɛu ɛtɛ yo o ishijɛ yee shikeni, yee kwuni du tahaŋnụ tizha. Iwɛnɛ ti yɛu ɛtɛ namwawaŋ shiywa umpwa-na-shɛba-shi-yebi te e meci bu. Gunu ata yaa dama atwa ata tebiye.

⁴³Ge Jisus tɛtaganɛ atwa ata unu tebiye maa kede e mbishi bụtụ be elele iwɛ ɛtɛ o. Nazhɛ bɛɛ hiɛŋ aŋ, Pana bu ma iyimɛyɛ maa ya.