Read bassa MAK 9 Bible Online

MAK 9 - bassa bible

MAK 9

¹Ge Jisus hiɛŋ aŋ, Iwɛ-tɛkana Omo hi mbiso maa, tu'wo ti zha shɛ to tumongono atwa oko na shikekeni epe kwukwuŋ nazhɛ a kwụbɛ Cɛnjɛ-ta-tugwama ta Agwatana ti te e ci nu ukpahiŋ.

²Na aba na ti ijitɛ icihiŋ keshici, ge Jisus zeriji Pita, ne Jemis, keeni Jon bee zhe ni ishɛmɛ ike i'wɛtwɛ, aba kiri bee suji. Bee sheyinji ya ne eshe aba nu gana na tu baa ga shɛ.

³I'wɛŋnɛ nɛ bee urigeni cɛnjɛmɛ paawụụ, yaa ta tebiye. I zasa bụtụ be elele na namɛ nu unyizo ga eri ba nda tugwuno maa tɛ cɛnjɛmɛ gana ata o.

⁴Nazhɛ eseshi-iyi ata atatụ kwụbɛ Elaija keeni Moses ta a banɛ aa njɛ n-ndumwa ne Jisus.

⁵Nazhɛ ga Pita hiɛŋ Jisus, E-Bimbisegeni,[31] itɛ zhɛmanɛ maa tu nama ma epe. Ba jala suu maa ta ta shidulo shɛ tatụ, maa uko ụ shɛ una bụ, uko ụ shɛ una Moses, maa uko ụ shɛ una Elaija?

⁶Iwɛnɛ ti ga Pita mepi shi ya iwɛ nɛ maa duma, iwɛnɛ ti inyɛsɛ shɛ bụ duwa.

⁷Nazhɛ udomu uko banɛ na azuba wee kezhe wee ubi aŋ, rụŋhwụŋ ru ko ru dumanɛ iwɛ nu udomu ata, rɛɛ hiɛŋ, Yɛu mi Omo lubo duwa na, na shɛlaga ma iwɛ ubwa.

⁸Aa mbiyanganɛ kakayɛ, a kwụbɛ shɛ ya binya bụtụ be elele na namɛ na aba o, semi ge Jisus bwooko.

⁹Aka na te e zwe ishɛmɛ ɛtɛ, ge Jisus tɛtaganɛ eseshi-iyi ubwa unu, bɛɛ hiɛŋ, To mbiso ma bụtụ be elele iyi nɛ ahiɛ kwụbɛ epe o, semi aka na ti Yɛu Bụtụ hiɛ hwuŋ no tu'wo.

¹⁰Ibɛ po eseshi-iyi ubwa untanganɛ iwɛ ɛtɛ oo momo hoŋtongonu, ɛɛ hiɛŋ, Imbe shɛ tihiɛ no tu'woo?

¹¹Ee unseni Jisus, ɛɛ hiɛŋ, Iwembe po embisegeni Undwa hiɛŋ maa ge Elaija shɛ ba zhajɛ tugwo hiiiŋ?

¹²Ge Jisus jishijɛ aŋ, bɛɛ hiɛŋ, Iiŋ, ge Elaija shɛ ba zhajɛ ga tugwo hiiŋ, iwɛ maa gwurocongo iyi elele no ogwungwu ibɛ. Ama iwembe tuba Iwɛ ya Agwatana hiɛŋ, I shɛ tilɛɛ maa Yɛu Bụtụ shɛ yo hioko ụbaụta duwa, maa a njɛ bụ gana ta bụtụ tɛgadagaa?

¹³Ama Mo hi mbiso maa ge Elaija zhogwo, aa nduwa bụ iyi nɛ kwụlanɛ aŋ gana na to o 'nywotwo iwɛ ubwa.

¹⁴Aka na ta atwa oko zhajɛ no ofwo eseshi-iyi Jisus, aa kwụbɛ tu ufwugwo ụ'wụtụ shɛnjɛ woo rungwutwonu aŋ, embisegeni Undwa a nda ashamanjɛ na aba.

¹⁵Gunu ata aka na ta atwamwa kwụbɛ Jisus, igɛhi 'imɛ aŋ, ee gezhiji ee zhe pu bwa aa 'walụ bụ.

¹⁶Ge Jisus unseni eseshi-iyi ubwa, bɛɛ hiɛŋ, Imbe bwa ihi shanɛ ashamanjɛ na atwa ataa?

¹⁷Nazhɛ bụtụ bu ko na namɛ na ashashɛ ufwugwo ata, jishijɛ bụ, bɛɛ hiɛŋ, N 'waŋnɛ yɛu mi ye eyi nɛ mpiala mụ wɛ mu namɛ na amɛ ubwa no ofwo bu, yɛu ɛtɛ eri shi ya dumana iwɛ o.

¹⁸Ofwo elele maa hwayɛgwa, ma pa bụ na cɛnjɛ. Unu ubwa no fwuno, bu na ya ene, bu na 'nya. Ngɛɛ hiɛŋ eseshi-iyi bu ge becinji mu, ama e eri shi o.

¹⁹Ge Jisus jishijɛ aŋ, bɛɛ hiɛŋ, Oo ahiɛba uwaŋnɛ ga zasa rishe-tɛtɛtana, ụkwụmbwụ umba Ngɛɛ zhɛ ma nama ne hiiŋ? Ụkwụmbwụ umba Ngɛɛ zhɛ ma ima-isɛbwɛ ne hiiŋ? Shapɛ ma yɛu ɛtɛ pi mi.

²⁰Aa shapɛ ga yɛu ɛtɛ pi Jisus. Aka na tu mpiala ma ata mụ wɛ mụ kwụbɛ Jisus, gunu ata mee keri yɛu ɛtɛ tigbici. Bee leyi na cɛnjɛ, boo jirongwu, unu ubwa wo fwuno.

²¹Ge Jisus heŋteni[32] bishi bi yɛu ɛtɛ, bɛɛ hiɛŋ, Taa aka naa ijɛ kwuni buu? Bishi bi yɛu ɛtɛ jishijɛ Jisus, bɛɛ hiɛŋ, Te kwuni taa na cɛnɛnɛ tu bwa.

²²Aka elele tu mpiala mu ga mụ wɛ mu hwayɛgwa, ma kala bụ nu ulwa, te meni, maa mụ kwụnɛ bụ. Ama yaa shɛ ebi eri ba nda iyi elele iwɛ ibɛ, asha hioko inyɛmɛnyɛmɛ tu maa utu sumanɛ-u'uno.

²³Ge Jisus hiɛŋ bụ, Yaa shɛ ebi eri! Iyi elele zana bụtụ na tɛtanɛ-rishe iwɛ tɛnda o.

²⁴Ibɛ po bishi bi yɛu ɛtɛ uganɛ[33] gunu ata, bɛɛ hiɛŋ, N tɛtanɛ-rishe. N sumanɛ-u'uno, okwo tu Ngaa zasa rishe-tɛtɛtana duwa.

²⁵Aka na ti ge Jisus kwụbɛ ta atwa ofwugwo e gezheji ee ci maa a ụlwatagwụ no ofwo aba, bee tezhigeni mpiala ma ata mụ wɛ, bɛɛ hiɛŋ mụ, Gabụ mpiala mi igwureni keeni mu na ma akwụrụ, M bu peni-unu, maa banɛ na amɛ ubwa, to tono ya na amɛ ubwa kwukwuŋ.

²⁶Nazhɛ mpiala ma ata mi keri yɛu ɛtɛ tigbici, maa uganɛ duwa, maa banɛ na amɛ ubwa. Ibɛ po yɛu ɛtɛ weci ya gana maa bu 'wi, ibɛ du atwamwa hiɛŋ, Bu 'wi.

²⁷Ama ge Jisus imɛ yɛu ɛtɛ u'ala, bɛɛ ishicinjɛ iŋ, nazhɛ yee shikeni.

²⁸Aka na ti ge Jisus teni nu umwono uko, nazhɛ eseshi-iyi ubwa unseni bu, ɛɛ hiɛŋ, Iwembe kwuŋ po eti eri shi ta bacɛnga mpiala ma ataa?

²⁹Ge Jisus jishijɛ aŋ, bɛɛ hiɛŋ, Mu na gana ga mi eri shi ma bana ni iyi elele o, semi na adua[34] kiri.

³⁰Ti ge Jisus ne eseshi-iyi ubwa beni apata, ee duri Galili. I namɛ kaa na amɛ ubwa maa kede bụtụ be elele mepi ofwo na aa namɛ o,

³¹iwɛnɛ tu boo mbisogono eseshi-iyi ubwa, bɛɛ hiɛŋ, Ɛ zhɛ a shapa Yɛu Bụtụ a pana atwamwa maa a kwụnɛ bụ, ama aka na ta a kwụnɛ bụ, na aba ijitɛ itɛtu, bi zhɛ bɛ hiɛ.

³²Ama eseshi-iyi ubwa eshiciji shi ijɛ boo mbisogono aŋ o, inyɛsɛ kaa shɛ aŋ maa e unseni bu.

³³Aka na te e ci Kapanaum, ee teni nu umwono uko, ge Jisus unseni eseshi-iyi ubwa, bɛɛ hiɛŋ, Ashamanjɛ imbe kwuŋ ahi ga nda nu uhwaŋnaa?

³⁴Ama eseshi-iyi ubwa sumenji bu, iwɛnɛ ta a ga nda ashamanjɛ nu uhwaŋna ata iwɛ bụtụ na hwuri binya tusara.

³⁵Ge Jisus jɛjɛ baa suyanɛ eseshi-iyi ata umpwa-na-ba-eyebi, bɛɛ hiɛŋ aŋ, Yaa shɛ yaa namɛ na amɛ bụtụ be elele na amɛ hiŋ maa sha iyɛri ya atwa vwɛ, asha ubwa zhɛ ba sha yɛu na atwa vwɛ hwɛɛ maa bu na ndana atwa vwɛ ugondu.

³⁶Baa shapɛ yɛu ike ticwɛŋ bee shikicinji iŋ na ashashɛ aba, baa untanganɛ yɛu ɛtɛ, bɛɛ hiɛŋ aŋ,

³⁷Bụtụ be elele na ba la yɛu ticwɛŋ gɛnɛ gɛ ni izeci mi, asha Gamba bee le. Bụtụ be elele na kaa n le, shɛ Gamba kiri bee le o, ama bi le du bụtụ na n tumwanɛ.

³⁸Ga Jon hiɛŋ Jisus, E-Bimbisegeni, tu kwụbɛ ta bụtụ bu ko ba bacɛnga atumwa-ibiri ni izeci bu, atu lakanɛ bụ iwɛnɛ baa tu 'wa sụ.

³⁹Ge Jisus hiɛŋ aŋ, Ta lakana bu ma o, iwɛnɛ ti yaa zasa bụtụ be elele na ba nda ugondu ụrụhwajɛ ni izeci mi na tɛ zhɛ na duma iwe mi iwɛ kakayɛ.

⁴⁰Bụtụ be elele na shɛ shɛ bụtụ-bi-i'ime tu, asha no tu baa namɛ.

⁴¹Bụtụ be elele na ihi peni okwo meni mo ohondo maa hi swe ni izeci mi iwɛnɛ ta ahiɛ shɛ atwa mi, iwɛ-tɛkana Omo hi mbiso maa, ule ubwa za ti'ina kwukwuŋ.

⁴²Ge Jisus hiɛŋ, Bụtụ be elele na zhɛ ba nda yɛu ike na ashashɛ miaụŋ mi ticwɛŋ cwɛŋ mu na mu n tɛtanɛ-rishe ukwurishi, asha i debeji maa o to bụtụ ata inɛnɛ ni i'ilu maa e keri bu ni itekwu.

⁴³Yaa shɛ u'ala bụ ma bu nda ukwurishi[35] Jaja uŋ. I bu zhɛmanɛ maa teni nu uraiŋ nu u'ala uko, uhwuri maa 'yaga i'ɛlɛ iyebi maa teni nu ukwokwo ulwa na 'weji shi;

⁴⁴[no ofwo na[36] ojumbulu aba 'wi shi okwo tu ulwa wa aba kaa 'weji shi].

⁴⁵Yaa shɛ kaa uvwuna bụ ma bu nda ukwurishi, jaja uŋ. I bu zhɛmanɛ maa teni nu uraiŋ nu uvwuna uko uhwuri maa 'yaga ivwunɛ iyebi maa e bu keri nu ukwokwo ulwa.

⁴⁶[No ofwo na ojumbulu aba 'wi shi, okwo tu ulwa wa aba kaa 'weji shi].

⁴⁷Yaa shɛ kaa rishe rụ bụ ru ma bu nda ukwurishi, asha vwa rụ kala. I bu zhɛmanɛ maa teni na Cɛnjɛ-ta-tugwama ta Agwatana ne rishe ru ko uhwuri maa 'yaga eshe eyebi maa e bi keri nu ukwokwo ulwa.

⁴⁸No ofwo na ojumbulu aba 'wi shi, okwo tu ulwa wa aba kaa 'weji shi.

⁴⁹Ulwa ụ shɛ gana manɛ mu na ɛɛ zhɛ o zwono bụtụ be elele gana na to o zwono iyi ụrụpɛ ye elele manɛ.

⁵⁰Manɛ mɛ shɛ iyi ibiye, ama yaa shɛ manɛ mu lacɛmɛ shɛ, imbe ɛɛ tɛ zhɛ o zwono mu maa mu lacɛmɛɛ? Na latuma ma na anya hiŋ gana manɛ, maa hi na 'yaga amɛ-olom na anya hiŋ du.