Read bassa LUK 10 Bible Online

LUK 10 - bassa bible

LUK 10

¹Na aba inɛ gɛ, ibɛ Agwangwama teri anya atwa dupu-nu-woshi-na-ba-eyebi,[28] (72) baa tumwanɛ aŋ utumwa atwa eyeyebi, nu umbe ubwa, nu ụshɛpwụ we elele keeni ofwo elele na baa jala maa hikokono.

²Bɛɛ hiɛŋ aŋ, Iyi tugwubo gembi ama anjɛ-ugondu twa sụ ufwugwo. Ibɛ po na tabwa ma Agwangwama iyi tugwubo maa bɛcinjɛ anjɛ-ugondu maa e zhe no ofwo tugwubo ta ata tu bwa.

³Zhaga ma! Gamba n hi tumwanɛ gana maa miaụŋ-ma-agwụdụ mu na aa tumwanɛ na ashashɛ ogwusu.

⁴Ta 'waŋna ma arɛta ukwuribi, okwo ulapa, okwo abida o, ta 'walụ ma kaa du bụtụ be elele nu uhwaŋna o.

⁵Ihwɛ ye elele ehi teni hiɛŋ ma tugwo, Ga amɛ-olom nama ni ihwɛ gɛ.

⁶Yaa shɛ bụtụ ba amɛ-lom namba ni ihwɛ ɛtɛ, asha a'walụ amɛ-olom hiŋ zhɛ a nama nu bwa, yaa shɛ kaa baa zasaba, asha ga a'walụ amɛ-olom hiŋ gwure pi hiŋ.

⁷Nama ma ni ihwɛ ɛtɛ, maa hiɛ yɛ, hi swe iyi elele nɛ ee hi peni apata, iwɛnɛ ta bɛnjɛ-bu-ugondu lanɛ maa a cɛpɛ bụ alubashɛ ubwa. Ta zhaga ma ni ihwɛ ihwɛ o.

⁸Ụshɛpwụ we elele ehi teni, ee hi le, iyimɛyɛ ye elele ee hi peni apata, ya ma.

⁹Nɛnga ma agwumashɛ elele namba apata, mbiso aŋ ma maa, Cɛnjɛ-ta-tugwama ta Agwatana tu gwumwonu pi hiŋ.

¹⁰Ama ụshɛpwụ we elele na ehi teni, ee hi le shi, bana ma hi zhe ne ekpekiti ubwa, hiɛŋ ma,

¹¹Okwo upwupwutu ụshɛpwụ hiŋ na shivwɛvwɛjɛ shi tu shi suje, ta wafwaga aŋ maa a shɛ gana iyi nɛ zhɛ ma hi la tiseyida tụ wɛ. Ama okwo ti yaa shɛ gana ata, mapa ma maa Cɛnjɛ-ta-tugwama ta Agwatana tu gwumwonu pi hiŋ.

¹²Mo hi mbiso maa i zhɛ yo dobogono hwuŋ Sụdụm nụ ụjita ụshɛrɛya uhwuri ụshɛpwụ ata.

¹³Ahiɛba atwa Korazin, hi zhɛ hia nda hwuŋ adangboo! Ahiɛba atwa Bɛtisaida, hi zhɛ hia nda hwuŋ adangboo! Yaa ga shɛ nu Taya keeni Saidụn aa njɛ ugondu na aa njɛ na ashashɛ hiŋ, asha a jɛshɛrugwa-shihaŋsa sha aba cala cala, oo urugwonuo tugwuno tụ ụcɛnjɛ tɛnda, aa na dula ma'alụ.[29]

¹⁴Ama i zhɛ yo dobogono hwuŋ atwa Taya keeni atwa Saidụn nụ ụjita ata ụshɛrɛya ihi hwuri.

¹⁵Ahiɛba atwa Kapanaum, ɛ zhɛ suu mo hi gombicingo na azuba? Ɛ zhɛ me hi zucinje hwuŋ kaa tutu ukwokwo ulwa.

¹⁶Bụtụ na ba hwulaga iwe hiŋ, ba hwulaga du iwe mi, bụtụ na kaa ba laka iwe hiŋ, asha ba laka du iwe mi, bụtụ na ma n laka, asha ba laka du bụtụ na n tumwanɛ.

¹⁷Ama atwa ata dupu-nu-woshi-na-ba-eyebi gwure nu unyasa, ɛɛ hiɛŋ, Agwangwama, okwo atumwa-ibiri du a hwụjɛ-unu tu ni izeci bu.

¹⁸Ge Jisus jishijɛ aŋ, bɛɛ hiɛŋ, N kwụbɛ Setan tu baa banɛ na azuba baa layɛ gana ubɛrɛ.

¹⁹Hioko ma, N hi peni ụhwada maa hi fwundacɛ egbezhi, na shina, tu ukpahiŋ bụtụ ata bi i'ime we elele, i zasa kaa iyi elele nɛ zhɛ ma hiɛ gwụcɛnga o.

²⁰Ama okwo ti yaa shɛ gana ata, ta nda ma unyasa iwɛnɛ ta mpiala mụ wɛ mu hwụjɛ-unu hiŋ o, ama na nda ma unyasa iwɛnɛ to o 'nywotwo nzeci mi hiŋ na azuba.

²¹Na aka ata ge Jisus njɛ unyasa na amɛ Mpiala mi Tijilo, bɛɛ hiɛŋ, Oo Bishi mi na shɛ Agwangwama azuba tu unyizo, N njɛ ugwoje bu, iwɛnɛ ebu sweci ijɛ iwɛ maa kede atwa ti'inta keeni atwa na eshiciji iyi eri iŋ tụkwụba o, ebi kepishingeni tuba atwa tukwakwa.[30] Eeba, Ada, gana yaa bu kwụlanɛ ta.

²²Ti ge Jisus jishirijɛ eshe geri be eseshi-iyi ubwa,[31] bɛɛ hiɛŋ, Bishi mi n utwogwonuo iyi elele ni i'ɛlɛ mi. Za bụtụ mepi bụtụ na Yɛu shɛ, semi Bishi, za kaa du bụtụ mepi bụtụ na Bishi shɛ, semi Yɛu, keeni bụtụ be elele na kwụlanɛ Yɛu maa kapɛshɛngana bụ bụtụ na Bishi shɛ.

²³Nazhɛ ge Jisus mbiyanɛ eseshi-iyi ubwa, bee mbishi aŋ swɛɛ, bɛɛ hiɛŋ, Atwa na a kwụba iyi nɛ ahia kwụba gwoje!

²⁴Mo hi mbiso maa, egesere ofwugwo keeni shɛgwuma, a ga jala maa a kwụbɛ iyi nɛ ahia kwụba, ama a kwụbɛ shɛ iŋ o, maa a hwụjɛ iyi nɛ ahia hwuga, a hwụjɛ iŋ o.

²⁵Ibɛ bụtụ bu ko bu Undwa zhajɛ bee menji Jisus, bee heŋteni bu, bɛɛ hiɛŋ, E-Bimbisegeni, imbe Ngɛɛ zhɛ ma nda maa ma 'yaga uraiŋ unyizo-nomm?

²⁶Ge Jisus jishijɛ bụ, bɛɛ hiɛŋ, Imbe ee 'nyeci nu Undwaa? Imbe tuba abɛ rɛcɛ apataa?

²⁷Bụtụ ata jishijɛ bụ, bɛɛ hiɛŋ, I hiɛŋ, Bɛ shɛ bo lubo Agwangwama na shɛ Agwatana bụ na amɛ bụ kpaaŋ, to ohwulu bu kpaaŋ, tu ukpahiŋ bụ kpaaŋ, ta ahaŋsa bụ kpaaŋ, bɛ shɛ du bo lubo uyebi bu gana na obu momo lubo.

²⁸Ge Jisus jishijɛ bụ, bɛɛ hiɛŋ, Ajɛshɛgwa bu teni cɛŋ, zhaga nda gana ata nazhɛ ɛbi zhɛ ba ya uraiŋ.

²⁹Ama gana na ta bụtụ ata ba jala maa mama pana n-ndumwa-zhɛ, bee heŋteni Jisus, bɛɛ hiɛŋ, Gaaba tuba shɛ uyebi muu?

³⁰Ge Jisus jishijɛ bụ, bɛɛ hiɛŋ, Bụtụ bu ko beni la nu Jɛrusalɛm, bɛɛ zhɛ Jɛriko, bee leyiteni ashɛrɛ nu uhwaŋna. Ashɛrɛ ata ushiji utogwo ubwa, ee jibi bu tebiye, ee weŋpeni ihwungwɛ cwɛŋ bana, nazhɛ ee genji bu ee hwuri.

³¹Ti ijɛ ɛtɛ teni gana ata, ibɛ bunongbo bu ko zhɛ tɛkashɛka nu uhwaŋna ata, baa kwụbɛ bụtụ ata, baa vwụrɛ nụ ụzalụ unya bee hwuri.

³²Gobwonu du aka na ta Bulivai bu ko zhajɛ bee ci apata, baa kwụbɛ bụ, baa vwụrɛ sasana nụ ụzalụ unya bee hwuri.

³³Ama ta Busamaria bu ko zhɛ tahaŋnụ, bee zhe bee ci apata, baa kwụbɛ bụtụ ata, ibɛ inyɛmɛnyɛmɛ ibwɛ shɛ bụ.

³⁴Bee zhe pu bwa, baa shananjɛ andala ata aa ga gwụcanjɛ bụ manɛbɛ ma buta keeni meni mụ tụ'walụ ta afwafwa, nazhɛ bee umpi andala ata. Bee shepi bu bee peteni na aba iyimabiga nɛ baa ga suka, bee shepi bu ni ihwɛ nɛ maa zokwu, baa ngbaracɛ bụ apata.

³⁵Ti iyi heri, bɛɛ vwɛ azụrụfa arinya eyebi bee peni agwuma-ihwɛ ɛtɛ oo go zokwu, bɛɛ hiɛŋ bụ, Ngbaraka ugwumashɛ ga. Ama yaa shɛ yaa ta 'yajɛ hwuŋ iyi elele nɛ abu ta njɛ ufwu uhwuri gana ga, aka na Ngee gwure, N zhɛ ma bu tụpa hwɛɛ.

³⁶Ge Jisus heŋteni bụtụ ebe bu Undwa, bɛɛ hiɛŋ bụ, Na ashashɛ atwa ga atatụ, gaaba ebi heŋshi maa ubwa shɛ uyebi bụtụ ata leyiteni ashɛrɛ?

³⁷Bụtụ ata jishijɛ bụ, bɛɛ hiɛŋ, Bụtụ ata kwụbɛ inyɛmɛnyɛmɛ ibwɛ. Ge Jisus hiɛŋ bụ, Zhaga nda du gana ata baa njɛ.

³⁸Gana na ata Jisus a zha tahaŋnụ ta aba, bee teni ụshɛpwụ uko, nazhɛ biyikwo bu ko na ɛɛ hiɛŋ izeci ibwɛ ga Mata 'imɛ bu ugaiŋ ni ihwɛ ibwɛ.

³⁹Ga Mata kaa 'yajɛ buhongwu na ɛɛ hiɛŋ izeci ibwɛ ge Meri, ubwa tuba jɛjɛ nu ukaka wa Agwangwama, baa shɛlaga imbisegeni ibwɛ.

⁴⁰Ama ahaŋsa Mata ci ụkpakwụ iwɛ iyi ifwugwo nɛ baa ndana aŋ. Ibɛ po baa zhajɛ, bɛɛ hiɛŋ Agwangwama, I bi te shi suu to buhongwu mi n genji Ama nda ugondu ga Ngooko? Mbiso bu maa gɛ ishijɛ maa mo mbiyono.

⁴¹Ama Agwangwama jishijɛ bụ, bɛɛ hiɛŋ, A-Mata, A-Mata! Amɛ bụ hashɛganụ iwɛ iyi ifwugwo nɛ aba nda.

⁴²Iyi ike gba kiri[32] kaa i to bụtụ ukekeshi. Ge Meri tolwo urobwo ubiye na aa zha shɛ a lashɛga bụ uŋ ya kwukwuŋ.