Read bassa LUK 13 Bible Online

LUK 13 - bassa bible

LUK 13

¹Atwa oko namba na aka ata mbishi Jisus iwɛ atwa Galili a na ga Pɛilat togotogwu mehieŋ ma aba na arụpɛ aba.

²Ge Jisus jishijɛ aŋ, bɛɛ hiɛŋ, Hi heŋshi suu maa atwa ata aba shɛ atwa-iwɛwɛ uhwuri atwa na vwɛ nu Galili kpaaŋ iwɛnɛ ta a njɛ aŋ ụbaụta gana ata?

³Mo hi mbiso maa, Awo! Ama yaa shɛ ahiɛ jɛshɛrɛjɛ shɛ shihaŋsa shi hiŋ, hi zhɛ du hia nda ufwu gana aba hwɛɛ hiŋ.

⁴Okwo hi heŋshi suu maa atwa umpwa-na-ba-atụndatụ a na ashɛkpa ata hwuŋzwo nu Silom 'imɛ aa kwụnɛ, aba shɛ atwa na tụwụma ta aba tu wumanjɛ uhwuri atwa elele na namɛ nu Jɛrusalɛm hwɛɛ?

⁵Mo hi mbiso maa, Awo! Ama yaa shɛ ahiɛ jɛshɛrɛjɛ shɛ shihaŋsa shi hiŋ, hi zhɛ du hia nda ufwu gana aba hwɛɛ hiŋ.

⁶Ge Jisus manganganɛ aŋ n-ndumwa mu ko, bɛɛ hiɛŋ, Bụtụ bu ko bɛrɛ la ụ'wụ'wụ uwowo ni itimɛ ibwɛ ya afwafwa. Bee zhe maa cwe tụ'walụ tu bwa, ama bu gwushiji shi okwo tu ko.

⁷Bụtụ ata hiɛŋ bungbaracɛ-bi-itimɛ ɛtɛ, Uywa ụtatụ na ya ta Ma zhajɛ maa mo two tụ'walụ tu uwowo ga, Ngee gwushiji shi okwo tu ko, jaja uŋ. Iwembe bwa po wɛɛ zhɛ wo ulono cɛnjɛ gbiii?

⁸Ama bungbaracɛ-bi-itimɛ ɛtɛ jishijɛ bụ, bɛɛ hiɛŋ, Iyɛri, ganga uŋ tugwo uuwa i ci unywanywa, N zhɛ mo hino ucilo ubwa uuwa mo rungwutwonu maa mo zwono uŋ ugwungwu.

⁹Nekeshi wa 'wala geri-be-eshe, ama yaa shɛ wee 'weri shi, nazhɛ ba jaja uŋ ya.

¹⁰Jitoo ko ti ge Jisus bo mbisogono atwa iyi nu umwono Tụ'ụlwatagwụ nụ Ụjita-ụhinjanụ.

¹¹Biyikwo bu ko namba apata na 'yajɛ mpiala mụ wɛ mu na mɛ njɛ bụ ikwuke, shiywa umpwa-na-shɛba-shɛ-tụndatụ. Bi eri shi kwukwuŋ bo shikono to.

¹²Aka na ti ge Jisus kwụbɛ biyikwo ata, baa suyanɛ bụ, bɛɛ hiɛŋ bụ, E-biyikwo ga, M bụ nɛnjɛ nụ ụngwụ bụ.

¹³Nazhɛ ge Jisus petengeni bu i'ɛlɛ. Gunu ata biyikwo ata shikeni to, bee kwuni Agwatana tɛshɛtana.

¹⁴Ibɛ po yaa gwumanɛ uhiu umwono ata Tụ'ụlwatagwụ, iwɛnɛ ti ge Jisus nɛnjɛ bụtụ nu Ụjita-ụhinjanụ. Bɛɛ hiɛŋ atwa ata, ijitɛ icihiŋ namba nɛ shɛ tilɛɛ maa atwa na nda ugondu, na zhajɛ ma na amɛ ijitɛ ɛtɛ icihiŋ maa a hiɛ nɛnjɛ, ama ta na zhajɛ ma nu Ụjita-ụhinjanụ o.

¹⁵Ama Agwangwama jishijɛ bụ, bɛɛ hiɛŋ, Ahiɛba atwa na a nda iyi tɛnda-te-eshe! I 'yajɛ suu bụtụ be elele na ashashɛ hiŋ na tufwurinji shi buna bu bwa, kwo kaa izhinyɛci ibwɛ no olugwo na oo zwono aŋ maa shapa bu no ofwo na meni mu namɛ maa swa nu Ụjita-ụhinjanụ?

¹⁶Biyikwo ga na shɛ yɛu Abraham, na ge Setan umpi shiywa umpwa-na-shɛba-shɛ-tụndatụ, i teni shi suu cɛŋ maa e tufwurinji bu nụ Ụjita-ụhinjanụ?

¹⁷Ama aka na ti ge Jisus jɛmɛ iwɛ ɛtɛ, ibɛ ezuye shɛ atwa elele na ga sukakanɛ bụ. Atwa ata kpaaŋ a nda unyasa iwɛ iyi ya arụhwajɛ elele nɛ ge Jisus njɛ.

¹⁸Nazhɛ ge Jisus hiɛŋ, Imbe Cɛnjɛ-ta-tugwama ta Agwatana tụ sụbɛɛ? Ni imbe Ngɛɛ zhɛ ma manga tụụ?

¹⁹Tụ sụbɛ bụzagwụ bu mustad bu ko na bụtụ bu ko shepi baa bɛrɛ ni itimɛ ibwɛ, aka na ti yɛɛ unshɛ yaa waŋnɛ, yaa shɛ ya ụ'wụ'wụ ụ'wụtụ, harɛ shanụnụ sha patangana ya na a'walụ ubwa.

²⁰Ge Jisus hiɛŋ sasana, Ni imbe Ngɛɛ zhɛ ma manga Cɛnjɛ-ta-tugwama ta Agwatanaa?

²¹Tụ sụbɛ Ifucingɛ nɛ biyikwo bu ko shepi bee sweci ni inɛmɛ yo omudu atatụ, uuwa i ci aka na yoo fwuno hwɛ hwɛɛ ibɛ.

²²Ge Jisus duleji ụshɛpwụ ụshɛpwụ, boo mbisogono aŋ iyi ti bɛɛ zhɛ Jɛrusalɛm.

²³Nazhɛ bụtụ bu ko heŋteni bu, bɛɛ hiɛŋ, Iyɛri, Atwa na zhɛ o bino twa sụ ofwugwo suu? Ge Jisus jishijɛ bụ, bɛɛ hiɛŋ,

²⁴Shana ma ikɛnyi maa hi teni no odubo ata tumwee, Mo hi mbiso maa, atwa ofwugwo ga jalakaka maa e teni, ama ikɛnyi ya aba zha shɛ yo to.

²⁵Aka na ta aguma-ihwɛ zhɛ ishijɛ bɛɛ zhɛ ba ta odubo ubwa, ɛhi zhɛ hio shikono no tupohondo hi na pa ukpa iyi, hiɛ hiɛŋ, Iyɛri, iti kepishingeni odubo. Ama bi zhɛ mɛ hi jishijɛ, bɛ hiɛŋ, M mepi shi olugwo na ahiɛ banɛ o.

²⁶Nazhɛ ɛhi zhɛ hio kwuno tihiɛŋ, Ta ya la, ata swa na bu, gabụ kaa bi mbisegeni la du atwa iyi na ashɛpwụ tu.

²⁷Ama bi zhɛ mɛ hi jishijɛ, bɛɛ hiɛŋ, Mo hi mbiso maa, M mepi shi olugwo na ahiɛ banɛ o. Ishɛga ma hi n genji, ahiɛba na hia nda ugondu ụwɛ.

²⁸U'wo-tutwa, ne ene tiya zhɛ wa nama apata. Na aka na ta ahiɛ kwụbɛ hwuŋ Abraham, na Azik, ne Jekob keeni egesere elele na Cɛnjɛ-ta-tugwama ta Agwatana, ɛ zhɛ ma hiɛ bacɛnga tuba no tupohondo ni ikɛnyi hiŋ.

²⁹Atwa zhɛ a bananjɛ nu uwaŋna-banụ, tu uwaŋna-twono, ta tuzuba keeni tuta, ɛɛ zhɛ a gɛgaga na Cɛnjɛ-ta-tugwama ta Agwatana

³⁰Hioko ma, atwa oko na shɛ la atwa ɛmɛwɛɛ, aba zhɛ a sha ya atwa ehiiŋ, nazhɛ atwa na shɛ la atwa ehiiŋ zhɛ a sha ya atwa ɛmɛwɛɛ.

³¹Na aka ata ibɛ atwa oko na ashashɛ Afarisi zhajɛ pi Jisus, ɛɛ hiɛŋ bụ, Bana epe, iwɛnɛ ti gɛ Hɛrod[43] ba jala maa ma bụ kwụna.

³²Ge Jisus jishijɛ aŋ, bɛɛ hiɛŋ, Zhaga mbiso ma inyenye ɛtɛ maa, N tɛ zhɛ ma bacɛnga atumwa-ibiri, Ngɛɛ tɛ zhɛ ma nda tɛnɛnjɛ hwayɛ ga keeni beyi, waŋna beyiko nazhɛ Ngɛɛ zhɛ mo hwuwo ugondu mu.

³³Ama i shɛ tilɛɛ maa N tɛ zhɛ ma ta tuhwulo ta tahaŋnụ ti mi hwayɛ ga keeni beyi tutu waŋna beyiko, iwɛnɛ ti yaa zasa ofwo elele na bigesere zhɛ ba nda ufwu no tupohondo tu Jɛrusalɛm.

³⁴Oo ahiɛba atwa Jɛrusalɛm, ahiɛba atwa Jɛrusalɛm, ahiɛba akwụnɛ egesere keeni etegeni atwa na aa hi tumwananɛ atayɛ. Kpalụ mba Ama jala la maa mo hi sotulonu pi mi, gana na tu unono wa hwakana oywoywo ubwa na apiɛmbɛ ubwa, ehi jeri shii?

³⁵Hioko, e hi jinokwonuo ihwɛ hiŋ gana osombo! Mo hi mbiso maa, hi zha shɛ hi ma n kwụba ya uuwa i ci aka na ɛhi zhɛ hiɛ hiɛŋ, Zhemonjino ma bụtụ ata be ci ne izeci ya Agwangwama!