Read bassa LUK 19 Bible Online

LUK 19 - bassa bible

LUK 19

¹Ti ge Jisus teni Jɛriko, ti bɛɛ zhɛ ba kashɛka ụshɛpwụ ata.

²Bụtụ bu ko namba ɛɛ hiɛŋ izeci ibwɛ ga Zakios. Bɛ shɛ uhiu we ele-ụdalụ, baa shɛ kaa bɛzhɛgba.

³Ba jalakaka maa kwụba Jisus maa mapa bụtụ na baa shɛ. Ama bi eri shi ba kwụba bụ, iwɛnɛ tu baa shɛ ikezhere, atwa ofwugwo ta kaa namɛ.

⁴Ibɛ po bee gezhiji geri bu umbe, bee munji ụ'wụ'wụ udurumi iwɛ maa kwụba bụ, iwɛnɛ ti ge Jisus zhɛ ba kashɛka nu uhwaŋna ata.

⁵Aka na ti ge Jisus ci apata, baa mbiyanɛ azuba baa kwụbɛ bụ, bɛɛ hiɛŋ bụ, A-Zakios, kezhe kakayɛ. N zhɛ ma gɛga hwayɛ ga ni ihwɛ bu tilɛɛ.

⁶Ga Zakios kezhe ga kakayɛ, bee le Jisus nu unyasa.

⁷Aka na ta atwamwa kwụbɛ iŋ, ee kwuni tungwulongongo kpaaŋ aba, ɛɛ hiɛŋ, Ge Jisus hwulwo maa sha bugaiŋ ba bụtụ-bi-iwɛwɛ.

⁸Ama ga Zakios shikeni apata, bɛɛ hiɛŋ Agwangwama, Iyɛri, N zhɛ ma pana okofwo ashashɛ i'wɛŋnɛ mi. Yaa shɛ kaa Ngee leshiji la iyi elele no olugwo bụtụ be elele no tuhwulo, N zhɛ ma tụpanana bụ kpalụ neshi ya.

⁹Ge Jisus hiɛŋ bụ, Ubino teni hwayɛ ga ni ihwɛ gɛ iwɛnɛ abɛ shɛ du yɛu Abraham.

¹⁰Iwɛnɛ ti Yɛu Bụtụ zhajɛ maa jalakaka, maa bicingo du atwa na 'inɛ. (Mat 18:11.)

¹¹Aka na ta atwa ata hwụjɛ iwɛ ɛtɛ, ge Jisus keeni aŋ n-ndumwa tumanganganɛ iwɛnɛ tu boo gwumwonu nu Jɛrusalɛm, keeni iwɛnɛ te e heŋshi du maa gunu ata ibɛ Cɛnjɛ-ta-tugwama ta Agwatana ti zhɛ ta banɛ.

¹²Ge Jisus hiɛŋ aŋ, Uzhɛgba wa agwuma uko zhe na cɛnjɛ tu ko tu dụlụmɛ maa lɛshijɛ ụhwada tugwama tiya maa gwure.

¹³Baa suyanɛ miaụŋ-mu-ugondu ubwa umpwa, bee peni aŋ ukwuribi[53] bɛɛ hiɛŋ aŋ, Na nda ma tihinya uuwa i ci aka na Ngɛɛ zhɛ me gwure.

¹⁴Ama atwa cɛnjɛ tu bwa a na to bu ni i'ime tumwanɛ eseci-i'ɛlɛ maa a 'wa bụ, ɛɛ hiɛŋ, Ti jeri shi maa bụtụ ga shɛ agwuma tu o.

¹⁵Aka na ti bɛɛ lɛshijɛ cɛnjɛ ta ata, bee gwure, baa tumwanɛ maa ga suyananɛ bu miaụŋ-mu-ugondu mu na bee peni la ukwuribi, maa kwụba gana na ta bụtụ bụtụ teni na tihinya tu bwa.

¹⁶Bụtụ bi hiiŋ zhajɛ, bɛɛ hiɛŋ bụ, Iyɛri, ukwuribi ata ebu m peni la, N teni du kpalụ umpwa.

¹⁷Bɛɛ hiɛŋ bụ, Okwu nu ugondu, bɛ shɛ yɛu-ugondu ibiye. Bu meme mbiseni maa bɛ shɛ yɛu-ugondu tɛcara ni iyi ticwɛŋ. 'Yaga ụhwada ashɛpwụ umpwa du.

¹⁸Bu na bi yebi zhajɛ du, bɛɛ hiɛŋ bụ, Iyɛri, ukwuribi ata ebu m peni la, N teni du kpalụ ta.

¹⁹Bɛɛ hiɛŋ bụ, 'Yaga du ụhwada ashɛpwụ a ta.

²⁰Bụtụ bu tatụ zhajɛ, bɛɛ hiɛŋ bụ, Iyɛri, ukwuribi bu na Ngee kwungwuri la no tugwuno Ngaa intanɛ.

²¹Iwɛnɛ tu Ngaa njɛ inyɛsɛ bu, iwɛnɛ ta abɛ shɛ bụtụ na hweteni. Inɛɛ nɛ ebi shiri shi, ibɛ aba shapa, ofwo na kaa abu bɛrɛ shɛ apata obo gwubo.

²²Ibɛ po agwuma-ihwɛ ibwɛ jishijɛ bụ, bɛɛ hiɛŋ, Gabụ yɛu-ugondu iwɛ, nu n-ndumwa mu unu bu Ngɛɛ zhɛ ma duma ụshɛrɛya bụ. Bi ge mepi hŋ maa Ma shapa inɛɛ nɛ Ngee shiri shi, maa Mo gwubo kaa inɛɛ nɛ Ngaa bɛrɛ shɛ?

²³Iwembe po ebu zweni shi ukwuribi mu nu umwono-ukwuribi, maa aka na Ngee gwure, maa ma lashɛga uŋ keeni titeni tu bwaa?

²⁴Bɛɛ hiɛŋ atwa na shikekeni apata, Lashɛga ma ukwuribi ata ni i'ɛlɛ ibwɛ, maa hi peni bụtụ ata ge teni kpalụ umpwa.

²⁵Atwa ata hiɛŋ bụ, Iyɛri, bi 'yagawa kaa kpalụ umpwaa.

²⁶Bɛɛ jishijɛ aŋ, bɛɛ hiɛŋ, Mo hi mbiso maa, bụtụ na 'yajɛ iyi, ubwa ɛɛ zhɛ a kaana, ama bụtụ na zasa iyi, okwo inɛɛ nɛ baa ga 'yajɛ, ɛ zhɛ a lashɛga iŋ ni i'ɛlɛ ibwɛ.

²⁷Ama iwɛ atwa i'ime mi, a na jeri shi la maa ma sha agwuma aba, suje aŋ ma epe, maa hiɛ kwụnɛ aŋ ne eshe mi.

²⁸Aka na ti ge Jisus jɛmɛ inɛ gɛ, bee hwuleni aŋ umbe ti bɛɛ zhɛ umungwo Jɛrusalɛm.

²⁹Aka na tu boo gwumwonu ni Bɛtifagi keeni Bɛtani, na namɛ ni Ishɛmɛ Buta. Baa tumwanɛ eseshi-iyi ubwa eyebi utumwa.

³⁰Bɛɛ hiɛŋ eseshi-iyi ata ubwa, Zhaga ma nu ụshɛpwụ ga namɛ geri-be-eshe hiŋ, gunu na ohio tono uŋ, hi zhɛ hia kwụba biywoywo bi izhinyɛci bu ko na ee umpi, na bụtụ be elele ta sụcɛ shɛ kwukwuŋ. Tufwurinje bu ma, hi zhajɛ nu bwa.

³¹Yaa shɛ bụtụ be elele ihi heŋteni hwayɛ, bɛɛ hiɛŋ, Iwembe po ohio tufwurungo buu? Hiɛŋ bu ma, Agwangwama[54] ubwa 'yajɛ uhwugwa nu bwa.

³²Nazhɛ atwa ata baa tumwanɛ sanɛ ga, aa kwụbɛ gana na ti bee ge mbishi aŋ.

³³Gana na to o tufwurungo biywoywo ata bi izhinyɛci, shɛgwuma shɛ bwa shi hiɛŋ aŋ, Iwembe po ohio tufwurungo biywoywo bi izhinyɛci ɛtɛɛ?

³⁴Ɛɛ jishijɛ aŋ, ɛɛ hiɛŋ, Agwangwama ubwa 'yajɛ uhwugwa nu bwa.

³⁵Nazhɛ aa shapɛ biywoywo ata bi izhinyɛci, ee petengeni otogwo aba na aba izhinyɛci ɛtɛ, nazhɛ ee peteni Jisus na aba ubwa.

³⁶Tu baa suka bụ bɛɛ zhɛ, ee beri otogwo aba nu uhwaŋna.

³⁷Aka na tu boo gwumwonu Ishɛmɛ ɛtɛ Buta tuzwo hwɛɛ, eseshi-iyi ofwugwo kwuni unyasa tɛnda kpaaŋ, aa shɛtana Agwatana na rụhwụŋ rụ 'wụtụ, iwɛ ugondu wa arụhwajɛ ụ'wụtụ elele na aa kwụbwa.

³⁸Ɛɛ hiɛŋ, Zhemonjino ma Agwuma ata e ci ni izeci ya Agwangwama! Ga amɛ-olom nama na azuba ga Agwatana 'yaga ụjɛrụma ụ'wụtụ 'wụtụ.

³⁹Afarisi oko a na namɛ na ashashɛ ufwugwo ata hiɛŋ bụ, E-Bimbisegeni, tazhɛgana eseshi-iyi bu maa a nama saiiŋ.

⁴⁰Ge Jisus jishijɛ aŋ, bɛɛ hiɛŋ, Mo hi mbiso maa, yaa shɛ atwa ga namɛ hwayɛ saiiŋ, asha atayɛ ga zhɛ a ugana.

⁴¹Aka na ti ge Jisus bo gwumwonu nu ụshɛpwụ ata, baa kwụbɛ uŋ, baa twanɛ uŋ u'wo, bɛɛ hiɛŋ,

⁴²Yaa shɛ ehi go mopwo hwayɛ ga ni ikɛnyi hiŋ iyi nɛ shɛ amɛ-olom! Ama ihi swakanɛ hwuwayɛ go iwɛ maa kede hiɛ kwụbɛ iŋ ne eshe hiŋ o.

⁴³Aka e ci ba, ta atwa i'ime hiŋ zhɛ ma hi ma ni i'wɛŋnɛ ujasa, ɛ zhɛ ma hi kapa o rungwutwonu geri elele.

⁴⁴Ɛ zhɛ mo hi iricingo hwɛɛ, ta atwa elele na zweni na amɛ na amɛ uba hiŋ. A zha shɛ a ganga utayɛ okwo uko maa u patana na azuba unya o, iwɛnɛ te hi mepi shi aka na Agwatana mo hi bicingo.

⁴⁵Nazhɛ ge Jisus teni nu Umwono wa Agwatana, bee kwuni atwa na a sanga iyi, na atwa na a sa iyi apata tu'unzo, bɛɛ hiɛŋ aŋ,

⁴⁶E 'nywotwo ɛɛ hiɛŋ, Umwono mu zhɛ wa sha umwono wa adua; ama hia nda uŋ tuba ụpangwụ wa ashɛrɛ.

⁴⁷Iyi-heri iyi-heri ge Jisus bo mbisogono atwa iyi nu Umwono wa Agwatana; ama ehiu onongbo, ne embesegeni Undwa, a jalakaka maa ge ehwurembe aba mbiyeni aŋ maa a kwụnɛ bụ.

⁴⁸Ama a kwụbɛ shɛ kaa iyi nɛ shɛ maa a njɛ bụ, iwɛnɛ ta atwa ata kpaaŋ a shɛlaga iwɛ ubwa tebiye.