Read bassa UNDWA TUKWABILANA 1 Bible Online

UNDWA TUKWABILANA 1 - bassa bible

UNDWA TUKWABILANA 1

¹N-ndumwa mu ga muba go Moses dumanjɛ na atwa Isrɛl kpaaŋ, nụ ụshɛka, hileniye Urefu Jodan, na Araba, to dongonu Suf, na ashashɛ Paran nu Tofɛ, nu Laban, nu Hazerot, keeni Dizahab.

²(Te e beni nu Horɛb, nu uhwaŋna Ishɛmɛ Sei i ci Kadɛsh-bania, tɛ shɛ tahaŋnụ ti ijitɛ umpwa-nu-boo-ko).

³Na amɛ uywa buhanda, nụ ụjita uhiiŋ, nu upiana umpwa-nu-boo-ko, nazhɛ go Moses mbishi atwa Isrɛl n-ndumwa mu na AGWANGWAMA peni bu unu muba kpaaŋ.

⁴Na aba na tu baa lasụ Sihon Agwuma A'amo, na namɛ ni Hɛshbon keeni Og agwuma Bashan, na namɛ na Ashtarot, keeni Ɛdrɛi.

⁵Go Moses kwuni aŋ andwa ga ti'eshicigono hileniye Jodan, na cɛnjɛ tu Moab, bɛɛ hiɛŋ,

⁶AGWANGWAMA na shɛ Agwatana tu, bi ti mbishi nu Horɛb, bɛɛ hiɛŋ, Gana na ahiɛ jɛjɛ ni ishɛmɛ gɛ ilegeji, u gwumwa ya;

⁷yinjɛ ma maa hi kwuni tahaŋnụ ti hiŋ, maa hi zhe na cɛnjɛ ti ishɛmɛ ya A'amo, keeni no ofwo anya aba elele a na shɛ atwa Araba, na cɛnjɛ ti ishɛmɛ keeni cɛnjɛ tu ulomu, keeni cɛnjɛ tụ ụzalụ tuta, keeni cɛnjɛ tụ ụpalanụ itekwu, na cɛnjɛ te Ekenan keeni Lebanon, tutu Urefu ata ụ'wụtụ na shɛ Yufretis.

⁸Hioko ma, N hi shileni cɛnjɛ ta ata nu umbe hiŋ; zhaga tono ma maa hi leshiji cɛnjɛ ta ata Ngee shileni la eshi hiŋ, ga Abraham, na Azik, keeni Jekob unu maa N zhɛ ma pana aŋ, keeni ajalalo aba.

⁹Go Moses mbishi atwa ata, bɛɛ hiɛŋ, N hi mbishi la taa na aka na atu namɛ ni Ishɛmɛ Sainai, maa, N eri shi ma hi 'yagaga Ngooko.

¹⁰AGWANGWAMA na shɛ Agwatana hiŋ kaa ihi keeni ugombo, hwuwayɛ go ufwugwo hiŋ ụ shɛ ya gana mkpasu.

¹¹Ga AGWANGWAMA na shɛ Agwatana ogwunukwoshi hiŋ ɛhiɛ njɛ atwa igbɛɛ kpalụ gembi ufwugwo uhwuri gana na ahiɛ namɛ la, maa ma hi pana uwebiye, nu gana na bee hi shileni la unu!

¹²Gana naa Ngee eri ma 'waŋna i'wɛŋnɛ udumanga hiŋ na zhinengeni hwɛɛ Ngookoo?

¹³Tala ma etwenyi a na incɛ, a na kaa eshiciji iyi, a na 'yajɛ shɛhaŋsa tuto, na alamụ hiŋ, maa Mo hi shikicingono aŋ maa a shɛ ehiu hiŋ.

¹⁴Ɛhi n jishijɛ, ɛhi hiɛŋ, Iyi nɛ ebi ti mbishi, iti zhɛmanɛ maa ta nda.

¹⁵Ngee suje ga ehiu, na alamụ hiŋ, a na incɛ keeni anaa na 'yajɛ shɛhaŋsa tuto, Ngee shikicinji aŋ maa a shɛ a'yagajɛ atwa akpakwụ-a-ta a-ta, (1,000) na a'yagajɛ atwa dipi-yebi yebi, (100) na a'yagajɛ atwa dupu dupu, (50) na a'yagajɛ atwa umpwa umpwa, (10) medenji atwa shihwolu, tutu rungwutwonu alamụ hiŋ kpaaŋ.

¹⁶Nazhɛ Ngaa tɛtaganɛ ajɛmɛ-ụshɛrɛya hiŋ unu, Ngɛɛ hiɛŋ, Na hwuga ma iwɛ nɛ namɛ na ashashɛ miaụŋ-mo-bino hiŋ, maa hi na duma ụshɛrɛya u tishiriri na ashashɛ bụtụ ni yɛu-bino bwa, kwo kaa na bulashɛ na namɛ pu bwa.

¹⁷Hiɛ shɛ shɛ hia 'yaga atwa tuzanga nụ ụshɛrɛya tụdụma o; hiɛ shɛ hi na shɛlagana okofwo keeni azhɛgba ta nangwụ. Hiɛ shɛ shɛ hia nda inyɛsɛ ye eshe bụtụ be elele o, Agwatana ubwa 'yajɛ ụshɛrɛya ga. Iwɛ elele nɛ ihi hwuleji, nazhɛ shapɛ iŋ ma pi mi, maa ma hwuga iŋ.

¹⁸Ngee hi peni sasana unu iyi elele nɛ ahiɛ shɛ hi na nda na aka ata.

¹⁹Nazhɛ eti beni nu Horɛb, eti duleji ụshɛka ata ụ'wụtụ 'wụtụ, na kaa wa sha bụtụ inyɛsɛ, na kaa ahiɛ kwụbɛ kpaaŋ, nu uhwaŋna ata zhɛ na cɛnjɛ tu nshama ta A'amo, nu gana na ta AGWANGWAMA na shɛ Agwatana tu iti peni la unu; eti ci Kadɛsh-bania.

²⁰Ngɛɛ hi hiɛŋ, Hi ci ya cɛnjɛ tu nshama ta A'amo, tu na AGWANGWAMA na shɛ Agwatana tu iti peni.

²¹AGWANGWAMA na shɛ Agwatana hiŋ kaa ihi shilwonuo cɛnjɛ ta ata nu umbe hiŋ; zhaga mungo ma maa hi leshiji tu, nu gana na ta AGWANGWAMA na shɛ Agwatana eshi hiŋ, ihi mbishi. Ta nda ma ya inyɛsɛ o, kede shihwulu shi hi horukono.

²²Nazhɛ ahiɛ zhajɛ pi mi hwɛɛ hiŋ, ɛhi hiɛŋ, Tu tumwanɛ ma etwenyi oko nu umbe tu, iwɛ maa a ti yalaganɛ cɛnjɛ ta ata, maa e ti gwuricingeni ajɛshɛgwa sasana iwɛ uhwaŋna na ụ shɛ tilɛɛ maa to mungo apata keeni ashɛpwụ na ɛti zhɛ to to hiiŋ.

²³Iwɛ ɛtɛ kaa i shɛ maa i n zhɛmanɛ, ibɛ po Ngee suji etwenyi umpwa-na-ba-eyebi, bụtụ bu ko nụ ụlamụ we elele.

²⁴Nazhɛ ee hwuri, ee munji na cɛnjɛ tu nshama, ee ci Ulomu Eshkol, ee yeleji tu.

²⁵Ee cwe du umeseyi tụ'walụ tɛ cɛnjɛ ta ata aa 'waŋnɛ tụ, ee zwe pu tu, aa tu 'waŋnanɛ kaa sasana unabarɛ tuba, ɛɛ hiɛŋ, Cɛnjɛ ta ata AGWANGWAMA na shɛ Agwatana tu iti peni tɛ zhɛmɛ.

²⁶Okwo ti yaa shɛ gana ata, hi munji shi maa hi teni cɛnjɛ ta ata o, ama hi to tigezhe nu unu na AGWANGWAMA na shɛ Agwatana hiŋ ihi peni.

²⁷Ibɛ po ehi ngwulengenji no shidulo shi hiŋ, ɛhi hiɛŋ, Iwɛnɛ ta AGWANGWAMA iti imi, ibɛ po bɛɛ ti bɛcinjɛ na cɛnjɛ ti Ijipti, maa mo tu zwono ni i'ɛlɛ ya A'amo, maa e ti iricinji.

²⁸Ce ɛti zhɛ to mungo ta zhaa? Miaụŋ-mo-bino tu mu na atu tumwanɛ, mu tu bweji shihwulu, ɛɛ hiɛŋ, Atwa ata gembenji, aa njɛsanjɛ kaa ee tu hwuri. Ashɛpwụ aba kaa 'yagajɛ ukpahiŋ, uba wa aba kaa njɛshɛ wee timengeni tụla. Shɛ inɛ ɛtɛ kiri o, tụ kwụbɛ kaa du miaụŋ-me-eyi mu Anak apata.

²⁹Nazhɛ Ngɛɛ hi hiɛŋ, Ta sụma ma atwa ata inyɛsɛ o, kede uriri wa aba ụ hiɛ 'imɛ o.

³⁰AGWANGWAMA na shɛ Agwatana hiŋ zhɛ ma hi 'yagaga maa ma hiɛ twagwụ ifelu ni ikɛnyi ibwɛ, gana na baa hiɛ ndanɛ la na cɛnjɛ ti Ijipti gbaa ne eshe hiŋ,

³¹keeni nụ ụshɛka, no ofwo ata ahiɛ kwụbɛ la ta AGWANGWAMA hiŋ ihi 'waŋnɛ, gana na ta bụtụ ba 'waŋna yɛu ibwɛ, nu uhwaŋna we elele na ehi duleji tutu ehi ci epe.

³²Okwo ti yaa shɛ gana ata, hiɛ tɛtanɛ shɛ n-ndumwa ma AGWANGWAMA na shɛ Agwatana hiŋ rishe o.

³³Ubwa kaa ihi hwuleni umbe nu uhwaŋna ata maa ma hi dwalakakana ofwo na maa hi jwe ugba hiŋ, maa mo hi mbisono uhwaŋna na maa hi duri tedure nu ulwa u tuwam nụ ụjita, nu udomu u tuwam na aka bu uwaŋna.

³⁴Ibɛ po AGWANGWAMA hwụjɛ n-ndumwa mi hiŋ, baa njɛ isɛbwɛ, bee keri-unu, bɛɛ hiɛŋ,

³⁵I zasa bụtụ okwo bu ko na ashashɛ usara ga ụwɛ zhɛ ba kwụba cɛnjɛ ta ata ti biye Ngee shileni la eshi hiŋ unu maa N zhɛ ma pana aŋ o,

³⁶semi ga Kalɛb yɛu-ye-eyi Jifune kiri zhɛ bo tono tu. N zhɛ ma pana bụ cɛnjɛ ta ata baa fwụndacɛ, ta miaụŋ mu bwa, iwɛnɛ tu baa n 'wa na amɛ oko kpaaŋ.

³⁷AGWANGWAMA du kaa njɛ isɛbwɛ ne mi iwe hiŋ, bɛɛ n hiɛŋ, Bi zha shɛ bo tono cɛnjɛ ta ata o.

³⁸Hiɛcɛnga ma Joshua yɛu-ye-eyi Nụn, na shɛ umadanga bụ[1] u'waba, ubwa zhɛ ba nda maa atwa Isrɛl leshiji cɛnjɛ ta ata.

³⁹Shɛ inɛ ɛtɛ kiri o, miaụŋ mi hiŋ mu na mu ta gwumwatangwụ, mu naa na ɛhi hiɛŋ ujasa zhɛ wa ya, miaụŋ ma ata mi hiŋ mi te mepi shi iyi ibiye keeni iyi iwɛ hwayɛ ga, muba kaa mi zhɛ ma zha apata. Aba kaa Ngɛɛ zhɛ ma pana tụ, aba kaa zhɛ a 'yaga tụ.

⁴⁰Ama inee hiŋ shɛ, jɛshɛrɛga ma, maa hi zhe tahaŋnụ ti hiŋ nụ ụshɛka maa hi hwuri geri bi Itekwu Ishenje.[2]

⁴¹Nazhɛ ɛhi n jishijɛ ɛhi hiɛŋ, Tɛ njɛ AGWANGWAMA iwɛwɛ; ti zhɛ to mungo maa ta twa ifelu nu gana na ta AGWANGWAMA na shɛ Agwatana tu iti peni-unu gbaa. Ibɛ po bụtụ bụtụ hiŋ umpi i'wɛŋnɛ ibwɛ ujasa, ehi heŋshi maa i zasa iwɛ maa hi munji na cɛnjɛ ta ata tu nshama o.

⁴²Ibɛ po AGWANGWAMA n hiɛŋ, Mbiso aŋ maa, To mungo ma maa hi twa ifelu o, iwɛnɛ tu Ngaa zasaba na ashashɛ hiŋ; atwa i'ime hiŋ zhɛ ma hi lasụ.

⁴³Ama okwo ti Ngee hi mbishi gana ata, hiɛ hwụjɛ shɛ waa kaa iwɛ o, ahiɛ njɛ tigezhe nu unu-tupana wa AGWANGWAMA, ehi munji ne tukwurimi, ehi zhe na cɛnjɛ tu nshama.

⁴⁴Nazhɛ A'amo a na jɛjɛ na cɛnjɛ ta ata tu nshama banɛ gana iswɛ nɛ yo unzo bụtụ, aa hiɛ sukakanɛ, ee hi unzhe, ee hi jibi ni Sei tutu i ci Homa.

⁴⁵Ibɛ po ehi gwure, ahiɛ cwɛ-u'wo na agba AGWANGWAMA; ama bụ hwụjɛ shɛ kaa u'wo hiŋ, bi shiri shi kaa okwo ụcɛbɛ pi hiŋ o.

⁴⁶Ibɛ po ahiɛ jɛjɛ ni Kadɛsh ijitɛ ifwugwo, ibɛ shɛ ijitɛ ye elele nɛ ahiɛ namɛ apata.